“Jānwōde 6–12. 1 Nipai 1–7: ‘Inaaj Ilo̧k im Kōm̧m̧ani’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Jānwōde 6–12. 1 Nipai 1–7,” Itok, Ļoor Eō—N̄an Jabōt Jikuuļ: Bok in Mormon 2020
Liai ej Ito-Itak Iturin Lom̧aļo̧ Ekilm̧ur, jān Gary Smith
Jānwōde 6–12
1 Nipai 1–7
“Inaaj Ilo̧k im Kōm̧m̧ani”
Am̧ m̧aanjabpopo āinwōt juon rūkaki in Jabōt Jikuuļ ej ijjino ilo ekkatak eo am̧ make kōn jeje ko rekwojarjar. Leļo̧k am̧ n̄an im je im̧we ko an jetōb kwoj būki. Itok, Ļoor Eō—N̄an Kajjojo Armej im Baam̧le ko maron̄ kobawaj ilo ekkatak eo am̧.
Je En̄jake ko Rej Im̧we Eok
Kajjitōk bwe ren Kwaļo̧k
Elōn̄ iaan ro uwaan kūlaaj eo am̧ remaron̄ jeļā kōn 1 Nipai 1–7, ak kajjojo iien jej riiti jeje ko rekwojarjar, jemaron̄ katak m̧ool ko me rej jerbal n̄an jekjek ko ad rainin. N̄an jino iien ekonono eo am̧, bōlen komaron̄ kajjitōk ippān ro uwaan kūlaaj eo ta eo rekar katak ak kar kakeememej er kake ke rekar ekkatak wiik in.
Katakin Katak ko
Jeje ko rekwojarjar rej aorōk ko reļļap.
-
Juon ennaan eaorōk ilo Bok in Mormon eo ej aorōk eo eļap kōn naan eo an Anij. Menin emaron̄ in juon ennaan em̧m̧an n̄an kwaļo̧k ippān doon ilo am̧ jino ekkatak Bok in Mormon eo. Komaron̄ in jino ilo am̧ kajjitōk ippān kajjojo ro uwaan kūlaaj eo n̄an kālet juon jebta jān 1 Nipai 1; 3–6 im riiti aolepān, kappukot wāween ko me naan ko an Anij rej kajju ak jab kajju kar kōjeraam̧m̧an ro uwaan baam̧le eo an Liai. (Ro uwaan kūlaaj eo remaron̄ in jeraam̧m̧an jān kōm̧m̧ani ikkure in ilo kūrub ko reddik.) Innām karuwaineneik er n̄an kwaļo̧k ta eo rekar loe. Ta eo bwebwenato kein rej katakin kōn aorōk eo an jeje ko rekwojarjar?
-
Juon iaan kōttōbar ko am̧ āinwōt juon rūkaki ej n̄an rōjan̄ kajjojo armej im baam̧le ko n̄an ekkatak gospel eo itulikin kūlaaj eo. Bōlen komaron̄ kajjitōk ippān ro uwaan kūlaaj eo bwe ren etale wāween an kar Liai ekkatak kōn pilieij brass ko (lale 1 Nipai 5:10–19), innām, komaron̄ in kajjitōk ko āinwōt kajjitōk kein: Kar ta m̧wil eo m̧wilin Liai ņae jeje ko rekwojarjar? Ta eo ekar loe kōn aorōk eo aer? Ro uwaan kūlaaj eo remaron̄ barāinwōt lale ennaan eo an Elder Richard G. Scott “The Power of Scripture” (Ensign ak Liahona, Nov. 2011, 6–8) ak riiti juon ennaan ekadu jān juon kōnono jān ennaan in ilo “Kein Jipan̄ ko Jet.” Ewi wāween ad maron̄ kōjerbal katak ko an Elder Scott ilo ad ekkatak Bok in Mormon eo ilo iiō in?
-
Āinwōt juon kūlaaj, komaron̄ in al juon al kōn jeje ko rekwojarjar, āinwōt “As I Search the Holy Scriptures” (Hymns, no. 277). Innām komaron̄ in kajjitōk ippān ro uwaan kūlaaj eo bwe ren kwaļo̧k ewi wāween aer jeraam̧m̧an mour ko aer jān aer make ekkatak jeje ko rekwojarjar. Er remaron̄ barāinwōt kwaļo̧k ewi wāween an jeje ko rekwojarjar kar im̧we er n̄an “itok n̄an … Anij … im mour” (1 Nipai 6:4).
Jemaron̄ bōk naan in kam̧ool ko ad make ilo ad kōmeraikļo̧k būruwōd.
-
Nipai ekar bun̄bun̄ kōn kajoor in tōmak eo an ilo Irooj, ak emaron̄ lukkuun jipan̄ ro uwaan kūlaaj eo kile bwe eaar aikuj in jerbal n̄an an bōk naan in kam̧ool eo an—āinwōt kōj aolep jej kōm̧m̧ane. Bōlen ro uwaan kūlaaj eo remaron̄ in kile ilo 1 Nipai 2:16–19 ta eo ekar kapidodoik n̄an Nipai n̄an an bōk kam̧ool eo an. Er remaron̄ barāinwōt etale eoon 11–14 n̄an etale etke Leman im Lemuel rekar jab bōk juon kam̧ool. Menin emaron̄ juon iien em̧m̧an n̄an kajjitōk ippān ro uwaan kūlaaj eo bwe ren kwaļo̧k ewi wāween aer kar bōk naan in kam̧ool eo aer.
-
Jet iien jemaron̄ kōņaan bōk juon kabwilōn̄lōn̄ bwe jen maron̄ bōk ak kōkajoorļo̧k naan in kam̧ool ko ad. Ak Leman im Lamuel rekar ioon juon enjeļ, im kiiō tōmak eo aer ekar āinwōt jab jelete. Ta eo ro uwaan kūlaaj eo remaron̄ katak jān en̄jake in, kar kōmeļeļeik ilo 1 Nipai 3:28–31, kōn ta eo ej kōkajoorļo̧k naan in kam̧ool ko ad make? (barāinwōt lale 1 Nipai 2:16). Ļōmņak in kwaļo̧k kōn kout in jān Būreejtōn Harold B. Lee ilo “Kein Jipan̄ ko Jet.” Ta eo jemaron̄ in kōm̧m̧ane n̄an kōjparoke wōt an kajoor naan in kam̧ool ko ad?
Anij enaaj kōpooje juon iaļ n̄an kōj n̄an kōm̧m̧ane Ankilaan.
-
En̄jake eo an ļaddik ro nejin Liai ilo 1 Nipai 3–4 emaron̄ āinwōt em̧m̧an, ak elōn̄ iaadwōj ewōr ad en̄jake ko me jej ļoor ankilaan Anij mekarta āinwōt epen. Ilo an ro uwaan kūlaaj eo riiti 1 Nipai 3–4 wiik in, ta m̧ool ko er rekar loi ko me rekar kakeememej er kōn juon aer make en̄jake? Bōlen komaron̄ kajjitōk ippān ro uwaan kūlaaj eo n̄an kwaļo̧k eoon ko me rej katakin m̧ool kein, im kajjitōk ippāer n̄an kwaļo̧k en̄jake ko aer. Ewi wāween an m̧ool kein jipan̄ kōj eļan̄n̄e Anij ej kōtmāneik kōj bwe jen kōm̧m̧ane juon men eo me emaron̄ in pen?
-
Komaron̄ in ajije kūlaaj eo n̄an jilu kūrub ko im leļo̧k n̄an kajjojo kūrub bwe ren katak juon iaan kajjieon̄ ko n̄an bōk pileij brass ko jān Leban (lale 1 Nipai 3:9–21; 1 Nipai 3:22–31; 4:1–4; and 1 Nipai 4:5–38). Innām komaron̄ in kajjitōk ippān kajjojo kūrub bwe ren kwaļo̧k ta kajjojo iaan kajjieon̄ kein rej katakin kōj kōn kōttōbrak ankilaan Irooj. Ewi wāween an waanjon̄ak kein jerbal n̄an kijejeto ko ad make n̄an kōm̧m̧ane ankilaan Anij?
Aer Lan̄lōn̄ Ekar Obrak, jān Walter Rane
Kōketak Ekkatak ilo M̧weo
N̄an ium̧we ro uwaan kūlaaj eo n̄an riiti 1 Nipai 8–10, komaron̄ in kwaļo̧k ennaan in jān Būreejtōn Dieter F. Uchtdorf: “Kōn elōn̄ kapo ko rej kajjeon̄ kūnōōrļo̧k kōj, ewi wāween ad dāpij jibadbad eo ad ioon lem̧ōņōņō eo eaiboojoj kar kallim̧ur kake n̄an ro rej tōmak? Ij tōmak bwe uwaak eo maron̄ loe ilo juon ettōņak an juon rikanaan taujin iiō ko remootļo̧k. Etan rikanaan in ej Liai, im ettōņak eo an ej jeje ilo Bok in Mormon eo eaiboojoj im kabwilōn̄lōn̄” (“Jilu Kōrā Jemjānjemjati,” Ensign ak Liaona, Okt. 2017, 18–19).
Kein Jipan̄ ko Jet
Pija in alooj ko ilo Bok in Mormon.
Pukote pija in alooj ko me rej bōk jikin bwebwenato ko jān 1 Nipai 1–7 ilo Pija in alooj ko ilo Bok in Mormon ChurchofJesusChrist.org ak Gospel Library app eo.
Jeje ko rekwojarjar ewōr ippāer kajoor in kareel.
Elder Richard G. Scott ekar kam̧ool kōn aorōk eo an jeje ko rekwojarjar:
“Jeje Ko Rekwojarjar rej āinwōt jet tōma jiddik me rej kōmeramļo̧k ļōmņak ko ad im kōpooj kōj n̄an tōl im im̧we eo ijo eutiej. Er remaron̄ erom̧ kii eo n̄an kōppeļļo̧k jānōļ eo n̄an kōnono ippān Jemed ilo Lan̄ im Nejin Jitōn Bōro, Jisōs Kraist.
“Jeje ko rekwojarjar … remaron̄ erom̧ eo m̧ōttad em̧ool me ejjab likjab kōn peļaakin jikin ak kōļanta. Er rej aolep iien pād n̄e jej aikuji. Aer jerbal ej letok juon pedped in m̧ool eo me emaron̄ karuj kōj jān Jetōb Kwojarjar eo. Ekkatak, kejōkļo̧kjeņ, kappukot, im kakkilōklōk eoon ko ej āinwōt kanne juon lowaan juon jikin bok kōn ro m̧ōttad, men ko raorōk, im m̧ool ko me maron̄ kūr ioer jabdewōt iien, jabdewōj jikin ilo laļ in. …
“Kejōkļo̧kjeņ kōn juon eoon jān jeje ko rekwojarjar emaron̄ in juon kii n̄an kōppeļļo̧k revelesōn eo im tōl im im̧we eo an Jetōb Kwojarjar eo. Jeje ko rekwojarjar remaron̄ in kaamņak juon jetōb einepata, leļo̧k aenōm̧m̧an, kōjatdikdik, im juon jepļaaktok in lōke ilo maron̄ an juon n̄an anjo̧ jān apan̄ ko an mour. Ewōr ippāer kajoor in kareel n̄an kōmour apan̄ ko ilo en̄jake n̄e ewōr tōmak ilo Rilo̧mo̧o̧r eo. Er remaron̄ m̧ōkaj aer em̧m̧akūt jān kōmour an ānbwin” (“The Power of Scripture,” Ensign ak Liahona, Nov. 2011, 6).
Naan in kam̧ool ko ad rej aikuj in kōkāāl aolep iien.
Būreejtōn Harold B. Lee ekar katakin, “Men eo kwoj kabwijere rainin ilo naan in kam̧ool eo eban naaj am̧ ilju m̧ae iien ewōr juon men kwoj kōm̧m̧ane kake” (Teachings of Presidents of the Church: Harold B. Lee [2000], 43).
Kōkōm̧anm̧anļo̧k Ad Katakin
Kōjerbal bwebwenato ko im waanjon̄ak ko n̄an katakin pedped ko an gospel. Elōn̄ iaan m̧ool ko an indeeo ilo jeje ko rekwojarjar rej katakin jān en̄jake ko ak bwebwenato rej pād ie. Ilo am̧ m̧aanjabpopo n̄an katakin, ļōmņak kōn en̄jake ko komaron̄ kobaiki kein karuo kam̧ool n̄an bwebwenato ko ilo jeje ko rekwojarjar im pedped ko rej kōmeļeļeiki. (Lale Teaching in the Savior’s Way, 22.)