armej rej m̧ōn̄ā leen wōjke in mour eo

Tōn̄aļļo̧k Jān Aolep Tōn̄al Otemjej, jān Miguel Ángel González Romero

Jānwōde 20–26

1 Nipai 11–15

“Pojak kōn Jim̧we im kōn Kajoor in Anij”

Jino m̧aanjabpopo eo am̧ n̄an katakin jān riiti 1 Nipai 11–15. Je ļōmņak ko am̧ im im̧we ko kōn eoon kein im pedped in katak ko kwonaaj kōketak ro uwaan kūlaaj eo am̧ n̄an ekōnono kaki. Ļōmņak kein ilaļ remaron̄ jipan̄.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jebta kein rekitbuuj pedped in katak ko me ro uwaan kūlaaj eo remaron̄ kōņaan ļōmņak kaki ilo aer kwaļo̧k kōn gospel eo ippān ro jet. Ļōmņak in je kajjitōk ko āinwōt kein ioon boot eo im kajjitōk ippān ro uwaan kūlaaj eo n̄an kwaļo̧k ippān doon men ko rekar loe ilo aer kar riit wiik eo kiiō me remaron̄ jipan̄ uwaaki kajjitōk kein:

• Ta in Bun̄ Jān Tōmak eo im Jepļaaktok eo?

• Etke Bok in Mormon eo emenin aikuj?

• Ewi wāween aō jeļā m̧ool ko an Anij kōn n̄a make?

pija ej bōk jikin katakin

Katakin Katak ko

1 Nipai 11:1–5, 13–33

Anij ekar jilkintok Jisōs Kraist āinwōt juon kōkaļļe in iakwe eo An.

• Juon enjeļ ekar kwaļo̧k kōkkaļļe ko im m̧akūtkūt ko n̄an Nipai jān mour eo an Rilo̧mo̧o̧r eo me rej kōmeļeļeiki iakwe eo an Anij. Komaron̄ loe bwe ejipan̄ n̄an etale kōkkaļļe kein im m̧akūtkūt kein āinwōt juon kūlaaj im ekōnono kōn wāween aer kōmeļeļeik iakwe eo an Anij n̄an kōj. Elōn̄ ke jabdewōt pija, pija in alooj, ak kein lale ko komaron̄ in kwaļo̧k men ko rej bōk jikin jet iaan m̧akūtkūt kein ilo eoon kein? (lale, n̄an waanjon̄ak, biblevideos.ChurchofJesusChrist.org). Ewi wāween an mour eo an Rilo̧mo̧o̧r eo im Pinmuur eo An jipan̄ eok meļeļe kōn iakwe eo an Anij n̄an eok?

1 Nipai 12–15

Anij enaaj jipan̄ kōj jum̧ae kareel eo an Setan.

• Ro uwaan kūlaaj eo am̧ remaron̄ jet iien en̄jake āinwōt armej ro ilo ettōņak eo an Nipai ro rekar jōbwābwe ilo dab in marok ak jelm̧ae aer kajoor er ilo m̧weo ekilep im eļap. Komaron̄ in kajjitōk ippān kūlaaj eo etke tab in maron̄ ko rej juon kōkkaļļe em̧m̧an kōn kapo (lale 1 Nipai 12:17) im etke em̧ eo ekilep im eļap ej juon kōkkaļļe em̧m̧an kōn ļōmņak ko rōwaan im utiej an laļ in (lale 1 Nipai 12:18). Innām komaron̄ in ajeje jebta 12–15 ilubwilijin ro uwaan kūlaaj eo im kajjitōk ippāer n̄an kappukot ilo eoon ko men ko rej katakin ewi jon̄an an Anij naaj jipan̄ kōj anjo̧ jān kapo ko, arōk, utiej bōro (lale, n̄an jekjek eo, 1 Nipai 13:34–40; 14:14).

• Ewi wāween am̧ maron̄ jipan̄ ro uwaan kūlaaj eo em̧m̧anļo̧k aer meļeļe kajoor eo me ej itok jān naan eo an Anij? (lale 1 Nipai 15:24). Komaron̄ kajjitōk ippāer n̄an ekōnono kōn kajjitōk ko āinwōt kein: Ta eo Nipai ekar katak kōn kajoor in naan eo an Anij? Ewi wāween an Setan kajjieon̄ kam̧ōjņo̧ik naan eo an Anij? (lale 1 Nipai 13:26–29). Ta eo Irooj im rikanaan ro An rej kōm̧m̧ane n̄an kōjparok naan eo An? Āinwōt m̧ōttan wōt ekōnono eo am̧, komaron̄ in kajjitōk ippān jejjo iaan ro uwaan kūlaaj eo am̧ bwe ren kwaļo̧k ewi wāween aer ekkatak jeje ko rekwojarjar im ta eo rej kōm̧m̧ane bwe naan eo an Anij en m̧ōttan mour ko aer kajjojo raan.

1 Nipai 13

Irooj ekar kōpooje iaļ eo n̄an Jepļaaktok eo an Kabun̄ eo An.

• Bōlen juon laajrak in iien enaaj jipan̄ ro uwaan kūlaaj eo meļeļe kōn ettōņak eo an m̧akūtkūt ko an Jepļaaktok eo. Komaron̄ kajjitōk ippān ro uwaan kūlaaj eo bwe ren kōm̧m̧ane juon ioon boot eo, ippān m̧akūtkūt ko rej loi im kōmeļeļeiki ilo 1 Nipai 13. Ewi wōt iaan m̧akūtkūt kein emōj aer bōk jikier? Ewi wōt ko rej waļo̧k kiiō? Ļōmņak im kwaļo̧k kōn kout eo ilo “Kein Jipan̄ ko Jet” jān George Washington, būreejtōn eo kein kajuon an United States, eo ej kwaļo̧k bwe ekar kile kajoor eo an Anij ilo iien American Revolution eo, juon m̧akūtkūt me ekar kōpooj iaļen Jepļaaktok eo.

• Ewi wāween an naaj ro uwaan kūlaaj eo kōjerbal 1 Nipai 13 n̄an kōmeļeļeiki bar juon armej jān bar juon tōmak etke Jepļaaktok eo ekar menin aikuj? (n̄an waanjon̄ak, lale 1 Nipai 13:26–29, 35–42). Eoon ta ko jet remaron̄ jipan̄ ro uwaan kūlaaj eo kōjerbali n̄an jipan̄ ro jet meļeļe etke Jepļaaktok eo ekar menin aikuj? (n̄an waanjon̄ak, lale Topical Guide, “Restoration of the Gospel”). Ro uwaan kūlaaj eo remaron̄ jeraam̧m̧an jān ikkure role play wāween aer naaj kōmeļeļe juon armej aikuj eo an Jepļaaktok eo im ewi wāween an kar kōjeraam̧m̧an er.

1 Nipai 13:20–41

Bok in Mormon eo ej katakin m̧ool ko realikkar im aorōk.

• Emaron̄ lukkuun jipan̄ n̄an kōjerbal 1 Nipai 13:20–41 n̄an jino juon ekōnono kōn etke jej aikuji Bok in Mormon eo. Ro uwaan kūlaaj eo remaron̄ in kōllaajrake jet iaan “men ko realikkar im aorōk” ko me rekar jako jān Baibōļ eo im jepļaaktok eo an Bok in Mormon eo (n̄an waanjon̄ak, lale eoon 26 im 39 ak laajrak ko jet ilo “Kein Jipan̄ ko Jet”). Komaron̄ barāinwōt kōņaan in kajjitōk ippān ro uwaan kūlaaj eo bwe ren kwaļo̧k ewi wāween an “men kein realikkar im aorōk” kar jepļaaktok kar jipan̄ er epaakeļo̧k Anij.

  baam̧le eo ej riiti jeje ko rekwojarjar

  Jetōb eo emaron̄ jipan̄ kōj loe “m̧ool ko realikkar im aorōk” n̄an kōj make.

• Ļōmņak im kwaļo̧k pija in alooj in “The Book of Mormon—a Book from God” (ChurchofJesusChrist.org), im kajjitōk ippān ro uwaan kūlaaj eo bwe ren kwaļo̧k ta eo pija eo ej katakin etke jej aikuji Bok in Mormon eo. Ak komaron̄ in kajjitōk ippān juon uwaan kūlaaj eo n̄an jin̄aik ioon boot eo kōmeļeļe eo kōmeļeļeiki ilo kout eo an Elder Tad R. Callister kout eo an ilo “Kein Jipan̄ ko Jet.” Ro uwaan kūlaaj eo innām remaron̄ kwaļo̧k ewi wāween an Bok in Mormon eo kar jipan̄ er meļeļeļo̧k gospel eo an Jisōs Kraist.

pija ej bōk jikin ekkatak

Kōketak Ekkatak ilo M̧weo

N̄an kōketak ro uwaan kūlaaj eo n̄an riiti 1 Nipai 16–22 ilo wiik eo tok juon, komaron̄ ba bwe ej kitbuuj juon bwebwenato eo me emaron̄ im̧we er im jipan̄ er n̄e kajjitōk ippāer n̄an kōm̧m̧ane juon men eo āinwōt epen.

pija ej bōk jikin kein jipan̄ ko

Kein Jipan̄ ko Jet

Pija in Alooj ko ilo Bok in Mormon

Pukot pija in alooj ko rej bōk jikin m̧akūtkūt ko jān 1 Nipai 11-15 ilo Pija in Alooj ko ilo Bok in Mormon ChurchofJesusChrist.org ak Gospel Library app eo.

Pein Anij ilo American Revolution.

George Washington ekar ba: “Armej bōlen maron̄ nana ro me rej kalimjōk m̧akūtkūt ko an American Revolution ilo aer jab en̄jake kam̧oolol ņae Rikōm̧anm̧an eo an Laļ eo me kwojarjar eo kar likūt ekar emakijkij an waļo̧k ilo etad” (Letter to Samuel Langdon, Sept. 28, 1789, founders.archives.gov/documents/Washington/05-04-02-0070).

Būreejtōn Russell M. Nelson Laajrak ko an ilo Bok in Mormon.

From “Bok in Mormon Eo: Eļan̄n̄e en kar Ejjeļo̧k Elmen Nej Kar Mour eo Am̧?” (Ensign ak Liaona, Nob. 2017, 60–63).

Bok in Mormon eo ej kam̧oole men in:

• Revelesōn ekar jem̧ļo̧k ippān Baibōļ eo.

• Nin̄nin̄ ko rej aikuj peptaij.

• Lem̧ōņōņō emaron̄ loe ilo men eo enana.

• Em̧m̧an an kajjojo armej ebwe n̄an mour ijo eutiej tata (kain̄i ko im bujen ko rej mennin aikuj).

• Wōtlo̧k eo an Adam ekar kakkure armej kōn “jerawiwi eo jinoin.”

Bok in Mormon eo ej kalikkarļo̧k meļeļe eo kōn:

• Mour eo ad m̧okta.

• Mej. Ej ruo men ko remennin aikuj ilo karōk in m̧ōņōņō eo eļap an Anij.

• Mour ālkin mej ej ijjino ilo paradise.

• Jerkakpeje an ānbwin, kobatok ippān jetōb eo an, ej erom̧ juon jetōb ejjab wabanban.

• Ekōjkan an ekajet eo ad jān Irooj naaj ekkar n̄an kōm̧m̧an ko ad im ikdeleel ko an būruwōd.

• Ewi wāween an kain̄i ko jejjet kōm̧m̧ani: n̄an waanjon̄ak, peptaij, kwojkwoj, leļo̧k ioon Jetōb Kwojarjar eo.

• Pinmuur eo an Jisōs Kraist.

• Jerkakpeje eo.

• Jerbal eo eaorōk an enjeļ ro.

• Piktokin priesthood eo ekwojarjar indeeo.

• Ewi wāween an m̧wil ko m̧wilin armej ļapļo̧k aer im̧we kōn kajoor in naan eo jān kajoor in jāje eo.

Etke Jej Aikuji Bok in Mormon eo.

Elder Tad R. Callister ekar katakin:

“Baibōļ eo ej juon kam̧ool kōn Jisōs Kraist; Bok in Mormon eo ej bar juon. Etke kein kam̧ool in kein karuo ekanooj in aorōk? Waanjon̄ak in emaron̄ jipan̄: Ewōr jete ļain ko rejim̧we komaron̄ in jin̄aik ilo juon jikin ioon juon m̧ōttan peba? Uwaak eo ejjeļo̧k jon̄an. Ium̧win jidik iien, ļōmņak bwe jikin eo ej jutak kōn Baibōļ eo im bwe buki in ļain ko rejim̧we kar pijaiki n̄an jikin eo ej jutak kōn ukook ko an Baibōļ eo im bwe kajjojo ukook ko rej jutak kōn kabun̄ ko roktak.

“Ta ej waļo̧k, mekarta, eļan̄n̄e ilo m̧ōttan peba eo ewōr juon jikin ej jutak kōn Bok in Mormon eo? Ewōr jete ļain ko rejim̧we komaron̄ pijaiki ikōtaan jikin kein ruo: Baibōļ eo im Bok in Mormon eo? Juon wōt. Juon wōt ukook in katak ko an Kraist ej kōmour naan in kam̧ool ko an kam̧ool kein ruo” (“The Book of Mormon—a Book from God,” Ensign or Liahona, Nov. 2011, 75).

Kōkōm̧anm̧anļo̧k Ad Katakin

Tōl ekōnono ko reim̧we. Aolep ewōr juon men ippāer n̄an jipan̄ ekōnono eo an kūlaaj eo, ak jet iien ejjab aolep ewōr aer iien n̄an jipan̄. Kalimjōk wāween ko n̄an kōļapļo̧k an ro uwaan kūlaaj eo iien n̄an kwaļo̧k naan in kam̧ool ko aer. (Lale Teaching in the Savior’s Way, 33.)