“Disyembre 19–25. Pasko: ‘Siya mao ang Dios nga Atong Gilaoman nga maoy Moluwas Kanato,’” Dali, Sunod Kanako—Alang sa Primary: Daang Tugon 2022 (2021)
“Disyembre 19–25. Pasko,” Dali, Sunod Kanako—Alang sa Primary: 2022
Natawo alang Kanato ang usa ka Bata, ni Simon Dewey
Disyembre 19–25
Pasko
“Siya mao ang Dios nga Atong Gilaoman nga maoy Moluwas Kanato”
Ang mga propeta sa Daang Tugon nagpaabot uban sa dakong kalipay sa pagkatawo sa Mesiyas (tan-awa sa Isaias 25:9). Samtang mangandam ka sa pagtudlo atol sa panahon sa Pasko, hunahunaa kon sa unsang paagi nimo matabangan ang mga bata nga makakaplag og kalipay sa pagkatawo sa Manluluwas nga si Jesukristo.
Irekord ang Imong mga Impresyon
Dapita ang Pagpaambit
Dapita ang mga bata sa pagpaambit sa unsay ilang nahibaloan mahitungod sa pagkatawo ni Jesukristo. Samtang mohisgot sila og usa ka tawo o butang gikan sa istorya, dapita sila sa pagdrowing niini sa pisara. Pangutan-a ang mga bata kon unsay ilang naganahan mahitungod niini nga istorya.
Itudlo ang Doktrina: Mas Gagmay nga mga Bata
Ang Daang Tugon nagtudlo kanako mahitungod ni Jesus.
Tabangi ang mga bata nga motutok sa Manluluwas nga si Jesukristo nga mao ang rason nga magsaulog kita sa Pasko. Mabuhat nimo kini gamit ang mga kasulatan gikan sa Daang Tugon nga nagpamatuod Kaniya.
Posible nga mga Kalihokan
-
Ipakita ang usa ka litrato sa pagkatawo ni Jesukristo (sama sa Libro sa mga Hulagway sa Ebanghelyo, nu.30, o usa sa mga litrato sa latid niining semanaha sa Dali, Sunod Kanako—Alang sa mga Indibidwal ug mga Pamilya). Basaha ang Isaias 9:6, nga maghatag sa matag bata og higayon nga itudlo ang batang Jesus kon madungog nila ang pulongan nga “natawo … ang usa ka bata.” Ipaambit ang imong pagpamatuod nga ang mga propeta sa Daang Tugon nasayod nga matawo si Jesus.
-
Dapita ang matag bata sa pagsulti sa iyang ngalan, ug ipasabot nga agig dugang sa atong mga ngalan, mahimo kitang tawagon sa ubang mga butang, sama sa sister o brother o higala. Dapita ang mga bata sa paghunahuna og lain nga mga ehemplo. Basaha ang Isaias 9:6 ngadto sa mga bata, nga hatagan og gibug-aton ang mga ngalan nga nagpasabot kang Jesukristo: “Maalamong Magtatambag, Dios nga Gamhanan, Amahan Hangtod sa Kahangtoran, Prinsipe sa Pakigdait.” Tabangi ang mga bata nga makasabot kon unsay gipasabot kanato niini nga mga ngalan mahitungod kang Jesus.
-
Hatagi ang matag bata og papel nga bituon, ug dapita ang mga bata sa pagpataas sa ilang mga bituon kon basahon nimo ang mosunod nga pulongan gikan sa Numeros 24:17: “may mosubang nga bituon gikan sa Israel.” Dapita ang mga bata sa pagpaambit kon sa unsang paagi si Jesus sama sa usa ka hayag nga bituon nga nagsidlak sa tibuok kalibotan. Kantaha og dungan ang usa ka awit mahitungod sa bituon nga mipakita sa dihang natawo si Jesus, sama sa “Kabit[u]onan Misanag” (Songbook sa mga Bata, 24) o “Unang Noel” (Mga Himno, nu. 130).
Si Jesukristo mao ang akong Manluluwas.
Ang Pasko mao ang panahon sa pagsaulog dili lang sa pagkatawo ni Jesus apan sa Iyang kinabuhi ug misyon usab isip Manluluwas sa kalibotan. Sa unsang paagi nimo matabangan ang mga bata nga mobati og kalipay ug pagpasalamat sa Pag-ula ni Jesukristo?
Posible nga mga Kalihokan
-
Hangyoa ang mga bata sa paghunahuna og usa ka butang nga ilang gipaabot. Ipasabot nga ang matinud-anon nga mga tawo sa panahon sa Daang Tugon nagpaabot ngadto sa pagkatawo ni Jesukristo. Basaha ang Isaias 25:9 ngadto sa mga bata, ug ipasubli kanila ang pulongan nga “Siya mao ang Dios nga atong gilaoman … Maglipay kita sa iyang pagluwas kanato.” Ipaambit sa ilaha kon nganong nalipay ug nagmaya ka nga natawo si Kristo. Dapita ang mga bata sa pagpaambit sa ilang mga pagbati mahitungod sa Manluluwas.
-
Kantaha og dungan ang usa ka awit mahitungod sa pagkatawo ni Jesus, sama sa “Didto sa Pas[o]ngan” (Songbook sa mga Bata, 26–27) o “Ang Anghel Paminawa!” (Mga Himno, nu. 128). Tabangi ang mga bata nga makadiskobre og mga pulongan niini nga mga awit nga nagtudlo kanato mahitungod sa atong Manluluwas ug sa mga panalangin nga anaa kanato tungod Kaniya.
Itudlo ang Doktrina: Mas Dagko nga mga Bata
Ang Daang Tugon nagtudlo kanako mahitungod ni Jesukristo, ang gisaad nga Mesiyas.
Ang Daang Tugon labaw pa sa usa ka koleksiyon sa makapainteres nga mga istorya ug mga sinulat; ang katuyoan niini, sama sa tanang kasulatan, mao ang pagpamatuod kang Jesukristo. Tabangi ang mga bata nga makakat-on kon unsaon sa pagpangita Kaniya diha sa Daang Tugon.
Posible nga mga Kalihokan
-
Dapita ang mga bata sa paghimo og lista sa tanang ngalan ug tawag ni Jesukristo nga ilang makit-an sa Moises 7:53; Salmo 23:1; Job 19:25; Isaias 7:14; 9:6; 12:2; Amos 4:13; ug Zacarias 14:16. Tugoti sila nga magpares-pares aron magtinabangay kon ganahan nila. Dapita sila sa pagpaambit sa ilang mga lista ngadto sa usag usa. Unsay atong makat-onan mahitungod sa Manluluwas gikan sa matag usa niini nga mga ngalan ug mga tawag?
-
Ipakita sa mga bata ang pipila ka dekorasyon sa Pasko (o mga litrato sa pipila niini), sama sa usa ka bituon, mga suga, o usa ka gasa. Pangutan-a ang mga bata kon sa unsang paagi ang matag usa niini nga mga butang mopahinumdom kanato sa Manluluwas. Ipasabot nga ang mga kasulatan kasagaran mogamit og mga simbolo aron sa pagtudlo kanato mahitungod ni Jesukristo. Dapita ang mga bata sa pagpangita diha sa usa o dugang pa nga mosunod nga mga bersikulo alang sa usa ka butang nga mahimong magsimbolo kang Jesukristo: Genesis 22:8; Exodo 17:6; Mga Salmo 18:2; 27:1 (tan-awa sa latid niining semanaha sa Dali, Sunod Kanako—Alang sa mga Indibidwal ug mga Pamilya alang sa dugang nga mga ehemplo). Sa unsang paagi si Jesus sama sa usa ka nating karnero, tubig, bato, usa ka kota, o kahayag?
-
Sa kataposan sa pagtuon sa Daang Tugon niining tuiga, dapita ang mga bata sa pagpaambit sa ilang paborito nga mga istorya o mga kasulatan gikan sa Daang Tugon. Unsa ang gitudlo kanato niini nga mga istorya o mga kasulatan mahitungod ni Jesukristo? Nganong mapasalamaton kita nga nakabaton sa Daang Tugon?
Si Jesukristo mao ang akong Manluluwas ug Manunubos.
Samtang saulogon nato ang pagkatawo ni Jesukristo, mahimo usab kitang magmaya sa Iyang kinabuhi ug maulaong sakripisyo. Sa unsang paagi kaha nimo magamit ang mga kasulatan gikan sa Daang Tugon aron sa pagtabang sa mga bata nga mapalambo ang ilang hugot nga pagtuo sa ilang Manluluwas ug Manunubos?
Posible nga mga Kalihokan
-
Basaha og dungan ang Isaias 7:14; dayon dapita ang mga bata sa pagpaambit sa unsay ilang nahibaloan mahitungod sa pagkatawo ni Kristo. Ipaambit ang imong pagpamatuod mahitungod sa Manluluwas, ug dapita ang mga bata sa pagbuhat sa ingon.
-
Aron matabangan ang mga bata nga mas makasabot sa tahas ni Jesukristo isip atong Manluluwas, dapita sila sa pagbasa sa Isaias 25:8–9; 53:3–5; ug Oseas 13:14. Unsa ang gitudlo kanato niini nga mga kasulatan mahitungod kon sa unsang paagi ang Ginoo moluwas kanato? Sa unsang paagi “maglipay kita sa iyang pagluwas kanato”? (Isaias 25:9).
-
Kantaha og dungan ang usa ka awit mahitungod sa gugma ni Jesukristo alang kanato sama sa “Didto sa Pasungan” (Songbook sa mga Bata, 26–27) o “Ako Nagpabilin nga Natingala” (Mga Himno, nu. 114). Dapita ang mga bata sa pagpaambit og mga pulongan nga nakatabang nila nga mobati sa gugma sa Manluluwas.
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya o sa usa ka higala og usa ka butang nga ilang nakat-onan mahitungod ni Jesukristo gikan sa Daang Tugon. Awhaga sila sa pagsugod og tuon sa Bag-ong Tugon karong semanaha.
Pagpalambo sa Atong Pagtudlo
Pagmugna og palibot nga magdapit sa Espiritu. Adunay daghang paagi nga imong madapit ang Espiritu nganha sa imong klase. Ang musika makaawhag og balaanong pagtahod. Ang mga pagpadayag og gugma ug pagpamatuod makamugna og mainiton, espirituhanong kahimtang. Hunahunaa sa mainampoong paagi unsa ang imong mabuhat aron makamugna og espirituhanon nga palibot diha sa imong klase. (Tan-awa sa Pagtudlo sumala sa Pamaagi sa Manluluwas,15.)