“Nobyembre 21–27. Jonas; Miqueas: ‘Siya Malipay diha sa Gugmang Walay Paglubad,’” Dali, Sunod Kanako—Alang sa Primary: Daang Tugon 2022 (2021)
“Nobyembre 21–27. Jonas; Miqueas,” Dali, Sunod Kanako—Alang sa Primary: 2022
Jonah on the Beach at Nineveh [Si Jonas sa Baybayon sa Ninibe], ni Daniel A. Lewis
Nobyembre 21–27
Jonas; Miqueas
“Siya Malipay diha sa Gugmang Walay Paglubad”
Pangita og importante nga mga baroganan diha sa Jonas ug Miqueas nga mopanalangin sa mga bata nga imong gitudloan. Pamalandong og mga paagi nga imong matabangan ang mga bata sa pagkat-on niini nga mga kamatuoran. Ang mga ideya niini nga latid makatabang.
Irekord ang Imong mga Impresyon
Dapita ang Pagpaambit
Aron matabangan ang mga bata nga makahinumdom sa istorya ni Jonas o sa ubang mga kamatuoran nga mahimong nakat-onan nila sa panimalay, kantaha og dungan ang usa ka awit, sama sa bersikulo 7 sa “Sunda ang Propeta” (Songbook sa mga Bata, 58–59).
Itudlo ang Doktrina: Mas Gagmay nga mga Bata
Ang Ginoo mopanalangin kanako kon mosunod ako Kaniya.
Sa dihang gisugo sa Ginoo si Jonas sa pagsangyaw ngadto sa katawhan sa Ninibe, wala mosunod si Jonas. Tabangi ang mga bata nga makasabot nga kita mapanalanginan kon kita mosunod sa Ginoo.
Posible nga mga Kalihokan
-
Ipakita ang mga hulagway sa istorya ni Jonas, ug dapita ang mga bata sa pagsulti kon unsay ilang nahibaloan mahitungod sa istorya (tan-awa sa “Jonas [ang Propeta]” sa Mga Istorya sa Daang Tugon; pahina sa kalihokan niining semanaha; o latid niining semanaha sa Dali, Sunod Kanako—Alang sa mga Indibidwal ug mga Pamilya). Pangutana og mga sama niini: Unsay nahitabo sa dihang wala mosunod si Jonas sa Ginoo? (tan-awa sa Jonas 1:4–17). Unsay nahitabo sa dihang misunod siya? (tan-awa sa Jonas 3:3–5). Ipaambit ang imong pagpamatuod nga ang Ginoo mopanalangin kanato kon kita mosunod Kaniya.
-
Kantaha og dungan ang usa ka kanta mahitungod sa pagsunod sa Ginoo, sama sa “Dali Ko nga Motuman” (Songbook sa mga Bata, 71). Hisgoti kon sa unsang paagi nga labing maayo unta kadto alang kang Jonas nga misunod sa unang higayon. Tabangi ang mga bata nga maghunahuna og mga butang nga gustong ipabuhat sa Dios kanila ug dayon idrama-drama kon unsaon nila nga makasunod dayon.
Gusto sa Langitnong Amahan nga makadungog ang tanan sa ebanghelyo.
Ang ebanghelyo alang sa tanan.
Ang katawhan sa Ninibe naghinulsol sa dihang gipaambit ni Jonas ang mensahe sa Ginoo ngadto kanila. Unsa ang mga oportunidad nga aduna ang mga bata sa pagpaambit sa ebanghelyo?
Posible nga mga Kalihokan
-
Idrama-drama uban sa mga bata ang mga bahin sa Jonas 3:3–8, sama sa paglakaw paingon sa siyudad sa Ninibe, pagpaambit sa mensahe sa Ginoo, ug pagsulat og kamandoan gikan sa hari ngadto sa iyang katawhan. Ipakita ang usa ka litrato sa mga misyonaryo (tan-awa sa Libro sa mga Hulagway sa Ebanghelyo, mga nu. 109, 110). Unsa ang buluhaton sa mga misyonaryo? Sa unsang paagi usa ka misyonaryo si Jonas? Tabangi ang mga bata nga maghunahuna og mga paagi nga sila makapaambit sa ebanghelyo sa uban, sama sa pagpaambit og usa ka artikulo sa hugot nga pagtuo o paghatag sa ilang pagpamatuod bahin ni Jesukristo.
-
Pagsaysay og usa ka kasinatian sa dihang gipaambit nimo ang ebanghelyo ni Jesukristo. O, pipila ka adlaw sa dili pa magklase, dapita ang usa ka tawo sa pagbisita sa imong klase ug sa pagsulti sa mga bata mahitungod sa usa ka panahon sa dihang gipaambit niya ang ebanghelyo o sa dihang ang usa ka tawo mipaambit sa ebanghelyo kaniya. Awhaga ang tawo sa pagpakita og mga litrato, kon mahimo. Tabangi ang mga bata sa paghunahuna og mga paagi nga sila mahimong mga misyonaryo karon.
Si Jesukristo natawo sa Betlehem.
Si Miqueas nanagna nga usa ka umaabot nga “hari sa Israel” matawo didto sa Betlehem. Matabangan nimo ang mga bata nga masayod nga ang pagkatawo ni Jesukristo nakatuman niini nga panagna.
Posible nga mga Kalihokan
-
Ipakita ang mga hulagway sa mga panghitabo nga naglibot sa pagkatawo ni Jesukristo (tan-awa sa Libro sa mga Hulagway sa Ebanghelyo, mga nu. 28, 29, 30, 31). Hangyoa ang mga bata sa paghisgot kon unsa ang nahitabo sa matag litrato. Basaha ang Miqueas 5:2, ug dapita ang mga bata sa pagtindog kon madungog nila ang pulong nga “Betlehem.” Pagpamatuod nga ang pagkatawo ni Jesus importante kaayo nga ang mga propeta nakahibalo mahitungod niini sa wala pa Siya matawo.
-
Dapita ang mga bata sa pagdrowing og hulagway sa pagkatawo ni Jesus. Samtang ilang ipakita ang ilang mga hulagway, hangyoa sila sa pagpaambit kon nganong mapasalamaton sila ni Jesukristo.
Itudlo ang Doktrina: Mas Dagko nga mga Bata
Ang paghinulsol naglakip sa pag-ila sa akong mga sala ug sa pagpangayo og kapasayloan.
Ang ehemplo ni Jonas makadasig sa mga bata nga modangop sa Ginoo kon sila nakasala.
Posible nga mga Kalihokan
-
Tabangi ang mga bata sa paghimo og lista diha sa pisara sa pipila ka sukaranang mga elemento sa paghinulsol (tan-awa sa Giya ngadto sa mga Kasulatan, “Hinulsol, Paghinulsol,” scriptures.ChurchofJesusChrist.org). Rebyoha og dungan ang istorya ni Jonas, ug dapita ang mga bata sa pagtino og ebidensiya nga naghinulsol si Jonas (tan-awa, sama pananglit sa, Jonas 1:10–12; 2:1–4, 9; 3:1–5). Sa unsang paagi nato mapakita sa Dios nga sinsero ang atong paghinulsol?
-
Kantaha ang awit mahitungod sa paghinulsol, sama sa “Tabangi Ko, Mahal nga Amahan” (Songbook sa mga Bata, 52). Pangutan-a ang mga bata kon unsa nga mga pulong o mga pulongan gikan sa awit ang ilang ipaambit ni Jonas aron makatabang kaniya nga maghinulsol.
Jonas 2:7–10; 3:10; 4:2; Miqueas 7:18–19
Ang Ginoo maluluy-on sa tanan nga modangop ngadto Kaniya.
Kon makasabot ang mga bata nga ang Ginoo maluluy-on ug mabination, sila modangop ngadto Kaniya kon sila magkinahanglan og kaluoy.
Posible nga mga Kalihokan
-
Dapita ang mga bata sa pagpangita og kahulogan sa pulong nga kal[u]oy diha sa usa ka diksyonaryo o diha sa Giya ngadto sa mga Kasulatan (scriptures.ChurchofJesusChrist.org). Nganong nagkinahanglan og kaluoy si Jonas? Nganong nagkinahanglan og kaluoy ang katawhan sa Ninibe? (tan-awa sa Jonas 1:1–3). Hangyoa ang mga bata sa paghunahuna nga ilang mainterbiyo si Jonas. Unsa nga ebidensiya ang mahimong ihatag ni Jonas aron ipakita nga maluluy-on ang Ginoo? (tan-awa, sama pananglit sa, Jonas 2:7–10; 3:10; 4:2). Sa unsang paagi ang Ginoo nagpakita kanato og kaluoy?
-
Hangyoa ang mga bata sa paghimo og lista diha sa pisara sa mga butang nga “malipay” sila, sama sa mga kalingawan, mga panalangin gikan sa Ginoo, ug uban pa. Dapita sila sa pagbasa sa Miqueas 7:18–19 aron sa pagdiskobre og usa ka butang nga gikalipay sa Ginoo. Unsa nga mga kamatuoran niini nga mga bersikulo ang makatabang sa usa ka tawo nga nahadlok nga maghinulsol?
-
Tabangi ang mga bata nga maghunahuna og mga ehemplo sa dihang ang Manluluwas mipakita og kaluoy ngadto sa uban, sama sa Marcos 2:3–12; Lucas 23:33–34; ug Juan 8:1–11. Ipakita ang mga litrato niini nga mga hitabo, kon mahimo. Tabangi ang mga bata nga maghunahuna og mga oportunidad nga aduna sila nga mahimong maluluy-on ug mabination ngadto sa uban.
Gusto sa Ginoo nga ako mobuhat sa kaangayan, mopakita og makanunayong gugma, ug magkinabuhi diha sa mapaubsanong pakig-uban Kaniya.
Ang Miqueas 6:8 naghatag og sundanan alang sa matarong nga pagpakabuhi. Sa unsang paagi nimo matabangan ang mga bata nga madiskobrehan ug masunod ang mga pagtulun-an niini nga bersikulo?
Posible nga mga Kalihokan
-
Basaha og dungan ang Miqueas 6:8, ug tabangi ang mga bata nga makasabot kon unsay gipasabot niini nga mga pulongan: “pagbuhat sa kaangayan,” “pagpakita sa makanunayong gugma,” ug “pagkinabuhi diha sa mapaubsanong pakig-uban sa atong Dios.” Dapita ang mga bata sa pagdrowing og hulagway sa ilang kaugalingon nga nagbuhat og usa ka butang nga may kalabotan sa usa niini nga mga pulongan.
-
Isulat sa pisara “Unsa ang … gipaabot sa Ginoo kanimo?” Dapita sila sa pagpangita sa tubag sa Miqueas 6:8. Sa unsang paagi ang pagsunod sa mga kasugoan sa Ginoo makatabang kanato sa pagtuman sa unsay gikinahanglan kanato sa Ginoo niini nga bersikulo?
Awhaga ang Pagkat-on diha sa Panimalay
Isulat sa usa ka piraso nga papel alang sa matag bata ang usa ka importante nga pulongan gikan sa usa sa mga kasulatan nga inyong gihisgotan isip usa ka klase. Dapita ang mga bata sa pagsulay og sag-ulo sa pulongan ug sa paghangyo sa usa ka sakop sa pamilya sa pagpaambit sa iyang mga hunahuna mahitungod niini.
Pagpalambo sa Atong Pagtudlo
Hatagi gayod og pagtagad ang mga bata. Unsa man ang reaksiyon sa mga bata sa imong klase ngadto sa mga kalihokan sa pagkat-on? Kon sila ingon og dili mahimutang, tingali panahon na nga mosulay og lain nga matang sa kalihokan. Sa laing bahin, kon makamatikod ka nga ang mga bata nalingaw sa usa ka kalihokan, ayaw batia nga naobligar nga mopadayon tungod kay wala pa nimo mahisgoti ang tanang materyal sa leksiyon.