Dagiti bilog ti Jaredite iti baybay

Aywanankayto Manen nga Iruar kadagiti Kaunggan, ni Jonathan Arthur Clarke

Nobiembre 16–22

Ether 6–11

“Tapno Mapapanaw ti Dakes”

Laglagipen a naisurat dagiti kasuratan a linaon iti Libro ni Mormon para iti aldawtayo. Bayat ti panangsaganam a mangisuro, sapulem kadagitoy a pakaammuan iti nasantuan a kasuratan dagiti pagbatayan a makapapigsa kadagiti miembro ti klase a mangsaranget kadagiti karit iti biagda.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno matulongan a mangibinglay dagiti miembro ti klase iti maysa a banag a masarakanda a napateg iti Ether 6–11, mabalinmo nga awisen ida a mangipapan a dagitoy a kapitulo ket naaramid a maysa a pelikula; ania a ragup ti balikas manipud iti Ether 6–11 a maisingasingda a kas paulo? Ikkan ida iti gundaway nga agpanunot iti daytoy, ken awisen ida a mangibinglay kadagiti paulo ken ilawlawag no apay a pinilida dagitoy.

icon iti panangisuro

Isuro ti Doktrina

Ether 6:1–12

Tarabayennatayonto ti Apo iti mortal a panagdaliasattayo.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia isingasingna ti panangidasig iti panangdaliasat dagiti Jaredite iti baybay iti panagdaliasattayo iti mortalidad. Idawat kadagiti miembro ti klase a nangpadas iti daytoy nga aktibidad iti pagtaengan tapno mangibinglay kadagiti nalawag a pannakaammo ken pannakaawat [insights] a nagun-odda manipud iti daytoy nga analohia. Tapno matulongan dagiti miembro ti klase nga agaramid iti ad-adu pay a panagidasig iti klase, awisem ida a mangsapul iti Ether 6:1–12 para kadagiti detalye maipapan iti panangdaliasat a mabalin nga addaan simboliko a kaipapanan (kas dagiti agrimrimat a bato, dagiti bilog, ken ti angin) ket ilista ida iti pisarra. Kalpasanna mabalin a mangbubos dagiti miembro ti klase iti sumagmamano a minuto a mangitrabaho a sagpaparis wenno iti babassit a grupo tapno mangadal kadagiti bersikulo ken mangilawlawag no ania ti mabalin nga ibagi dagitoy a simbolo iti biagtayo. Kas pagarigan, ania ti “naikari a dagatayo”? (bersikulo 8). Kasano a tarabayennatayo ti Dios iti panagdaliasattayo?

• Mabalinmo nga usaren ti Ether 6:1–12 a mangparegta iti panaglilinnawag maipapan no kasano a ti yaasideg iti Dios ket makatulong kadatayo a dumur-as babaen kadagiti pannuboktayo. Kas pagarigan, ti adaw iti “Dagiti Nainayon a Resources” ket makatulong kadagiti miembro ti klase a mangidasig iti “narungsot nga angin” a naagapad kadagiti bersikulo 5–8 iti rigrigat ti biag. Ania ti inaramid dagiti Jaredite idi “nalikmutda iti dandanum”? (bersikulo 7). Mabalin dagiti miembro ti klase ti mangibinglay kadagiti padas a nakatulongan kadakuada dagiti rigrigatda a makapagtultuloy. Kasano a ti wagas a panagrespondeda kadagiti pannubokda ket nakatulong kadakuada a dumur-as nga agturong iti “naikari a dagada”? Kasano a tinulungan ida ti Apo kadagiti panagkarigatanda? Allukoyem ida nga agibasar kadagiti balikas ken ragup ti balikas manipud iti Ether 6 bayat ti panangibinglayda kadagiti padas ken kapanunotanda.

  Dagiti Jaredite nga agbambaniaga a kakuyog dagiti ayupda

  Panagdaliasat dagiti Jaredite iti Asia, ni Minerva Teichert

Ether 6:7–18, 30; 9:28–35; 10:1–2

Bendisionannatayo ti Apo no agpakumbabatayo.

• Nupay kaaduanna ti estoria dagiti Jaredite ti mangiladawan kadagiti negatibo a bunga ti kinatangig ken kinadangkes, iramanna pay dagiti panawen ti panagpakumbaba ken panagrang-ay a mabalin a pakasursuruantayo. Tapno matulongan dagiti miembro ti klase a makasursuro manipud kadagitoy positibo a pagarigan, mabalinmo a bingayen ti klase iti dua a grupo ket dutokam ti maysa a grupo a mangbasa iti Ether 6:7–18 ken 30 idinto a basaen ti sabali pay a grupo ti Ether 9:28–35 ken 10:1–2. Idawatmo kadakuada a mangsapul kadagitoy a bersikulo ti pakakitaan nga impakumbaba dagiti Jaredite ti bagbagida—wenno pinakumbaba ida dagiti kasasaadda—ken no kasano a pinaraburan ti Dios ida kas bungana. No adda umdas nga oras dagiti miembro ti klase, awisem dagiti miembro iti tunggal grupo a mangibinglay no ania ti nasursuroda. Kasano a ti panagbalin a napakumbaba ket makatulong kadatayo nga umas-asideg iti Dios? Ti panangkanta wenno idedengngeg iti maysa a himno maipapan iti panagpakumbaba, kas iti “I Need Thee Every Hour” (Hymns, no. 98), ket mabalin a mangnayon iti daytoy nga aktibidad.

Ether 7–11

Dagiti nalinteg a dadaulo ti mangiturong kadagiti tao iti Dios.

• Uray dagiti saan pay pulos a nakaiggem iti pormal a posision iti panangidaulo ket makasursuro manipud iti pagarigan dagiti nalinteg ken nadangkes nga ari; makatulong dagitoy a pakaammuan iti panagbalintayo a nasaysayaat a dadaulo kadagiti pagtaengantayo, kadagiti komunidadtayo, ken iti simbaan. Nalabit a mabalinmo a rugian ti panaglilinawag maipapan iti daytoy a topiko babaen iti panangidawat kadagiti miembro ti klase a mangpanunot iti maysa a tao nga ibilangda nga agbalin a nasayaat a dadaulo. Awisem ida a mangibinglay biit iti sumagmamano a kababalin dayta a tao, ket ilista iti pisarra. Kalpasanna mabalinmo a dutokan ti tunggal miembro ti klase a mangsursuro maipapan iti maysa kadagiti ari ti Jaredite iti Ether 7–11. (Ti listaan dagiti ari, nga addaan kadagiti reperensia iti nasantuan a kasuratan a mangiladawan iti panagturayda, ket masarakan iti balabala iti daytoy a lawas iti Umaykayo, Sumurot Kaniak—para kadagiti Indibidual ken Pamilia.) Mabalin nga ibinglay dagiti miembro ti klase no ania ti masursuroda manipud kadagitoy nga ari maipapan iti panangidaulo, nga inaynayon dagiti dadduma pay a kababalin a masarakanda iti listaan iti pisarra. Nailista dagiti dadduma pay a nasayaat a kababalin iti “Dagiti Nainayon a Resources.” Kasano a mapadur-astayo dagitoy a kababalin ket agbalintayo a dadaulo, uray pay no awanantayo iti naituding nga aramiden iti panangidaulo?

icon iti panagsursuro

Yallukoy ti Panagsursuro iti Pagtaengan

Tapno maparegta ti essem dagiti miembro ti klase iti panangbasa iti Ether 12–15, mabalinmo a dakamaten a kadagitoy a kapitulo impeksa ni Moroni iti Apo ti sumagmamano kadagiti pakaseknanna maipapan iti kasuratan nga iduldulinna. Makatulong kadatayo ti sungbat ti Apo no addaantayo iti isu met la a rikna ti kinakurang.

resources icon

Dagiti Nainayon a Resources

Isagananatayo dagiti pannuboktayo nga umawat iti agnanayon a biag.

Iti panagsaritana iti sapasap a komperensia kabayatan dagiti narigat a tawen ti World War II, kinuna ni Elder Charles A. Callis ti Korum dagiti Sangapulo-ket-dua nga Apostol: “Naibaga kadatayo nga idi pumanaw dagiti Jaredite a nakasakay kadagiti bilogda nga agturong iti naikari a daga, nagtalinaed dagiti narungsot ken nakabutbuteng a bagyo. Nagpuyupoy ti angin ket addada iti naballaagan a pagpeggadan kabayatan dayta napeggad a panagdaliasat. Tinulongan ida ti Dios. Ket mabasatayo a nupay nagtultuloy dagitoy a napigsa nga angin ken bagyo, a mangigapu iti pannakadadaelda, nagtultuloy a nagpuyupoy ti angin agingga iti Naikari a Daga. Ken dagitoy a panagrigrigat a daldaliasatentayo, dagitoy nakabutbuteng a gubat ket ti amin a nakaam-ames a banag a maisaksaknap, ket adda iti pannakabalin ti Dios. Mabalinna a pagsardengen ida no pilienna, no maipatungpal dagiti nadiosan a panggepna. Ngem ditayo koma liplipatan a babaen daytoy a baybay a napnuan iti parikut, dagiti rigrigattayo, dagiti padpadastayo a pagdaliasatantayo ken pangaramidan ti Dios ti panagkaykaysa nga aramid, no agtungpaltayo Kenkuana—amin dagitoy ket maipuyupoyda nga agturong iti lugar a paginanaan, iti nagloriaan a masakbayan, iti agnanayon a biag” (iti Conference Report, Abr. 1943, 62).

Dagiti Kababalin dagiti nalinteg a dadaulo.

“Iti pagarian ti Dios, ti kinaindaklan ken panangidaulo kaipapananna ti kas iti panangkita iti dadduma kas iti kinapudnoda——ket kalpasanna panangtulong ken panangserbi kadakuada. Kayatna a sawen ti pannakipagrag-o kadagiti naragsak, pannakipagladingit kadagiti malidlidayan, panangparegta kadagiti madandanagan, ken panangayat iti kaarrubatayo kas iti panangayat ti Dios kadatayo. …

“… Ti panangidaulo iti Simbaan ket saan unay a maipapan iti panangiturong kadagiti dadduma daytoy ket maipapan iti kinatallugodtayo nga agpaiturong iti Dios” (Dieter F. Uchtdorf, “The Greatest among You,” Ensign wenno Liahona, Mayo 2017, 79–80).

“Dagiti laeng nasayaat ti addaan iti kabaelan a mangparegta ken mangallukoy iti tunggal maysa iti dakdakkel a serbisio, iti dakdakkel a balligi, ken dakdakkel a pigsa” (Teachings of Presidents of the Church: Ezra Taft Benson [2014], 244).

“Isuro ti lubong a nasken nga agbalin a nabileg dagiti dadaulo; isuro ti Apo a nasken nga agpakumbabada. Magun-od dagiti nailubongan a dadaulo ti bileg ken impluensia babaen ti talento, paglaingan, ken kinabaknangda. Magun-od dagiti dadaulo a kas ken ni Cristo ti bileg ken impluensia ‘babaen ti panangguyugoy, babaen ti naunday a panangitured, babaen ti kinaanus ken kinaemma, ken babaen ti di aginkukuna nga ayat’ [DK 121:41]” (Stephen W. Owen, “The Greatest Leaders Are the Greatest Followers,” Ensign wenno Liahona, Mayo 2016, 75).

Panangpadur-as iti Panangisurotayo

Yalluloy ti naraem ken makaay-ayo nga aglawlaw. Mariknam kadi a ti tunggal maysa iti klase ket komportable iti panangipeksada kadagiti kapanunotan ken riknada? “Tulongam a maawatan dagiti miembro ti klasem a ti tunggal maysa kadakuada ket mangaring iti espiritu ti klase. Allukoyem ida a tulongandaka a mangipasdek iti silulukat, naayat, ken nadayaw nga aglawlaw tapno marikna ti tunggal maysa a natalgedda a mangibinglay kadagiti padas, saludsod, ken pammaneknekda” (Panangisuro iti Wagas ti Mangisalakan, 15).