mga bata nga anaa sa lawak klasehanan sa simbahan

Paggamit sa Dali, Sunod Kanako—Alang sa Primary

Pagpangandam sa Pagtudlo sa Primary

Ang personal ug pamilya nga pagtuon sa panimalay kinahanglang mao ang sentro sa pagkat-on sa ebanghelyo. Tinuod kini alang kanimo ug sa mga bata nga imong gitudloan. Samtang mangandam ka sa pagtudlo, sugdi pinaagi sa pag-angkon og kaugalingon nimong mga kasinatian sa mga kasulatan. Ang imong labing importante nga pagpangandam mahitabo samtang magsiksik ka sa mga kasulatan ug magtinguha sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa usab ka importante nga bahin sa imong personal nga pagtuon ug sa imong pagpangandam sa pagtudlo. Makatabang kini kanimo nga makaangkon og mas lawom nga pagsabot sa doktrinal nga mga baroganan nga makita diha sa mga kasulatan.

Atol sa imong pagpangandam, mga hunahuna ug mga impresyon moabot kanimo mahitungod sa mga bata nga imong gitudloan. Makadawat ka og mga panabot kon sa unsang paagi ang mga baroganan diha sa mga kasulatan mopanalangin sa ilang mga kinabuhi. Magiyahan ka sa pagdasig kanila sa pagdiskobre niadto nga mga baroganan samtang magkat-on sila gikan sa mga kasulatan alang sa ilang mga kaugalingon ug uban sa ilang mga pamilya.

Mga Ideya sa Pagtudlo

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga latid sa pagtudlo niini nga kapanguhaan. Hunahunaa kini nga mga ideya dili isip mga instruksiyon sa mga lakang nga buhaton apan isip mga sugyot nga motabang kanimo nga makadawat og inspirasyon. Nakaila ka niining mga bataa—ug mas mailhan nimo sila samtang makig-uban ka nila sa klase. Ang Ginoo nakaila usab kanila, ug Siya modasig kanimo sa labing maayo nga mga paagi sa pagtudlo ug pagpanalangin kanila.

Ikaw adunay daghan pang mga kapanguhaan nga anaa aron magamit nimo samtang mangandam ka, lakip na ang mga ideya diha sa Dali, Sunod Kanako—Alang sa mga Indibidwal ug mga Pamilya ug sa mga magasin sa Simbahan. Alang sa dugang nga impormasyon kabahin niini ug sa ubang mga kapanguhaan, tan-awa sa “Dugang nga mga Kapanguhaan alang sa Pagtudlo sa mga Bata” niini nga kapanguhaan.

tawo nga nagtuon sa mga kasulatan diha sa panimalay

Pipila ka Butang nga Angayang Hinumdoman

• Matag panahon nga makigtagbo ka sa mga bata, paghunahuna og mga paagi nga matabangan nimo sila nga mobati sa gugma sa Langitnong Amahan ug ni Jesukristo ug makaila sa impluwensiya sa Espiritu Santo.

• Ang mga ginikanan adunay nag-unang responsibilidad sa pagtudlo sa ilang mga anak. Isip magtutudlo, ikaw adunay importanteng responsibilidad sa pagsuporta, pag-awhag, ug paglig-on sa pagkat-on sa ebanghelyo diha sa panimalay. Magmahimong sensitibo sa mga bata kansang mga ginikanan wala magtudlo sa ebanghelyo diha sa ilang panimalay. Ilakip ang tanang bata sa mga panaghisgotan sa ebanghelyo, bisan unsa pa ang mga kahimtang sa ilang panimalay.

• Ang pagsabot sa mga pagtulun-an diha sa Daang Tugon mahimong mas sayon alang sa mga bata kon nahibalo sila og gamay nga konteksto sa kasaysayan alang niadto nga mga pagtulun-an. Makakita ka og konteksto sa kasaysayan diha sa Dali, Sunod Kanako—Alang sa mga Indibidwal ug mga Pamilya ug sa Mga Istorya sa Daang Tugon.

• Ang pagbalik-balik maayo. Ang mga bata makakat-on sa mga kamatuoran sa ebanghelyo sa mas epektibong paagi kon kini nga mga kamatuoran ibalik-balik sa pagtudlo pinaagi sa lain-laing mga kalihokan. Kon imong makita nga ang usa ka kalihokan sa pagkat-on epektibo ngadto sa mga bata, ikonsiderar ang pagbalik-balik niini, ilabi na kon nagtudlo ka sa mas gagmay nga mga bata. Mahimo usab nimong rebyohon ang usa ka kalihokan gikan sa miaging leksiyon.

• Ang Langitnong Amahan gusto nga molampos ka isip usa ka magtutudlo. Mihatag Siya og daghang kapanguhaan sa pagtabang nimo, lakip na ang mga miting sa konseho sa magtutudlo. Niini nga mga miting mahimo kang magpakitambag sa ubang mga magtutudlo mahitungod sa mga hagit nga imong giatubang. Mahimo usab nimong hisgotan ug sundon ang mga baroganan sa Kristohanon nga pagtudlo.

• Kon nagtudlo ka sa mas gagmay nga mga bata ug nagkinahanglan og dugang nga tabang, tan-awa ang “Pagtubag sa mga Panginahanglan sa Mas Gagmay nga mga Bata” dinhi niini nga kapanguhaan.

• Kini nga kapanguhaan naglakip sa mga latid alang sa matag semana sa tibuok tuig. Sa mga Dominggo nga walay ipahigayon nga Primary tungod sa kinatibuk-ang komperensiya, komperensiya sa stake, o sa bisan unsang rason, ang mga pamilya magpadayon sa pagbasa sa Daang Tugon diha sa panimalay sumala sa eskedyul nga gilatid. Ayaw kabalaka bahin sa mga leksiyon nga wala nimo mahimo; itudlo ang gi-assign nga sinemanang latid.