jun ch’ina al sa’ jun silla de ruedas rochb’een jun li ixq sa’ li Iglees

Xb’aanunkil li nak’anjelak choq’ reheb’ li kok’al li wankeb’ xmajelal sa’ tib’elej

Teneb’anb’il sa’ xb’eeneb’ laj jolominel sa’ li Tzoleb’aal reheb’ li Kok’al xk’utb’al lix evangelio li Jesukristo chiruheb’ chixjunileb’ li kok’al, jo’eb’ ajwi’ li wankeb’ xmajelal sa’ tib’elej. Sa’ li Tzoleb’aal reheb’ li Kok’al, chixjunileb’ li kok’al tento te’reek’a naq k’ulb’ileb’, raarookeb’, ilb’ileb’, ut k’ulub’ejeb’. Sa’ li na’ajej chi jo’kan moko ch’a’aj ta choq’ reheb’ chixjunileb’ li kok’al xtawb’al ru lix rahom li qaChoxahil Yuwa’ ut li Jesukristo, ut reek’ankil ut xk’eeb’al reetal lix wankil li Santil Musiq’ej. Eb’ li na’leb’ a’in naru nakate’xtenq’a chixb’aanunkil li nak’anjelak choq’ reheb’ li kok’al li wankeb’ xmajelal sa’ tib’elej.

• Sik’ aanawom chirixeb’ lix majelaleb’ li kok’al. Naru nakataw tz’aqal aanawom chirix a’an naq nakat-aatinak rik’ineb’ lix na’ xyuwa’ li ch’ina al malaj rik’in li kristiaan na’ilok re. Tz’il rix chan ru naru chi tzolok chi us li ch’ina al ut k’a’ru li k’anjeleb’aal naru nakawoksi. Naru ajwi’ nakat-aatinak rik’ineb’ jalaneb’ chik aj jolominel ut aj k’utunel re li Tzoleb’aal reheb’ li Kok’al li ak wankeb’ xnawom li naru neke’xwotz.

• Yoob’ jun chaab’il eek’ahom b’ar wi’ li junjunq chi kok’al taareek’a naq kolb’il rix ut raaro. Tzol xk’ab’a’eb’ chixjunileb’ li kok’al re laa tzoleb’aal, ut tenq’aheb’ chireek’ankil naq k’ulb’ileb’, raarookeb’, ut k’ulub’ejeb’. Wan naq neke’majewaak li kok’al wankeb’ xmajelal sa’ tib’elej, jo’kan naq sik’ hoonal re xwaklesinkileb’ xch’ool xb’aan lix chaab’il wanjikeb’.

• K’uub’ ru laa hoonal re naq chixjunileb’ te’ruuq chi tz’aqonk. Naru neke’jalman b’ayaq li hoonal sa’eb’ li kok’ k’anjel re naq chixjunileb’ li kok’al te’ruuq chi tzolok, jo’eb’ ajwi’ li wankeb’ xmajelal sa’ tib’elej malaj eb’ li ch’a’aj tzolok chiruheb’. Qayehaq, wi junaq li ch’ina k’anjel naxye naq taak’ut jun jalam-uuch, naru teeb’icha jun li b’ich na’aatinak chirix ajwi’ a’an re naq te’tz’aqonq li kok’al ink’a’ neke’ilok.

• K’uub’ ru li k’anjel ut li k’a’ru taab’aanumanq sa’ li tzoleb’aal. Naru taayiib’ xtusulal ru li tzolok taab’aanumanq chiru jun nimla perel li hu. Chiru ajwi’ li nimla hu a’an naru taatz’iib’a ani taatijoq, lix hoonalil li tzolok, ut lix hoonalil li kok’ k’anjel. A’in naru natenq’an chixk’osb’al lix k’a’uxleb’aaleb’ li kok’al chirix li taab’aanumanq, li naru naxk’eheb’ chi titz’k.

• Oksiheb’ jalam-uuch. Li kok’al ch’a’aj chiruheb’ tzolok malaj li jwal neke’poqlek naru neke’tenq’aak xb’aaneb’ li jalam-uuch, jo’eb’ li jalam-uuch neke’xk’ut chan ru tento toowanq, jo’ chanru xtaqsinkil li quq’ re xsumenkil junaq li patz’om.

• Tz’il rix k’a’ut naq neke’poqlek li kok’al. Chasik’ aana’leb’ chirixeb’ li majelal sa’ tib’elej malaj k’a’aq chik ru chirix lix wanjik junaq ch’ina al. Chak’ehaq aawilob’aal rik’in li nak’ulman naq nawan li poqlek. Chattijoq chirix chan ru naru nakajal li nak’ulman re xtenq’ankil chi us li ch’ina al.