Nobiembre 30–Disiembre 6. Moroni 1–6: ‘Tapno Maiturongda iti Umno a Dalan,’” Umaykayo, Sumurot Kaniak—Para iti Sunday School: Book of Mormon 2020 (2020)
Nobiembre 30–Disiembre 6. Moroni 1–6,” Umaykayo, Sumurot Kaniak—Para iti Sunday School: 2020
Minerva Teichert (1888–1976), Mamuniag ni Alma iti Dandanum ti Mormon, 1949–1951, oil in masonite, 35⅞ x 48 inches. Brigham Young University Museum of Art, 1969
Nobiembre 30–Disiembre 6
Moroni 1–6
“Tapno Maiturongda iti Umno a Dalan”
Tinarigagayan ni Moroni a dagiti banag nga insuratna ket “napategdanto” kadagiti sibibiag kadagiti ud-udina nga aldaw (Moroni 1:4). Bayat ti panangbasam iti Moroni 1–6, nainkararagan nga ibilangmo dagiti banag nga agbalinto a kapatgan kadagiti sursuruam.
Isuratmo Dagiti Impresionmo
Yawis ti Panagbibinninglay
No dadduma nasaysayaat a kabaelan dagiti miembro ti klase a mangibinglay kadagiti nalawag a pannakaammo ken pannakaawat [insights] manipud iti bukod a panagadalda no bassit ti orasda a manglagip iti nabasada. Mabalinmo nga usaren ti sumagmamano a minuto iti rugi ti klase a mangrebyu kadagiti paulo ti kapitulo para iti Moroni 1–6. (Daytoy pay ti makatulong kadagiti miembro ti klase a saan a nagbasa iti pagtaengan.) Kalpasanna awisem dagiti miembro ti klase a mangsukisok kadagiti kapitulo para iti maysa a bersikulo a masarakanda a napateg ken kayatda nga ibinglay iti dadduma pay iti klase.
Isuro ti Doktrina
Nasken a maimatonan dagiti ordinansa ti kinasaserdote kas ibilin ti Apo.
-
No agsagsagana dagiti miembro ti klasem (wenno dagiti ay-ayatem) nga umawat kadagiti ordinansa ti kinasaserdote, mabalin a napateg nga irebyu no ania ti insuro ni Moroni maipapan kadagiti ordinansa iti Moroni 2–6. Mabalin nga agtitinnulong dagiti miembro ti klase iti kada paris tapno mangyakem kadagiti senario kas iti sumaganad. (1) Dumanin maordenan ti kabsatmo a lalaki iti kinasaserdote. Ania a balakad ti maitedmo kenkuana manipud iti Moroni 3? (2) Masmasdaaw ti maysa a gayyem a sabali ti pammatina no apay a kasapulan ti makiranud iti sakramento iti tunggal lawas. Ania koma ti kunam? (kitaen iti Moroni 4–5). (3) Umadanin ti panagbuniag ti anakmo a babai, ngem saan a sigurado no nakasaganan daytoy. Kasano koma a matulongam? (kitaen iti Moroni 6:1–3). Kalpasan dagiti panangyakem, mabalin a paglilinnawagan ti klase no ania ti nasursuroda manipud iti tunggal maysa. Mabalinda pay nga ibinglay dagiti pammaneknekda maipapan no kasano a dagiti ordinansa kas kadagitoy ket nangyas-asideg kadakuada iti Nailangitan nga Ama ken ni Jesucristo.
-
Tapno mayam-ammo ti panaglilinnawag maipapan iti panagsagana para iti panagbuniag, mabalinmo nga idawat iti maysa a miembro ti klase a mangiladawan kadagiti wagas a panagsaganada para kadagiti napapateg a panagkumit iti biagda, kas iti maysa a mision, kallaysa, panagbalin a nagannak, wenno baro a pagtrabahuan. Kasano a maipada dayta a panagsagana iti panagsagana a kasapulan tapno maikari para iti panagbuniag, kas nailadawan iti Moroni 6:1–3? (kitaen met iti Mosiah 18:8–10; DK 20:37). Apay a kasapulan para iti panagbuniag dagiti kababalin a nailista kadagitoy a binatog? Kasano nga ammotayo no nakasaganatayon para iti daytoy nga ordinansa? Allukoyem dagiti miembro ti klase a mangutob no kasano ti kinasayaat ti panagbiagda a mayannurot kadagitoy a pagrukodan manipud pay iti panagbuniagda ken ania ti maaramidda tapno sumayaatda. Mabalinmo pay nga awisen ida a mangisurat kadagiti ania man nga impresion nga awatenda ken masansan nga agibasarda kadagitoy.
Ladawanbalasitang nga umaw-awat iti bendisionMaan-annong dagiti ordinansa babaen ti bileg ti kinasaserdote.
Ti pannakiranud iti sakramento ket mangtulong kadatayo nga umas-asideg ken ni Jesucristo.
-
Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing kadagiti adalen nga aktibidad a mainaig iti sakramento. Nalabit a mabalinmo nga awisen ti sumagmamano a miembro ti klase a mangileppas kadagitoy nga aktibidad iti pagtaengan ket umayda iti klase a nakasagana a mangibinglay no ania ti nasursuroda. Mabalinmo pay nga awisen dagiti miembro ti klase a mangibinglay iti tunggal maysa no ania ti aramidenda a mangisagana iti bagbagida ken dagiti pamiliada a maaddaan kadagiti sagrado a padas iti sakramento.
-
Nangngeganen ti kaaduan kadatayo dagiti kararag iti sakramento iti adu a gundaway, ngem namin-adu a pampanunotentayo kadi maipapan iti kayat a sawen dagiti balikas? Tapno matulongan dagiti miembro ti klase a mangutob kadagitoy a kararag, mabalinmo nga ikkan ida iti sumagmamano a minuto tapno mangisurat iti dua a kararag iti sakramento iti panunotda. Kalpasanna awisem ida a mangidasig iti insuratda iti Moroni 4:3 ken 5:2. Ania ti nalaka a nalagipda? Ania ti nalibtawanda? Adda kadi ania man a banag a nadlawda maipapan kadagitoy a kararag a saanda a nadlaw idi? Awisem dagiti miembro ti klase a mangibinglay kadagiti balikas ken ragup ti balikas manipud kadagiti kararag ti sakramento a napateg kadakuada wenno mangtulong kadakuada a mangrikna iti kinasagrado daytoy nga ordinansa. Tapno mapadakkel ti panangdayaw dagiti miembro ti klase ti panagdayawda iti sakramento, ibilang ti panangawis iti maysa a miembro ti klase a mangkanta wenno mangtugtog iti maysa a himno ti sakramento. Mabalinmo pay nga ipabuya ti video “Always Remember Him” (ChurchofJesusChrist.org).
Agserbi iti tunggal maysa dagiti disipulo ni Jesucristo.
-
Ibilang ti panangusar iti maysa nga analohia a mangtulong a maawatan dagiti miembro ti klase ti kinapateg ti “pannakataraonda iti nasayaat a balikas ti Dios” (Moroni 6:4). Kas pagarigan, ania ti kita a pannakataraon ti kasapulan para iti maysa nga apagtubo a mula wenno maysa a maladaga? Ania ti mapasamak no maliwayam ti maysa a banag nga agkasapulan iti pannakataraon? Kasano a maipada dagiti baro ken agsubsublin a miembro ti Simbaan iti maysa a mula wenno maladaga nga agkasapulan iti pannakataraon? Mabalin nga agsukisok dagiti miembro ti klase iti Moroni 6:4–9 kadagiti kapanunotan maipapan no kasano a mabalinda a naespirituan a “taraonan” ti tunggal maysa. Mabalinda pay a sapulen dagiti kapanunotan iti “Dagiti Nainayon a Resources.” Mabalin nga ibinglay ti maysa a padas a nakapagserbian kenka ti pada a disipulo. Nalabit nga agtallugod dagiti miembro ti klase a mangibinglay kadagiti isu met la a padas.
-
Makatulong tiMoroni 6:4–9 a maawatan dagiti miembro ti klase no kasano a naparaburantayo no “naibilang[tayo] kadagiti tao ti simbaan ni Cristo” ken dumar-ay kadagiti miting iti simbaan. Kasano a mailawlawagtayo dagitoy a bendision iti maysa a tao nga agduadua iti panagkasapulan iti maysa a nabukel a simbaan? Nalabit a mabalin a sukisoken dagiti miembro ti klase dagitoy a bersikulo tapno sapulenda ti maysa a banag a mabalinda nga ibinglay. Wenno mabalinda nga ilista ti sumagmamano kadagiti bendision a naawatda kas miembro ti Simbaan (kitaen iti D. Todd Christofferson, “Why the Church,” Ensign wenno Liahona, Nob. 2015, 108–11). Ania ti maaramidtayo tapno masigurado a dagiti padatayo a disipulo ket “malagip ken mataraonan ti balikas ti Dios” no “aggigimongtayo a masansan”? (Moroni 6:4–5).
Yallukoy ti Panagsursuro iti Pagtaengan
Mabalin a naggaggagar dagiti miembro ti klase a mangbasa iti Moroni 7–9 iti sumaruno a lawas no ilawlawagmo nga iraman daytoy ti dua a surat nga insurat ni Mormon a mangtulong iti anakna a lalaki nga agtalinaed a napudno kadagiti naririgat a panawen.
Dagiti Nainayon a Resources
Nataraonan iti balikas ti Dios.
Insuro ni Elder Jeffrey R. Holland: “Saan nga umay ti kaaduan a tattao iti simbaan nga agsapsapul laeng iti sumagmamano a baro a kinapudno [fact] ti ebanghelio wenno mangkita kadagiti nabayagen a gayyem, nupay napateg amin dayta. Umayda nga agkalkalikagum a manggun-od iti naespirituan a padas. Agtarigagayda iti talna. Tarigagayanda a mapapigsa ti pammatida ken mapabaro ti namnamada. Iti ababa, tarigagayanda ti mataraonan iti nasayaat a balikas ti Dios, mapapigsa kadagiti bileg ti langit” (“A Teacher Come from God,” Ensign, Mayo 1998, 26).
Inlawlawag ni Presidente Gordon B. Hinckley a ti panangtaraon kadagiti napasurot [convert] iti balikas ti Dios “ket aramid para iti tunggal maysa. Daytoy ti aramid dagiti home teacher ken visiting teacher [ministering brothers ken sisters itan]. Daytoy ti aramid para iti bishopric, para kadagiti korum ti priesthood, para iti Relief Society, ti young men ken young women, uray pay ti Primary.
“Addaak iti miting ti panagayuno ken panagpaneknek laeng itay napalabas a Domingo. Nagtakder ti barito nga agtawen iti 15 wenno 16 iti sango ti kongregasion ket kinunana nga inkeddengna ti agpabuniag.
“Kalpasanna saggaysa a napan iti mikropono dagiti babbarito ti teacher’s quorum tapno ipeksa ti ayatda kenkuana, tapno ibaga kenkuana nga ar-aramidenna ti umno a banag, ket ipanamnamana kenkuana a makipagtakderda kenkuana ken tulonganda. Nakaskasdaaw a padas ti dumngeg kadagiti agtutubo a lallaki a mangipeksa iti panagyaman ken panangparegta iti gayyemda. Mapnekak nga amin dagita a babbarito, agraman ti maysa a nabuniagan itay napalabas a lawas, ket mapandanto iti mision.
“Itay kallabes nga interbyu iti press nadamag kaniak, ‘Ania ti nangisangbay kenka iti kadakkelan a pannakapnek bayat ti pannakakitam iti aramid ti Simbaan iti agdama?’
“Ti sungbatko: ‘Ti kangrunaan a makapakapnek a padasko ket makitak no ania ti aramiden daytoy nga ebanghelio para kadagiti tao. Mangted daytoy kadakuada iti baro a pannirigan iti biag. Mangted daytoy kadakuada iti pannirigan a dida pay pulos narikna idi. Daytoy ti mangtulong kadakuada a manggun-od kadagiti banag a natakneng ken nadiosan. Mapasamak ti maysa a banag kadakuada a namilagruan nga imatangan. Kumitada ken ni Cristo ken naregtada nga agaramid.’
“… Idawatko iti tunggal maysa kadakayo a tumulongkayo iti daytoy nga aramid” (“Converts and Young Men,” Ensign, Mayo 1997, 48).
Panangpadur-as iti Panangisurotayo
Ikarigatam a manggun-od iti bukodmo a pammaregta. Imbes a panangkita kadagitoy a balabala a kas pangiturong a nasken a surotem, usarem dagitoy kas maysa a pagalaan kadagiti kapanunotan a mangpataud iti bukodmo nga inspirasion bayat ti panangutobmo kadagiti kasapulan dagiti sursuruam.