laj Jose re Egipto

Xjalam-uuch laj Jose re Egipto, xb’aan laj Robert T. Barrett

14–20 marzo

Genesis 42–50

“Li Dios xsutq’isi choq’ re li us”

Aajel ru xnawb’aleb’ ru li loq’laj hu yookat chixk’utb’al, a’b’an aajel ajwi’ ru xnawb’aleb’ ru li kok’al. K’e aahoonal re xk’oxlankileb’ ut tijok chirixeb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Xb’aan naq li seraq’ sa’ Genesis 42–50 a’an xkomon li seraq’ re li xamaan xnume’, li wan sa’ Genesis 37–41, k’e xhoonaleb’ li kok’al sa’ xtiklajik li tzolok re naq te’xwotz k’a’ru najultiko’ reheb’ chirix laj Jose, maare li xe’xtzol sa’ li Tzoleb’aal reheb’ li Kok’al malaj sa’ kab’l.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Genesis 45:4–15

Naru nink’ut inrahom sa’ lin junkab’al.

Choq’ reheb’ li kok’al toj ka’ch’ineb’, maare naru taajultika xcha’al li seraq’ reheb’ b’ar wi’ laj Jose kixk’ut xrahom choq’ reheb’ lix junkab’al.

Kok’ k’anjel naru chi b’aanumank

• Oksi “Los hermanos de Jose en Egipto” (sa’ Relatos del Antiguo Testamento) malaj li jalam-uuch wan sa’ Kim, Taaqehin—Choq’ reheb’ li komon ut li junkab’al, re xseraq’inkil reheb’ li kok’al chan ru naq laj Jose kixtaw rib’ rik’ineb’ li ras. K’ut chan ru naq laj Jose kixk’ut xrahom choq’ reheb’ li ras.

• Yaab’asiheb’ ch’ol aatin sa’ Genesis 45:4–15 li neke’xye k’a’ru kixb’aanu laj Jose re xk’utb’al naq naxra lix junkab’al. Patz’ reheb’ li kok’al naq te’xk’oxla naq yookeb’ chixb’aanunkil li neke’xye li raqal. Maare, te’xk’oxla naq yookeb’ chixpatz’b’al re jun komon sa’ lix junkab’aleb’ naq “taajiloq chaq” (raqal 4) malaj te’xk’e xtzakemq jun li komon (chi’ilmanq li raqal 11).

• B’ichahomaq jun li b’ich na’aatinak chirix li rahok, maare “Li rahok cherib’il eerib’” (B’ichleb’aal choq’ reheb’ li Kok’al, 74). Tenq’aheb’ li kok’al chixyiib’ankil xjalam-uuch li ruq’eb’ ut chixtz’iib’ankil chi sa’ k’a’ru te’xb’aanu re te’xk’ut xrahom chiruheb’ lix junkab’al.

Genesis 48:8–9

Li osob’tesiik rik’in li tijonelil nikinixtenq’a.

Laj Jakob kirosob’tesiheb’ li ralal ut eb’ li rimam (chi’ilmanq Genesis 48–49). Anajwan naru noko’osob’tesiik rik’in li tijonelil li naxk’ojob’ qach’ool, nokoxk’irtesi, nokoxb’eresi, malaj nokoxkawob’resi sa’ musiq’ej.

ch’ina al naxk’ul rosob’tesinkil

Naru naqak’ul qosob’tesinkil rik’ineb’ laj k’amol re li tijonelil.

Kok’ k’anjel naru chi b’aanumank

• K’ut chiruheb’ li kok’al jun xjalam-uuch laj Jakob naq kirosob’tesiheb’ li ralal malaj jalan chik xjalam-uuch li osob’tesiik rik’in li tijonelil (chi’ilmanq li jalam-uuch sa’ li tusleb’ aatin a’in; chi’ilmanq ajwi’ Hu reheb’ li Jalam-uuch re li Evangelio, 12). Kanab’eb’ li kok’al chixch’olob’ankil k’a’ru neke’ril sa’ li jalam-uuch.

• Yaab’asi Genesis 48:8–9 reheb’ li kok’al. Ch’olob’ naq laj Israel, aj Jakob ajwi’ nak’ab’a’iman, a’an lix yuwa’ laj Jose ut kiraj rosob’tesinkileb’ li ralal laj Jose rik’in li tijonelil. Wi junaq ch’ina ak xk’ulum jun rosob’tesinkil rik’in li tijonelil, patz’ re naq tixwotz resil a’an. Wotz junaq aanumsihom laa’at.

• Tenq’aheb’ li kok’al chixk’oxlankil k’a’ut raj naq te’xpatz’ junaq rosob’tesinkileb’ rik’in li tijonelil. Tenq’aheb’ ajwi’ chixyeeb’al ani raj aj-e te’xpatz’ li rosob’tesinkileb’, maare xyuwa’eb’, xmama’eb’ malaj laj ilol komon.

Genesis 50:15–21

Naru ninkuyuk maak.

K’a’ru te’xtzol li kok’al chirix li kuyuk maak sa’ li seraq’ b’ar wi’ laj Jose kixkuyeb’ xmaak li ras?

Kok’ k’anjel naru chi b’aanumank

• Oksi li perel re kok’ k’anjel re li xamaan a’in re xtenq’ankileb’ li kok’al chixjultikankil naq eb’ li ras laj Jose ke’xk’ut xlab’alil chiru laj Jose. Yaab’asi Genesis 50:17 reheb’ li kok’al, ut ye naq eb’ li ras laj Jose ke’xjal xk’a’uxl ut ke’raj naq laj Jose tixkuy xmaakeb’. Yaab’asi li raqal 21 re xk’utb’al naq laj Jose kixkuyeb’ xmaak li ras—maak’a’ chik xjosq’il rik’ineb’.

• B’ichahomaq sa’ komonil “Chinaatenq’a re tinkuyeb’ lix maak” (B’ichleb’aal choq’ reheb’ li Kok’al, 52). Naq texb’ichanq chirix li kuyuk maak, patz’ reheb’ li kok’al naq te’xk’ut laj Jose sa’ li perel re kok’ k’anjel. Naq texb’ichanq chirix li jalb’a-k’a’uxlej, patz’ reheb’ naq te’xk’uteb’ li ras laj Jose.

• Tenq’aheb’ li kok’al chixk’oxlankil jo’q’e raj te’wulaq chirajb’al ru xk’uyb’al xmaak anihaq. Patz’ reheb’ li kok’al naq te’xtzol k’a’ raj ru te’xye malaj te’xb’aanu re te’xk’ut naq xe’xk’uy xmaak li kristiaan.

reetalil li k’utuk

Xk’utb’al li tzol’leb’: Kok’al ak ninqeb’

Genesis 42–44; 45:1–15

Li kuyuk maak naxk’am chaq tuqtuukilal.

Jwal ra ke’xb’aanu li ras laj Jose. A’b’anan, laj Jose kixkuyeb’ xmaak ut kixk’am chaq tuqtuukilal sa’ lix junkab’al.

Kok’ k’anjel naru chi b’aanumank

• Tenq’aheb’ li kok’al chixk’utb’esinkil xcha’al li naxye sa’ Genesis 42–44. Naq te’xb’aanu a’an, patz’ reheb’ k’a’ru neke’xk’oxla naq kireek’a laj Jose naq kirileb’ wi’chik li ras.

• Patz’ reheb’ li kok’al k’a’ru naraj naxye xkuyb’al xmaak anihaq. Tenq’aheb’ chixtawb’al ru naq xkuyb’al xmaak anihaq naraj naxye naq tink’ut inrahom chiru jo’ li Kristo. Patz’ reheb’ li kok’al k’a’ru neke’xnaw chirix li seraq’ naq laj Jose kixkuyeb’ xmaak li ras, malaj yaab’asi reheb’ li kok’al Genesis 45:1–15. K’a’ru kixb’aanu malaj kixye laj Jose re naq eb’ li ras te’xnaw naq kixkuyeb’ xmaak? K’a’ru taqaye malaj taqab’aanu naq junaq kristiaan tixpatz’ qe naq taqakuy xmaak?

• Patz’ reheb’ li kok’al naq te’xk’oxla junaq hoonal b’ar wi’ xe’xkuy xmaak anihaq malaj xe’kuye’ xmaak. Naq te’xk’oxla a’an, wotz junaq aanumsihom laa’at ut ch’olob’ xyaalal li osob’tesiik nachal xb’aan li kuyuk maak. Patz’ reheb’ li kok’al naq te’xwotz lix numsihomeb’, wi neke’raj. K’a’ru xe’reek’a? K’a’ru naqatzol chirix li kuyuk maak rik’in li Kolonel? (chi’ilmanq Lukas 23:33–34).

Genesis 45:5–11

Li qaChoxahil Yuwa’ kixtaqla chaq li Jesukristo re inkolb’al.

Li seraq’ chirix laj Jose naq kixkoleb’ lix junkab’al chiru li tz’okaak naru nokoxtzol chirix li Jesukristo, li nakolok qix chiru li maak ut li kamk.

Kok’ k’anjel naru chi b’aanumank

• Tz’iib’a chiru li pizarron Jose ut Jesukristo. Tenq’aheb’ li kok’al chixtzolb’aleb’ li raqal a’in ut chixtz’iib’ankil chiru li pizarron chan ru naq laj Jose ut li Jesus wankeb’ xjuntaq’eetil: Genesis 37:3 ut Mateo 3:17; Genesis 37:26–28 ut Mateo 26:14–16; Genesis 45:5–7 ut Lukas 4:18; ut Genesis 47:12 ut Jwan 6:35.

• Patz’ reheb’ li kok’al k’a’ru naraj naxye xkolb’al rix junaq kristiaan. Wi junaq ch’ina al kikole’ jun sutaq chiru li xiwxiw, patz’ re naq tixseraq’i. Chan ru naq laj Jose kixkoleb’ rix li ras? (chi’ilmanq Genesis 42:1–3; 45:5–7). K’ut xjalam-uuch li Kolonel. Chan ru naq xooxkol li Jesus?

Genesis 50:27–33, jo’ jaltesinb’il ru xb’aan laj Jose Smith.

Li qaChoxahil Yuwa’ kixkawresi laj Jose Smith re naq a’anaq li profeet sa’eb’ li qakutankil.

K’iila mil chihab’ chaq rub’elaj, laj Jose re Egipto kiril naq li Qaawa’ tixb’oq laj Jose Smith re xk’eeb’al chi uxmank jun xnimal ru k’anjel sa’ roso’jikeb’ li kutan. K’ut chiruheb’ li kok’al naq li Qaawa’ nokorosob’tesi rik’in li profeet aj Jose Smith.

Kok’ k’anjel naru chi b’aanumank

• Yeheb’ kok’ na’leb’ reheb’ li kok’al chirix laj Jose Smith ut patz’ reheb’ naq te’xq’ehi ani li nakaye. Oksiheb’ aatin re Genesis 50:27–33, jo’ jaltesinb’il ru xb’aan laj Jose Smith, maare “tooxk’am chixnawb’al li sumwank” (chi’ilmanq li raqal 28), “xk’e chi k’utmank li raatin li Qaawa’ ” (chi’ilmanq li raqal 30), ut “lix k’ab’a’ a’anaq ajwi’ xk’ab’a’ lix yuwa’ ” (chi’ilmanq li raqal 33). Chirix naq eb’ li kok’al te’xq’ehi ani a’an, patz’ reheb’ naq te’xtaweb’ li na’leb’ a’an sa’eb’ li raqal. K’a’ chik ru naqatzol chirix laj Jose Smith sa’ lix profeetil aatin laj Jose re Egipto?

• K’uteb’ jalam-uuch chiruheb’ li kok’al li neke’reetali li k’a’ru aajel ru kixb’aanu malaj kixk’ut laj Jose Smith (chi’ilmanq, Hu reheb’ li Jalam-uuch re li Evangelio, nos. 89–95, 97, 98, 117, 118). Tenq’aheb’ li kok’al chixk’oxlankileb’ li qosob’tesinkil wankeb’ sa’ xk’ab’a’ laj Jose Smith. Chan ru naq lix k’anjel a’an nokoxtenq’a chi jilok chi us rik’in li Jesukristo?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz li perel re kok’ k’anjel re li xamaan a’in reheb’ lix junkab’al sa’ kab’l. Naru te’roksi re xtzolb’al wi’chik li seraq’ chirix laj Jose ut eb’ li ras ut re xtz’ilb’al rix k’a’ut naq aajel ru li rahok ut li kuyuk maak sa’eb’ li qajunkab’al.

Xkawresinkil qib’ jo’ aj k’utunel

Ye xnawom aach’ol chirix li Jesukristo. Moko naxye ta Jesukristo sa’ li Najter Chaq’rab’, a’b’an na’aatinak chirix li Jesukristo rik’in jalan chik k’ab’a’ej ut naxch’olob’ xyaalal a’an rik’ineb’ li eetalil ut eb’ li seraq’. Tenq’aheb’ li kok’al chixtzolb’al xsik’b’aleb’ li yaal chirix li Kolonel naq te’ril ru li loq’laj hu.

perel re kok’ k’anjel: naru ninkuyuk maak