“Disiembre 7–13. Moroni 7–9: ‘Bitbitennaka Koma ni Cristo,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Disiembre 7–13. Moroni 7–9,” Umaykayo, Sumurot Kaniak—Para iti Sunday School: 2020
Minerva Teichert (1888–1976), Moroni: Ti Maudi a Nephite, 1949–1951, oil on masonite, 34¾ x 47 inches. Brigham Young University Museum of Art, 1969
Disiembre 7–13
Moroni 7–9
“Bitbitennaka Koma ni Cristo”
Ti paggepmo ket tapno mangtulong kadagiti tao nga umas-asideg iti Dios, a saan laeng a mangidatag iti maysa nga adalen. Agsaganaka para iti Sunday School babaen ti panangbasam iti Moroni 7–9 a pampanunotem dagiti miembro ti klase, a mangsapsapul kadagiti pagbatayan a mangtulongto kadakuada.
Isuratmo Dagiti Impresionmo
Yawis ti Panagbibinninglay
Awisem ti tunggal miembro ti klase a mangrebyu iti Moroni kapitulo 7, 8, wenno 9 ket mangsapul iti maysa a kinapudno a napateg kenkuana. Kalpasanna mabalin nga ibinglay dagiti miembro ti klase ti kinapudno a nasarakanda ken no kasano a nangparabur daytoy kadakuada.
Isuro ti Doktrina
“Nadiosan dayta aggapu iti Dios nga awis ken ay-ayo iti kanayon a panagaramid iti nasayaat.”
-
Tapno agbalin a disipulo ni Jesucristo, nasken a kabaelantayo ti mangngeddeng iti nagbaetan ti nasayaat ken dakes. Nalabit a ti panangilawlawag kadagiti kinapudno iti Moroni 7:3–19 ket makatulong kadagiti miembro ti klase a mangliklik iti panangeddeng a “sibibiddut” (Moroni 7:18). Tapno agsagana para iti panaglilinnawag, mabalin a sukisoken ti kagudua ti klase dagitoy a bersikulo para iti balakad nga ited ni Mormon maipapan no kasano nga ilasin ti aggapu iti Dios, ken mabalin a sapulen ti sabali pay a kagudua ti klase no kasano nga ilasin ti aggapu iti sairo. Kalpasanna mabalinda nga ilawlawag no ania ti nasarakanda ket ibinglay dagiti pagarigan dagiti banag a mangawis kadakuada “nga agaramid iti nasayaat, ket agayat iti Dios, ken agserbi kenkuana” (Moroni 7:13). Kasano nga aramatentayo ti balakad ni Mormon kadagiti inaldaw a pangngeddengtayo? Kasano a makaaramidtayo kadagiti nalinteg a pili ken maipakitatayo latta ti ayat kadagiti adda iti lawlawtayo a saan nga agbibiag iti ebanghelio?
-
Masdaaw dagiti adu a tao, “Kasano a maammuak no aggapu iti Dios ti parikna nga adda kaniak wenno naggapu iti bukodko a kapanunotan?” Mabalinmo nga isurat daytoy a saludsod iti pisarra ket awisem dagiti miembro ti klase a mangsukisok iti Moroni 7:13–16 para kadagiti pagbatayan a makatulong a mangsungbat iti daytoy a saludsod. Kasano a makatulong kadatayo dagitoy a bersikulo a mangbigbig iti nadiosan nga inspirasion? Mabalin a makatulong a mangilawlawag a “ti Espiritu ni Cristo,” a maawagan pay iti silaw ni Cristo, ket no dadduma maitudo a ti konsiensiatayo. Mabalin pay a makatulong ti palawag ni Presidente Gordon B. Hinckley iti “Dagiti Nainayon a Resources” ken makatulong pay ti video “Patterns of Light: Discerning Light” (ChurchofJesusChrist.org).
Kalikaguman a gun-oden dagiti pasurot ni Jesucristo ti pammati, namnama, ken panangngaasi.
-
Tapno matulongan a nasaysayaat a maawatan ti klasem dagiti pagnanaigan ti pammati, namnama, ken panangngaasi, mabalinmo nga ipakita ti tallo ti sakana a bangkito (wenno ladawan ti maysa) ket idawat kadagiti miembro ti klase nga ibilangda no kasano a maipada ti pammati, namnama, ken panangngaasi kadagitoy tallo a saka (kitaen iti palawag ni Presidente Dieter F. Uchtdorf iti “Dagiti Nainayon a Resources”). Kalpasanna mabalinmo nga awisen ida a mangpili iti maysa kadagitoy a kababalin ken magsapul no ania ti isuro ni Mormon maipapan iti daytoy iti Moroni 7:21–48. Paglilinnawagan dagiti saludsod kas iti sumaganad: Apay a kasapulantayo ti pammati ken namnama tapno umawat iti sagut ti panangngaasi? Kasano nga inaignatayo dagitoy a kababalin ken ni Jesucristo? Apay a kasapulan dagitoy a kababalin para iti maysa a disipulo ni Jesucristo? Ania ti mapasamak kadatayo no mapukawtayo ti pammati? namnama? panangngaasi? Awisem dagiti miembro ti klase a mangala iti sumagmamano a kanito a mangisurat kadagiti impresion nga adda kadakuada.
Ti pannakaawat iti umno a doktrina ket makatulong kadatayo nga agpili iti umno.
-
Mabalin a saan a kasapulan ti klasem a mangilawlawag no apay a biddut ti mangbuniag kadagiti maladaga, ngem dagiti balikas ni Mormon iti daytoy a topiko ti makatulong kadakuada a mangkita kadagiti peggad ti ulbod a doktrina iti sapasap. Tapno maipakita no kasano a ti Libro ni Mormon “[mangtubngar] kadagiti ulbod a doktrina” (2 Nephi 3:12), mabalinmo nga awisen dagiti miembro ti klase a mangbasa iti Moroni 8:4–21 iti kada grupo wenno saggaysa. Kagudua kadakuada ti mangsapul iti doktrina a narikna ni Mormon a saan a naawatan dagiti tao, agraman ti Pannubbot ni Jesucristo (kitaen iti bersikulo 20) ken kaadda ti sungsungbatan (kitaen iti bersikulo 10). Mabalin a kitaen ti sabali pay a kagudua ti klase dagiti bunga ti biddut dagiti tao. Mabalin nga ibinglay ti tunggal grupo iti klase no ania ti nasarakanda. Ania ti isuro dagitoy a bersikulo kadatayo maipapan iti pateg ti panagsursuro ken panagbiag babaen ti umno a doktrina? Sadino ti pakasarakantayo kadagiti umno a pannakailawlawag ti doktrina ni Cristo? Kasano a masiguradotayo nga umno ti pannakaawattayo iti doktrina?
-
Nalabit a mangted pagimbagan iti klasem ti panangsurot iti pagarigan ni Mormon iti panangtulong iti maysa a tao nga agaramid kadagiti nasaysayaat a pili babaen ti panangisuro kadakuada iti umno a doktrina. Mabalinmo nga aramiden daytoy babaen ti panangawis kadagiti miembro ti klase a mangpanunot iti maysa a tao manipud kadagiti nasantuan a kasuratan a nagaramid iti biddut a pili. Ania ti kinapudno iti doktrina a mangtulong iti dayta a tao a mangliklik manen iti panangaramid iti dayta a biddut a pili? Mangted kadagiti miembro ti klase iti sumagmamano a minuto a mangsapul kadagiti nasantuan a kasuratan wenno palawag manipud iti kallabes a sapasap a komperensia a mangtulong a maipaawat kadakuada ti kinapudno ti doktrina. Kalpasanna mabalinmo nga idawat kadakuada a mangibinglay no ania ti nasarakanda.
Maaddaantayo iti namnama ken ni Cristo ania man dagiti kasasaadtayo.
-
Ti maudi a naisurat a mensahe ni Mormon iti anakna iti Moroni 9:25–26 ket makatulong kadagiti miembro ti klase a mangsarak iti namnama ken ni Cristo, uray kadagiti kasla makauppapay a kasasaad. Nalabit a mabalinmo a rugian babaen ti panangidawat kadagiti miembro ti klase a mangibinglay kadagiti rason a mabalin a narikna ni Moroni ti pannakaupay. Kalpasanna mabalinda a basaen dagitoy a bersikulo ken ilista iti pisarra dagiti kinapudno nga inyallukoy ni Mormon nga ipamaysa ni Moroni. Kasano a mabalin nga “itag-ayna[tayo]” dagitoy isu met la a kinapudno iti aldawtayo? Mabalin pay nga ibinglay dagiti miembro ti klase dagiti pagarigan ti Dios iti “asi ken naunday a panagitured” a nasaksianda. Wenno mabalinda nga ibinglay dagiti kapanunotan a mangtulong iti tunggal maysa nga agtalinaed ti Mangisalakan ken ti ebangheliona “iti kapanunotan[tayo] iti agnanayon,” uray no maipasangotayo iti pannakaupay (bersikulo 25).
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti Moroni 10, mabalinmo nga isingasing a mabalin a daytoy ti nasayaat a gundaway a mangutob maipapan iti no kasano a napadasanda ti napabaro a saksi ti kinapudno ti Libro ni Mormon nga inadalda iti daytoy a tawen.
Dagiti Nainayon a Resources
Naggapu kadi daytoy iti Espiritu?
Tapno masungbatan ti saludsod, “Kasano a mabigbigtayo dagiti pannignay ti Espiritu?” Inadaw ni Presidente Gordon B. Hinckley ti Moroni 7:13 ket kinunana: “panagkunak saan unay a narigat [daytoy], a talaga. … Daytoy kadi ti mangallukoy iti maysa nga agaramid iti naimbag, dumur-as, tumibker, agaramid iti umno a banag, agbalin a naasi, agbalin a managparabur? Ngarud daytoy ti Espiritu ti Dios” (Teachings of Gordon B. Hinckley [1997], 260–61).
Pammati, namnama, ken panangngaasi.
Indilig ni Presidente Dieter F. Uchtdorf ti pammati, namnama, ken panangngaasi iti maysa a bangkito a tallo ti sakana, a nangilawlawag a dagitoy tallo a naimbag nga ugali ti “mangpatibker iti biagtayo ania man dagiti narusanger wenno nakillo a rabaw a mabalin a pakaipasanguantayo. …
“Agsisinnuporta ti pammati, namnama, ken panangngaasi, ket no dumur-as ti maysa, dumur-as met dagiti dadduma. Aggapu ti pammati iti namnama, ta no awan ti pammati, awan ti namnama. Iti maipada a wagas, aggapu ti namnama iti pammati, gapu ta ti pammati isu ‘ti punganay ti panangnamnama kadagiti banbanag nga ur-urayen.’
“Napateg ti namnama iti agpada a pammati ken panangngaasi. No ti kinasukir, pannakapaay, ken panangitantan ti mangpukaw iti pammati, adda idiay ti namnama a mangitandudo iti pammatitayo. No ti pannakaupay ken kinaawan anus ti mangkarit iti panangngaasi, ti namnama ti mangpapigsa kadatayo ken mangguyugoy kadatayo a mangaywan kadagiti padatayo a tao uray no saantayo a mangnamnama iti gunggona. Ti naranraniag a namnamatayo, dakdakkel met ti pammatitayo. Ti natibtibker a namnamatayo, natartarnaw met ti panangngaasitayo” (“The Infinite Power of Hope,” Ensign wenno Liahona, Nob. 2008, 21, 23–24).
“Ti natarnaw nga ayat ni Cristo.”
Insingasing ni Elder Jeffrey R. Holland ti dua a posible a kaipapanan ti ragup ti balikas a “ti natarnaw nga ayat ni Cristo”:
“Ti maysa ket… isu ti kita ti manangngaasi, managpakawan nga ayat a nasken nga adda kadagiti disipulo ni Cristo para iti tunggal maysa. …
“[Ti sabali pay a kaipapanan ket isu ti] saan nga agbalbaliw, di mapagduaduaan, ken manangsubbot nga ayatna para kadatayo. … Daytoy ti panangngaasi—ti natarnaw nga ayatna para kadatayo—no awan daytoy without awantayo koma met” (Christ and the New Covenant: The Messianic Message of the Book of Mormon [1997], 336).
Panangpadur-as iti Panangisurotayo
Tulongam dagiti agad-adal a mangpadur-as iti naespirituan a panagpannuray iti bagi. “Bayat ti panangisurom, imbes a panangiburay iti impormasion, tulongam [dagiti miembro ti klase] a mangtakuat kadagiti kinapudno ti ebanghelio para iti bagbagida. … No adda dagiti saludsodda, no dadduma nasaysayaat nga isuro kadakuada no kasano a makitada mismo dagiti sungbat” (Panangisuro iti Wagas ti Mangisalakan, 28). Kas pagarigan, mabalinmo nga itudo kadagiti miembro iti Gospel Topics iti topics.ChurchofJesusChrist.org, a naglaon iti makatulong nga impormasion iti nadumaduma a topiko.