Jisōs ej waļokļo̧k n̄an Rinipai ro

Pija in an Kraist waļokļo̧k n̄an Rinipai ro jān Andrew Bosley

Oktoba 12–18

3 Nipai 20–26

“Kom̧ij Ajri ro Nejin Bujen eo”

Kōtļo̧k bwe Jetōb eo en tōl ekkatak eo am̧ 3 Nipai 20–26. Enaaj jipan̄ eok kalikkar pedped in katak ko me remaron̄ ļap tokjāer n̄an armej ro kwoj katakin.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Ālkin riit ippān doon naan ko an Rilo̧mo̧o̧r eo ilo 3 Nipai 23:1, komaron̄ in kajjitōk ippān ro uwaan kūlaaj eo ta eo rekar pukote ilo aer riiti jeje ko rekwojarjar ilo wiik in. Ta eo rekar loe?

pija ej bōk jikin katakin

Katakin Katak ko

3 Nipai 20:25–41; 21:9–11, 22–29

Ilo raan kein āliktata, Anij enaaj kōm̧m̧ane juon jerbal eļap im kabwilōn̄lōn̄.

• Rilo̧mo̧o̧r eo ekar kōnono kōn “juon jerbal eļap im kabwilōn̄lōn̄” (3 Nipai 21:9) bwe Jemān enaaj kōm̧m̧ane ilo raan ko āliktata. Bōlen ro uwaan kūlaaj eo remaron̄ in kwaļo̧k ta eo rekar ekkatak kōn jerbal ilo aer ekkatak jebta kein ilo m̧ōko m̧weer. Kajjitōk ko āinwōt kein remaron̄ im̧we juon iien ekōnono: Ta eo Rilo̧mo̧o̧r eo enaaj kar ba enej waļo̧k ilo juon raan ilju im jekļaj? (lale eļaptata 3 Nipai 20:30–32, 39–41; 21:22–29). Etke E enaaj ņaetan men kein “reļļap” im “kabwilōn̄lōn̄”? Ta kein kam̧ool eo jej loe me jerbal in ej bōk jikin? Ewi wāween ad bōk koņaad ie?

• N̄an jipan̄ ro uwaan kūlaaj eo loe ewi wāween an kar Rikanaan Josep Smith kar jipan̄ kakūrm̧ool jerbal in eļap im kabwilōn̄lōn̄ an Irooj, komaron̄ kwaļo̧k juon pija in Rikanaan eo im kajjitōk ippān ro uwaan kūlaaj eo n̄an riiti 3 Nipai 21:9–11, pukot naan ko im meļeļe ko me rej kakeememej er kōn mour im jerbal eo an Josep Smith. N̄an waanjon̄ak, ewi wāween an kar Irooj “naaj leļo̧k n̄an e kajoor bwe e en naaj bōktok er [gospel eo] n̄an ro riAelōn̄ ko”? (eoon 11). Etke eaorōk n̄an jeļā bwe jerbal in karejar eo an Josep Smith kar kanaan kake jān Rilo̧mo̧o̧r eo? (lale barāinwōt 2 Nipai 3).

• Komaron̄ barāinwōt jipan̄ ro uwaan kūlaaj eo loe er make ilo jerbal eo eļap kar kanaan kake ilo jebta kein jān riit ippān doon 3 Nipai 20:25–27. Eļan̄n̄e emenin aikuj, komaron̄kalikkare bwe n̄e jej kōm̧m̧anij bujen ko ippān Irooj, jej erom ineen Ebream. Ewi wāween ad maron̄ āinwōt ro ineen Ebream kōjeraam̧m̧an “aolep nukwin ko iaļ”? (eoon 25). Ro uwaan kūlaaj eo remaron̄ in kejōkļo̧kjeņ kōn kajjitōk in ilo aer riiti ennaan eo an Būreejtōn Russell M. Nelson ilo “Kein Jipan̄ ko Jet” im kwaļo̧k ļōmņak ko aer.

3 Nipai 23; 26:1–12

Rilo̧mo̧o̧r eo ekōņaan bwe jen etale eoon ko.

• Ta iktōltōl ko an Rilo̧mo̧o̧r eo ippān Rinipai ro ej kwaļo̧k kōn wāween An en̄jake kōn jeje ko rekwojarjar? N̄an jipan̄ ro uwaan kūlaaj eo pukote, komaron̄ kajjitōk ippān jimettanier n̄an riiti 3 Nipai 23 im jimettan eo juon n̄an riiti 3 Nipai 26:1–12; innām remaron̄ kwaļo̧k ippān doon ta eo rekar loe. Remaron̄ barāinwōt kwaļo̧k ļōmņak ko ewōr ippāer kōn wāween kwaļo̧k n̄an Irooj bwe eoon ko rej aorōk n̄an kōj. N̄an waanjon̄ak, ta oktak eo ikōtaan kappukoti eoon ko im baj riiti wōt eoon kein? (lale 3 Nipai 23:1).

3 Nipai 24:1–6

Irooj ej āinwōt juon kijeek in kōkōm̧anm̧anļo̧k.

• Pija ko remaron̄ kōkōm̧anm̧anļo̧k ekōnono eo am̧ kōn 3 Nipai 24:1–6. N̄an waanjon̄ak, komaron̄ kwaļo̧k juon jāān dōkā ak jet joop ilo an ro uwaan kūlaaj eo riiti eoon ko n̄an pukot wāween an men kein ekkejelļo̧k n̄an Rilo̧mo̧o̧r eo im mijen eo An. Komaron̄ barāinwōt kwaļo̧k ippān kūlaaj eo kōmeļeļe eo kōn kōkōm̧anm̧anļo̧k eo an jāān dōkā eo im joop eo “Kein Jipan̄ ko Jet.” Ak komaron̄ in kwaļo̧k pija in alooj eo “The Refiner’s Fire” (ChurchofJesusChrist.org). Ewi wāween an Irooj “āinwōt juon kijeek ej kōkōm̧anm̧anļo̧k, im āinwōt joop eo”? (eoon 2). Ta eo waanjon̄ak kein rej katakin kōj kōn wāween an Rilo̧mo̧o̧r eo karreoik kōj?

3 Nipai 24:7–18

Anij elukkuun tūriamo̧ kake n̄an ro rej ro̧o̧lļo̧k n̄an E.

• Komaron̄ in kwaļo̧k bwe katak ko kōn juon m̧ōttan jon̄oul ilo 3 Nipai 24:8–12 rej uwaak ko n̄an kajjitōk eo ilo eoon 7: “Ekōjkan ad naaj ro̧o̧lļo̧k [n̄an Irooj]?” Ta kadkad eo ikōtaan “[ro̧o̧lļo̧k] n̄an [Irooj]” im kōļļā juon m̧ōttan jon̄oul? Ro uwaan kūlaaj eo remaron̄ kwaļo̧k ewi wāween aer kar bōk kōjeraam̧m̧an kōllaajrak ilo eoon 10–12 ilo aer kōļļāik juon m̧ōttan jon̄oul. Ewi wāween an m̧ool kein maron̄ lukkuun jipan̄ juon armej eo ej en̄taan ilo an kōļļā juon m̧ōttan jon̄oul?

• Kain m̧wil rot eo kōmeļeļeiki ilo 3 Nipai 24:13–15 emakijkij loe ilo laļ in rainin? Rōjan̄ ro uwaan kūlaaj eo bwe ren kwaļo̧k ta eo renaaj kar ba n̄an juon eo ej en̄jake bwe mour ej pidodoļo̧k ak em̧m̧anļo̧k n̄an ro rejjab kōjparok kien ko. Ekkar n̄an 3 Nipai 24, ewi wāween an Irooj kōjeraam̧m̧an ro rej jerbal n̄an E? Komaron̄ barāinwōt rōjan̄ er n̄an pukot waanjon̄ak ko ilo 3 Nipai 22. (barāinwōt lale Mosaia 2:41; Alma 41:10.)

3 Nipai 25:5–6

Būruwōd rej aikuj in oktakļo̧k n̄an ro jibūd im jim̧aad.

• N̄an kōmeļeļeiki ļōmņak in kōn ukōt būruwōd n̄an ro jibūd im jim̧aad remej, komaron̄ kajjitōk ippān juon uwaan kūlaaj eo n̄an oktakļo̧k jān kūlaaj eo im kōmeļeļeiki ro uwaan kūlaaj eo jān an keememej (ia eo rej jijet ie, ta eo rej kōņake, im men ko eierļo̧k wōt). Innām ļeo ak lio emaron̄ oktakļo̧k n̄an kūlaaj eo im bar kajjieon̄. Ta eo waanjon̄ak in ej katakin kōj kōn ukōt būruwōd n̄an ro jibūd im jim̧aad remej kōn jerbal in tampeļ im menmenbwij an baam̧le? Ālkin riiti 3 Nipai 25:5–6, bōlen ro uwaan kūlaaj eo remaron̄ kwaļo̧k ewi wāween an būruweer kar oktakļo̧k n̄an ro jibūer im jim̧aer ro remej. Komaron̄ barāinwōt kajjitōk ippān ribōk eddo eo an jerbal in tampeļ im menmenbwij an baam̧le an ward eo n̄an kwaļo̧k kadkadier n̄an jet iaan kein jerbal ko an menmenbwij. Ewi wāween an jerbal in jelet aiintok Israel ilo an Russell M. Nelson kōmeļeļeiki ilo “Kein Jipan̄ ko Jet”?

pija ej bōk jikin ekkatak

Kōketak Ekkatak ilo Mweo

Ilo 3 Nipai 27–4 Nipai jej riit kōn “armej ro “[rem̧ōņōņōļo̧k] ilubwiljin armej ro otemjej kar ejaak jān pein Anij” (4 Nipai 1:16). Kwaļo̧k n̄an kūlaaj eo bwe riiti jebta kein emaron̄ jipan̄ kōj wāween ad loe lem̧ōņōņō eo n̄an kōj make im baam̧le ko ad.

pija ej bōk jikin kein jipan̄ ko

Kein Jipan̄ ko jet

Komaron̄ erom̧ m̧ōttan juon men eļap.

Būreejtōn Russell M. Nelson ekar kwaļo̧k:

“Em̧ool erkein rej raan ko āliktata, im Irooj ej kōm̧ōkajļo̧k jerbal eo An n̄an aiintok Israel. Aiintok in ej men eo eļap an aorōk ej bōk jikin ilo laļ in rainin. Ejjeļo̧k men maron̄ keidi kōn kilepān, ejjeļo̧k bar men keidi kōn aorōk in, ejjeļo̧k bar men keidi kōn bōtata eo an. Im eļan̄n̄e kwoj kāālet n̄an, eļan̄n̄e kwoj kōņaan, komaron̄ in juon eo m̧ōttan ekilep. Komaron̄ in juon m̧ōttan eo eļap kōn juon men eļap, juon men eo bōtata!

“N̄e jej kōnono kōn aiintok, jej ba m̧ool in eaorōk: aolep kajjojo ajri ro nejin Jemedwōj Ilan̄, jim̧or ilo rejete ko an rōn̄ōl eo, rej aikuj ron̄jake ennaan eo an gospel eo kar kōjepļaaktok an Jisōs Kraist. …

“… Ļōmņak kake! Jān aolep armej ro rekar mour ioon laļ in, kōj jej armej ro rej bōk koņaer ilo m̧akūtkūt in āliktata, an aiintok doon in eļap. Ewi jon̄an an kam̧ōņōņōk menin! …

“Aiintok doon in ej aikuj in meļeļein men otemjej n̄an kwe. En̄in ej mijen eo me kar jilkintok eok n̄an ippm laļ in” (“Hope of Israel” [worldwide devotional for youth, June 3, 2018], broadcasts.ChurchofJesusChrist.org).

Kōkōm̧anm̧anļo̧k im Kareeoiki.

Jelba eo kar loe ilo an peljoļo̧k ippān men ko jet ilo kar kobaikļo̧k im ejake aaen. Etto, juon rikōm̧anm̧an jelba eo enaaj bōk jelba ilo an likūt aaen eo ilo juon kijeek ebwil n̄an an lukkuun bwil. Menin enaaj kōm̧m̧an am (men ko rettoonon im renana) im jib lōn̄tak ioon aijet in aaen eo ebwil. Rikōm̧anm̧an in enaaj joļo̧k nana ko, likūt wōt jelba eo erreo, eo maron̄ in kile e kōn alikkar in an meram.

Juon riae nuknuk eo ekar juon eo ekar karreo im kamoujļo̧k nuknuk ko. Nuknuk eo enaaj rum̧ļo̧k ilo dān eo kere ippān “joop eo an riae nuknuk eo,” eo kar kōm̧m̧ane n̄an joļo̧k oil im ettoonoon. Ilo iien eo nuknuk eo ej jojo, riae nuknuk eo enaaj nuknukji ak keņe n̄an joļo̧k jān an ettonon. (Lale “Refiner’s Fire and Fuller’s Soap,” New Era, June 2016, 6–7.)

Kōkōm̧anm̧anļo̧k Ad Katakin

Katakin armej, jab katak ko. “Wāween eo kwoj kōm̧anm̧an n̄an armej ej āinwōt an aorōk ilo am̧ katakin er. Jet iien jerbal ko ad m̧okta kōn kwaļo̧ke juon katak emaron̄ bōbraeik kōj jān ad kwaļo̧k ad iakwe n̄an ro jej katakin. Eļan̄n̄e menin ej waļo̧k n̄an eok, ļōmņak kōn ewi wāween am̧ maron̄ pedped wōt ioon ta eo elukkuun aorōk” (Teaching in the Savior’s Way, 6).