kok’aleb’ sa’ jun tzoleb’aal sa’ li kapiiy

Roksinkil Kim, Taaqehin—Choq’ re li Tzoleb’aal reheb’ li Kok’al

Kawresink-ib’ re k’utuk sa’ li Tzoleb’aal reheb’ li Kok’al

Li tzolok sa’ junesal ut jo’ junkab’al sa’ kab’l tento naq a’anaq tz’aqal xna’ajil xtzolb’al li evangelio. Yaal a’in choq’ aawe laa’at jo’ ajwi’ choq’ reheb’ li tzolb’ileb’ aab’aan. Naq nakakawresi aawib’ re k’utuk, taatikib’ rik’in li k’a’ru nakak’ul laa’at rik’ineb’ li loq’laj hu. Li kawresink-ib’ li q’axal aajel ru taak’ulmanq naq taasik’ aamusiq’ankil xb’aan li Santil Musiq’ej.

Kim, Taaqehin—Choq’ reheb’ li komon ut li junkab’al aajel ajwi’ ru sa’ li tzolok sa’ junesal ut sa’ xkawresinkil aawib’ re k’utuk. Tatxtenq’a chixtawb’al chik aana’leb’ chirixeb’ li tzol’leb’ re li evangelio li neke’tawman sa’eb’ li loq’laj hu.

Naq yookat chixkawresinkil aawib’, te’chalq li na’leb’ ut li eek’ahom aawik’in chirixeb’ li kok’al yookat chixtzolb’aleb’. Taak’ul aamusiq’ankil chirix chan ru naq eb’ li na’leb’ sa’eb’ li loq’laj hu taarosob’tesiheb’ xyu’am a’an. B’eresinb’ilaqat chixmusiq’ankileb’ re xtawb’aleb’ li na’leb’ a’an naq yookeb’ chixtzolb’aleb’ li loq’laj hu xjuneseb’ ut rik’ineb’ lix junkab’al.

Li na’leb’ re k’utuk

Naq yookat chixk’uub’ankil aana’leb’ re k’utuk, naru taataw chik aana’leb’ rik’in li aatin li tusub’anb’il sa’ li hu a’in. Maak’oxla naq tento xtaaqenkileb’ li aatin a’in chi tzoltzo jo’ tz’iib’anb’il, a’an b’an tenq’ re tat-ok chixk’ulb’al li na’leb’ chi musiq’anb’il. Laa’at nakanaweb’ ru li kok’al tzolb’ileb’ aab’aan—ut naru taanaweb’ ru chi us naq nakat-aatinak rik’ineb’ sa’ laa tzoleb’aal. Li Qaawa’ naxnaweb’ ajwi’ ru, ut a’an tatxmusiq’a rik’in tz’aqal li chaab’il k’utuk ut rosob’tesinkileb’ li kok’al.

Wankeb’ naab’al chik li k’anjeleb’aal naru taawoksi naq nakakawresi aawib’, jo’eb’ li na’leb’ neke’tawman sa’ Kim, Taaqehin—Choq’ reheb’ li komon ut li junkab’al ut sa’eb’ li hu puktesinb’il xb’aan li Iglees. Re xtawb’al chik li na’leb’ chirixeb’ li k’anjeleb’aal a’in, chi’ilmanq “Xkomon chik li k’anjeleb’aal” sa’ li hu a’in.

jun kristiaan naxtzol li loq’laj hu sa’ kab’l

Junjunq li na’leb’ li tento taawanq sa’ aach’ool

• Rajlal sut naq taach’utub’ aawib’ rik’ineb’ li kok’al, k’oxla chan ru taatenq’aheb’ chireek’ankil lix rahom li qaChoxahil Yuwa’ ut li Jesukristo ut chixk’eeb’al reetal li Santil Musiq’ej.

• Teneb’anb’il sa’ xb’eeneb’ li yuwa’b’ej xtzolb’aleb’ lix kok’al. Jo’ aj k’utunel, wan jun aanimla k’anjel xkawresinkil, xwaklesinkil, ut kab’lak sa’ xb’een li tzolok chirix li evangelio li na’ux sa’ li junkab’al. Weent taab’aanu rik’ineb’ li kok’al li ink’a’ tzolb’ileb’ xb’aaneb’ lix na’ xyuwa’ chirix li evangelio sa’ kab’l. Kanab’eb’ chi tz’aqonk chixjunileb’ li kok’al chi aatinak chirix li evangelio a’ yaal jo’ chanru lix wanjikeb’ sa’ lix junkab’aleb’.

• Eb’ li kok’al naru te’ok chixtawb’aleb’ ru li na’leb’ sa’ li Najter Chaq’rab’ naq te’xtzol k’a’ru yoo chi k’ulmank sa’ li tasal nak’utman wi’ jun li na’leb’. Naru taataw k’a’ru yoo chi k’ulmank sa’ Kim, Taaqehin—Choq’ reheb’ li komon ut li junkab’al ut sa’ Relatos del Antiguo Testamento.

• Li ka’sutink a’an chaab’il. Eb’ li kok’al neke’xtzol xyaalalil li evangelio chi chaab’il naq li yaal a’an k’utb’il chi naab’al sut rik’in k’iila kok’ k’anjel. Wi nakak’e reetal naq junaq li ch’ina k’anjel chaab’il choq’ reheb’ li kok’al, naru taaka’suti, mas wi’chik naq nakatzoleb’ li kok’al toj ka’ch’ineb’ xyu’am. Maare taanumsi wi’chik junaq li ch’ina k’anjel re li tzolok xnume’.

• Li qaChoxahil Yuwa’ taaraj naq us tat-elq jo’ aj k’utunel. A’an xk’e k’iila k’anjeleb’aal re aatenq’ankil chi usaak, jo’eb’ li ch’utam reheb’ laj k’utunel. Sa’eb’ li ch’utam a’in naru taak’ul aana’leb’ rik’ineb’ li jun ch’ol chik chi aj k’utunel chirixeb’ li ch’a’ajkilal li yookat chirilb’al. Naru ajwi’ tex’aatinaq chirix li k’utuk jo’ li Kristo, ut teeyal xb’aanunkil.

• Wi nakatzoleb’ li kok’al toj ka’ch’ineb’ xyu’am ut nakawaj xkomon aatenq’ankil, sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ li k’anjeleb’aal a’in.

• Li hu a’in naxk’e jun tzolom choq’ re li junjunq xamaan re li chihab’. Sa’eb’ li domingo maak’a’ wi’ li Tzoleb’aal reheb’ li Kok’al sa’ xk’ab’a’ jun li ch’utub’aj-ib’ re oqech malaj jalan chik li na’leb’, eb’ li junkab’al toj te’ril li Najter Chaq’rab’ sa’ rochocheb’ jo’ chanru tz’iib’anb’il resil. Maak’a’ naxye wi ink’a’ naru xk’utb’al chixjunileb’ li tzolok; k’ut li tzolok choq’ re li xamaan a’an.