« ថ្ងៃទី ១៩–២៥ ខែ មេសា ។ គោលលទ្ធិ និង សេចក្ដីសញ្ញា ៤១–៤៤ ៖ ‹ ក្រឹត្យវិន័យរបស់យើងដើម្បីត្រួតត្រាសាសនាចក្ររបស់យើង › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ២០២១ ( ២០២០ )
« ថ្ងៃទី ១៩–២៥ ខែ មេសា ។ គោលលទ្ធិ និង សេចក្ដីសញ្ញា ៤១–៤៤ » ចូរមកតាមខ្ញុំ—សម្រាប់សាលាថ្ងៃអាទិត្យ
ថ្ងៃទី ១៩–២៥ ខែ មេសា
គោលលទ្ធិ និង សេចក្ដីសញ្ញា ៤១–៤៤
« ក្រឹត្យវិន័យរបស់យើងដើម្បីត្រួតត្រាសាសនាចក្ររបស់យើង »
អ្នកនឹងពុំអាចធ្វើការពិភាក្សាទំាងអស់គ្រប់គោលការណ៍ដែលបានបង្រៀននៅក្នុង គោលលទ្ធិ និង សេចក្ដីសញ្ញា ៤១–៤៤ ឡើយ ។ សូមស្វែងរកការបំផុសគំនិតដើម្បីជួយអ្នកជ្រើសយកគោលការណ៍ដែលនឹងសំខាន់បំផុតចំពោះសិស្សរបស់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
នៅពេលវិវរណៈនៅក្នុង កណ្ឌទី ៤២ ត្រូវបានបោះពុម្ព យ៉ូសែប ស៊្មីធ បានសរសេរថា ពួកបរិសុទ្ធ « បានទទួលយ៉ាងត្រេកអរ » ( « Letter to Martin Harris » ថ្ងៃទី ២២ ខែកុម្ពៈ ឆ្នាំ១៨៣១, josephsmithpapers.org ) ។ សូមលើកចិត្តសិស្សឲ្យចែកចាយអ្វីៗមកពីការសិក្សាផ្ទាល់ខ្លួន ឬជាមួយគ្រួសារនៅសប្ដាហ៍នេះ ដែលពួកគេបានទទួលដោយត្រេកអរ ។
បង្រៀនគោលលទ្ធិ
គោលលទ្ធិ និង សេចក្ដីសញ្ញា ៤១–៤២
ក្រឹត្យវិន័យរបស់ព្រះត្រួតត្រាសាសនាចក្ររបស់ទ្រង់ ហើយអាចត្រួតត្រាជីវិតរបស់យើង ។
-
នៅក្នុង គោលលទ្ធិ និង សេចក្តីសញ្ញា ៤១ ព្រះអម្ចាស់បានជួយពួកបរិសុទ្ធរៀបចំខ្លួនទទួលក្រឹត្យវិន័យរបស់ទ្រង់ ដែលទ្រង់នឹងបើកសម្ដែងពីរបីថ្ងៃក្រោយមក ( សូមមើល កណ្ឌទី ៤២ ) ។ តើវិវរណៈនៅក្នុង កណ្ឌទី ៤១ អាចជួយពួកបរិសុទ្ធឲ្យទទួលយកក្រឹត្យវិន័យរបស់ព្រះតាមរបៀបណា ? ដើម្បីជួយសិស្សឲ្យឆ្លើយចំពោះសំណួរនេះ អ្នកអាចអញ្ជើញពួកគេឲ្យអាន គោលលទ្ធិ និង សេចក្តីសញ្ញា ៤១:១-៦ ហើយស្វែងរកគោលការណ៍ដែលអាចជួយយើងឲ្យទទួលយកក្រឹត្យវិន័យរបស់ព្រះ ។ តើយើងអាចអនុវត្តគោលការណ៍ទាំងនេះតាមរបៀបណា នៅពេលយើងមានឱកាសទទួលយកសេចក្ដីណែនាំមកពីព្រះអម្ចាស់ ?
-
គម្រោងមេរៀនសម្រាប់សប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ណែនាំឲ្យបែងចែក កណ្ឌទី ៤២ ទៅជាខគម្ពីរប្រាំក្រុម ដែលក្រុមនីមួយៗបង្ហាញនូវគោលការណ៍ដ៏សំខាន់មួយនៃដំណឹងល្អ ។ ការបែងចែកជាក្រុមនេះអាចផ្ដល់ភាពងាយស្រួលដល់អ្នកដើម្បីពិភាក្សាពីកណ្ឌនេះជាមួយនឹងសិស្ស ។ ឧទាហរណ៍ អ្នកអាចសរសេរសេចក្ដីយោងទាំងឡាយនៅលើក្ដារខៀន ហើយអញ្ជើញសិស្សម្នាក់ៗឲ្យជ្រើសយកក្រុមមួយ ។ សុំឲ្យសិស្សអានខគម្ពីររបស់ពួកគេ ហើយស្វែងរកអ្វីមួយដែលពួកគេគិតថាសំខាន់ចំពោះយើងនៅជំនាន់របស់យើង ។ បន្ទាប់មក ពួកគេអាចចែកចាយឧទាហរណ៍នៅក្នុងជីវិតរបស់ពួកគេផ្ទាល់ ដែលវាឆ្លុះបញ្ចាំងពីរបៀបដែលយើងទទួលបានពរជ័យ នៅពេលយើងគ្រប់គ្រងជីវិតរបស់យើងស្របតាមក្រឹត្យវិន័យទាំងនេះ ។
គោលលទ្ធិ និង សេចក្ដីសញ្ញា ៤១:៩–១១
ព្រះអម្ចាស់សុំពួកអ្នកបម្រើរបស់ទ្រង់ឲ្យលះបង់ ។
-
អែតវឹត ប៉ាទ្រិច ជាប៊ីស្សពដំបូងគេក្នុងសាសនាចក្រដែលស្ដារឡើងវិញនេះ ត្រូវបានបង្គាប់ឲ្យបោះបង់អាជីពរបស់លោក ហើយ « ចំណាយពេលទាំងអស់របស់លោក » បម្រើនៅក្នុងការហៅរបស់លោក ។ ទោះជាយើងពុំត្រូវបានតម្រូវឲ្យធ្វើបែបនេះក្ដី តើយើងរកឃើញអ្វីខ្លះនៅក្នុងខគម្ពីរទាំងនេះដែលអាចអនុវត្តដល់ការបម្រើរបស់យើងចំពោះព្រះ ? ( សម្រាប់ព័ត៌មានបន្ថែមអំពី អែតវឹត ប៉ាទ្រិច សូមមើល « A Bishop unto the Church » Revelations in Context ទំព័រ ៧៧-៨៣ ) ។
គោលលទ្ធិ និង សេចក្តីសញ្ញា ៤២:៦១, ៦៥-៦៨, ៤៣:១-៧
វិវរណៈនាំមកនូវសេចក្ដីសុខសាន្ត អំណរ និងជីវិតដ៏នៅអស់កល្បជានិច្ច ។
-
ដូចជាថ្នាក់ដឹកនាំពីដើមក្នុងសាសនាចក្រដែរ សិស្សរបស់អ្នកអាចនឹងមានសំណួរដែលមានលក្ខណៈជា « អាថ៌កំបាំង » ដោយសារវាតម្រូវឲ្យមានការណែនាំមកពីព្រះអម្ចាស់ ។ អ្នកអាចលើកទឹកចិត្តពួកគេឲ្យកត់ត្រាសំណួរមួយដែលពួកគេឆ្ងល់ ឬបញ្ហាមួយដែលពួកគេត្រូវការវិវរណៈផ្ទាល់ខ្លួន ។ តើយើងរកឃើញអ្វីខ្លះនៅក្នុង គោលលទ្ធិ និង សេចក្តីសញ្ញា ៤២:៦១, ៦៥-៦៨ ដែលអាចជួយយើងបាន នៅពេលស្វែងរកវិវរណៈ ?
-
ដើម្បីជួយសិស្សឲ្យយល់ពីរបៀបដែលព្រះប្រទានវិវរណៈដើម្បីដឹកនាំសាសនាចក្ររបស់ទ្រង់ អ្នកអាចអញ្ជើញពួកគេឲ្យអាន គោលលទ្ធិ និង សេចក្តីសញ្ញា ៤៣:១-៧ ។
គោលលទ្ធិ និង សេចក្ដីសញ្ញា ៤៣:៨-១០
យើងជួបជុំគ្នាដើម្បី « ណែនាំ និងស្អាងគ្នាទៅវិញទៅមក » ។
-
តើយើងអាចប្រើ គោលលទ្ធិ និង សេចក្ដីសញ្ញា ៤៣:៨-១០ ដើម្បីបង្រៀនមនុស្សម្នាក់ដែលគិតថា វាពុំមែនជាការចាំបាច់ដើម្បីមកកាន់ការប្រជុំរបស់សាសនាចក្រ ? បញ្ជីនៅក្នុង « ធនធានបន្ថែមទាំងឡាយ » អាចជួយការពិភាក្សានេះឲ្យផ្ដោតទៅលើគោលបំណងដ៏ទេវភាពនៃកូរ៉ុមបព្វជិតភាព និងសមាគមសង្គ្រោះ ( បញ្ជីនោះក៏អនុវត្តចំពោះថ្នាក់យុវនារីផងដែរ ) ។ សិស្សអាចចែកចាយពីរបៀបដែលការចូលរួមនៅក្នុងកូរ៉ុម សមាគមសង្គ្រោះ និងថ្នាក់នានាក្នុងសាសនាចក្របានផ្ដល់ពរជ័យដល់ពួកគេ ។ តើ ខ ៨-១០ បានបញ្ជាក់អ្វីខ្លះអំពីអ្វីដែលយើងគួរធ្វើដើម្បីរៀបចំខ្លួន ហើយចូលរួមនៅក្នុងការប្រជុំរបស់យើង ?
រូបភាពថ្នាក់សាលាថ្ងៃអាទិត្យសម្រាប់យុវវ័យការប្រជុំនៅព្រះវិហារគឺជាវិធីមួយដែលយើង « ណែនាំ និងស្អាងគ្នាទៅវិញទៅមក » ។
ធនធានបន្ថែមទាំងឡាយ
ហេតុផលដែលយើងត្រូវបានរៀបចំជាកូរ៉ុម និងសមាគមសង្គ្រោះ ។
ស៊ិស្ទើរ ជូលី ប៊ី ប៊េក អតីតប្រធានសមាគមសង្គ្រោះទូទៅ បានពន្យល់ពីហេតុផលដែលព្រះបានរៀបចំយើងជាកូរ៉ុមបព្វជិតភាព និងសមាគមសង្គ្រោះ ៖
-
« ដើម្បីរៀបចំយើងឲ្យនៅក្រោមបព្វជិតភាព និងតាមគន្លងនៃបព្វជិតភាព » ។
-
« ដើម្បីជួយបុត្រាបុត្រីរបស់ព្រះវរបិតាសួគ៌ឲ្យផ្ដោតទៅលើកិច្ចការនៃសេចក្ដីសង្គ្រោះ ហើយឲ្យពួកគេចូលប្រឡូកនៅក្នុងកិច្ចការនោះ ។ កូរ៉ុម និងសមាគមសង្គ្រោះគឺជាភាពជាអ្នកដឹកនាំមួយដែលបានរៀបចំឡើងដោយមានការទទួលខុសត្រូវក្នុងការជួយនៅក្នុងកិច្ចការរបស់ព្រះវរបិតារបស់យើង ដើម្បីនាំយកជីវិតដ៏នៅអស់កល្បជានិច្ចដល់បុត្រាបុត្រីរបស់ទ្រង់ » ។
-
« ដើម្បីជួយប៊ីស្សពឲ្យគ្រប់គ្រងឃ្លាំងរបស់ព្រះអម្ចាស់ដោយឈ្លាសវៃ ។ ឃ្លាំងរបស់ព្រះអម្ចាស់ រួមមាន ‹ ពេលវេលា ទេពកោសល្យ សេចក្តីមេត្តាករុណា សម្ភារ និង ចំណូលហិរញ្ញវត្ថុ › នៃសមាជិកសាសនាចក្រ [ ក្បួនខ្នាតភាគ ២ ៖ ការគ្រប់គ្រងសាសនាចក្រ, ៦.១.៣, ChurchofJesusChrist.org ] ។ ទេពកោសល្យរបស់ពួកបរិសុទ្ធគឺត្រូវបានប្រើដើម្បីជួយមើលថែដល់ជនក្រីក្រ ហើយខ្វះខាត និងដើម្បីស្ថាបនានគររបស់ព្រះអម្ចាស់ » ។
-
« ដើម្បីផ្ដល់ជាការការពារ និងទីជម្រកមួយសម្រាប់បុត្រាបុត្រីរបស់ព្រះវរបិតាសួគ៌ និងក្រុមគ្រួសាររបស់ពួកគេនៅថ្ងៃចុងក្រោយ » ។
-
« ដើម្បីពង្រឹង ហើយគាំទ្រយើងនៅក្នុងតួនាទី និងការទទួលខុសត្រូវរបស់យើងក្នុងគ្រួសារ ក្នុងនាមជាបុត្រាបុត្រីរបស់ព្រះ » ។( « Why We Are Organized into Quorums and Relief Societies » [ ការប្រជុំធម្មនិដ្ឋាននៅសាកលវិទ្យាល័យព្រិកហាំ យ៉ង់ នៅថ្ងៃទី ១៧ ខែ មករា ឆ្នាំ ២០១២ ] speeches.byu.edu ) ។
ការកែលម្អការបង្រៀនរបស់យើង
អញ្ជើញ ។ « ជាជាងការអញ្ជើញឲ្យធ្វើអ្វីមួយជាក់លាក់ជានិច្ចនោះ សូមពិចារណាអញ្ជើញសិស្សឲ្យគិតពីវិធីរបស់ពួកគេផ្ទាល់ដើម្បីអនុវត្តអ្វីដែលពួកគេបានរៀន » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ៣៥ ) ។