“Oktoba 4–10. Katak im Bujen Ko 77–80: ‘Inaaj Karōk Aolep Men Otemjeļo̧k n̄an Em̧m̧an eo Ami,’” Itok, Ļoor Eō—N̄an Jabōt Jikuuļ: Katak im Bujen Ko 2021 (2020)
“Oktoba 4–10. Katak im Bujen Ko 111–114,” Itok, Ļōōr Eō—N̄an Jabōt Jikuuļ: 2021
Oktoba 4–10
Katak im Bujen Ko 111–114
“Inaaj Karōk Aolep Men Otemjeļo̧k n̄an Em̧m̧an eo Ami”
Ilo am̧ riiti Katak im Bujen Ko 111–14, ļōmņak kōn m̧ool ko ilo jetōb me Irooj ej kōņaan bwe ro uwaan kūlaaj eo ren meļeļe. Jetōb Kwojarjar eo enaaj jipan̄ tōl kom̧ n̄an jeļā ta pedped in katak ko n̄an kalimjōki.
Je En̄jake ko Rej Im̧we Eok
Kajjitōk bwe ren Kwaļo̧k
Ļōmņak in jin̄aik juon tōptōp in menin aorōk ioon boot eo. Ro uwaan kūlaaj eo remaron̄ je ioon boot eo eoon ko jān jekjōn 111–14 ijo raar lo juon men rej watōke “eļap mennin aorōk” (Katak im Bujen Ko 111:2). Kajjitōk ippān jejjo uwaan kūlaaj eo n̄an kwalo̧k ta eo raar loe eaorōk ilo eoon ko.
Katakin Katak eo
Irooj emaron̄ “karōk aolep men otemjeļo̧k n̄an em̧m̧an eo [ad].”
-
Kapilōk eo an Irooj ilo Katak im Bujen Ko 111 emaron̄ jipan̄ ro uwaan kūlaaj eo am̧ n̄e rej inepata kōn n̄ūrbōktak ko an kanniōk ak jetōb, āinwōt an kar jipan̄ Josep Smith kōn n̄ūrbōktak ko an kōn Zaion. Kwomaron̄ jino iien ekōnono eo kōn jekjōn in ilo am̧ kajjitōk ippān ro uwaan kūlaaj eo n̄an kōllaajrake ioon boot eo men ko me er ak armej ro rejeļā kajjier rej inepata kake. Innām, kōn n̄ūrbōktak ko ilo kōļmenļo̧kjeņ, remaron̄ etale jekjōn 111 kōn kapilōk im kaenōm̧m̧an eo Irooj ej letok n̄an jipan̄ kōj. Ro uwaan kūlaaj eo remaron̄ kwaļo̧k ekōjkan an Rilo̧mo̧o̧r kar jipan̄ er n̄e rej likūt tōmak eo aer ilo E.
-
Ro uwaan kūlaaj eo am̧ emaron̄ kar wōr aer en̄jake ko āinwōt ko an Josep—ke raar en̄jake an Irooj bōk er jekdo̧o̧n “nouwe ko” aer (Katak im Bujen Ko 111:1). Ekōjkan an en̄jake ko aer waanjon̄ak kōn m̧ool ko kar katakin ilo Katak im Bujen Ko 111? N̄an waanjon̄ak, ke jaar en̄jake an Irooj “[kar] karōk aolep men otemjeļo̧k n̄an em̧m̧an eo [aer]”? (eoon 11). Ta eo en̄jake kein rej katakin kōj kōn Rilo̧mo̧o̧r im kōn er make?
Katak im Bujen Ko 112:3–15, 22
Irooj enaaj tōl ro me rej kappukot Ankilan ilo ettā.
-
N̄an jipan̄ ro uwaan kūlaaj eo ekōnono kōn ta eo jekjōn 112 ej katakin kōn ettā, ļōmņak in kōjeno̧lok kūlaaj eo n̄an jilu kurup ko. Leļo̧k n̄an kajjojo kurup juon iaan kajjitōk ko n̄an ļōmņak kaki ilo aer etale eoon 3–15 im 22: Ta in ettā? Ekōjkan ad maron̄ erom̧ em̧m̧anļo̧k? Ta kōjeraam̧m̧an ko kar kallim̧ur kaki n̄an eo ettā? Leļo̧k n̄an kūlaaj eo iien n̄an aer kwaļo̧k uwaak ko aer. Kurup ko remaron̄ bōk eļapļo̧k meļeļe ko ilo aer riiti ennaan eo an Elder Quentin L. Cook’ ilo “Kein Jipan̄ ko Jet” ak jekjōn eo taitōl in “Humility” ilo Preach My Gospel (peij 126–27). Etke ettā eaorōk n̄an kōm̧m̧ane jerbal eo an Irooj?
Eļan̄n̄e jej ettā, Irooj enaaj tōl kōj im uwaaki jar ko ad.
Ro me rej m̧ool in rioktak rej itok n̄an jeļā Jisōs Kraist.
-
M̧ool eo in bwe jet Rijilōk ilo 1837 eo, raar oktak im jum̧ae Rikanaan ej juon kakeememej em̧m̧an bwe mekarta kūr eo ad ak ewi jon̄an ad jeļā kōn gospel eo, kōj kajjojo jej aikuj lale bwe jej m̧ool in rioktak. Riiti kapilōk eo an Irooj kar leļo̧k n̄an Thomas B. Marsh n̄an jipan̄ e kakobaik Doulul eo an Jon̄oulruo eo emaron̄ leļo̧k meļeļe n̄an kūlaaj eo am̧ kōn ta meļeļein oktak. Bōlen ro uwaan kūlaaj eo remaron̄ riiti Katak im Bujen Ko 112:12–26 ippān juon uwaan baam̧le ak m̧ōttam̧ me kwoj ļōmņak—jet ro me bolen rej kakkōt kōn tōmak eo a Ta m̧ool ko ilo eoon kein ro uwaan kūlaaj eo naaj kar kōmejajaik n̄an jipan̄ armej lukkun m̧oolin oktak? Leļo̧k n̄an ro uwaan kūlaaj eo iien n̄an kejekļo̧kjeņ kōn ta eo remaron̄ kōm̧m̧ane n̄an kōkajoorļo̧k oktak eo aer make n̄an Irooj.
Kein Jipan̄ ko Jet
Jinōkjeej in ettā āinwōt an Kraist
Elder Quentin L. Cook ekar katakin:
“Burom̧ōj eo, ilo raan kein ad ilo enan̄in aolep jekjek ko an jukjukin pād, jej lo an armej kwaļo̧k aer aorōk im an ļap aer utiej bōro ak ettā im bōk eddo n̄an Anij rej dikļo̧k. Enan̄in aolep jukjukin pād rejjab jeļā kōn m̧ool ko raorōk im rejjab meļeļe etke jej mour ioon laļ in. M̧ool in ettā bōro, eo emenin aikuj n̄an tōpar kōttōpar eo an Irooj n̄an kōj, ejeja an waļo̧k.
“Elukkuun aorōk n̄an meļeļe jon̄an an ļap ettā bōro eo an Kraist, wāppen eo An, m̧wil eo An, im jeļāļo̧kjeņ eo An, āinwōt an jeje ko rekwojarjar kwaļo̧k. Ej menin bwebwe n̄an pere menin aorōk n̄an wōnm̧aanļo̧k wōt im kajjieon̄ mour kōn piktok im m̧wil ko āinwōt an Kraist ilo jekjek ko kajjojo raan, eļaptata ettā. …
“Ilo Juļae 23, 1837, Rikanaan Josep ekar kweilo̧k ippān Elder Thomas B. Marsh, Būreejtōn eo an Doulul eo an Jon̄oulruo ro. Elder Marsh ekar rub būruwōn bwe Rikanaan eo ekar kūr ruo membōr in doulul eo an n̄an etal n̄an England ilo an jab kepaake e. Ke Josep ekar kweilo̧k ippān Elder Marsh, jabdewōt en̄jake ko rekemettak kar likūt itulik, im Rikanaan eo ekar bōk juon revelesōn ekabwūlōn̄lōn̄. Ej pād kiiō ilo 112th jekjōn in Katak im Bujen Ko. Ej letok tōl eo ekabwūlōn̄lōn̄ jān lan̄ ilo kautiej n̄an ettā bōro im jerbal in mijenede.. Eoon 10 ej riit, ‘Kwōn kōttāik eok; im Irooj am Anij enaaj tōl eok kōn peim, im lewōj n̄an eok uwaak n̄an jar ko am’ [Katak im Bujen Ko 112:10; kar kobaiktok eoon in eaorōk” (“Men ko an Indeeo rej Waļo̧k Aolep Raan,” Ensign ak Liaona, Nob. 2017, 51–52).
Kōkōm̧anm̧anļo̧k Ad Katakin
Pedped ioon armej. “Wāween am̧ kōm̧man n̄an armej ej āinwōt an aorōk ilo am̧ katakin er. Jet iien jerbal ko ad m̧okta kōn kwaļo̧ke juon katak emaron̄ bōbraeik kōj jān ad kwaļo̧k ad iakwe n̄an ro jej katakin. … Ļōmņak kōn ewi wāween am̧ maron̄ pedped wōt ioon ta eo elukkuun aorōk” (Teaching in the Savior’s Way, 6).