mga magtutudlo ug gagmay nga mga bata diha sa lawak klasehanan sa simbahan

Dugang nga mga Kapanguhaan alang sa Pagtudlo sa mga Bata

Kini nga mga kapanguhaan makita diha sa Gospel Library nga app ug sa ChurchofJesusChrist.org.

Dali, Sunod Kanako—Alang sa mga Indibidwal ug mga Pamilya

Mahimo nimong ipahiangay ang mga kalihokan gikan sa Dali, Sunod Kanako—Alang sa mga Indibidwal ug mga Pamilya aron magamit sa imong klase sa Primary. Ayaw kabalaka kon ang mga bata nakahimo na niini nga mga kalihokan uban sa ilang mga pamilya sa panimalay; ang pagbalik-balik makatabang sa mga bata nga makat-on. Ang mga bata gustong mosulti kanimo kon giunsa nila pagbuhat ang mga kalihokan uban sa ilang mga pamilya ug unsay ilang nakat-onan.

Mga Himno ug Songbook sa mga Bata

Ang sagradong musika nagdapit sa Espiritu ug nagtudlo og doktrina sa halandomong paagi. Agig dugang ngadto sa giimprinta nga mga bersyon sa Mga Himno ug sa Songbook sa mga Bata, makakita ka og audio ug video nga mga rekording sa daghang mga himno ug mga awit sa mga bata sa music.ChurchofJesusChrist.org ug diha sa Sacred Music ug sa Gospel Media nga mga app.

Alang sa mga ideya, tan-awa ang mga seksiyon nga “Paggamit og Musika sa Pagtudlo sa Doktrina” ug “Pagtabang sa mga Bata nga Makakat-on ug Mahinumdom sa mga Kanta sa Primary ug mga Himno” diha sa “Mga Panudlo alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento” niini nga kapanguhaan.

Tan-awa Ang Inyong Gagmay nga mga Bata

Daghan sa mga hilisgotan nga gitudlo diha sa Tan-awa Ang Inyong Gagmay nga mga Bata: Manwal sa Nursery susama ra niadtong imong itudlo sa Primary. Ilabi na kon magtudlo ka og mas gagmay nga mga bata, ikonsiderar ang pagtan-aw diha sa manwal sa nursery alang sa dugang nga mga awit, mga istorya, mga kalihokan, ug pagpanghimo og mga produkto gamit ang kamot [crafts].

Higala nga Magasin

Ang Higala nga magasin maghatag og mga istorya ug mga kalihokan nga makadugang sa mga baroganan nga imong gitudlo gikan sa Dali, Sunod Kanako—Alang sa Primary.

Mga Istorya sa Daang Tugon

Ang Mga Istorya sa Daang Tugon makatabang sa mga bata nga makakat-on sa doktrina ug mga istorya nga makita diha sa Daang Tugon. Makita usab nimo ang mga video niini nga mga istorya sa Gospel Library app ug sa MediaLibrary.ChurchofJesusChrist.org.

Koloranan nga Libro sa mga Istorya sa Kasulatan—Daang Tugon

Kini nga kapanguhaan naglangkob og makalingaw nga koloranan nga mga pahina sa kalihokan nga gidesinyo aron sa pagpalambo sa pagkat-on sa mga bata gikan sa Daang Tugon.

Mga Video ug Sining

Ang artwork, mga video, ug ubang media makatabang niadtong imong tudloan nga makasabot sa doktrina ug makahulagway sa mga istorya nga may kalabotan sa mga kasulatan. Bisitaha ang Gospel Media sa MediaLibrary.ChurchofJesusChrist.org aron sa pag-browse sa koleksiyon sa Simbahan sa mga kapanguhaan sa media. Ang Gospel Media anaa usab isip mobile nga app. Daghang hulagway nga mahimo nimong gamiton sa klase makita diha sa Libro sa mga Hulagway sa Ebanghelyo.

Pagtudlo sumala sa Pamaagi sa Manluluwas

Ang Pagtudlo sumala sa Pamaagi sa Manluluwas makatabang kanimo sa pagkat-on ug sa paggamit sa mga baroganan sa Kristohanon nga pagtudlo. Kining mga baroganan hisgotan ug buhaton diha sa mga miting sa teacher council.