“19–25 septiembre. Isaias 40–49: “K’ojob’omaq xch’ool lin tenamit,” ” Kim, Taaqehin—Choq’ re li Tzoleb’aal reheb’ li Kok’al: Li Najter Chaq’rab’ 2022 (2021)
“19–25 septiembre. Isaias 40–49,” Kim, Taaqehin—Choq’ re li Tzoleb’aal reheb’ li Kok’al: 2022
Xk’irtesinkil li winq mutz’, xb’aan laj Carl Heinrich Bloch
19–25 septiembre
Isaias 40–49
“K’ojob’omaq xch’ool lin tenamit”
Naab’aleb’ re li raqal sa’ Isaias 40–49 naru naxtenq’aheb’ li kok’al chixnimob’resinkil lix rahomeb’ ut lix paab’aaleb’ chirix li Qaawa’. Sik’ lix b’eresihom li Musiq’ej re xtawb’aleb’ li raqal a’an naq tattzoloq.
Tz’iib’a li nakak’oxla
Xkanab’ankileb’ chi wotzok
Yaab’asi Isaias 40:9 reheb’ li kok’al ut patz’ reheb’ naq te’xk’oxla naq yookeb’ chi taqe’k sa’ “xb’een junaq tzuul najt xteram” ut chirix a’an te’xwotz junaq na’leb’ xe’xtzol sa’ li loq’laj hu toje’—maare sa’ kab’l malaj sa’ li Iglees.
Xk’utb’al li tzol’leb’: Kok’al toj ka’ch’ineb’ xyu’am
Naru ninxaqli jo’ aj yehol nawom chirix li Qaawa’.
Li Qaawa’ kixjultika reheb’ laj Israelita naq a’aneb’ aj yehol nawom chirix li k’a’aq re ru kixb’aanu chaq a’an choq’ reheb’. A’an kiraj naq eb’ a’an (ut laa’o ajwi’) toowanq choq’ aj yehol nawom chirix a’an, re xtenq’ankileb’ li qas qiitz’in chixnawb’al ru lix wankil ut lix chaab’ilal.
Kok’ k’anjel naru chi b’aanumank
-
Aatinan rik’ineb’ li kok’al chirix k’a’ruhaq xatwan wi’ jo’ aj yehol nawom. Tenq’aheb’ chixk’oxlankil k’a’ru rilomeb’ li naru neke’aatinak wi’ ut li naru neke’wan wi’ choq’ “aj yehol nawom”—maare jun xtib’el wa k’a’jo’ xsahil xe’xyal, junaq na’ajej xwulak chiruheb’, malaj junaq kristiaan neke’xnaw ru. Yaab’asi reheb’ li kok’al li ch’ol aatin a’in re Isaias 43:10: “Laa’ex lin testiiw, chan li Qaawa’, laa’ex aj k’anjelex chiwu ut insik’om chaq eeru.” Ye reheb’ li kok’al naq sa’ li hoonal naq nakub’e qaha’ naqayeechi’i wank jo’ aj yehol nawom chirix li Jesukristo (chi’ilmanq Mosiah 18:9). K’a’ru naraj naxye li wank jo’ aj yehol nawom chirix li Qaawa’?
-
Patz’ reheb’ li kok’al naq te’xye k’a’ru neke’xnaw chirix li Jesukristo ut chirix lix evangelio. K’uteb’ jalam-uuch chiruheb’ re xk’eeb’aleb’ xna’leb’ (maare, xjalam-uuch lix waklijik chi yo’yo li Kolonel, lix Hu laj Mormon, li santil ochoch, ut li yo’yookil profeet). Patz’ reheb’ naq te’aatinaq chirix k’a’ru naru neke’xwotz rik’ineb’ li ras riitz’in jo’ aj yehol nawom chirix li Qaawa’.
“Maak’a’ chik junaq aj kolonel chiwu.”
Ka’ajwi’ li Jesukristo naru chi kolok qe chiru li maak ut chiru li kamk. K’oxla chan ru taawaklesi xch’ooleb’ li kok’al chixk’ojob’ankil xch’ool rik’in a’an.
Kok’ k’anjel naru chi b’aanumank
-
Patz’ reheb’ li kok’al naq te’xk’oxla junaq hoonal b’ar wi’ te’raj raj ru xtenq’ankil (maare naq yajeb’ malaj naq neke’tawe’ xb’aan kawil hab’). K’uteb’ k’iila k’a’aq re ru (malaj xjalam-uucheb’ li k’a’aq re ru), li naru natenq’ank reheb’ li kok’al sa’ li hoonal xe’xk’oxla ut wan chik li ink’a’ naru natenq’ank reheb’. Qayehaq, sa’ li hab’ naru neke’tenq’aak xb’aan jun li sombriiy, a’b’an jun sek’ li ha’ malaj jun tz’iib’leb’, ink’a’. Patz’ reheb’ li kok’al naq te’xsik’ ru li k’a’aq re ru li taatenq’anq’ reheb’. K’uteb’ xjalam-uuch li Kolonel re xb’oqb’aleb’ chixwotzb’al chan ru naq a’an nokoxtenq’a.
-
Yaab’asi Isaias 43:11 reheb’ li kok’al ut patz’ reheb’ naq te’xk’ut lix jalam-uuch li Jesus naq te’rab’i li aatin “kolonel.” Ch’olob’ xyaalal naq xb’aan naq li Jesukristo kixnumsi rahilal ut kikam sa’ qak’ab’a’ ut kiwakli chi yo’yo, ka’ajwi’ a’an naru nakolok qe chiruheb’ li qamaak ut chiru li kamk.
Naru naqak’ul “qosob’tesinkil jo’ raj xnimal li xkawil roq li palaw” (Isaias 48:18).
Xpaab’ankil lix taqlahom li Dios naxk’e qatuqtuukilal.
Li Qaawa’ naxyeechi’i tuqtuukilal jo’ “jun li nima’ ” ut li rosob’tesihom jo’ “xkawil roq li palaw” choq’ reheb’ li neke’paab’ank re lix taqlahom.
Kok’ k’anjel naru chi b’aanumank
-
Yaab’asi Isaias 48:18 reheb’ li kok’al. Patz’ reheb’ naq te’reek’asi li ruq’ ut lix tel jo’ jun nima’ malaj xb’oolam li palaw. Ch’olob’ chan ru naq xb’aan xpaab’ankil lix taqlahom li Dios nakak’ul aatuqtuukilal jo’ jun li nima’ malaj aametz’ew jo’ xb’oolam li palaw.
-
Yiib’ xjalam-uuch jun nima’ chiru li pizarron. Tenq’aheb’ li kok’al chixk’oxlankil k’a’ru li taqlahom xk’ehom qe li Dios. Tz’iib’aheb’ li taqlahom chiru kok’ hu (malaj yiib’ xjalam-uucheb’) ut patz’ reheb’ li kok’al naq te’xlatz li kok’ hu sa’ li nima’ yiib’anb’il chiru li pizarron. Tenq’aheb’ li kok’al chixtzolb’al k’a’ut naq xpaab’ankil li taqlahom naxk’e qatuqtuukilal.
-
B’ichahomaq jun li b’ich na’aatinak chirixeb’ li taqlahom, maare “Paab’eb’ li taqlahom” (B’ichleb’aal choq’ reheb’ li Kok’al, 68─69). K’a’ru naxk’ut chiqu li b’ich a’an chirix xpaab’ankil lix taqlahom li Dios?
Xk’utb’al li tzol’leb’: Kok’al ak ninqeb’
Naru nikintenq’an chixkawresinkil “junaq b’e choq’ re li Qaawa’.”
Naq naqatenq’aheb’ li qas qiitz’in chixk’ulb’al li Qaawa’ sa’ xyu’ameb’, nokotenq’an chixtz’aqob’resinkil ru li profeetil aatin natawman sa’ Isaias 40:3–5.
Kok’ k’anjel naru chi b’aanumank
-
Patz’ re junaq ch’ina al naq taaril Isaias 40:3 ut junjunqeb’ chik li kok’al te’ril jun reheb’ li raqal a’in ut te’xsik’ aatin malaj ch’ol aatin juntaq’eeteb’: Markos 1:3–4 (Jwan aj Kub’sihom Ha’); Alma 7:9 (Alma); Tzol’leb’ ut Sumwank 33:10–11 (eb’ li misioneer re roso’jikeb’ li kutan). Tenq’aheb’ chixk’eeb’al reetal ani yoo chi kawresink re “junaq b’e choq’ re li Qaawa’ ” sa’ li junjunq chi raqal. Chan ru naq eb’ li kristiaan a’an ke’xkawresi xb’e li Qaawa’? K’a’ru taqab’aanu laa’o re tenq’ank?
-
Yiib’ junaq li b’e chiru li pizarron ut yaab’asi Isaias 40:3–5 reheb’ li kok’al. Patz’ reheb’ naq te’xye k’a’ru naru naramok reheb’ li kristiaan chixtaaqenkil li Kolonel ut patz’ reheb’ naq te’xyiib’ xjalam-uuch li ramleb’ sa’ li b’e. Patz’ reheb’ naq te’xsach li ramleb’ naq yooqat chixyeeb’al chan ru naru neke’qatenq’a li kristiaan chi numtaak sa’ xb’eeneb’.
Li Qaawa’ nawan wik’in sa’ lix yalb’al wix.
Naq noko’ok sa’ sumwank rik’in li Qaawa’, naxyeechi’i naq taawanq qik’in, mas wi’chik sa’ lix yalb’al qix. Tenq’aheb’ li kok’al chirilb’al rib’ jo’ xcha’al lix tenamitil lix sumwank li Qaawa’ ut jo’ aj k’ulul re lix yeechi’ihom.
Kok’ k’anjel naru chi b’aanumank
-
Chiru li pizarron, tz’iib’a Li Qaawa’ laa’in… ut Laa’in tinb’aanu… Patz’ reheb’ li kok’al naq te’ril Isaias 41:10 ut Isaias 43:1–5 re te’xsik’ ani li Qaawa’ naq naxye ut k’a’ru naxye naq tixb’aanu. K’a’ chik chi ch’ol aatin naka’sutiman sa’eb’ li raqal a’an? Chan ru naq eb’ li aatin a’an naru neke’xk’ojob’ qach’ool ut neke’xk’e qoyb’enihom sa’eb’ li ch’a’ajkil kutankil?
-
Ilomaq Isaias 48:10 sa’ komonil ut yehomaq k’a’ru a’an jun li horno ut chan ru na’oksiman. Ch’olob’ naq li ch’iich’ neke’saqob’resiik ru sa’ jun li horno. K’a’ut naq li horno a’an jun chaab’il eetalil choq’ re li ch’a’ajkilal? Chan ru naq li qach’a’ajkilal naru nokoxsaqob’resi? (chi’ilmanq Alma 62:41).
Maajun wa tinsachq sa’ xch’ool li Qaawa’.
Naq naqeek’a naq nokonajto’ rik’in li Qaawa’ xb’aan li maak, li yale’k, malaj xb’aan a’ yaal chik k’a’ru, li na’leb’ wan sa’ Isaias 49:14–16 naru naxtuqub’ qach’ool.
Kok’ k’anjel naru chi b’aanumank
-
Patz’ reheb’ li kok’al naq te’ril Isaias 49:14. K’a’ru maare te’reek’a wi’ li kristiaan naq tz’eqtaananb’ileb’ malaj xjunes wankeb’? Chan ru te’qatenq’a li qas qiitz’in chixnawb’al naq moko sachsookeb’ ta sa’ xch’ool li Qaawa’? Chan ru naqanaw naq moko sachsooko ta’ sa’ xch’ool laa’o?
-
Patz’ reheb’ li kok’al naq te’aatinaq chirix junaq kristiaan neke’xnaw ru li maajun wa taasachq sa’ xch’ooleb’, maare jun komon sa’ lix junkab’aleb’ malaj junaq ramiiweb’. Yehomaq k’a’ru nareek’a jun na’b’ej choq’ reheb’ lix kok’al ut k’a’ru nareek’a li Qaawa’ choq’ qe. Chirix a’an patz’ reheb’ naq te’ril Isaias 49:15–16. Jo’ chanru neke’xye li raqal a’an, k’a’ut naq maajun wa toosachq sa’ xch’ool li Qaawa’? Patz’ reheb’ li kok’al naq te’xwotz li neke’reek’a chirix li Jesukristo.
Xb’oqb’aleb’ chi tzolok sa’ kab’l
Patz’ reheb’ li kok’al naq te’xk’oxla junaq na’leb’ xe’xtzol anajwan li toj neke’raj xnawb’al chi us. Tenq’aheb’ chixtz’iib’ankil junaq xpatz’omeb’ chirix a’an li maare te’xpatz’ re lix na’ xyuwa’eb’ malaj junaq chik komon sa’ lix junkab’aleb’.
Xkawresinkil qib’ jo’ aj k’utunel
K’e reetal k’a’ru neke’raj ru li kok’al. Wi nakatzoleb’ li kok’al toj kok’eb’ a’b’an nakaweek’a naq maare us raj xk’utb’al chiruheb’ junaq reheb’ li na’leb’ sa’ li tusleb’ aatin a’in rub’el li “Kok’al ak ninqeb’,” oksi jun reheb’ li kok’ k’anjel nayeeman sa’ li na’leb’ a’an re naq taab’aanu li k’a’ru neke’raj ru li kok’al.