“5–11 septiembre. Isaias 1–12: “Li Dios aʼan lin kolbʼal,” ” Kim, Taaqehin—Choq’ re li Tzoleb’aal reheb’ li Kok’al: Li Najter Chaq’rab’ 2022 (2021)
“5–11 septiembre. Isaias 1–12,” Kim, Taaqehin—Choq’ re li Tzoleb’aal reheb’ li Kok’al: 2022
Li profeet aj Isaias naxye resil lix yo’lajik li Kristo chi rub’elaj, xb’aan laj Harry Anderson
5–11 septiembre
Isaias 1–12
“Li Dios aʼan lin kolbʼal”
Maare ch’a’ajaq xtawb’al ru li raatin laj Isaias. Naq nakak’oxla chan ru taatzoleb’ li kok’al chirix laj Isaias, k’e aach’ool sa’eb’ li kok’ na’leb’ li naru neke’xkawob’resi xpaab’aaleb’ chirix li Jesukristo.
Tz’iib’a li nakak’oxla
Xkanab’ankileb’ chi wotzok
Patz’ reheb’ li kok’al naq te’aatinaq chirix k’a’ru xe’xb’aanu toje’ re xyu’aminkil li evangelio, maare xe’tijok, xe’xk’ut xchaab’ilal, malaj xe’xpaab’ junaq taqlahom.
Xk’utb’al li tzol’leb’: Kok’al toj ka’ch’ineb’ xyu’am
Sa’ li santil ochoch nokotzolok chirix li Jesukristo.
Laj Isaias ki’aatinak chirix li kutankil naq sa’ li santil ochoch, “li tzuul wan wi’ li rochoch li Qaawa’,” “chixjunileb’ li tenamit te’chalq.” Naru nakawoksi li profeetil aatin a’an re xtenq’ankileb’ li kok’al chixtawb’al rajomeb’ re xik sa’ li santil ochoch.
Kok’ k’anjel naru chi b’aanumank
-
Patz’ reheb’ li kok’al naq te’xyiib’ xjalam-uuch li rochocheb’. Chirix a’an ilomaq Isaias 2:2 ut patz’ reheb’ naq te’xyiib’ xjalam-uuch “li rochoch li Qaawa’,” li santil ochoch. Ilomaq li raqal 3 ut patz’ reheb’ naq te’xk’eheb’ kristiaan sa’ lix jalam-uucheb’ li neke’xik sa’ li santil ochoch, ut eb’ ajwi’ lix junkab’al. K’a’ut naq naqaj xik sa’ rochoch li Qaawa’? Wotz xnawom aach’ool chirix li osob’tesiik nak’ulman naq nokotzolok chirix li Qaawa’ sa’ li rochoch.
-
Patz’ re jun ch’ina al naq tixchap xjalam-uuch jun santil ochoch ut patz’ reheb’ xkomon li kok’al naq te’xye k’a’ru neke’ril sa’ li jalam-uuch. Patz’ reheb’ k’a’ru nawulak chiruheb’ chirix li santil ochoch. Ilomaq Isaias 2: 2–3 ut patz’ reheb’ naq te’ab’inq chi us re naq te’xk’e reetal k’a’ut naq tento taqara li santil ochoch. Ye reheb’ li kok’al k’a’ut naq nakara li santil ochoch.
-
B’icha rik’ineb’ li kok’al jun li b’ich chirix li santil ochoch, maare “Sa’ li santil ochoch” (B’ichleb’aal choq’ reheb’ li Kok’al, 99). Tenq’aheb’ chixtawb’aleb’ aatin ut ch’ol aatin sa’ li b’ich li neke’xk’ut k’a’ru li santil ochoch ut k’a’ru nab’aanuman aran.
-
Yiib’ jun li b’e chiru li pizarron ut k’e xjalam-uuch li santil ochoch malaj li Kolonel toj sa’ xmaril (chi’ilmanq Desarrollo personal: Guia para niños, 2–3). Kanab’eb’ li kok’al chixyiib’ankil xjalam-uucheb’ a’an sa’ jun li b’e. Naq yooqeb’ chixb’aanunkil a’an, patz’ reheb’ naq te’xka’suti li ch’ol aatin re Isaias 2:3: “Taqe’qo sa’ xtzuulul li Qaawa’.” K’a’ru naru naqab’aanu re tootaqe’q sa’ xtzuulul li Qaawa’?
“Xbʼaan naq yoʼlajenaq choqʼ qe jun li kʼuulaʼal, kʼeebʼil chaq qe jun li alalbʼej” (Isaias 9:6).
Laj Isaias kixye profeetil aatin chirix li Jesukristo.
Chixjunileb’ li profeet neke’xch’olob’ xyaalal li Jesukristo us ta ke’wan chaq rub’elaj naq kiyo’la chaq, jo’ laj Isaias. K’oxla k’a’ru li na’leb’ naru neke’xtzol li kok’al chirix li Jesus sa’ lix profeetil aatin laj Isaias li wan sa’ Isaias 9:6.
Kok’ k’anjel naru chi b’aanumank
-
Wotz rik’ineb’ li kok’al “Isaias el profeta” (sa’ Relatos del Antiguo Testamento). Chi kok’ aj xsa’ k’e xhoonaleb’ li kok’al re te’aatinaq chirix k’a’ru naxnaw chaq laj Isaias chirix li Jesukristo k’iila chihab’ naq maji’ nayo’la. Yaab’asi Isaias 9:6 reheb’ ut patz’ reheb’ naq te’xka’suti aawik’in li junjunq chi “k’ab’a’ej” li kixye laj Isaias naq “tixk’ab’a’in” li Jesukristo.
-
Tz’iib’a chiruheb’ kok’ hu junjunq reheb’ lix k’ab’a’ li Jesukristo li wan sa’ Isaias 9:6 (chi’ilmanq li perel re kok’ k’anjel re li xamaan a’in). Patz’ reheb’ li junjunq chi kok’al naq tixsik’ ru junaq, ut tenq’a chixyaab’asinkil li junjunq chi k’ab’a’ej. Ch’olob’ chiruheb’ li kok’al k’a’ru naraj naxye li junjunq chi k’ab’a’ej choq’ aawe. K’e xjalam-uuch li Kristo re junaq ch’ina al ut patz’ re naq tixwotz junaq na’leb’ chirix li Jesus ut chirix a’an tixnumsi li jalam-uuch re junaq chik ch’ina al. K’iilasuti li ch’ina k’anjel toj reetal naq chixjunileb’ li kok’al te’tz’aqonq.
Xk’utb’al li tzol’leb’: Kok’al ak ninqeb’
B’antiox re li Jesukristo, naru ninjal ink’a’uxl ut taasaqo’q wu.
Laj Isaias kiwan chaq sa’ jun kutankil b’ar wi’ naab’aleb’ li kristiaan ke’risi rib’ chiru li Qaawa’. A’b’an kixyeechi’i reheb’ naq naru nakuye’ xmaakeb’ chirixeb’ lix maak wi neke’xjal xk’a’uxl. Nayeechi’iman ajwi’ qe a’an anajwan.
Kok’ k’anjel naru chi b’aanumank
-
Patz’ reheb’ li kok’al naq te’ril Isaias 1:2–4 ut te’aatinaq chirix junjunq xyaalal naq li Qaawa’ ink’a’ sa chaq xch’ool rik’in li tenamit Juda. Chirix a’an ilomaq Isaias 1:16–19 re xtawb’al k’a’ru kixpatz’ li Qaawa’ re li tenamit naq te’xb’aanu. Wi na’ajman ru, tenq’aheb’ li kok’al chixtawb’aleb’ ru li aatin ut ch’ol aatin ink’a’ neke’xtaw ru. Re xtenq’ankileb’ chixk’oxlankil li raqal 18, k’e junaq k’a’aq re ru kaq chi kutankil ut junaq chik k’a’aq re ru tz’aqal saq ru. K’a’ru naqatzol sa’eb’ li raqal a’an chirix li ruxtaan li Jesukristo? Patz’ reheb’ li kok’al naq te’xwotz k’a’ru neke’reek’a chirix lix maatan li Jesukristo re kuyuk maak, ut wotz ajwi’ laa week’ahom laa’at.
-
Tenq’aheb’ li kok’al chixkanab’ankil sa’ xk’a’uxleb’ Isaias 1:18. Tz’iib’a li raqal chiru li pizarron ut patz’ reheb’ chixyeeb’al k’iila sut, yooqat chirisinkil chi junjunq li aatin toj reetal naq te’xye xjuneseb’. Naru ajwi’ nakawoksiheb’ kok’ hu b’ar wi’ tz’iib’anb’ilaqeb’ junjunq raatinul li raqal. K’a’ut naq aajel ru naq junelik taqajultika li naxk’ut li raqal a’an? Aatinanqex chirix li kub’iha’ ut li loq’laj wa’ak ut chan ru naq nokohe’xtenq’a chixk’ulb’al li yeechi’ihom a’an.
Sa’ li santil ochoch nokotzolok chirix li Jesukristo.
Lix profeetil aatin laj Isaias chirix “li tzuul wan wi’ li rochoch li Qaawa’ ” naxk’ut junjunq reheb’ li osob’tesiik neke’k’ulman xb’aan li loq’onink sa’ li santil ochoch, jo’ ajwi’ xkomoneb’ chik li osob’tesiik te’k’ulmanq sa’ roso’jikeb’ li kutan. K’oxla chan ru taawaklesi xch’ooleb’ li kok’al chixsik’b’aleb’ li osob’tesiik a’an.
Kok’ k’anjel naru chi b’aanumank
-
Patz’ reheb’ li kok’al naq te’ril sa’ Isaias 2:2–3 li k’a’ru kiril laj Isaias ut te’xyiib’ xjalam-uuch jo’ chanru neke’xk’oxla naq nak’utun. Ch’olob’ naq laj Isaias kixk’ab’a’in li santil ochoch “li tzuul re li rochoch li Qaawa’.” K’a’ut naq li tzuul a’an jun chaab’il eetalil choq’ re li santil ochoch?
-
Patz’ reheb’ li kok’al naq te’ril Isaias 2:2–3, 5 ut te’xsik’ junjunqaq na’leb’ sa’eb’ li raqal a’an li naxwaklesi xch’ooleb’ chi xik sa’ li santil ochoch sa’ jun kutan. Chirix a’an ilomaq li raqal 4 sa’ komonil, uy wotzomaq chan ru naq li santil ochoch naxk’am chaq li tuqtuukilal li naxch’olob’ li raqal a’an. Tenq’aheb’ li kok’al chixk’oxlankil chan ru te’xkawresi rib’ re te’xik sa’ li santil ochoch sa’ jun kutan.
Laj Isaias kixye profeetil aatin chirix li Jesukristo.
Laj Isaias kixye naq taayo’laaq jun ch’ina al li taachunlaaq sa’ xchunleb’ laj David ut naq tixk’ojob’ jun awa’b’ejihom li maak’a’ roso’jik. Chan ru taatenq’aheb’ li kok’al chixtawb’aleb’ ru li profeetil aatin a’an chirix li Jesukristo?
Kok’ k’anjel naru chi b’aanumank
-
Patz’ reheb’ li kok’al naq te’xye k’a’ru li k’a’b’a’ej naru naxk’ul junaq kristiaan, maare xb’aan lix trab’aaj, lix b’oqb’al sa’ li Iglees, xb’aan jun li ch’uut, malaj lix junkab’al. K’a’ru naxk’ut li k’ab’a’ej a’an chirix li kristiaan? Tenq’aheb’ li kok’al chixtawb’aleb’ xk’ab’a’ li Jesukristo sa’ Isaias 7:14 ut 9:6–7. K’a’ru neke’xk’ut li junjunq chi k’ab’a’ej a’an chirix li Jesukristo? K’a’ chik ru naqatzol sa’eb’ li raqal a’an chirix li Jesukristo?
-
Ilomaq Mateo 1:21–23 ut Lukas 1:31–33, ut wotzomaq chan ru naq lix profeetil aatin laj Isaias wankeb’ sa’ Isaias 7:14; 9:6–7 xe’tz’aqlok ru naq kiyo’la li Jesukristo.
Xb’oqb’aleb’ chi tzolok sa’ kab’l
Patz’ reheb’ li kok’al naq te’xk’oxla junaq na’leb’ xe’xtzol chirix li Kolonel li naru neke’xwotz sa’ ochoch rik’ineb’ lix junkab’al, maare jun reheb’ lix k’ab’a’ li Jesus.
Xkawresinkil qib’ jo’ aj k’utunel
Tenq’aheb’ li kok’al chixnimob’resinkil xkawileb’ xch’ool. Maare junjunqeb’ li kok’al te’reek’a naq moko te’ruuq ta chixtzolb’al li evangelio xjuneseb’ rib’. Naru naniman xkawileb’ xch’ool wi nakawaklesiheb’ xch’ool rajlal sut naq neke’tz’aqon sa’ li tzoleb’aal. Ye reheb’ naq li Santil Musiq’ej tixtenq’aheb’ naq yooqeb’ chi tzolok.