Jisas i kamkamaot long Ol Man blong Nifae

Laet blong Fes blong Hem i Bin Kamkamaot, I Saen long Olgeta, i kam long Gary L. Kapp

28 Septemba–11 Oktoba

3 Nifae 17–19

“Luk, Glad blong Mi I Fulap”

Yu stat blong rere taem yu mekem stadi blong yuwan blong ol skripja. Kam Folem Mi—Blong Wanwan Man, Woman mo Famli i save kam mekem stadi blong yu i fulwan, mo aotlaen ia i givim tu samfala aedia blong helpem yu blong rere.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Long 3 Nifae 17:1–3, Sevya i bin invaetem ol pipol blong oli gobak long hom blong olgeta mo “mekem rere ol tingting blong [olgeta]” bifo oli kambak blong Hem i tijim olgeta bakegen. Yu save askem ol studen blong yu olsem wanem nao oli bin rere blong kam tekpat long toktok insaed long klas, mo wanem nao oli bin tingting hevi long hem.

tijing pikja bokis

Stap Tijim Doktrin

3 Nifae 17; 18:24–25, 28–32

Sevya i stret eksampol ia blong fasin blong givhan.

• Yumi evriwan i gat ol janis blong givhan long ol narawan, mo yumi evriwan i save mekem gud moa blong kam gud moa. Wan wei blong lanem samting aot long eksampol blong Sevya long saed blong fasin o wok blong givhan, hem i blong rid, 3 Nifae 17 olsem wan klas, mo invaetem ol memba blong klas blong givim tingting taem oli faenem wan samting we i stap tijim olgeta abaot wok blong givhan. ?Wanem nao mi lanem abaot fasin blong Sevya we i mekem se Hem nao i bigfala eksampol blong fasin mo wok blong givhan? ?Wanem nao ol trutok we yumi lanem abaot wok mo fasin blong givhan aot long eksampol blong Sevya? Mo tu, yu save lukaotem blong gat sam moa niu tingting we oli stap long 3 Nifae 18:24–25 mo 28–32. Afta, ol memba blong klas oli save toktok raon long ol spesifik samting we oli filim insperesen blong mekem, blong folem eksampol blong Sevya long saed blong wok mo fasin blong givhan.

  Jisas i stap blesem ol pikinini blong Ol Man blong Nifae

  Luk Ol Smolwan blong Yufala, i kam long Gary L. Kapp

3 Nifae 17:13–22; 18:15–25; 19:6–9, 15–36

Sevya i tijim yumi olsem wanem blong prea.

• Blong helpem ol memba blong klas blong oli lanem samting aot long ol plante eksampol mo tijing abaot prea we oli stap long 3 Nifae 17–19, yu save raetem long bod: ?Hu? ?Olsem wanem? ?Wetaem? Mo ?From wanem? mo invaetem klas blong lukaotem ol ansa long olgeta kwestin ia mo olsem wanem oli go wetem prea; lukluk insaed long ol ves ia: 3 Nifae17:13–22; 18:15–25; mo 19:6–9, 15–36. ?Wanem nara niu tingting nao ol memba blong klas oli gat taem oli stap ridim olgeta ves ia? Ol toktok blong Elda Richard G. Scott we i stap long “Sam Moa Risos,” i save kam givhan long toktok insaed long klas. Yu save invaetem ol memba blong klas blong serem wanem we oli mekem blong mekem se prea blong olgetawan mo famli prea i gat moa mining (luk long 3 Nifae 18:18–21).

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim sam kwestin blong tingting hevi abaot prea taem bae yufala i ridim olgeta ves ia. Yu save askem ol memba blong klas blong serem ol niu tingting we oli gat abaot olgeta kwestin ia. O yu save invaetem samfala memba blong klas blong oli kam we oli rere gud blong toktok raon long wan samting we oli bin lanem abaot prea insaed long 3 Nifae 17–19. ?Wanem nao oli bin gat insperesen blong mekem, blong mekem se ol prea blong olgeta i gat plante moa mining?

• Jisas i bin tijim se yumi mas prea oltaem (luk long 3 Nifae 18:15–18). Sapos yu holem wan lesen we i yusum wan samting, bae i helpem klas blong yu blong andastanem wanem Hem i bin tijim. Eksampol: maet bae yu fulumap wan kontena wetem wota blong ripresentem paoa blong Setan blong save lidim tingting blong man. Putum wan pepa tawel (we i ripresentem yumi) i stap gud daon insaed long wan kap (we i ripresentem fasin blong prea oltaem). Tanem kap ia i apsaed daon, mo pusum i go stret i go daon insaed long kontena blong wota. Pepa tawel ia, bae i mas stap drae nomo insaed long kap ia, nomata we wota i raonem hem. Lesen ia we i yusum wan samting mo 3 Nifae 18:15–18, ?oli tijim wanem long yumi abaot prea? (luk tu long D&K 10:5). ?Hem i minim wanem blong “prea oltaem”? ?Olsem wanem nao prea i save helpem yumi blong stanap agensem ol paoa blong Setan blong lidim tingting blong yumi? Tingting blong givim, long ol memba blong klas, sam minit blong blong oli raetemdaon samting we oli save mekem blong kam antap long wei we oli stap prea.

3 Nifae 18:1–12

Yumi save kam fulap long Spirit taem yumi tekem mo kakae sakramen.

• Blong stat blong toktok raon long ol tijing blong Sevya abaot sakramen, we i stap long 3 Nifae 18, yu save invaetem klas blong yu blong mekem ol smol grup; afta, givim ol skripja ia long wanwan grup ia blong oli ridim mo toktok raon long olgeta: Matiu 26:26–28; 3 Nifae 18:1–12; mo Doktrin mo Ol Kavenan 20:75–79; 27:1–4. Afta we oli ridim wanwan skripja we yu givim long olgeta, wanwan grup i save tingting long wan o tu kwestin abaot sakramen, we ansa blong hem i stap insaed long ol ves we oli stap ridim, mo oli raetem ol kwestin ia long bod. Afta, haf blong klas i save luklukgud insaed long ol skripja blong faenem ansa long ol kwestin ia. Ol memba blong klas oli save toktok raon long wei we oli save gat wan eksperiens we i gat moa mining abaot fasin blong tekem mo kakae sakramen.

• ?I minim wanem blong stap “fulap” taem yumi tekem mo kakae sakramen? (luk long 3 Nifae 18:4–5, 9; 20:9). Tingting blong invaetem ol memba blong klas blong oli tutu, mo blong toktok raon long kwestin ia taem oli stap ridim 3 Nifae 18:1–12 tugeta. Yu save invaetem ol memba blong klas blong tingting gud long las taem we oli bin filim se oli bin “fulap” long saed blong spirit taem oli bin tekem mo kakae long sakramen. Mebi oli save toktok raon long ol samting we i bin stopem olgeta, o i bin pulum tingting blong olgeta blong oli no “fulap” wetem sakramen, mo serem ol aedia long samfala wei blong winim ol kaen samting olsem we i save kam blokem yumi.

3 Nifae 19:9–15, 20–22

Ol disaepol blong Jisas Kraes oli lukaotem blong kasem presen we i Tabu Spirit.

• Tingting blong askem ol memba blong klas blong serem wan samting we oli wantem tumas. ?Wanem nao oli rere blong mekem blong save kasem samting ia? Hemia i save lidim yufala blong toktok raon long wanem olgeta twelef disaepol oli “wantem tumas” olsem we oli tokbaot insaed long 3 Nifae 19:9–15 mo 20–22. ?From wanem hemia bae i impoten tumas long olgeta? ?From wanem hem i impoten long yumi? Folem olgeta ves ia, ?olsem wanem nao yumi save lukaotem, wetem strong tingting, blong gat kampani blong Tabu Spirit?

lanem samting pikja bokis

Stap Leftemap Tingting blong Lanem Samting long Hom

Lod i talem: “Ol toktok blong Aesea oli bigwan tumas” (3 Nifae 23:1). Blong leftemap tingting blong ol memba blong klas blong ridim 3 Nifae 20-26, yu save talem long olgeta se, insaed long ol japta ia, Jisas i stap eksplenem sam long ol toktok ia blong Aesea we oli “bigwan tumas” ia. Invaetem ol memba blong klas blong oli tingting hevi se from wanem nao ol toktok blong Aesea oli bigwan tumas. Leftemap tingting blong olgeta, blong nekis Sandei, oli kam we oli rere blong serem wanem oli bin lanem.

risos pikja bokis

Sam Moa Risos

Valiu blong prea.

Elda Richard G. Scott i testifae abaot hamas prea i impoten:

“Yumi stap prea long Papa long Heven long tabu nem blong Pikinini blong Hem we Hem i lavem tumas, Jisas Kraes. Prea i wok gud moa taem yumi traehad blong yumi stap klin mo yumi stap obei, taem yumi gat ol stret tingting, mo taem yumi wantem mekem wanem Hem i stap askem long yumi. Wan prea we yumi talem wetem tingting we i stap daon, i save givim daereksen mo pis.

“Yu no stap wari tumas long wei we yu no save talem gud ol filing blong yu. Jes toktok nomo long Papa blong yu we i gat lav mo sore, mo i save andastanem man. Yu yu pikinini blong Hem, we yu impoten tumas long Hem, mo Hem i lavem yu i stret evriwan, mo Hem i wantem helpem yu. Taem yu stap prea, luksave se, Papa we i stap long Heven, Hem i stap kolosap, mo Hem i stap lisin.

“Wan ki blong wan prea we i kam gud moa, hem i blong lanem blong askem ol raet kwestin. Tingting blong jenisim fasin blong askem ol samting we yu wantem, mo lukaotem, wetem ones fasin, blong save ol samting we Hem i wantem blong yu. Afta, taem yu lanem tingting blong Hem, prea se bae Hem i lidim yu blong gat paoa blong mekem olgeta samting ia oli kamtru.

“Sapos yu filim se yu stap longwe long Papa blong yumi, maet bae i from samfala risen. Nomata wanem nao hem i risen, taem yu stap gohed blong askem Hem blong helpem yu, bambae Hem i lidim yu blong mekem olgeta samting we bae i putumbak tras ia long yuwan se, Hem i stap kolosap. Prea iven we yu no wantem prea. Samtaem, olsem wan smol pikinini, yumi no mekem ol gud samting, mo yumi filim se yumi no save kam kolosap long Papa wetem wan problem blong yumi. Be, long tetaem ia nao yumi nidim moa blong stap prea. Yu neva mas filim se yu no klin inaf blong save prea.

“Mi stap askem miwan sapos yumi rili kasem bigfala strong paoa blong prea, be kasem taem ia nomo we yumi fesem wan bigfala problem we i nidim blong stretem kwik, mo yumi luksave se yumi no gat paoa blong stretem problem ia. Afta, bae yumi tanem yumi long Papa, mo gat tingting i stap daon mo luksave se yumi dipen fulwan long Hem. Hem i help blong faenem wan ples we i haed, o i no gat noes, we yumi save talem long laod voes, ol filing blong yumi; bae yumi save talemaot hat blong yumi i longwan mo wetem hamas paoa blong hat blong yumi” (“Using the Supernal Gift of Prayer,” Ensign o Liahona, May 2007, 8).

Stap Kam Antap long Fasin blong Yumi blong Stap Tij

Traehad blong gat lav olsem Kraes. Sapos i gat wan memba blong klas blong yu we i nidim blong oli felosip long hem, tingting long wei we bae yu helpem hem blong hem i filim se hem i pat blong klas. Eksampol: yu save invaetem ol memba blong klas blong oli sidaon long saed blong man o woman ia, mo kam fren wetem hem.