Jisōs ej lotok Rinipai ro

N̄a Meram in Laļ, jān James Fullmer

Jeptōm̧ba 14–20

3 Nipai 8–11

“Jutak im Wōnm̧aantak n̄an Ippa”

Reilikļo̧k n̄an im̧we ko kwaar je ilo iien eo kwaar ekkatak jān 3 Nipai 8–11 emaron̄ im̧we jet ļōmņak ko n̄an katakin. Elmakot kein ilaļ remaron̄ lewaj elōn̄ļo̧k ļōmņak ko.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jet iien armej ekkā aer kwaļo̧k ippān ro jet ļōmņak ko aer eļan̄n̄e kwoj kajjitōk. N̄an waanjon̄ak, komaron̄ kajjitōk ippān 3 Nipai 8–11 bwe katakin er kōn kadkad in m̧wil eo an Jisōs Kraist. Komaron̄ leļo̧k kajjitōk in jejjo raan m̧okta bwe ren maron̄ pojak in kwaļo̧k n̄e rej itok.

pija ej bōk jikin katakin

Katakin Katak ko

3 Nipai 8–10

Eļan̄n̄e jej ukweļo̧k, Rilo̧mo̧o̧r eo enaaj aiintok, kōjparok, im kōmour kōj.

• Jebta kein rekitbuuj bwebwenato in jorrāān im kakkure ko, ak rej barāinwōt katakin katak ko ilo jetōb im remaron̄ jipan̄ kōj epaakeļo̧k Jisōs Kraist. Bōlen komaron̄ ajije kūlaaj eo n̄an jilu kūrub ko im leļo̧k n̄an kajjojo kūrub ko bwe ren etale juon jebta jān 3 Nipai 8–10, lale naan ko ak meļeļe ko me rej kōmeļeļeiki ta eo armej ro rekar ekkatak im en̄jake. Juon armej jān kajjojo kumi emaron̄ in kwaļo̧k ippān ro jet uwaan kūlaaj eo ta eo kūrub eo aer ekar loe. Rōjan̄ ro uwaan kūlaaj eo n̄an ekōnono kōn wāween an katak kein ilo jetōb maron̄ jipan̄ kōj epaakeļo̧k Rilo̧mo̧o̧r eo.

• Juon ennaan eaorōk ilo jebta kein ej kōn an Rilo̧mo̧o̧r eo pukot tok kōj kōn iakwe im tūriam̧o men̄e ilo iien mālijjon̄ ko ad reppen. Komaron̄ kajjitōk ippān ro uwaan kūlaaj eo n̄an ļōmņak kōn juon armej eo ej jelm̧ae juon iien eapan̄ innām pukot naan ko an Rilo̧mo̧o̧r eo ilo 3 Nipai 9:13–22 im 10:1–10 n̄an pukot meļeļe ko me remaron̄ jipan̄ armej eo. Bōlen ro uwaan kūlaaj eo remaron̄ barāinwōt kwaļo̧k en̄jake ko aer n̄e Rilo̧mo̧o̧r eo ekar pukotļo̧k er.

3 Nipai 9:19–22

Irooj ej aikuji “bōro e rup im jetōb ettā.”

• M̧okta jān an kar Rilo̧mo̧o̧r eo itok, ro retiljek ilo ānen kallim̧ur eo rekar pokake kien Moses, ko ekitbuuj katok kōn mennin mour. N̄an jipan̄ ro uwaan kūlaaj eo meļeļeļo̧k kien in, komaron̄ etale jidik Moses 5:5–8. Etke armej ro an Anij kar kakien er n̄an katok kōn mennin mour ilo raan ko etto? Ta kien eo ekāāl im Rilo̧mo̧o̧r eo ekar letok ilo 3 Nipai 9:20, im ewi wāween an jitōn̄ kōj n̄an E im n̄an katok eo An? Kout kein kōn kien katok rej pād ilo “Kein Jipan̄ ko Jet” remaron̄ jipan̄.

• Ewi wāween am̧ maron̄ jipan̄ ro uwaan kūlaaj eo meļeļe ta meļeļein n̄an bōk juon bōro e rup im jetōb ettā? Bōlen komaron̄ jino ilo jeje ioon boot eo naan kein e rup, ettā, im katok. Innām komaron̄ kajjitōk ippān ro uwaan kūlaaj eo n̄an jin̄aiki pija ko rej bōk jikin meļeļe eo an naan kein n̄an er ak je naan ko ak meļeļe ko me rej ekkejelļo̧k n̄an meļeļe ko aer. Kajjitōk ippān ro uwaan kūlaaj eo bwe ren kwaļo̧k pija ko aer, naan ko, ak meļeļe ko, remaron̄ ekōnono kōn wāween aer ekkejelļo̧k n̄an ta eo Rilo̧mo̧o̧r eo ej kajjitōk ippād ilo 3 Nipai 9:19–22. Kout eo jān Elder D.Todd Christofferson ilo “Kein Jipan̄ ko jet” emaron̄ barāinwōt jipan̄.

3 Nipai 11:1–17

Jisōs Kraist ej Meram eo an Laļ in.

• M̧akūtkūt ko kōmeļeļeiki ilo 3 Nipai 11:1–17 rej ilubwilijin ko rekwojarjar tata ilo Bok in Mormon eo. Ļōmņak in kōtļo̧k an ro uwaan kūlaaj eo am̧ iien n̄an riiti eoon kein ippāer make ilo aer jab kwaļo̧k ainikier. Bōlen komaron̄ jeje jejjo kajjitōk ko ioon boot eo n̄an er bwe ren kejōkļo̧kjeņ kaki ilo aer riiti, āinwōt kein: Ewi wāween am̧ kar en̄jake eļan̄n̄e kwaar pād ilubwilijin armej rein? Ta eo ej kam̧weiur eok kōn Rilo̧mo̧o̧r eo ilo eoon kein? Ta eo kwoj ekkatak jān waanjon̄ak eo an Jisōs? ak Ta en̄jake ko kwaar en̄jake āinwōt juon kam̧ool an Jisōs Kraist āinwōt Rilo̧mo̧o̧r eo? Komaron̄ kōtļo̧k an ro uwaan kūlaaj eo kwaļo̧k jet iaan ļōmņak ko aer ak im̧we ko.

  Jisōs ej kwaļo̧k jeno̧k ko ilo Pein n̄an RiNipai ro

  Juon lo̧k Juon, jān Walter Rane

3 Nipai 11:10–41

Jisōs Kraist ekar ejake katak ko An im Kabun̄ eo An.

• Emaron̄ em̧m̧an n̄an je men ko jinoin im Rilo̧mo̧o̧r eo ekar kāālet n̄an ba im kōm̧m̧ani ke Ekar loļo̧k ānen Bun̄ Peļo̧k. Bōlen ro uwaan kūlaaj eo am̧ remaron̄ in kōkkaļļeiki ak je m̧ool ko rej loi jān naan ko an Rilo̧mo̧o̧r eo im m̧akūtkūt ko ilo 3 Nipai 11:10–41. Kajjitōk ippāer n̄an kwaļo̧k ta eo rekar loe. Ta eo jej katak kōn Rilo̧mo̧o̧r eo jān eoon kein? Ta eo kwoj ekkatak kōn Kabun̄ eo An?

• N̄an maron̄ kabōjrak jab errā ko ilubwilijin armej ro kōn peptaij, Rilo̧mo̧o̧r eo ekar kwaļo̧k m̧ool ko raorōk kōn kain̄i in ilo 3 Nipai 11. N̄an jipan̄ ro uwaan kūlaaj loe m̧ool kein, komaron̄ je laajrak in eoon kein ioon boot eo: 21–25, 26–27, 33–34. Kajjitōk ippān kajjojo ro uwaan kūlaaj eo n̄an kāālet juon ak ruo eoon ko im kwaļo̧k juon iaan m̧ool ko ej katakin kōn peptaij.

pija ej bōk jikin ekkatak

Kōketak Ekkatak ilo Mweo

Kūlaaj eo am̧ remaron̄ itok limoer n̄an jeļā bwe loļo̧k eo an Rilo̧mo̧o̧r eo n̄an Rinipai ro im Rileman ro ekar kanooj jelet er jon̄an kar rein rekijon̄akiweel rekar mour ilo aenōm̧m̧an ium̧win 200 iiō tok jet (lale 4 Nipai 1). Menin emaron̄ im̧we ro uwaan kūlaaj n̄an ekkatak 3 Nipai 12–16 n̄an ekkatak ta eo Irooj ekar katakin armej ro me remaron̄ kar bōk tōl n̄an kain oktak rot in ekabwilōn̄lōn̄.

pija ej bōk jikin kein jipan̄ ko

Kein Jipan̄ ko jet

Kien eo an katok.

Būreejtōn M. Russell Ballard ekar kōmeļeļeiki juon wāween n̄an mour kōn kien katok rainin:

“Ālkin katok eo eļap an Rilo̧mo̧o̧r eo, ruo oktak ko rekar kōm̧m̧an ilo kōjerbal [kien eo an katok]. Kein kajuon, kain̄i in kwojkwoj eo ej bōk jikin kain̄i in katok eo; im kein karuo, oktak in ekar kōm̧akūt kōttōbar eo an katok jān juon mennin mour nejin juon armej n̄an armej eo make. Ilo juon wāween, katok eo ekar oktak jān mennin joortak ko n̄an rijoortak ro. …

“… Ijjelo̧kin an Irooj kajjitōk kōn mennin mour ko nejid ak leen wōjke ko, kiiō Ekōņaan aolep men ko rej dien Anij. …

“… jej anjo̧ jān kōņaan in ļōmņak ko ad make im likūt Anij im̧aan ilo mour ko ad im bujen n̄an jerbal n̄an E mekarta jete wōņāān eo, innām jej mour kōn kien eo an katok” (“The Law of Sacrifice,” Ensign, Oct. 1998, 10).

Elder Neal A. Maxwell jān Doulul eo an Jon̄oulruo Rijilōk ro ekar ba: “Katok eo em̧ool, an juon make ej jāmin likūt juon mennin mour ioon juon lokatok. Ijjelo̧kin, ej juon mennin m̧ōņōņō n̄an likūt mennin mour eo ilo kōj ioon lokatok eo im kōm̧m̧an bwe en makunļo̧k!” (“Deny Yourselves of All Ungodliness,” Ensign, May 1995, 68).

Juon bōro e rup im jetōb ettā.

Elder D. Todd Christofferson ekar kōmeļeļeiki ta meļeļe n̄an bōk juon bōro e rup im jetōb ettā:

“Komaron̄ leļo̧k mennin leļo̧k eo n̄an Irooj būruwōm̧ erup, ak ukweļo̧k, bōro im ettā, ak pokake, jetōb. Ilo m̧ool, ej mennin leļo̧k eok make—ta eo ej kwe im ta eo kwoj erom̧.

“Ewōr ke juon men ilo kwe ak ilo mour eo am̧ ejjab erreo ak ejjab wāppen? N̄e kwoj joļo̧ke, en̄ņe ej juon menin leļo̧k n̄an Rilo̧mo̧o̧r eo. Ewōr ke juon m̧wil em̧m̧an ak bōnjen em̧m̧an eo im ejjeļo̧k ilo mour eo am̧? N̄e kwonej bōke im kōm̧m̧an bwe en m̧ōttan wōt m̧wilim, kwoj leļo̧k n̄an Irooj juon mennin leļo̧k” (“When Thou Art Converted,” Ensign ak Liahona, May 2004, 12).

Kōkōm̧anm̧anļo̧k Ad Katakin

Jerbal ippān doon ippān ro uwaan baam̧le ko. “Armej ro ekar wōr aer kareel ekajoor ioon juon armej—n̄an em̧m̧anļo̧k ak nan̄inmej—ekkā wōt an armej ro ilo m̧weo im̧ōn. Kōnke m̧weo ej dilepān ekkatak im mour kōn gospel eo, kijejeto ko am̧ n̄an kōkajoorļo̧k ro uwaan juon kūlaaj renaaj lukkuun wājabdik n̄e renej jerbal ippān doon ippān … ro uwaan baam̧le eo” (Teaching in the Savior’s Way, 8–9).