“O̧kwōj 24–30: ‘Keememej Irooj,’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“O̧kwōj 24-30. Hilamōn 7–12,” Itok, Ļoor Eō—N̄an Jabōt Jikuuļ: 2020
Kōmeļeļe jān Nipai ilo juon wōrwōr in jikin kallib jān Jerry Thompson
O̧kwōj 24–30
Helamōn 7–12
“Keememej Irooj”
Nipai ej rōjan̄ armej ro an n̄an Keememej Irooj. Komaron̄ in kōm̧m̧ane ejja wāween in n̄an ro kwoj katakin. Ilo am̧ riit Hilamōn 7–12, je im̧we ko kōn wāween am maron̄ jipan̄ ro uwaan kūlaaj eo keememej Irooj.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ro uwaan kūlaaj eo n̄an je ioon boot eo jet pedped in katak ko an gospel eo loi ilo Hilamōn 7–12, ippān eoon jipan̄ ko im meļeļe ko ijo me maron̄ loi pedped in katak kein ie. Innām komaron̄ kōnono kaki āinwōt juon kūlaaj ewi wōt pedped in katak kein im eoon ko kwonaaj ekōnono kaki.
Katakin Katak ko
Rikanaan ro rej kwaļo̧k ankilan Anij n̄an armej ro.
-
N̄an jipan̄ kūlaaj eo am̧ ekkatak jān Hilamōn 7–11 kōn jerbal im eddo ko an rikanaan ro, komaron̄ jino riit ippān doon jino kōn “Rikanaan” ilo Unin tōl n̄an Jeje ko Rekwojarjar (scriptures.ChurchofJesusChrist.org). Ro uwaan kūlaaj eo remaron̄ kalikkar jerbal ko an rikanaan ro kōnono kaki im kōllaajraki ioon boot eo. Komaron̄ kajjitōk ippān ro uwaan kūlaaj eo n̄an kajjojo etale juon jebta jān Hilamōn 7–11. Kajjitōk ippāer n̄an lale ewi wāween an Nipai kar kakūrm̧ool jerbal ko kar kōllaajraki ioon boot eo. Ewi wāween an rikanaan ro ad remour im rijilōk ro kakūrm̧ool jerbal kein? Ewi wāween ad rejtake er ilo eddo ko aer?
-
Etke rikanaan ro jet iien rekar kōnono kōn kajoor āinwōt an Nipai kar kōm̧m̧ane? Ļōmņak in kajjitōk ippān ro uwaan kūlaaj eo n̄an riiti Hilamōn 7:11–29, pukot kōkkaļļe ko Nipai ekar leļo̧k im un ko ekar aikuj bwe en kajoor ilo an liļo̧ki. Ta kōkkaļļe in kanaan ko rekar im̧we kōj n̄an ukweļo̧k im itok n̄an Irooj? Ilo “Kein Jipan̄ ko Jet” kwonaaj loe juon metaphor me Elder Neil L. Andersen ekar kōjerbale n̄an jipan̄ kōj meļeļe kauwōtata ko an kōwaani kakkōļ ko an rikanaan ro.
Tōmak ej aikuj in ekkal ioon eļapļo̧k jān kōkkaļļe ko im kabwilōn̄lōn̄ ko.
-
Juon wāween n̄an kōnono kōn eoon kein ej n̄an ajije kūlaaj eo n̄an ruo m̧ōttan im kajjitōk ippān kajjojo kumi n̄an riiti Hilamōn 9:1–20 im pijaiki er make ilo jikin eo an emaron̄ ļalem em̧m̧aan ro ak riekajet ro. Ta eo armej rein remaron̄ kar en̄jake? Ta eo emaron̄ in kar kareel kajjojo kumi n̄an uwaak eoktakļo̧k n̄an ejja naan in kanaan in ekabwilōn̄lōn̄ wōt? Ekōjkan ad kanooj lale bwe kabwilōn̄lōn̄ ko ren kalōk naan in kam̧ool ko ad bōtaab ren jab erom pdped ko wōt an naan in kam̧ool ko ad? Ewi wāween ad lale eļan̄n̄e naan ko an rikanaan eo ilo raan kein ad rej m̧ool?
Irooj ej letok kajoor n̄an ro pukot Ankilaan im kōjparok kien ko An.
-
Bwebwenato eo kōn an Irooj kōjeraam̧m̧an Nipai ilo Hilamōn 10 emaron̄ im̧we ro uwaan kūlaaj eo am̧ erom tiljekļo̧k kappukōt im kōm̧m̧ane ankilan Irooj. Ro uwaan kūlaaj eo remaron̄ riiti eoon 1–12, pukōt ta eo Nipai ekar kōm̧m̧ane n̄an bōk lōke eo an Irooj im ewi wāween an Irooj kōjeraam̧m̧an e. Innām remaron̄ kwaļo̧k waanjon̄ak ko an armej ro jet ro rekar pukōt im kōm̧m̧ane ankilan Irooj “kōn ejjeļo̧k ebbeer” (Hilamōn 10:4), mekarta jān jeje ko rekwojarjar ak mour ko aer make. Ewi wāween an Irooj kar kōjeraam̧m̧an armej rein kōn kajoor n̄an “rum̧laļļo̧k” (Hilamōn 10:9) ilo m̧ool ilo toļ ko ilo mour ko aer? Leļo̧k n̄an ro uwaan kūlaaj eo iien n̄an kejōkļo̧kjeņ kōn wāween ko emaron̄ em̧m̧anļo̧k aer kappukōt ankilan Irooj im kōjparok kien ko An.
Irooj ekōņaan bwe jen keememej E.
-
Elōn̄ ro uwaan kūlaaj eo am̧ rekar kōm̧m̧ani bujen ko n̄an aolep iien keememej Jisōs Kraist. Bōlen remaron̄ kwaļo̧k ippān doon jet men ko me rekar jipan̄ er “keememej E iien otemjej” (Moronai 4:3; KB 20:77), jim̧or ilo iien jeraam̧m̧an ko im iien ko reppen. Innām ro uwaan kūlaaj eo remaron̄ etale Hilamōn 12 n̄an un ko me armej n̄e rej itōn meļo̧kļo̧ke Irooj. Ewi wāween ad maron̄ anjo̧ jān kōņaan ko im kōmeļeļeiki ilo jebta in? Ewi wāween an apan̄ ko kar jipan̄ kōj keememej Irooj? (lale Hilamōn 11:4–7).
-
N̄an kwaļo̧k kijejeto eo bwe ej aikuji keememej juon men, komaron̄ leļo̧k n̄an ro uwaan kūlaaj eo jejjo minit ko n̄an aer lale Hilamōn 12. Innām remaron̄ kajjitōk ippāer kajjitōk ko kōn jebta eo n̄an lale ta eo rej keememej e. Bōlen remaron̄ kwaļo̧k ta eo rej kōm̧m̧ane n̄an keememej meļeļe ko kōn juon teej. Ewi wāween an menin einļo̧k wōt kijejeto eo me ej aikuji ad “keememej Irooj”? (Hilamōn 12:5). Ewi wāween an oktak? Kajjitōk ippān kūlaaj eo n̄an pukōt juon eoon ak juon ennaan jān Hilamōn 12 me remaron̄ in kwaļo̧k ilo im̧ōko im̧wer ak kakkilōklōke n̄an kakeememej er n̄an keememej em̧m̧an eo im kajoor eo an Anij.
Kōketak Ekkatak ilo Mweo
N̄an rōjan̄ ro uwaan kūlaaj eo n̄an riiti Hilamōn 13–16, komaron̄ kwaļo̧k ke Kanaan ko an Samuel Rileman eo kōn m̧akūtkūt ko rej ekkejelļo̧k ippān ļotak eo an Rilo̧mo̧o̧r eo im Dōbwāāl eo maron̄ keidi n̄an m̧akūtkūt ko ad ilo raan kein me renaaj itok im̧aan Itok eo an Rilo̧mo̧o̧r eo Kein Karuo.
Kein Jipan̄ ko jet
Ron̄jake tōl eo an rikanaan ro.
Elder Neil L. Andersen ekar kwaļo̧k en̄jake kein:
“Ro rej kāālet n̄an jerbal n̄an Irooj naaj aolep iien maron̄ ron̄jake im eļaptata n̄an Rikanaan eo. …
“… In kōmeļeļeiki kōn juon waanjon̄ak. Baam̧le eo am ekar mour ium̧win elōn̄ iiō ko ilo bukwōn in Florida. Kōnke Florida elukkuun ļap pok ie, ujooj ko ijeņ rej katōki kōn juon ujooj ekilep ņae etan Saint Augustine. Juon menin mour ejōkkar n̄an juon ujooj in Florida eo, ņaetan mole cricket.
“Juon joteen ke armej eo ej jokwe iturin m̧weo imō im n̄a kom̧ro kar jutak ilo jikinwe ko im̧aan kōjem̧ eo, ekar kile juon mennin mour jidikdik ej kijoone sidewalk eo. ‘Kwoj aikuj in būtūki ujooj ņe am̧,’ ekar kakkōļ. ‘Lale juon ņe mole cricket.’ Ikar būtūki ujooj eo kōn dān in m̧anm̧an mennin mour jidik eo jejjo wōt wiik ko rem̧ootļo̧k, im ikar en̄jake bwe ejjeļo̧k aō iien ak jāān n̄an kōm̧m̧ane bar juon alen.
“Jibbon̄ōn̄ eo juon ilo an meram, ikar lukkuun ekkatak kōn ujooj eo aō. Ekar lukkuun eddōk im aiboojoj an m̧aroro. Ikar lale ioon ujooj ko n̄an lale eļan̄n̄e imaron̄ kar ello mennin mour jiddik ko. Ikar maron̄ loe juon. Ij keememej aō ļōmņak, ‘Ekwe, bōlen mole cricket in edik bōlen ekar kijoone ujooj eo aō im ilo̧k n̄an ujooj eo an armej ro ej jokwe iturin m̧weo im̧ō.’ …
“Bwebwenato eo, kōn menin, jem̧ļo̧kin ekabūrom̧ōjm̧ōj. Ikar diwōjtok im̧aan kōjem eo juon jibbon̄, enan̄in 10 raan tokālik in am̧ro armej eo ej jokwe iturin m̧weo im̧ō kar kōnono. Ļo̧kjenaō, āinwōt n̄e ekar waļo̧k ilo bon̄ōn eo, elōn̄ jikin ko rekar aolep oktak kōļaer n̄an m̧ōņakņak. Ikar ettōrļo̧k n̄an m̧ōn wia an jikin kallib, wiaki juon dān in m̧anm̧an menin mour jiddik, im būtūki, ak ikar rum̧wij. Ujooj eo ekar jorrāān, im n̄an an bar ro̧o̧l n̄an jekjek eo am m̧oktata ekar aikuj in juon ujojo ewōr bwidej ie, awa in jerbal ko raittok, im ļap wōņāān.
“Kakkōļ eo an armej eo ej jokwe iturin m̧weo im̧ō ekar dilepān mennin jipan̄ eo an ujooj eo aō. Ekar loe men ko me ikar jab maron̄ loi. Ekar jeļā juon men eo im ikar jab jeļā. Ekar jeļā bwe mole cricket ko rej mour ium̧win bwidej im rej m̧akūtkūt wōt ilo bon̄, rej kōm̧m̧an bwe aō etale in raan en jab em̧m̧an. Ekar jeļā bwe mole cricket ko rekar jab m̧ōn̄ā bōlōk in ujooj ko ak rekar lo kijeer ilo okar ko. Ekar jeļā bwe menin tabōlbōl kein reddik remaron̄ kan̄ eļap okar ko m̧okta jān aō naaj maron̄ loe wāween eo ej jelet bwidej eo. Ikar kōļļāiki juon wōņaan eo em̧m̧an n̄an kaju būruwō make. …
“… Elōn̄ mole cricket ko an jetōb me rej kōjerbal wōrwōr in kōjparok ko ad im ejaake okar in kōjparok ko ad make. Elōn̄ wōt iaan mennin mour jiddik kein renana rej waļo̧k deddik, aolep iien nan̄in jab loi wōt. …
“Jen jab ļoor jon̄ak eo ikar kwaļo̧ke ilo aō kar kōm̧m̧ane n̄an mole cricket ko in Florida. Lale bwe jen jab kōwaane kōkkaļļe kien. Lale bwe jen jab make kaju būrwōd make. Jen aolep iien ron̄jake im ekkatak ilo ettā bōro im tōmak, m̧ōņōņō in ukweļo̧k ej aikuj in menin aikuj” (“Prophets and Spiritual Mole Crickets,” Ensign, Nov. 1999, 16–18).
Kōkōm̧anm̧anļo̧k Ad Katakin
Kwaļo̧k iakwe. “Pedped wōt ioon jekjek ko am̧, kwaļo̧k iakwe n̄an ro kwoj katakin emaron̄ leļo̧k nōbar ko rem̧ool, itok limo kōn mour ko aer, ron̄jake er, kobaik er ilo katak eo, kōm̧m̧ane m̧akūtkūt in jerbal in jipan̄ ko n̄an er, ak iakiakwe er n̄e kwoj loe e” (Teaching in the Savior’s Way, 6).