Samuel Rileman eo ej katakin ioon wōrwōr eo

Samuel Rileman eo ioon Wōrwōr eo, jān Arnold Friberg

O̧kwōj 31–Jeptōm̧ba 6

Hilamōn 13-16

“Naan in Lan̄lōn̄ im M̧ōņōņō Eļap”

Ewi wōt katak ko an Samuel Rileman eo im Kanaan ko kwoj en̄jake ke renaaj lukkuun jipan̄ ro uwaan kūlaaj eo am̧? Ilo am̧ ekkatak Hilamōn 13–16, kejōkļo̧kjeņ kōn wāween am̧ maron̄ jipan̄ er lo meļeļe ilo jebta kein.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ro uwaan kūlaaj eo n̄an kwaļo̧k ippān juon m̧ōttāer men ko rekar ekkatak, jet iaan men ko rekar em̧m̧anļo̧k aer meļeļe kaki, ak jet iaan men ko rekar mour kaki ilo aer riiti bwebwenato eo an Samuel Rileman eo ilo Hilamōn 13–16 wiik in. Innām kōm̧m̧an bwe jet iaer ren kwaļo̧k ippān aolep ro uwaan kūlaaj eo.

pija ej bōk jikin katakin

Katakin Katak ko

Hilamōn 13

Rikarejar ro an Irooj rej kōnono im m̧akūtkūt ekkar n̄an tōl eo an Anij.

• Irooj ekar kajjitōk ippāņ Samuel Rileman eo n̄an kōm̧m̧ane juon men eo me emaron̄ in bwe an pen: n̄an kwaļo̧k n̄an armej ro rekar kadiwōjļo̧k e jān bukwōn eo aer. Riiti Hilamōn 13:2–5 emaron̄ kakeememej ro uwaan kūlaaj eo kōn men ko reppen Irooj ekar kajjitōk ippāer n̄an kōm̧m̧ani. Kajjitōk ippāer n̄an kwaļo̧k en̄jake ko aer. Ewi wāween an kar Irooj jipan̄ er? N̄an waanjon̄ak, ro uwaan kūlaaj eo remaron̄ in kwaļo̧k en̄jake koke Irooj ej likūt juon men ilo būruwier me Eaar kōņaan bwe ren ba n̄an juon armej (lale eoon 4). Ta kōjeraam̧m̧an ko ro uwaan kūlaaj eo rekar loi ke rekar ļoor tōl eo an Irooj?

  Būreejtōn Russell M. Nelson

  Rikanaan eo ej kwaļo̧k n̄an kōj Jisōs Kraist.

• Men̄e kakkōļ ko an Samuel rekar kwaļo̧ki n̄an Rinipai ro epen būruweer, Hilamōn 13 ewōr ie jet katak ko n̄an kōjwōj aolep. N̄an jipan̄ ro uwaan kūlaaj eo loe meļeļe eo aer make ilo naan ko An, komaron̄ kajjitōk ippāer n̄an lale Hilamōn 13 n̄an juon ennaan eo me emaron̄ jejjet n̄an raan kein ad. (Eļan̄n̄e rej aikuj jipan̄, komaron̄ je ioon boot eo laajrak in eoon kein: 8, 21–22, 26–29, 31, im 38.) Innām remaron̄ in kwaļo̧k ta eo rej loe ilo aer ruo ļo̧k ruo, ak ilo kumi ko reddik, ak ippān aolepān kūlaaj eo. Ta ennaan ko reitierļo̧k wōt rikanaan ro em̧ōj kar aer litok n̄an kōj rainin?

Hilamōn 14; 16:13–23

Kōkkaļļe ko im kabwilōn̄lōn̄ ko remaron̄ kōkajoorļo̧k tōmak eo an ro rejjab kapen būruweer.

• Unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko kajjitōk n̄an pukot kōkkaļļe ko me Irooj ekar litok n̄an kōj “bwe [jen] maron̄ tōmak ilo Etan” (Hilamōn 14:12). Bōlen ro uwaan kūlaaj eo remaron̄ in kwaļo̧k ta eo rekar loe ilo aer kejōkļo̧kjeņ kōn ļōmņak in. Lukkuun lale im kwaļo̧k bwe kōkkaļļe ko ilo mour ko ad remaron̄ kam̧ōņōņō im ļapļo̧k kilaer n̄an kōj make jān kōkkaļļe ko Samuel ekar atooni. Ta jibadbad ko jet kōn kōkkaļļe ko rej kōnono kaki ilo Hilamōn 14:28–30? Ro uwaan kūlaaj eo remaron̄ barāinwōt kwaļo̧k men ko jet im Irooj ekar kōm̧m̧ani n̄an jipan̄ er kaddōkļo̧k tōmak ilo E.

• Riit kōn wāween an naan in kanaan ko an Samuel kar kūrm̧ool im aer maron̄ kalōk tōmak eo an ro uwaan kūlaaj eo ilo Jisōs Kraist im mijen eo An. Bōlen ro uwaan kūlaaj eo remaron̄ in kōjerbal Hilamōn 14 n̄an ejaake juon jaat me ej kōllaajrake kanaan ko Samuel kōn ļotak eo an Kraist im mej eo an ilo juon side im eoon ko me kanaan kein rekar kūrm̧ool ilo side eo juon. Jet iaan eoon in jipan̄ kein remaron̄ kitbuuj eoon ko jān 3 Nipai 1:15–21 im 3 Nipai 8:5–25. Etke ej aorōk n̄an kōj bwe jen jeļā kōn naan in kanaan kein im aer kūrm̧ool?

• Ro uwaan kūlaaj eo emaron̄ m̧ōj aer kar kile—ilo Hilamōn 16 im jikin ko jet ilo jeje ko rekwojarjar—bme lo kōkkaļļe ko im kabwilōn̄lōn̄ ko rejjab menin aikuj n̄an kōm̧m̧an bwe juon en tōmak ilo Kraist. Kajjitōk ippāer n̄an kwaļo̧k jet waanjon̄ak ko jān eoon ko kajjojo ro rekar loe kōkkaļļe ko im rejjan̄in de tōmak. Ekkar n̄an Hilamōn 16:13–23, Etke elōn̄ armej ro ilo iien eo an Samuel Rileman eo rekar jab tōmak kōkkaļļe ko im naan kanaan ko? Ewi wāween an Setan kareel armej ro n̄an “kōjatdikdik kōn aer kajoor eo aer make im … mālōtlōt” rainin? (Hilamōn 16:15). Ta eo jemaron̄ ekkatak jān bwebwenato in me emaron̄ jipan̄ kōj kattoļo̧k kain bōd ro in?

Hilamōn 15:3

Irooj ej kauweiki ro Ej iakwe.

• Naan ko an Samuel ewōr ie elōn̄ kauwe ko reļļap, ak Hilamōn 15:3 ej letok juon kōļmenļo̧kjeņ ejenolo̧k kōn kauwe eo jān Irooj. Juon wāween n̄an jipan̄ ro uwaan kūlaaj eo meļeļe kōļmenļo̧kjeņ in ej n̄an riiti eoon in ippān doon im kajjitōk ippāer bwe ren kwaļo̧k kam̧ool eo rej loe kōn iakwe im tūriamo̧ eo an Anij ilo naan kanaan ko im kakkōl ko. Ewi wāween an kauwe in jān Irooj erom juon kōkkaļļe kōn iakwe eo An?

• N̄an jipan̄ ro uwaan kūlaaj eo meļeļeļo̧k kōn ennaan en ilo Hilamōn 15:3, komaron̄ kwaļo̧k jilu kōttōbar ko kōn kauwe in ekwojarjar im kar katakin jān Elder D. Todd Christofferson (lale “Kein Jipan̄ ko Jet”). Ajeji kūlaaj eo n̄an jilu kumi ko, im kajjitōk ippān kajjojo kumi n̄an ekōnono kōn juon iaan kōttōbar kein (eoon ko im pija in alooj eo kwaļo̧ki ilo “Kein Jipan̄ ko Jet” emaron̄ jipan̄). Innām kajjojo kumi emaron̄ kwaļo̧k ippān kūlaaj eo jabdewōt en̄jake ko jān ekōnono eo aer me ej jipan̄ er meļeļeļo̧k bwe Irooj ej kauweiki ro Ej iakwe er.

Hilamōn 16

Rikanaan eo ej ba kajijen Irooj n̄an kōj.

• Ilo Hilamōn 16, Ta eo jej ekkatak jān ro raar bōk katak ko an Samuel? Ta eo jej ekkatak jān ro raar jab bōk E? Emaron̄ in kōketak kōj n̄an ron̄jake an ro uwaan kūlaaj eo kwaļo̧k ewi wāween aer bōk naan in kam̧ool eo aer kōn aorōk in ļoor rikanaan ro remour. Rej barāinwōt kwaļo̧k ewi wāween aer naaj kōjerbale Hilamōn 16 ak naan ko an Elder Andersen ilo “Kein Jipan̄ ko Jet” n̄an kōmeļeļeiki juon armej etke rej aikuj kāālet n̄an ļoor rikanaan eo.

pija ej bōk jikin ekkatak

Kōketak Ekkatak ilo Mweo

N̄an kōketak ro uwaan kūlaaj eo n̄an riiti 3 Nipai 1–7 wiik in tok, komaron̄ ba n̄an er bwe elōn̄ wōt iaan naan in kanaan kein rej riiti kaki ilo wiik in renaaj kūrm̧ool ilo jebta kein.

pija ej bōk jikin kein jipan̄ ko

Kein Jipan̄ ko jet

Kōttōbar ko an kauwe eo ekwojarjar.

Elder D. Todd Christofferson ekar kwaļo̧k jilu kōttōbar ko an kauwe eo ekwojarjar (lale “As Many as I Love, I Rebuke and Chasten,” Ensign ak Liahona, May 2011, 97–100):

1. “N̄an kareel kōj n̄an ukweļo̧k.” Lale Ether 2:14–15; Katak im Bujen ko 1:27; 93:41–50; 105:6.

2. “N̄an kōm̧anm̧an im kōkwojarjare kōj.” Lale Mosaia 23:21–22; Katak im Bujen ko 101:1–5; 136:31.

3. “N̄an bar kajejjet iaļ eo ad ilo mour n̄an ta eo Anij ejeļā ej juon iaļ em̧m̧anļo̧k.” Lale bwebwenato eo an Būreejtōn Hugh B. Brown im wōjke eo emeo̧ leen ilo kōnono eo an Elder Christofferson (peij 98–99); “The Will of God” (video, ChurchofJesusChrist.org).

Jej m̧ōņōņō bwe ewōr juon ad rikanaan.

Elder Neil L. Andersen ekar katakin:

“Juon rikanaan ejjab jutak ikōtaam̧ im Rilo̧mo̧o̧r eo. Ijoke, ej jutak ituruum̧ im ba kajjien iaļ eo n̄an Rilo̧mo̧o̧r eo. Eddo eo im menin letok eo eaorōk tata an juon riknaan n̄an kōj ej an kam̧ool em̧ool, jeļāļo̧kjeņ eo an em̧ool, bwe Jisōs ej Kraist eo. Āinwōt Piter eo etto, rikanaan eo ad ej kwaļo̧k, ‘[E ej] Ri Kraist, Nejin Anij e mour’ [Matu 16:16; bar lale Jon 6:69].

“Ilo raan kane tok, reilikļo̧k kōn mour eo ad ilo kanniōk, jenaaj m̧ōņōņō bwe jaar etetal ioon laļ in ilo tōre eo an juon rikanaan emour. Ilo raan en, Ij jar bwe jenaaj maron̄ in ba:

“Jekar ron̄jake e. Jekar tōmak e. Jekar ekkatak naan ko an kōn kijenmej im tōmak. Jekar jar kōn e. Jekar jutak ippān. Jekar ettā n̄an ļoor e. Jekar iakwe e” (“Rikanaan eo an Anij,” Ensign ak Liaona, Māe 2018, 27).

Kōkōm̧anm̧anļo̧k Ad Katakin

Kajjieon̄ jeļā kajjeen ro kwoj katakin. Ejjeļo̧k ruo armej rej āinwōt juon. Kajjojo armej kwoj katakin ewōr juon an pedped ejenolo̧k, jibadbad, im jon̄ak in maron̄. Jar n̄an jeļā ewi wāween am̧ maron̄ kōjerbali oktak kein n̄an jipan̄ ro uwaan kūlaaj eo am̧ ekkatak. Ilo an em̧m̧anļo̧k am̧ meļeļe ro kwoj katakin, komaron̄ in ejake iien ko katakin ko eļap meļeļeier im ememļo̧kjeņ. (Lale Teaching in the Savior’s Way, 7.)