Si Jesus nga nagtan-aw sa mga bitoon

“Ang Iyang mga paagi mao sa gihapon” (Habacuc 3:6). Sa Wala Pay Nabuhat Bisan Unsa, ang Pulong Diha Na, ni Eva Timothy

Nobyembre 28–Disyembre 4

Nahum; Habacuc; Sofonias

“Ang Iyang Mga Paagi Mao Sa Gihapon”

Ang imong gugma sa mga kasulatan mahimong adunay gamhanan nga impluwensiya sa mga bata nga imong gitudloan. Pakit-a sila kon unsa ka kamapasalamaton alang sa pulong sa Dios.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga bata nga magpuli-puli og barog ug magpakaaron-ingnon nga usa ka propeta sa Daang Tugon nga nagbarog “sa bantayang tore” sama ni Habacuc (Habacuc 2:1). Hangyoa sila sa pag-istorya ngadto sa ubang mga bata og usa ka butang nga ilang nakat-onan mahitungod ni Jesukristo ug sa Iyang ebanghelyo.

pagtudlo nga icon

Itudlo ang Doktrina: Mas Gagmay nga mga Bata

Habacuc 2:3

Ang Ginoo kanunay nga motuman sa Iyang mga saad.

Ang propeta Habacuc nabalaka sa kadaotan nga iyang nakita taliwala sa katawhan sa Juda (tan-awa sa Habacuc 1:2–4). Ang Ginoo miseguro kaniya pag-usab nga ang Iyang mga saad matuman sa Iyang panahon (see Habacuc 2:3).

Posible nga mga Kalihokan

• Ipaambit ang pipila ka ehemplo sa mga butang nga maayo apan human lamang nga maghulat kita—sama sa bunga nga kinahanglang mahinog o minasa nga harina [dough] nga kinahanglang lutoon. Unsay mahitabo kon gisulayan nato og kaon ang bunga o ang minasa nga harina sa dili pa kini andam? Pag-istorya mahitungod sa propeta Habacuc, kinsa gustong mahibalo kon kanus-a hunongon sa Ginoo ang kadaotan nga nakita niya sa iyang palibot. Basaha ngadto sa mga bata ang tubag sa Ginoo, nga makita sa Habacuc 2:3. Ipasabot pag-ayo nga gikinahanglan ni Habacuc nga maghulat nga matuman ang mga saad sa Ginoo, sama lang nga kita usahay kinahanglan nga mobuhat sa ingon. Ipaambit ang higayon sa dihang kinahanglan kang maghulat sa usa ka panalangin.

• Tabangi ang mga bata nga maghunahuna og mga butang nga gisaad sa Ginoo—sama pananglit, nga si Jesukristo mobalik nganhi sa yuta o nga kita makapuyo pag-usab uban sa Dios. Sa matag ehemplo, dapita ang mga bata sa pagsubli sa pulongan “Paabota lang kay moabot gayod kini.”

Habacuc 2:14

Ako makatabang sa pagpuno sa kalibotan sa kahibalo bahin ni Jesukristo.

Si Habacuc nanagna sa panahon sa dihang ang tibuok kalibotan mahibalo bahin ni Jesukristo. Kana nga panagna nagsugod na sa pagkatuman sa atong panahon. Hunahunaa kon sa unsang paagi nimo matabangan ang mga bata nga mahimong kabahin sa katumanan niini.

Posible nga mga Kalihokan

• Ipakita ang usa ka walay sulod nga garapon, ug hatagi ang matag bata og gamay nga butang. Hangyoa ang matag bata sa pagpaambit og usa ka butang nga gibuhat o gitudlo ni Jesus ug dayon isulod ang ilang butang diha sa garapon. Basaha og kusog ang Habacuc 2:14, ug ipasabot nga sama lang nga gipuno sa mga bata ang garapon sa ilang kahibalo sa Ginoo, kita usab makapuno sa kalibotan sa kahibalo bahin Niya.

• Ipakita sa mga bata ang mapa sa kalibotan (tan-awa sa mga Mapa sa Kasaysayan sa Simbahan, nu. 7, “Mapa sa Kalib[o]tan”). Tabangi sila nga makit-an ang dapit diin sila nagpuyo ug ang mga dapit diin miserbisyo ang mga misyonaryo nga ilang nailhan. Pagpamatuod nga gusto sa Langitnong Amahan nga makahibalo ang tanang tawo sa tibuok kalibotan mahitungod ni Jesukristo. Sa unsang paagi nga makatabang kita sa pagtudlo sa ubang tawo mahitungod ni Jesus? Sultii ang mga bata mahitungod sa mga butang nga imong nakita nga ilang gibuhat nga nagtudlo kanimo mahitungod ni Jesukristo. Tabangi sila sa paghunahuna og ubang mga butang nga ilang mahimo.

• Kantaha og dungan ang usa ka awit mahitungod sa pagpaambit sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90). Unsa ang atong maistorya sa uban mahitungod ni Jesukristo? Alang sa pipila ka ideya, tan-awa ang mga Artikulo sa Hugot nga Pagtuo.

Sofonias 2:3

“Pangitaa ninyo ang Ginoo.”

Gitudlo ni Sofonias nga kinahanglan pangitaon nato ang Ginoo atol sa mga panahon sa dakong kadaotan, sama niining ulahing mga adlaw. Pamalandongi kon unsaon nimo sa pagdasig ang mga bata nga mangita Kaniya.

Posible nga mga Kalihokan

• Ipakita ang usa ka hulagway ni Jesus, ug dayon basaha ngadto sa mga bata ang Sofonias 2:3. Dapita sila sa pagbutang sa ilang mga kamot nga murag anteyohos sa ilang mga mata ug tan-awon ang hulagway sa matag higayon nga imong mabasa ang pulong nga “pangitaa.” Ipasabot nga gusto ni propeta Sofonias nga pangitaon sa mga tawo ang Ginoo. Sa unsang paagi nato pangitaon ang Ginoo? Asa nato Siya makit-an?

• Gamita ang pahina sa kalihokan niining semanaha, o paghunahuna og laing dula nga mag-awhag sa mga bata nga pangitaon ang Ginoo. Ipatukar o kantaha og dungan ang usa ka awit nga may kalabotan niini nga hilisgotan, sama sa “Sayo kong Mangita sa Ginoo” (Songbook sa mga Bata, 67). Hisgoti kon unsay gitudlo sa awit kon unsaon nato pagpangita si Jesukristo sa atong kinabuhi.

pagtudlo nga icon

Itudlo ang Doktrina: Mas Dagko nga mga Bata

Nahum 1:7

“Ang Ginoo maayo, dalangpanan siya panahon sa kalisdanan.”

Ang matag usa kanato moatubang sa atong kaugalingon nga “mga panahon sa kalisdanan.” Sa unsang paagi nimo matabangan ang mga bata nga moduol ngadto sa Ginoo, “modangop kaniya,” ug mangita og espirituhanon nga kasegurohan sa ilang mga adlaw sa kalisdanan?

Posible nga mga Kalihokan

• Ipakita sa mga bata ang litrato sa usa ka dalangpanan o sa usa ka kuta. Unsa man ang pipila ka rason nga ang mga tawo magkinahanglan og usa ka kuta? Dapita ang mga bata sa pagbasa sa Nahum 1:7 aron mahibaloan kon unsay gisulti ni propeta Nahum nga sama sa usa ka dalangpanan o kuta alang kanato. Gikan sa unsa man nga mapanalipdan kita sa Manluluwas?

• Dapita ang mga bata sa pagdrowing og hulagway sa ilang mga kaugalingon ug sa ilang mga pamilya diha sulod sa usa ka dalangpanan o kuta. Awhaga sila sa pagsulat og mga pulong palibot sa dalangpanan nga naghulagway sa pipila ka daotan nga mga impluwensiya sa kalibotan. Dapita sila sa pagsulat og mga pulong sulod sa dalangpanan nga naghulagway ni Jesukristo. Unsa ang gihangyo Niya nga buhaton nato aron makadawat sa Iyang kalig-on ug proteksiyon? (tan-awa sa Doktrina ug mga Pakigsaad 35:24).

  kuta nga bato

  “Ang Ginoo maayo, dalangpanan siya panahon sa kalisdanan” (Nahum 1:7).

Habacuc 3:17–19

Makabaton ako og kalipay kang Jesukristo, bisan og dili maayo ang dagan sa mga butang.

Gihulagway ni Habacuc ang pipila ka pagsulay nga mahimong mahitabo ngadto sa iyang katawhan, lakip sa mga kahoy o mga paras [vine] nga dili mamunga. Miingon dayon siya nga bisan og kini nga mga butang mahitabo “apan bisan pa niana maglipay ako diha sa Ginoo.”

Posible nga mga Kalihokan

• Dapita ang mga bata sa pagbasa sa Habacuc 3:17 ug sa pag-ila sa mga pagsulay nga gihulagway niini nga bersikulo. Unsa kahay bation sa usa ka tawo kon kining mga butanga mahitabo? Tabangi ang mga bata nga maghunahuna og mga pagsulay nga mahimong mahitabo ngadto kanila. Dayon basaha og dungan ang mga bersikulo 18–19 aron makakat-on kon unsay giingon ni Habacuc nga bation niya bisan kon kining mga butanga mahitabo ngadto kaniya.

• Tabangi ang mga bata nga mangita og ubang mga ehemplo sa mga tawo sa kasulatan nga naglipay diha sa Ginoo bisan atol sa lisod nga mga panahon. Makapangita sila og mga ehemplo diha sa Mga Buhat 16:19–25; Mosiah 24:10–15; ug sa mensahe ni Presidente Dieter F. Uchtdorf nga “Mapasalamaton sa Bisan Unsang Kahimtang” (Liahona, Mayo 2014, 70–77), ilabi na sa bahin nga “Magmapasalamaton diha sa Atong mga Kahimtang.” Ngano nga nahimong malipayon man kini nga mga tawo atol sa lisod nga mga panahon? Unsaon nato sa pagsunod sa ilang mga ehemplo?

Sofonias 3:14–20

Kadto kinsa mosunod ni Jesukristo makakaplag og kalinaw ug kalipay.

Ang Sofonias 3:14–20 naghulagway og malipayon nga adlaw sa dihang si Jesukristo, “ang hari sa Israel,” maghari taliwala sa Iyang katawhan ug “magmalipayon siya nga moawit tungod [kanato]” (mga bersikulo 15, 17).

Posible nga mga Kalihokan

• Basaha og dungan ang Sofonias 3:14. Dayon dapita ang matag bata sa pagpili og usa sa mga bersikulo sa Sofonias 3:15–20 ug sa pagtuon niini, nga mangita og usa ka butang nga makatabang kanato sa “pagmaya ug paglipay.” Hangyoa sila sa pagpaambit sa ilang nakit-an.

• Tabangi ang mga bata nga mangita og mga himno o mga awit sa mga bata nga makatabang kanila sa “pagmaya ug paglipay pag-ayo” (Sofonias 3:14). Kantaha og dungan ang pipila ka awit, ug awhaga ang mga bata sa pag-istorya mahitungod sa kalipay nga ilang nakaplagan sa ebanghelyo ni Jesukristo.

pagkat-on nga icon

Awhaga ang Pagkat-on diha sa Panimalay

Hangyoa ang mga bata sa pagsulat sa pakisayran sa usa ka kasulatan nga gusto nilang ipaambit sa ilang mga pamilya (o isulat kini alang kanila).

Pagpalambo sa Atong Pagtudlo

Tabangi ang mga bata nga makaila sa Espiritu. Sulayi sa pagbantay ang mga higayon sa dihang tingali nabati sa mga bata ang impluwensiya sa Espiritu. Kon mahitabo kini, tabangi sila nga makasabot nga kini nga mga pagbati naggikan sa Espiritu Santo.

pahina sa kalihokan: Pangitaa ninyo ang Ginoo