bata nga nagsakay og wheelchair kauban ang usa ka babaye diha sa simbahan

Pagtubag sa mga Panginahanglan sa mga Bata nga adunay mga Kakulangan

Ang mga lider sa Primary responsable sa pagtudlo sa ebanghelyo ni Jesukristo ngadto sa tanang mga bata, lakip niadtong adunay mga kakulangan. Sa Primary, ang matag bata kinahanglan nga hangopon, higugmaon, amumahon, ug apilon. Niini nga kahimtang mas sayon alang sa tanang bata ang pagsabot sa gugma sa atong Langitnong Amahan ug ni Jesukristo ug mobati ug makaila sa impluwensiya sa Espiritu Santo. Ang mosunod nga mga ideya makatabang kanimo sa pagtubag sa mga panginahanglan sa mga bata nga adunay mga kakulangan.

• Pagpakisayod mahitungod sa piho nga mga panginahanglan sa bata. Ang labing maayo nga paagi sa paghimo niini mao ang pagpakigsulti sa mga ginikanan sa bata o sa mga tig-atiman. Susiha kon sa unsang paagi nga mas makakat-on ang bata ug unsa nga mga pamaagi ang labing makatabang. Mahimo usab nga magpakitambag ka sa ubang mga lider ug mga magtutudlo sa Primary kinsa adunay kasinatian ug mga panabot nga ikapaambit.

• Paghimo og usa ka positibo nga kahimtang diin ang matag bata mobati nga luwas ug gihigugma. Kat-oni ang mga ngalan sa tanang bata sa imong klase, ug tabangi sila nga mobati nga gidawat, gihigugma, ug giapil. Ang mga bata nga adunay mga kakulangan sa kasagaran ginasaway, busa pangita og mga kahigayonan sa pagdayeg kanila alang sa maayo nga mga kinaiya.

• Paghimo og mga pagpahiangay aron ang tanan makaapil. Ang ginagmay nga mga kausaban mahimong himoon sa mga kalihokan aron sa pagseguro nga ang tanang bata makakat-on, lakip na niadtong adunay pisikal nga mga limitasyon o mga kalisdanan sa pagkat-on. Sama pananglit, kon ang usa ka kalihokan nagsugyot sa pagpakita og usa ka hulagway, mahimo kamong manganta hinuon og usa ka awit nga may kalabotan niini aron maapil ang mga bata nga adunay mga problema sa panan-aw.

• Pag-establisar og makanunayon nga mga kalihokan ug estraktura sa lawak klasehanan. Ang usa ka paagi sa pagbuhat niini mao ang paghimo og usa ka poster nga adunay eskedyul sa klase nga nagpakita kon unsa ang dagan sa klase. Ang imong eskedyul mahimong maglakip og mga pag-ampo, panahon sa pagtudlo, ug oras sa kalihokan. Makatabang kini nga makunhoran ang mga pagbati sa pagduda, nga mahimong makapadugang sa kabalaka sa ubang mga bata.

• Paggamit og biswal nga mga tabang. Ang mga bata nga adunay mga kakulangan sa pagkat-on o mga hagit sa kinaiya mahimong makabenepisyo sa biswal nga mga tabang, sama sa mga hulagway nga magpakita og angay nga mga kinaiya sama sa pagpataas sa kamot sa dili pa motubag sa pangutana.

• Sabta ngano nga mahitabo ang mahagiton nga mga kinaiya. Pagkat-on mahitungod sa mga kakulangan o mga kahimtang nga makaimpluwensiya sa usa ka bata sa paglihok nga dili angay. Bantayi og maayo kon unsay mahitabo sa higayon nga motumaw ang mahagiton nga mga kinaiya. Hunahunaa sa mainampoong paagi kon unsaon sa pag-usab ang sitwasyon aron mas matabangan ang bata.