“Oktoba 19–25. 3 Nipai 27–4 Nipai: ‘Ejjeļo̧k Bar Armej Rem̧ōņōņōļo̧k Ilubwiljin Armej ro,’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Oktoba 19–25. 3 Nipai 27–4 Nipai,” Itok, Ļoor Eō—N̄an Jabōt Jikuuļ: 2020
Jar eo an Jisōs, jān Derek Hegsted
Oktoba 19-25
3 Nipai 27–4 Nipai
“Ejjeļo̧k Bar Armej Rem̧ōņōņōļo̧k Ilubwiljin Armej ro”
Katak Ippād Make 3 Nipai 27–4 Nipai ej wāween eo em̧m̧antata n̄an m̧aanjabpopo n̄an katakin. Katak ko im ļōmņak ko ilo laajrak in remaron̄ jipan̄ eok uwaak n̄an im̧we ko an jetōb kwoj būki ilo am̧ katak.
Je En̄jake ko Rej Im̧we Eok
Kajjitōk bwe ren Kwaļo̧k
Juon wāween n̄an kōketak ro uwaan kūlaaj eo kwaļo̧k en̄jake ko jān aer ekkatak ippāer make ej n̄an kajjitōk ippāer n̄an pukot juon al in jar eo ej iookļo̧k juon m̧ool rekar ekkatak ilo 3 Nipai 27–4 Nipai. Innām remaron̄ kwaļo̧k al in jar ko rekar loi im ewi wāween an al kein jelet m̧ool ko ilo jeje ko rekwojarjar.
Katakin Katak ko
Kabun̄ eo an Jisōs Kraist ej ņae etan kōn āt eo Etan im ej ekkal ioon gospel eo An.
-
Ekōnono kōn āt eo etan Kabun̄ in emaron̄ kam̧wilaļļo̧k kam̧m̧oolol eo an ro uwaan kūlaaj eo am̧ kōn membership eo aer ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ļōmņak in kajjitōk ippān ro uwaan kūlaaj eo am̧ n̄an kōlaajrake āt ko etan doulul ko rellōn̄ im kōmeļeļeiki ta et ko rej jiron̄ kōj kōn doulul kein. Innām ro uwaan kūlaaj eo remaron̄ in riiti 3 Nipai 27:1–12, pukot ta eo Rilo̧mo̧o̧r eo ekar katakin kōn āt eo an Kabun̄ in. Remaron̄ barāinwōt kwaļo̧k ta meļeļein n̄an er n̄an erom ro uwaan Kabun̄ eo an Kraist. Ta meļeļein n̄an bōk iood āt eo Etan?
-
En̄in ej bar juon wāween n̄an ekōnono kōn aorōk in āt eo etan Kabun̄ eo an Rilo̧mo̧o̧r eo. Ālkin juon iien ekōnono kōn m̧ool ko loi ilo 3 Nipai 27:1–22, komaron̄ je tarlep in etan Kabun̄ eo ioon boot eo. Innām ro uwaan kūlaaj eo remaron̄ kāālet naan ko ilo āt eo im elmakote ewi wāween an kajjojo naan ko jipan̄ kōj jeļā wōn kōj ak ta eo jej tōmak ie. Ennaan eo an Būreejtōn M. Russell Ballard ilo “Kein Jipan̄ ko Jet” emaron̄ jipan̄. Etke ej aorōk n̄an kōjerbale āt eo etan Kabun̄ in ilo ad kwaļo̧k tōmak ko ad ippān ro jet?
-
Ālkin kōmeļeļeiki bwe Kabun̄ eo An ej aikuj in “ekkaļ ioon gospel eo [An]” (3 Nipai 27:10), Rilo̧mo̧o̧r eo ekar kōmeļeļeiki ta gospel eo An. Bōlen komaron̄ karuwaineneik ro uwaan kūlaaj eo n̄an kwaļo̧k ewi wāween aer maron̄ kōmeļeļeiki juon m̧ōttāer ta gospel eo. Innām komaron̄ kajjitōk ippāer n̄an etale 3 Nipai 27:13–22, pukot wāween an Rilo̧mo̧o̧r eo kōmeļeļeiki gospel eo An. Ewi wāween ad kwaļo̧k tukadu in ta eo Rilo̧mo̧o̧r eo ekar ba? Ilo ad katak meļeļe eo an Rilo̧mo̧o̧r eo kōn gospel eo, ta en̄jake ko jej būki kōn wāween n̄an mour kōn gospel eo ilo aolepān mour ko ad?
Bok in Mormon eo ej juon kōkkaļļe bwe jerbal eo an Anij ilo raan kein āliktata em̧ōj an kūrm̧ool.
-
Bōlen komaron̄ jinoe juon ekōnono kōn 3 Nipai 29–30 jān am̧ kōnono kōn kōkkaļļe ko. N̄an waanjon̄ak, ro uwaan kūlaaj eo remaron̄ kwaļo̧k etan kōkkaļļe ko me rej jiron̄ kōj bwe ewōr juon ļan̄ ej itok ak bwe season ko rej oktak. Innām remaron̄ riiti 3 Nipai 29:1–3 n̄an ekkatak ta em̧m̧an eo ilo an waļo̧ktok n̄an kōj Bok in Mormon eo, eo Mormon ekar ņaetan “men kein” (barāinwōt lale 3 Nipai 21:1–7). Ta ennaan eo Irooj ekar letok ilo 3 Nipai 29:4–9 n̄an ro otemjej renaaj “kōrraat e” ak “kaarmejjete” jerbal eo an Anij ilo raan ko āliktata? Ewi wāween bwe riiti Bok in Mormon raan otemjej ej kōkajoorļo̧k tōmak eo ad ilo men kein me armej ro jet rej “kōrraat e” ak “kaarmejjete” ilo raan kein ad? Komaron̄ in kajjitōk ippān ro uwaan kūlaaj eo n̄an riiti kajjitōk eo an Irooj ilo 3 Nipai 30 im kwaļo̧k ewi wāween an Bok in Mormon kar jipan̄ er bōk kajjitōk in.
Oktaktok n̄an Jisōs Kraist im gospel eo An ej tōlļo̧k n̄an ippān doon im lem̧ōņōņō.
-
Bwebwenato eo ilo 4 Nipai ej kōmeļeļeiki lan̄lōn̄ eo me emaron̄ itok n̄an mour ko ad—āinwōt kajjojo armej ro, āinwōt baam̧le ko, im āinwōt juon ward ak stake—ilo ad kajjieon̄ eļapļo̧k ad lukkuun oktaktok n̄an Jisōs Kraist. Ļōmņak in kajjitōk ippān ro uwaan kūlaaj eo n̄an etale 4 Nipai 1:1–18 im je ioon boot eo kōjeraam̧m̧an ko me ekar itok n̄an armej ro ke rekar aolep oktaktok n̄an Irooj. Ewi wāween an oktaktok ko aer jelet wāween aer kōm̧anm̧an n̄an doon? Bōlen ro uwaan kūlaaj eo remaron̄ in kwaļo̧k ewi wāween an gospel eo kar bōktok ejja kain kōjeraam̧m̧an ko n̄an baam̧le ko aer ak ward eo aer. N̄an jipan̄ ro uwaan kūlaaj eo meļeļe ewi wāween ad kōj kajjojo maron̄ mour eļapļo̧k āinwōt armej ro ilo 4 Nipai im ewi wāween ad maron̄ kōketak eļapļo̧k ippān doon im m̧ōņōņō ilubwiljin ro ipeļaakid, komaron̄ riiti ennaan eo jān Elder D. Todd Christofferson ilo “Kein Jipan̄ ko Jet.” Ro uwaan kūlaaj eo remaron̄ in etale kijejeto ko aer make ilo eria kein jilu Elder Christofferson ekar kōmeļeļeiki.
-
Armej ro ilo Bok in Mormon rekar kōjenolo̧k er make āinwōt Rinipai ro im Rileman ro—im elōn̄ ro jet “-ites”—ium̧win epepen ko, ak ālkin kwaļo̧k eo an Rilo̧mo̧o̧r ro ilubwilijier, kōjenolo̧k kein rekar jako. Ālkin riiti 4 Nipai 1:17 ippān doon, bōlen ro uwaan kūlaaj eo emaron̄ in kwaļo̧k ļōmņak ko aer kōn ta kain “ites” ak kūrub ko rej waļo̧k ilo jukjukin pād eo ad rainin. Ta eo jemaron̄ in kōm̧m̧ane n̄an anjo̧ jān kain jepel kein im em̧ool erom “juon, ro nejin Kraist”? (eoon 17).
-
Ta eo ro uwaan kūlaaj eo remaron̄ ekkatak jān dikļo̧k in Zaion jukjukin pād eo kar kōmeļeļeiki ilo 4 Nipai? Komaron̄ kajjitōk ippāer n̄an etale 4 Nipai 1:19–34, pukot ta ko rekar kajem̧ļo̧k lem̧ōņōņō eo im ippān doon eo armej ro rekar en̄jake ilo enan̄in 200 iiō ko ālkin loļo̧k eo an Rilo̧mo̧o̧r eo. Ta m̧ool ko ilo eoon kein remaron̄ jipan̄ kōj kalikkar bōnjen ko im m̧wil ko me rej aikuj in oktak ilo mour ko ad im ilo jukjukin pād ko ad?
Kōketak Ekkatak ilo Mweo
Mormon 1–6 ej kōmeļeļeiki m̧akūtkūt ko rekabūrom̧ōjm̧ōj rekar tōlļo̧k n̄an kakkure eo an armej in Nipai ro. N̄an kōketak ro uwaan kūlaaj eo n̄an riiti jebta kein, kajjitōk ippāer n̄an pukot men ko rej kūli kōn Rinipai ro me rej loi aer waļo̧k ilo raan ko ad.
Kein Jipan̄ ko jet
Āt eo etan Kabun̄ eo an Kraist.
Būreejtōn M. Russell Ballard ekar ba:
“Ikar ļōmņak eļap kōn etke Rilo̧mo̧o̧r eo ekar letok ratimjuon naan ko an āt eo n̄an Kabun̄ eo An em̧ōj an jepļaaktok. Emaron̄ bōlen aitok, ak eļan̄n̄e jej ļōmņak kake āinwōt an kōmeļeļeiki tarlep in ta eo ej Kabun̄ in, ej m̧ōkaj an erom tōmak aiboojoj, im ekajju. Ewi wāween an jabdewōt meļeļe maron̄ kajju im alikkar im aaet kwaļo̧k ilo jejjo wōt naan?
“Aolep naan ej kalikkar im lukkuun aorōk. Naan eo Eo ej kwaļo̧k jekjek eo ejenolo̧k an Kabun̄ eo em̧ōj an jepļaaktok ilubwilijin kabun̄ ko an laļ in.
“Naan ko Kabun̄ eo an Jisōs Kraist ej kwaļo̧k bwe ej Kabun̄ eo An [lale 3 Nipai 27:8]. …
“ilo Raan-ko Āliktata ej kōmeļeļeiki bwe ejja Kabun̄ eo wōt me Kabun̄ eo Jisōs Kraist ekar ejaake ilo iien kwaļo̧k eo An ioon laļ in ak ekar jepļaaktok ilo raan kein āliktata. Jej jeļā bwe ekar wōr juon wōtlo̧k, ak juon bun̄ jān tōmak, menin aikuj an Jepļaaktok eo an Kabun̄ eo An em̧ool im likio ilo raan kein ad.
“Armej ro Rekwojarjar ej meļeļein bwe ro uwaan rej ļoor E im kajjieon̄ in kōm̧m̧an Ankilaan, kōjparok kien ko An, im m̧aanjabpopo bar juon alen n̄an mour Ippān im ippān Jemedwōj Ilan̄ ilju im jekļaj. Armej ro Rekwojarjar ej kōnono kōn ro otemjej ro rej pukot n̄an kōm̧m̧an bwe mour ko aer ren kwojarjar jān kōm̧m̧an bujen n̄an ļoor Kraist” (“The Importance of a Name,” Ensign ak Liahona, Nov. 2011, 80).
Ta eo enaaj bōke n̄an kalōk Zaion?
Elder D. Todd Christofferson katakin: “Zaion ej Zaion kōnke kadkad, bōnjen ko, im tiljek an zitizen ro an [lale Moses 7:18]. … Eļan̄n̄e jenaaj ejaake Zaion ilo m̧ōko im̧ōd, branch ko, ward ko, im stake ko, jej aikuj ebbōkak n̄an jon̄an in. Enaaj menin aikuj (1) n̄an erom juon wōt ilo bōro im juon kōļmenļo̧kjeņ; (2) n̄an erom, kajjojo armej im aoelp, juon jarlepju in armej rekwojarjar; im (3) n̄an kōjparok rijeram̧ōļ ro im riaikuj ro ilo wājabdik eo me jej joļo̧k jeramōļ ilubwiljid. Jejjab maron̄ kōttar m̧ae iien Zaion ej itok kōn men kein n̄an kwaļo̧ki—Zaion enaaj itok wōt eļan̄n̄e rej waļo̧k” (“Come to Zion,” Ensign ak Liahona, Nov. 2008, 38).
Kōkōm̧anm̧anļo̧k Ad Katakin
Kōjerbal elōn̄ kain kōl ko. Emaron̄ in pidodo n̄an bōk aenōm̧m̧an kōn kajjojo jekjek in katakin, ak oktak in kilen katak ko rej tōpar elōn̄ laajrak in kain membōr ro. Ļōmņak kōn kil ko kwaar kōjerbali kiiō—kwaar kōjerbale bwebwenato ko, katak jān men ko, pija ko, im ko jet? (lale Teaching in the Savior’s Way, 7).