Liai ej lale Liaona eo

Liai im Liaona eo, jān Joseph Brickey

Jānwōde 27–Pāpode 2

1 Nipai 16–22

“Inaaj Kōpooje juon Iaļ Im̧aami”

llo am̧ riiti 1 Nipai 16–22, ļōmņak kōn waanjon̄ak eo an Nipai ilo an jelm̧ae apan̄ ko emaron̄ kar lukkuun jipan̄ n̄an armej ro ilo kūlaaj eo am̧.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Nipai ekar loe aorōk in keidi jeje ko rekwojarjar n̄an e make im armej an (lale 1 Nipai 19:23). Ļōmņak in kajjitōk ippān ro uwaan kūlaaj eo bwe ren kwaļo̧k pedped in katak ko rekar ekkatak jān bwebwenato in ito itak eo an Nipai n̄an ānen kallim̧ur eo ej jelet mour ko am̧.

pija ej bōk jikin katakin

Katakin Katak ko

1 Nipai 16:10–16, 23–31; 18:10–13, 20–22

Anij ekar kōjerbal men ko reddik n̄an kōttōbrak men ko reļļap.

• Komaron̄ ke, ak juon armej ilo kūlaaj eo am̧, ļōmņak kōn men eo edik me maron̄ kōjerbale n̄an bōktok men eo eļap? (lale 1 Nipai 16:29). Komaron̄ kajjitōk ippān ro uwaan kūlaaj eo n̄an ekkatak ta eo rekar ekkatak kōn pedped in katak in ālkin an kajjojo armej riiti ak ilo kūrub riiti eoon kein: 1 Nipai 16:25–31; Alma 37:3–8; im Katak im Bujen ko 64:33; 123:12–17. Ewi wāween an Anij kar kōjerbal men ko reddik n̄an kōttōbrak men ko reļļap ilo mour ko ad?

• Kūlaaj eo am̧ emaron̄ in jeraam̧m̧an jān ekōnono kōn wāween an Jemedwōj Ilan̄ tōl iaļ ko ad. N̄an jinoe, komaron̄ kajjitōk ippān kūlaaj eo bwe ren ekōnono kōn pedped in katak ko me rekar kōm̧m̧an bwe Liaona eo en jerbal (lale 1 Nipai 16:10–16, 23–31; 18:10–13, 20–22; see also Alma 37:38–47). Ewi wāween an pedped in katak kein maron̄ kili “men ko reddik”? Ro uwaan kūlaaj eo remaron̄ kōllaajrake ioon boot eo men ko me Irooj ekar kōpooji n̄an tōl kōj (lale “Bar jet Kein Jipan̄ ko” n̄an ļōmņak ko). Ta m̧akūtkūt ko reddik jemaron̄ būki n̄an bōk tōl eo an Anij?

Liai ej kōjerbal Liaona eo

Eļan̄n̄e Kom̧ij Pojak Kom̧ Jamin Mijak, jān Clark Kelley Price

1 Nipai 16:18–32; 17:7–16; 18:1–4

N̄e jej kōjparok kien ko, Anij enaaj jipan̄ kōj jelm̧ae apan̄ ko.

• Ro uwaan kūlaaj eo am̧ remaron̄ in jelm̧ae jerbal ko im apan̄ ko remaron̄ pen. Ewi wāween am̧ kōjerbale en̄jake eo an Liai ippān jerbal ko me relukkuun pen—naajdik baam̧le eo ilo āne jam̧den im jōk juon wa—n̄an jipan̄ er? Bōlen ro uwaan kūlaaj eo remaron̄ riiti 1 Nipai 16:18–32; 17:7–16; im 18:1–4, pukot pedped in katak ko me remaron̄ jipan̄ er n̄e rej jelm̧ae juon apan̄ epen (n̄an waanjon̄ak, 1 Nipai 16:24–26 katakin bwe jar im ettā bōro ej kōtļo̧k ad bōk im̧we im tōl jān Anij). Komaron̄ jino leļo̧k n̄an er juon waanjon̄ak in juon pedped in katak eo kwaar loe ilo eoon kein. Ilo aer kwaļo̧k ta eo rej loe, remaron̄ barāinwōt kwaļo̧k en̄jake ko aer make rejelet e.

1 Nipai 16:18–32; 17:7–22

Tōmak ej tōlļo̧k n̄an m̧akūtkūt.

• En̄jake kein an Liai im baam̧le eo an ilo āne jam̧aden rej kōmeļeļeiki kajoor in tōmak eo im kaje ko jān jab tōmak. N̄an jipan̄ ro uwaan kūlaaj eo loe m̧ool kein, komaron̄ je kajjitōk kein ioon boot eo: Ewi wāween an Nipai kar m̧akūtkūt kōn tōmak eo an? Ewi wāween an kar kōjeraam̧m̧an āinwōt juon uwaak? Ta kar kaje ko jān jab tōmak eo an Leman im Lamuel? Kajjitōk ippān ro uwaan kūlaaj eo āinwōt kūrub ko n̄an pukot uwaak ko n̄an kajjitōk kein ilo 1 Nipai 16:18–32 ak 17:7–22 im kwaļo̧k ta eo rekar loe.

1 Nipai 19:22–24

Jemaron̄ keidi eoon ko n̄an kōj make.

• N̄an jipan̄ ro uwaan kūlaaj eo ekkatak wāween n̄an keidi eoon ko n̄an er make, remaron̄ riiti waanjon̄ak ko kōn wāween an Liai kar kōm̧m̧ane. Ilo juon wāween, ilo 1 Nipai 4:1–3 im 17:23–32, 41–45, ta pedped in katak ko Nipai ekar katakin jān keidi jeje ko rekwojarjar n̄an jekjek eo an baam̧le eo an? Bwebwenato eo jān Elder Robert D. Hales ilo “Kein Jipan̄ ko jet” ej kōmeļeļeiki wāween keidi jeje ko rekwojarjar n̄an kōj make emaron̄ kōjeraam̧m̧an kōj. Ļōmņak in kajjitōk ippān ro uwaan kūlaaj eo n̄an kallikari apan̄ ko rej jelm̧ai ak ro uwaan baam̧le eo aer innām pukot bwebwenato ko jān jeje ko rekwojarjar me remaron̄ leļo̧k n̄an er ļōmņak ko im jipan̄ er kōn jekjek ko aer. Ekkar n̄an 1 Nipai 19:22–24, ewi wāween jemaron̄ keidi jeje ko rekwojarjar n̄an kōj make kōjeraam̧m̧an kōj?

• Ekōnono 1 Nipai 19:22–24 emaron̄ juon iien em̧m̧an im ļap n̄an ro uwaan kūlaaj eo bwe ren “keidi jeje ko rekwojarjar” n̄an er make im baam̧le ko aer, barāinwōt kōjeraam̧m̧an ko rekar būki jān aer kōm̧m̧ane. Ļōmņak kōn laajrak in meļeļe ko an ro uwaan kūlaaj eo ioon boot eo kōn wāween keidi jeje ko rekwojarjar n̄an er make (n̄an jet elmakot ko, lale laajrak in ilo “Kein Jipan̄ ko jet”). Ilo juon kūlaaj ilju im jekļaj, komaron̄ kajjitōk ippān ro uwaan kūlaaj eo bwe ren kwaļo̧k en̄jake ko ke rekar kōjerbali meļeļe ko ilo laajrak eo.

1 Nipai 20–21

Irooj enaaj aini m̧weo im̧ōn Israel ilo raan ko āliktata.

• N̄an rōjan̄ ro uwaan kūlaaj eo bwe ren kwaļo̧k katak ko ewōr tokjāer remaron̄ loe ilo 1 Nipai 20–21, ļōmņak kōn ennaan kein āinwōt kein ioon boot in: Children of Israel, Lehi’s Family, im People in Our Day. Leļo̧k n̄an er iien n̄an etale 1 Nipai 20–21 im kōlaajrake ium̧win kajjojo enaaj wāween an kanaan eo an Aiseia jerbal n̄an kūrub kein.

pija ej bōk jikin ekkatak

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti 2 Nipai 1–5, kajjitōk ippāer n̄an ļōmņak kōn ta eo remaron̄ ba n̄an baam̧le ko aer eļan̄n̄e iien eo aer ioon laļ in ekadu. Kalikkare bwe jebta ko im̧aan in 2 Nipai rekitbuuj ennaan eo āliktata Liai ekar leļo̧k n̄an baam̧le eo an.

pija ej bōk jikin kein jipan̄ ko

Kein Jipan̄ ko Jet

Pija in alooj ko ilo Bok in Mormon.

Pukot pija in alooj ko rej bōk jikin m̧akūtkūt ko jān 1 Nipai 16–22 ilo Pija in alooj ko ilo Bok in Mormon ChurchofJesusChrist.org ak Gospel Library app eo.

‘Liaona ko” ad.

Elder David A. Bednar ekar katakin: “Jetōb Kwojarjar eo ej jerbal ilo mour ko ad jejjet āinwōt Liaona eo kar n̄an Liai im baam̧le eo an, ekkar n̄an tōmak im tiljek im eo̧ron̄ eo ad” (“That We May Always Have His Spirit to Be with Us,” Ensign ak Liahona, May 2006, 31).

Ilo Oktoba 2005 kweilo̧k eo eļap, Elder Lowell M. Snow jān Jiljilimjuonn̄oul eo ekar ba: “Kweilo̧k in eļap ej juon Liaona ekāāl, juon iien im jikin n̄an bōk im̧we in tōl im tōl eo ej kōjeraam̧m̧an kōj” (“Compass of the Lord,” Ensign ak Liahona, Nov. 2005, 97).

Būreejtōn Thomas S. Monson ekar katakin: “Ejja Irooj in wōt eo ekar leļo̧k juon Liaona n̄an Liai ej lewaj n̄an kom̧ im n̄an n̄a rainin juon menin letok ejeja im eaorōk n̄an letok tōl n̄an mour ko ad. … Menin letok eo me ij kōnono kake ej āinwōt kōjeraam̧m̧an in petriak eo am̧” (Thomas S. Monson, “Your Patriarchal Blessing: A Liahona of Light,” Ensign, Nov. 1986, 65).

Keidi jeje ko rekwojarjar n̄an kōj make.

Elder Robert D. Hales ekar katakin:

“Jet iiō ko remootļo̧k ikar katakin ļaddik eo nejūm̧ edik kōn mour im en̄jake ko an ļeo jein Jared. Mekarta bwebwenato eo ekar lukkuun kaitoktoklimo, ekar jab iruj kake. Innām ikar kajjitōk ippān ta meļeļe in bwebwenato eo n̄an e make. Eļap meļeļe in n̄e kōmij kajjitōk ippān ajri ro nejim̧, ‘Ta meļeļe in n̄an kwe?’ Ekar ba, ‘Kwojeļā, ejjab oktak jān ta eo Josep Smith ekar kōm̧m̧ane ilo bukwin wōjke eo ke ekar jar im kar bōk juon uwaak.’

“Ikar ba, ‘Enan̄in dettam̧ wōt iiō eo an Josep. Kwoj ļōmņak juon jar āinwōt eo an naaj jipan̄ eok?’ Jidik iien tokālik, kōm ar jab kōnono kōn juon bwebwenato in etto ilo juon āne ettoļo̧k. Kōm kar kōnono kōn ļaddik eo nejūm̧—kōn mour eo an, aikuj ko an, im wāween an jar maron̄ jipan̄ e.

“Āinwōt ro jinen im jemān, ewōr am eddo n̄an jipan̄ ajri ro nejim n̄an “keidi aolep jeje ko rekwojarjar [em̧ool, aolep m̧ōttan gospel eo an Jisōs Kraist] n̄an kōm̧ [im n̄an ajri ro nejim], … n̄an [jeraam̧m̧an] eo im ekkatak eo [an baam̧le eo am]’” (“With All the Feeling of a Tender Parent: A Message of Hope to Families,” Ensign ak Liahona, May 2004, 90).

Elmakot ko n̄an keidi jeje ko rekwojarjar.

• Ļōmņak kōn m̧akūtkūt ko ak jekjek ko ilo raan ko ad me rej āinwōt ilo raan ko ilo jeje ko rekwojarjar kwoj riiti.

• Lale ta ko armej rejeļā, rej ekkatak, ak kōm̧m̧ani ilo jeje ko rekwojarjar me remaron̄ jipan̄ eok kōn juon am inepata ak kajjitōk.

• Kalikkar pedped in katak ko jān bwebwenato ko me remaron̄ jipan̄ eok ilo jekjek ko am̧ make.