“Disyembre 12–18. Malaquias: ‘Ang Ginoo Miingon, Gihigugma Ko Kamo,’” Dali, Sunod Kanako—Alang sa Primary: Daang Tugon 2022 (2021)
“Disyembre 12–18. Malaquias,” Dali, Sunod Kanako—Alang sa Primary: 2022
Disyembre 12–18
Malaquias
“Ang Ginoo Miingon, Gihigugma Ko Kamo”
Gihigugma sa Ginoo ang mga bata nga imong gitudloan. Sa unsang paagi nimo matabangan ang mga bata nga mobati sa Iyang gugma samtang itudlo nimo ang doktrina nga makita diha sa basahon ni Malaquias?
Irekord ang Imong mga Impresyon
Dapita ang Pagpaambit
Basaha ang mosunod nga pulongan gikan sa Malaquias 1:2: “Ang Ginoo miingon, gihigugma ko kamo.” Dapita ang matag bata sa pagpaambit og usa ka paagi nga ilang nahibaloan nga ang Ginoo nahigugma kanila. Human mopaambit ang matag bata, pasalamati siya, ug ipaambit ang imong pagpamatuod sa gugma sa Ginoo alang niana nga bata.
Itudlo ang Doktrina: Mas Gagmay nga mga Bata
Ang Langitnong Amahan mopanalangin kanako kon mobayad ako og ikapulo.
Bisan og ang gagmay nga mga bata nga imong gitudloan dili pa makapangita og kwarta, makakat-on gihapon sila mahitungod sa mga panalangin sa pagbayad og ikapulo.
Posible nga mga Kalihokan
-
Tabangi ang mga bata nga moihap og 10 ka gagmay nga mga butang, sama sa mga sensilyo diha sa pahina sa kalihokan niining semanaha. Dapita sila sa paglain og usa sa mga butang gikan sa tanan, ug ipasabot nga sama kini sa ikapulo nga ihatag nato sa Ginoo. Ihatag nato Kaniya ang ikanapulo sa unsay atong madawat. Ipaambit ang imong pagpamatuod kon sa unsang paagi ang Ginoo mopanalangin kanato kon kita mobayad og ikapulo. Kantaha uban sa mga bata ang usa ka awit mahitungod sa ikapulo, sama sa “Mohatag G’y[o]d Ko og Tithing” (Liahona, Oktubre 2006, H13).
-
Pagdrowing og bentana diha sa pisara, ug basaha ang Malaquias 3:10 ngadto sa mga bata. Dapita sila nga itudlo ang bentana kon basahon nimo ang pulongan nga “mga b[e]ntana sa langit.” Ipatin-aw nga kini nagpasabot nga ang Langitnong Amahan mohatag kanato og talagsaon nga mga panalangin kon kita mobayad og ikapulo. Samtang koloran sa mga bata ang pahina sa kalihokan niining semanaha, hisgoti ang pipila ka rason kon nganong mobayad kita og ikapulo.
-
Ipaambit ang usa ka istorya gikan sa ang Higala nga magasin o gikan sa imong kaugalingon nga kinabuhi mahitungod sa pagbayad og ikapulo. Dapita ang mga bata nga maminaw alang sa mga panalangin nga mahimong moabot gikan sa pagbayad og ikapulo.
Kita silyohan isip mga pamilya diha sa templo.
Tungod sa mga yawe sa pagkapari sa pagsilyo nga gihatag ni Elijah kang Joseph Smith didto sa Templo sa Kirtland, ang mga pamilya mahimong mahiusa hangtod sa kahangtoran. Samtang itudlo nimo kini nga kamatuoran, magmahimong sensitibo sa mga pagbati sa mga bata kansang mga pamilya wala pa masilyo sa templo.
Posible nga mga Kalihokan
-
Basaha ang Malaquias 4:5 ngadto sa mga bata. Dayon sultihi sila nga natuman kini nga saad sa dihang si Elijah mipakita ngadto kang Joseph Smith didto sa Templo sa Kirtland (tan-awa sa “Kapitulo 40: Mga Panan-awon Sulod sa Templo sa Kirtland,” sa Mga Istorya sa Pagtulun-an ug mga Pakigsaad, 157). Ipakita ang usa ka litrato niini nga panghitabo (tan-awa sa Libro sa mga Hulagway sa Ebanghelyo, nu. 95), ug dapita ang mga bata nga itudlo si Elijah ug si Joseph Smith. Ipasabot nga tungod kay mianhi si Elijah, masilyo kita isip mga pamilya diha sa templo. Ipaambit ang imong pagpamatuod sa importansiya nga masilyohan isip mga pamilya.
-
Sultihi ang mga bata mahitungod sa imong gugma alang sa imong pamilya; ipakita ang usa ka litrato, kon mahimo. Dapita ang pipila ka bata sa pagpaambit sa ilang mga pagbati alang sa ilang pamilya. Kantaha og dungan ang usa ka awit mahitungod sa mga pamilya, sama sa “Mga Pamilya Mahimong Manag-uban sa Hangt[o]d” (Mga Himno, nu. 188), ug pagpamatuod nga gusto sa Langitnong Amahan nga masilyo ang mga pamilya ug mao kana ang usa ka rason nga kita adunay mga templo. Tabangi ang mga bata nga makasabot nga tungod ni Jesukristo, kita mahimong masilyo gani ngadto sa mga sakop sa pamilya nga wala makaadto sa templo niini nga kinabuhi. Dapita ang mga bata sa pagdrowing og hulagway sa ilang pamilya nga magkauban sa langit.
Itudlo ang Doktrina: Mas Dagko nga mga Bata
Ang Langitnong Amahan mopanalangin kanako kon mobayad ako og ikapulo.
Ang pagbayad og ikapulo mas mahitungod sa pagbaton og hugot nga pagtuo sa Langitnong Amahan ug ni Jesukristo kay sa mahitungod sa panalapi. Unsay nasabtan sa mga bata nga imong gitudloan mahitungod sa ikapulo? Sa unsang paagi nimo matabangan sila nga makabaton sa hugot nga pagtuo nga mobayad og ikapulo?
Posible nga mga Kalihokan
-
Isulat sa pisara ang mga pangutana mahitungod sa ikapulo sama sa mosunod: Unsa ang ikapulo? Unsaon nako sa pagbayad og ikapulo? Para unsa ang ikapulo? Unsa ang mga panalangin sa pagbayad og ikapulo? Dapita ang mga bata sa pagsiksik sa Malaquias 3:8–12 ug “Ikanapulo, Mga Ikapulo” diha sa Giya ngadto sa mga Kasulatan (scriptures.ChurchofJesusChrist.org) ug isulat ang mga tubag nga ilang makit-an. Awhaga sila sa pagpaambit sa ilang mga tubag ngadto sa usag usa. Unsa nga matang sa katawhan kita mamahimo pinaagi sa pagbayad og ikapulo?
-
Basaha og dungan ang Marcos 12:41-44. Unsay gitudlo kanato niini nga istorya mahitungod sa unsay bation sa Ginoo mahitungod sa atong mga halad?
-
Pagdrowing og bentana diha sa pisara, ug dapita ang mga bata nga isulat sulod sa bentana ang mga panalangin nga mahimong madawat sa usa ka tawo tungod sa pagbayad og ikapulo (alang sa mga ideya, tan-awa sa Malaquias 3:10–12). Dapita ang mga bata sa pagpaambit og personal nga ehemplo kon sa unsang paagi sila o ilang mga pamilya napanalanginan pinaagi sa matinud-anong pagbayad og ikapulo. O mahimo kang mopaambit og ehemplo gikan sa imong kaugalingon nga kinabuhi kon sa unsang paagi ang pagbayad og ikapulo nakapalambo sa imong hugot nga pagtuo sa Langitnong Amahan ug ni Jesukristo.
Paghulagway ni Elijah nga nagpakita ngadto nila ni Joseph Smith ug Oliver Cowdery didto sa Templo sa Kirtland, ni Robert T. Barrett
“Ipadala ko kaninyo si propeta [Elijah].”
Ang panagna ni Malaquias mahitungod ni Elijah ang propeta natuman sa dihang si Elijah mipakita ngadto ni Joseph Smith didto sa Templo sa Kirtland ug mihatag kaniya sa mga yawe sa pagkapari nga magtugot sa mga pamilya nga masilyo hangtod sa kahangtoran. Mahimo nimong ikonsiderar ang pagdapit og usa ka tawo sa ward nga adunay responsibilidad alang sa buhat sa templo ug family history (sama sa usa ka sakop sa kapangulohan sa elders quorum o kapangulohan sa Relief Society) aron sa pagtabang kanimo og tudlo niini nga doktrina ngadto sa mga bata. Hinumdomi nga magmahimong sensitibo sa mga pagbati sa mga bata kansang mga pamilya wala pa masilyo.
Posible nga mga Kalihokan
-
Isulat ang matag pulongan gikan sa Malaquias 4:5–6 sa usa ka lahi nga piraso sa papel. Ihatag ang mga piraso sa papel ngadto sa mga bata, ug hangyoa sila nga ibutang ang mga pulongan sa husto nga han-ay. Basaha og dungan ang mga bersikulo, ug hisgoti ang mga pangutana sama niini: Kinsa ang gisaad sa Ginoo nga ipadala? Kanus-a sa Iyang gisulti nga kini nga tawo moabot? Unsay gisulti sa Ginoo nga buhaton niini nga tawo? Nganong kinahanglan nga moanhi kini nga tawo? Diin natuman kini nga panagna? (tan-awa sa Doktrina ug mga Pakigsaad 110:13–16).
-
Isulat sa pisara ang usa ka pangutana sama sa Unsay buot ipasabot nga hiusahon ang mga anak ug ang mga ginikanan? (tan-awa sa Malaquias 4:6). Dapita ang mga bata sa pagpaambit sa ilang mga hunahuna kabahin sa pangutana diha sa pisara. Hisgoti og dungan ang mga kasinatian nga ikaw o ang mga bata aduna sa pagkat-on mahitungod sa family history.
-
Ipakita ang hulagway ni Elijah gikan sa latid niining semanaha sa Dali, Sunod Kanako—Alang sa mga Indibidwal ug mga Pamilya. Dapita ang mga bata sa pagpaambit kon unsay ilang nahibaloan mahitungod sa panghitabo nga gipakita niini nga hulagway (tan-awa usab sa Doktrina ug mga Pakigsaad 110:13–16). Pagpamatuod nga ang gahom sa pagsilyo nga gipahiuli ni Elijah magtugot sa mga pamilya nga mahiusa sa kahangtoran—lakip sa mga pamilya nga wala makabaton niana nga oportunidad dinhi sa mortalidad. Kon nakaapil ka sa usa ka pagsilyo, alang sa imong kaugalingon o alang sa usa ka namatay nga tawo, paghisgot mahitungod sa unsay imong nabati atol niana nga ordinansa. Hangyoa ang mga bata sa pagpaambit sa ilang mga pagbati mahitungod sa ilang mga pamilya ug mahitungod sa plano sa Dios sa pagtabang sa mga pamilya nga magkauban hangtod sa kahangtoran.
Awhaga ang Pagkat-on diha sa Panimalay
Dapita ang mga bata sa paghunahuna og usa ka butang nga ilang nakat-onan atol sa klase karon, ug hangyoa ang pipila ka bata sa pagpaambit. Awhaga ang tanan nga mga bata sa pagpaambit ngadto sa ilang mga pamilya og usa ka butang nga ilang nakat-onan mahitungod sa mga pagtulun-an ni Malaquias.
Pagpalambo sa Atong Pagtudlo
Paapila ang mga bata sa mga panaghisgot sa ebanghelyo. Mahimong kinahanglanon nimong maghunahuna og mamugnaon nga mga paagi aron mapaapil ang mas gagmayng mga bata sa mga panaghisgot sa ebanghelyo. Sama pananglit, ang mga bata mahimong mopasa-pasa og usa ka bola ug mopaambit sa ilang tubag sa usa ka pangutana kon sila ang naggunit sa bola.