mga bata nga nagpataas og mga kamot diha sa lawak klasehanan sa simbahan

Pagtubag sa mga Panginahanglan sa Mas Gagmay nga mga Bata

Ang gagmay nga mga bata andam ug mahinamon nga makakat-on sa ebanghelyo kon ipresentar kini sa paagi nga ilang masabtan. Ilabi na kon nagtudlo ka og mas gagmay nga mga bata, ikonsiderar ang paggamit sa mosunod nga matang sa mga kalihokan aron sa pagtabang kanila nga makakat-on.

• Manganta. Ang mga himno ug mga awit gikan sa Songbook sa mga Bata nagtudlo og doktrina sa gamhanan nga paagi. Gamita ang indeks sa mga hilisgotan sa luyo sa Songbook sa mga Bata aron mangita og mga awit nga may kalabotan sa mga baroganan sa ebanghelyo nga imong gitudlo. Tabangi ang mga bata nga makonektar ang mensahe sa mga awit ngadto sa ilang kinabuhi. Sama pananglit, mahimo kang mangutana kabahin sa mga pulong o mga pulongan diha sa awit. Agig dugang sa pagkanta, ang mga bata makahimo og mga aksiyon nga mobagay sa mga awit o maminaw lang sa mga awit isip background nga musika samtang naghimo sila sa ubang mga kalihokan. Alang sa ubang mga ideya, tan-awa ang mga seksiyon nga “Paggamit og Musika sa Pagtudlo sa Doktrina” ug “Pagtabang sa mga Bata nga Makakat-on ug Mahinumdom sa mga Kanta sa Primary ug mga Himno” diha sa “Mga Panudlo alang sa Panahon sa Pagpanganta ug sa Musika nga Pasundayag sa mga Bata sa Panagtigom alang sa Sakramento” niini nga kapanguhaan.

• Maminaw o i-aksiyon ang usa ka istorya. Ang gagmay nga mga bata gusto og mga istorya—gikan sa mga kasulatan, gikan sa imong kinabuhi, gikan sa kasaysayan sa Simbahan, o gikan sa mga magasin sa Simbahan. Pangita og mga paagi nga maapil sila sa pagsaysay sa istorya. Mahimo silang maggunit og mga litrato o mga butang, modrowing og mga hulagway sa unsay ilang nadunggan, mo-aksiyon sa istorya, o motabang sa pagsaysay sa istorya. Tabangi ang mga bata nga makaila sa mga kamatuoran sa ebanghelyo diha sa mga istorya nga imong gipaambit.

• Magbasa og usa ka kasulatan. Ang gagmay nga mga bata tingali dili pa kaayo makamao nga mobasa, apan mahimo gihapon nimo silang ilakip sa pagkat-on gikan sa mga kasulatan. Mahimong kinahanglanon nimo nga tutokan ang usa ka bersikulo, o importante nga pulongan, o pulong. Samtang kusgon nimo pagbasa ang usa ka kasulatan, mahimo nimong dapiton ang mga bata sa pagbarog o pagpataas sa ilang mga kamot kon makadungog sila og piho nga pulong o pulongan nga gusto nimong tutokan. Tingali makahimo pa gani sila sa pagsag-ulo og mubo nga mga pulongan gikan sa mga kasulatan kon balikon nila kini og sulti sa pipila ka higayon. Samtang maminaw sila sa pulong sa Dios, mabati nila ang Espiritu.

• Magmainabtikon. Tungod kay ang gagmay nga mga bata kanunay nga lagsik, pagplano og mga paagi nga matugotan sila sa paglihok-lihok—pagmartsa, pag-ambak-ambak, paglukso-lukso, pagyuko, paglakaw, ug ubang mga lihok nga may kalabotan sa baroganan o istorya nga imong gitudlo. Kini nga mga lihok mahimong epektibo usab samtang dungan kamo nga manganta.

• Magtan-aw og hulagway o magtan-aw og usa ka video. Kon mopakita ka sa mga bata og usa ka hulagway o video, pangutana sa mga bata sa paagi nga makatabang kanila nga makakita kon sa unsang paagi kini adunay kalabotan ngadto sa usa ka baroganan sa ebanghelyo o istorya sa kasulatan. Sama pananglit, mahimo ka nga mangutana, “Unsa ang nahitabo niini nga hulagway o video?” o “Unsa ang inyong gibati niini?” Ang Gospel Media nga app, MediaLibrary.ChurchofJesusChrist.org, ug children.ChurchofJesusChrist.org maayo nga mga dapit nga pangitaan og mga video.

• Magpaambit og mga kasinatian. Ang gagmay nga mga bata tingali wala pa kaayoy mapaambit sama sa mas dagkong mga bata, apan kon hatagan nimo sila og piho nga giya, makahimo sila sa pagpaambit sa ilang mga pagbati ug mga kasinatian kabahin sa unsay ilang nakat-onan.

  bata nga nagkolor diha sa lawak klasehanan sa simbahan

• Maghimo. Ang mga bata makabuhat, makadrowing, o makakolor og usa ka butang nga may kalabotan sa istorya o baroganan nga ilang gikat-onan. Awhaga sila sa pagdala sa ilang hinimo ngadto sa panimalay ug sa pagpaambit niini ngadto sa mga sakop sa pamilya aron sa pagtabang sa mga bata sa paghinumdom sa unsay ilang nakat-onan.

• Moapil sa mga leksiyon nga naggamit og mga butang. Ang usa ka yano nga leksiyon nga naggamit og butang makatabang sa mga bata nga makasabot sa baroganan sa ebanghelyo nga lisod sabton. Kon mogamit og mga leksiyon nga naggamit og butang, pangita og mga paagi nga makaapil ang mga bata. Mas makakat-on sila gikan sa usa ka kasinatian diin makaapil sila kay sa magtan-aw lang og pasundayag kon unsaon paghimo ang usa ka butang.

• Magdrama-drama [role-play]. Kon idrama-drama sa mga bata ang usa ka sitwasyon nga malagmit ilang masugatan sa tinuod nila nga kinabuhi, mas dali nilang masabtan kon sa unsang paagi ang usa ka baroganan sa ebanghelyo magamit sa ilang kinabuhi.

• Ibalik-balik ang mga kalihokan. Ang gagmay nga mga bata tingali kinahanglang makadungog sa mga konsepto sa makadaghang higayon aron makasabot niini. Ayaw kahadlok nga balikon kanunay ang mga istorya o mga kalihokan, bisan atol sa samang leksiyon. Sama pananglit, mahimo nimong ipaambit ang usa ka istorya sa kasulatan sa pipila ka higayon sa lain-laing mga paagi panahon sa usa ka leksiyon—pinaagi sa pagbasa gikan sa mga kasulatan, pag-summarize pinaagi sa imong kaugalingong mga pulong, pagpasalida og video, pagtugot sa mga bata nga motabang kanimo sa pagsaysay sa istorya, pagdapit kanila nga i-aksiyon ang istorya, ug uban pa. Kon ang usa ka kalihokan nga gigamit diha sa klase balikon usab diha sa panimalay, ang pagbalik-balik makatabang sa mga bata nga makakat-on ug makahinumdom.

• Makighalubilo [Interact] sa uban. Ang mga bata nagpalambo og sosyal nga mga kahanas ug sa kasagaran malingaw nga magkat-on ug magdula uban sa ilang mga kaedad. Paghimo og mga oportunidad alang kanila nga magpaambit, magpuli-puli, ug magtinabangay samtang magkat-on sila.

• Moapil sa lain-laing mga kalihokan. Ang gagmay nga mga bata kasagaran mubo ra og atensiyon, ug sila adunay lain-laing mga estilo sa pagkat-on. Paggamit og lain-laing mga kalihokan, ug hatagi og pagtagad ang mga timailhan nga ang mga bata nagkinahanglan og lain na pod nga kalihokan. Sama pananglit, kinahanglan tingali nimong kanunay nga puli-pulihon ang hilom ug makalingaw nga mga kalihokan.

Kabahin sa imong tahas isip magtutudlo sa gagmay nga mga bata—agig dugang sa pagtudlo sa mga baroganan sa ebanghelyo—mao ang pagtabang sa mga bata nga makakat-on unsaon sa pag-apil sa husto nga paagi diha sa usa ka klase sa Simbahan. Sama pananglit, mahimo silang magkinahanglan nga magkat-on mahitungod sa pagpuli-puli, pagpaambit, pagrespeto sa uban, ug uban pa. Ang ubang mga magtutudlo mohimo og mga tsart nga adunay buhatonon alang sa matag bata sa pag-apil sa klase sa piho nga paagi (sama sa pag-ampo, paggunit og litrato, o pagpasa og mga papel). Ang mga buhatonon mahimong mausab matag semana. Makatabang kini sa mga bata nga magpuli-puli ug motutok sa angay nga pamatasan diha sa lawak klasehanan.

Ang mga bata—ilabi na ang mas gagmay nga mga bata—kasagaran makabenepisyo sa usa ka regular, naandang buluhaton. Tungod kay ang gagmay nga mga bata mubo ra og atensiyon ug usahay maglisod sa pagtutok sa tibuok klase, labing maayo kon kini nga buluhaton maglakip og kanunay nga mga pagbalhin gikan sa usa ka kalihokan ngadto sa lain. Sama pananglit, ang naandan nga buluhaton sa inyong klase tingali maglakip og panagsa nga paghunong aron magdula, magkolor og hulagway, mokanta og awit, ug uban pa.