Ni Moroni nga agsursurat kadagiti balitok a pinanid

Ni Moroni nga Agsursurat kadagiti Balitok a Pinanid, ni Dale Kilborn

Nobiembre 2–8

Mormon 7–9

“Agsaritaak Kadakayo a Kasla Addakayo”

Irebyu dagiti impresion nga insuratmo kabayatan ti bukod a panagadalmo iti Mormon 7–9 iti daytoy a lawas. Ania dagiti binatog manipud kadagitoy a kapitulo a mariknam nga agbalinto a kapatgan nga irebyu iti klasem?

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno maikkan dagiti klase ti gundaway a mangibinglay iti maysa a banag manipud iti bukod wenno sangapamiliaan a panagadalda, mabalinmo nga allukoyen ida a mangbasa biit iti Mormon 7–9 ken mangibinglay iti maysa a binatog (wenno bersikulo) a pagyamananda a pinili ni Mormon wenno Moroni nga iraman kadagiti pinanid.

icon iti panangisuro

Isuro ti Doktrina

Mormon 7:8–10; 8:12–22; 9:31–37

Dakkel ti pateg ti Libro ni Mormon.

• Maysa a wagas a pangyam-ammo iti panaglilinnawag maipapan iti dakkel a pateg ti Libro ni Mormon ket pagsasaritaan no kasano a maikeddengtayo ti pateg ti maysa a banag. Kasano a ti panangammo iti pateg ti maysa a banag ket mangbalbaliw iti wagas a panangusartayo iti daytoy? Mabalin a sukisoken dagiti miembro ti klase ti Mormon 8:12–22 ket ibinglay no ania ti kinuna ni Moroni maipapan iti pateg ti Libro ni Mormon (“daytoy a kasuratan”). Mabalinda pay nga ibinglay dagiti bukod a padas a naipakitan kadakuada ti pateg ti Libro ni Mormon. Kasano a maipakitatayo nga ipategtayo ti Libro ni Mormon?

  dagiti kopia ti Libro ni Mormon iti nadumaduma a pagsasao

  Ilawlawag ti Libro ni Mormon ti doktrina a naisuro iti Biblia.

• Tapno matulongan dagiti miembro ti klase a mangbigbig no kasano nga agsinnuporta ti Libro ni Mormon ken ti Biblia, mabalinmo nga awisen ida a mangbasa iti Mormon 7:8–10 ken manggupgop iti panangiladawan ni Mormon iti dua a kasuratan iti bukodda a balikas (“ti kasuratan nga umayto kadagiti Gentil manipud kadagiti Judio” ket maitudo iti Biblia). Ibilang ti panangidrowing iti dua nga agsinnukot a sirkulo iti pisarra ket suratan ti maysa iti ti Biblia ken ti sabali iti ti Libro ni Mormon. Mabalin nga ilista dagiti miembro ti klase dagiti pagpadaan ti dua a libro ti nasantuan a kasuratan iti agsinnukot a benneg ken pagdudumaan iti dadduma pay a benneg. (Ti video “Bible and Book of Mormon” iti ChurchofJesusChrist.org ti mangted kadagiti nalawag a pannakaammo ken pannakaawat [insights].) Wenno, ibilang ti panangilista iti sumagmamano a kinapudno iti ebanghelio iti pisarra ken panangawis kadagiti miembro ti klase a mangkita iti Pangiwanwan iti Nasantuan a Kasuratan tapno mangsapul kadagiti bersikulo manipud iti Libro ni Mormon ken iti Biblia a mangtulong kadakuada a makaawat kadagiti kinapudno.

Mormon 8:1–11

Makapagbalintayo a napudno uray no agmaymaysatayo.

• Mabalin a marikna nga agmaymaysa ti sumagmamano a tao iti klasem kadagiti panagkagumaanda nga agbiag iti ebanghelio. Ania ti masursuroda manipud iti pagwadan ni Moroni a makatulong kadakuada? Ibilang ti panangawis kadagiti miembro ti klase a mangbasa iti Mormon 8:1–11 ken mangpanunot kadagiti saludsod a kayatda a damagen ken ni Moroni tapno masursuruan maipapan no kasano a nagtalinaed isuna a napudno iti baet dagiti narigat a kasasaadna. Ania ti mangparegta kadakuada maipapan iti pagwadanna? Bayat ti panangibinglayda kadagiti kapanunotanda, allukoyem dagiti miembro ti klase a mangibinglay kadagiti bukod a padas idi isuda wenno sabali pay nga am-ammoda ket nagtalinaed a napudno, uray no nariknada nga agmaymaysada. Kasano a tinulongan ida ti Apo?

Mormon 8:26–41; 9:1–30

Naisurat ti Libro ni Mormon para iti aldawtayo.

• Bayat ti yaasideg iti gibus daytoy a tawen ti panagadal iti libro ni Mormon, nalabit a mabalin nga utoben dagiti miembro ti klase maipapan no apay a mariknada a naisurat daytoy a libro para iti aldawtayo. Mabalinmo nga irugi ti panaglilinnawag babaen ti panangbasa iti palawag ni Presidente Ezra Taft Benson iti “Dagiti Nainayon a Resources.” Kalpasanna mabalin a yaplikar dagiti miembro ti klase dagiti saludsod ni Presidente Benson iti Mormon 8:26–41. Apay a pinaregta ti Apo ni Moroni a mangiraman kadagitoy a balikas iti kasuratan? Kasano a tulongandatayo iti aldawtayo?

• Kas naisuro iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, naglaon ti Mormon 9:1–30 iti mensahe ni Moroni kas sungbat iti kinaawan iti pammati ken ni Jesucristo iti aldawtayo. Nalabit a mabalinmo a bingayen ti klase iti tallo a grupo ket awisem ti tunggal grupo a mangsapul iti balakad a makatulong kadakuada kadagiti sumaganad a bersikulo: 1–6 (dagiti pagbanagan ti saan a panamati ken ni Cristo), 7–20 (ti kinapateg ti panamati iti Dios ti paltiing ken dagiti milagro), ken 21–30 (ti balakad ni Moroni kadatayo).

• Nupay naisurat ti Mormon 9:1–6 “kadagiti saan a mamati ken ni Cristo,” makatulong a panunotentayo nga agtaktakdertayo amin iti sango ti Dios iti maysa nga aldaw tapno maukom. Idawat nga irebyu dagiti miembro ti klase dagitoy a bersikulo, a mangsapsapul kadagiti balikas ken ragup ti balikas a mangiladawan no anianto ti rikna dagiti nadangkes iti dayta nga aldaw. Ania ti mabalin nga aramidentayo tapno maliklikan dagitoy a rikna? Mabalin a masarakan dagiti miembro ti klase dagiti makatulong a nalawag a pannakaammo ken pannakaawat [insights] iti estoria nga insarita ni Presidente Boyd K. Packer iti “Dagiti Nainayon a Resources.”

• Mamati ti adu a tao ita a nagsardengen dagiti milagro. Kasano a mausarmo dagiti pannursuro ni Moroni a mangtulong kadagiti miembro ti klase a mamati iti maysa a “Dios dagiti milagro”? Mabalinmo nga irugi babaen ti panangidawat kadagiti miembro ti klase a mangrebyu iti Mormon 9:7–26 ket sapulenda dagiti milagro nga inyallukoy ni Moroni a patientayo. Ania ti masursurotayo manipud kadagitoy a bersikulo maipapan iti Dios ken iti aramidna iti aldawtayo? Ania ti nasken nga aramidentayo tapno maaramid ti Dios dagiti milagro? (kitaen iti Mormon 9:20–21). Ania dagiti milagro a nakitatayon?

icon iti panagsursuro

Yallukoy ti Panagsursuro iti Pagtaengan

Mapanunot kadi dagiti miembro ti klasem no kasano a mapapigsada ti pammatida iti Nailangitan nga Ama ken ni Jesucristo? No kasta, awisem ida a mangsukisok iti Ether 1–5 para kadagiti wagas a mangtulong a mangpapigsa iti pammatida.

resources icon

Dagiti Nainayon a Resources

Naisurat ti Libro ni Mormon para iti aldawtayo.

Kinuna ni Presidente Ezra Taft Benson:

“Iti kaano man saan a naaddaan iti libro dagiti Nephite; saan met a naaddaan dagiti Lamanite iti nagkauna a panawen. Nairanta daytoy a para kadatayo. …

“Pinaneknekan ti tunggal maysa kadagiti kangrunaan a mannurat ti Libro ni Mormon nga insuratna para kadagiti masakbayan a kaputotan [kitaen iti 2 Nephi 25:21; Jacob 1:3; Mormon 7:1; 8:34–35]. …

“No nakitada ti aldawtayo, ken napilida dagita a banag a kaindaklanan ti pategda kadatayo, ket saan a no kasano ti nasken a panagadaltayo iti Libro ni Mormon? Nasken a kanayon a saludsodentayo iti bagbagitayo, ‘Apay a pinaregta ti Apo ni Mormon (wenno ni Moroni wenno Alma) a mangiraman iti dayta iti kasuratanna? Ania nga adalen ti masursurok manipud iti dayta a mangtulong kaniak nga agbiag iti daytoy nga aldaw ken panawen?’” (“The Book of Mormon—Keystone of Our Religion,” Ensign, Nob. 1986, 6).

Makapagbalintayo a nadalus.

Insarita ni Presidente Boyd K. Packer maipapan iti panagbiahena iti uneg ti innem nga aldaw kas maysa nga agtutubo a kaduana ti tripulante ti militar iti maysa a napudot, naasuk a tren ti bagahe, a saan a makapagdigos wenno makapagsukat iti kawes. Idi agsardeng ti tren, napan ti mabisin a tripulante iti maysa a panganan.

“Nagadu ti tao, isu a nakipagliniakami iti atiddog a linia nga agu-uray a makapagtugaw. Siak ti umuna, adda iti likudak ti sumagmamano a babbai a nagkawes iti napintas. Uray no saan a tumaltaliaw, ammo ti natakneng a babai iti sangok nga addakamin idiay.

“Timmaliaw ket kinitanakami. Sa tinaliaw ken minatmatannak manipud iti ulo agingga iti ramay ti saka. Idiay a nakatakderak a nakakawes iti nabasa iti ling-et, narugit, nauring, nakuretret a uniporme. Kinunana iti maysa a manglalais a tono, ‘Ayna apo, nagrugitdan a lallaki!’ Naiturong amin a mata kadakami.

“Awan duadua a tinarigagayanna nga awankami koma idiay; inranudko ti kiddawna. Nariknak a narugitak, saanak a komportable, ken mababainak.”

Kalpasanna inadaw ni Presidente Packer ti Mormon 9:4 ket imdasigna ti padasna iti panagbalin a naespirituan a narugit iti imatang ti Dios. Ti panangipaneknek a ti Pannubbot ni Jesucristo laeng ti kakaisuna a wagas a makapagbalin a naespirituan a nadalus, kinunana kalpasanna:

“Mapanunotyo kadi no kasano ti nariknak idi nakitak iti kamaudianan a no sinurotko dagiti ania man a kondision nga intuding ti Mannubbot, diak kasapulan nga ibturan ti panagsagaba iti panagbalin a naespirituan a narugit? Panunotenyo ti makalinglingay, makawayawaya, ken makaintan-ok a rikna nga umay kadakayo no makitayo ti kinapudno ti Pannubbot ken ti maaramat a kinapateg daytoy kadakayo kas indibidual iti inaldaw” (“Washed Clean,” Ensign, Mayo 1997, 9–10).

Panangpadur-as iti Panangisurotayo

Ikararagam dagiti miembro ti klasem. Adda kadi maysa a tao iti klasem nga agkarkarigatan? Kas met laeng iti panangikararagan ti Mangisalakan ken ni Pedro (kitaen iti Lucas 22:31–32), maikararagam dagiti sursuruam tapno mapapigsada (kitaen iti Panangisuro iti Wagas ti Mangisalakan, 6).