laj Abraham ut li xSara

Xjalam-uuch laj Abraham ut li xSara, xb’aan li xDilleen Marsh

7–13 febrero

Genesis 12–17; Abraham 1–2

“Aj taaqenel re li tiikilal”

Jultikaq aawe naq moko tento ta taak’ut chixjunil li nayeeman arin. Kanab’ li Musiq’ej chixk’amb’al aab’e sa’eb’ li na’leb’ ut kok’ k’anjel li taak’anjelaq reheb’ li kok’al.

Tz’iib’a li nakak’oxla

reetalil li wotzok

Xkanab’ankileb’ chi wotzok

Ke’b’oqman lix junkab’aleb’ li kok’al chi tzolok chirix laj Abraham ut xSara chiru li xamaan xnume’. K’e xhoonaleb’ li kok’al chixwotzb’al k’a’ru neke’xnaw chirix laj Abraham malaj xSara.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Abraham 1:18; 2:8

Li Jesukristo naru nikinixb’eresi chi wuq’.

Laj Abraham kiraj wank chi tiik us ta aj maakeb’ li komon sa’ lix junkab’al. Li Qaawa’ kixye re: “Laa’in tatinb’eresi chi wuq’ ” (Abraham 1:18). Jo’ naq kixyeechi’i xtenq’ankil laj Abraham, li Dios naru ajwi’ naxb’eresiheb’ li kok’al naq te’raj xsik’b’al ru li us.

Kok’ k’anjel naru chi b’aanumank

• Yaab’asi Abraham 1:18 ut 2:8 reheb’ li kok’al ut patz’ reheb’ naq te’rab’i xk’ab’a’ jun xcha’al li junxaqalil wan sa’eb’ li raqal. K’a’ raj ru taqeek’a wi ta wan li Jesukristo chiqab’eresinkil malaj wi ta wan li ruq’ chixkolb’al qix? Ch’olob’ xyaalal naq li Jesus nokoxb’eresi rik’in lix Musiq’.

• Oksi “Abraham” (sa’ Relatos del Antiguo Testamento) re xtenq’ankileb’ li kok’al chixtawb’al ru naq eb’ li kristiaan sa’ xsutam laj Abraham moko us ta li neke’xb’aanu, a’b’an laj Abraham kiraj xb’aanunkil li us ut kitenq’aak xb’aan li Qaawa’. Chan ru naq li qaChoxahil Yuwa’ ut li Jesukristo nokohe’xtenq’a naq naqayal qaq’e chixsik’b’al ru li us? B’ichahomaq jun li b’ich na’aatinak chirix li na’leb’ a’in, maare “Tzolin chi b’eek sa’ saqen” (B’ichleb’aal choq’ reheb’ li Kok’al, 197).

• K’uteb’ xjalam-uuch li Kolonel (chi’ilmanq Hu reheb’ li Jalam-uuch re li Evangelio, 38, 39, 40, ut 41), ut tenq’aheb’ li kok’al chixk’eeb’al reetal k’a’ru kixb’aanu rik’in li ruq’. K’a’ru naru naqab’aanu rik’in li quq’ re xtenq’ankileb’ li qas qiitz’in?

Genesis 13:5–12

Naru tink’ojob’ li tuqtuukilal.

Naq eb’ lix moos laj Abraham ut eb’ lix moos laj Lot ink’a’ saheb’ xch’ool chirix lix ch’och’eb’, laj Abraham kixk’uub’ ru a’an ut chi jo’kan ke’tuqla xch’ool. Naru nakawoksi li na’leb’ a’an re xwaklesinkileb’ xch’ool li kok’al chixk’ojob’ankil li tuqtuukilal.

Kok’ k’anjel naru chi b’aanumank

• Wotz’ li seraq’ wan sa’ Genesis 13:5–12 reheb’ li kok’al ut patz’ reheb’ naq te’xk’utb’esi. Patz’ reheb’ li kok’al naq chixjunqaleb’ te’xk’e rib’ choq’ laj Abraham, laj Lot, ut eb’ li moos. Ye chan ru naru neke’xk’ojob’ li tuqtuukilal jo’ laj Abraham, maare xto’ninkil li b’atz’uul naq neke’b’atz’un rik’in li ramiiweb’. Patz’ reheb’ naq te’xk’utb’esi li eetalil a’an.

• Yaab’asi Mateo 5:9, ut ch’olob’ naq li Jesus naraj naq laa’aqo aj k’ojob’ahom re li tuqtuukilal. Tenq’aheb’ li kok’al chixk’oxlankil k’a’ru te’xb’aanu re naq te’xk’ojob’ li tuqtuukilal sa’ kab’l malaj rik’ineb’ li ramiiw. Patz’ reheb’ naq te’xyiib’ xjalam-uucheb’ a’an chixk’ojob’ankil. Patz’ reheb’ li kok’al naq te’xwotz k’a’ru neke’reek’a naq neke’xk’ojob’ li tuqtuukilal jo’ li Jesukristo.

Genesis 15:1–6; 17:1–8; Abraham 2:9–11

Aajel ru naq tinb’aanu li k’a’ru ninye.

Li tzolok chirix li sumwank kixb’aanu li Dios rik’in laj Abraham ut xSara naru naxtenq’aheb’ li kok’al chixtawb’al ru naq aajel ru xb’aanunkil li naqayeechi’i. Naru ajwi’ nakatenq’aheb’ chixkawresinkil rib’ re te’ok sa’ ut te’roxloq’i li sumwank.

Kok’ k’anjel naru chi b’aanumank

• Patz’ reheb’ li kok’al ma neke’xnaw k’a’ru li yeechi’ink malaj li sumwank. Patz’ reheb’ naq te’xwotz xnumsihomeb’ naq ke’xb’aanu malaj ke’xk’ul li yeechi’ink. Wi naru, wotz junjunq laa numsihom laa’at. Tenq’aheb’ li kok’al chixtawb’al ru naq laj Abraham ut xSara ke’xyeechi’i naq te’ab’inq chiru li Dios. Sik’eb’ ru li ch’ol aatin sa’ Genesis 15:1–6; 17:1–8; Abraham 2:9–11 re xwotzb’al junjunq reheb’ li osob’tesiik kixyeechi’i li Dios reheb’. Maare taawotzeb’ a’in: “Matxiwak, Abram: laa’in laj kolol aawe,” “Laa’ataq xyuwa’il li k’iila teep chi tenamit,” malaj “te’osob’tesimanq chixjunil li junkab’al re li ruchich’och’.”

• K’a’ru li kok’ yeechi’ink naru neke’xb’aanu li kok’al sa’ li tzoleb’aal? Patz’ reheb’ naq te’xyeechi’i naq te’kanaaq sa’ xna’ajeb’ chiru wiib’ oxib’ k’asal, malaj naq te’xk’uula lix chunleb’aaleb’ naq taaraqe’q li tzolok. Wotz rik’ineb’ aanumsihom b’ar wi’ xab’aanu li xayeechi’i, ut patz’ reheb’ naq te’xwotz xnumsihomeb’ a’an. Tenq’aheb’ chixtawb’al ru naq te’yeechi’inq chiru li qaChoxahil Yuwa’ naq te’kub’eeq xha’ ut naq te’ok sa’ li santil ochoch.

reetalil li k’utuk

Xk’utb’al li tzol’leb’: Kok’al ak ninqeb’

Abraham 1:12–17

Lin Choxahil Yuwa’ narab’iheb’ ut naxsumeheb’ lin tij.

Naq lix yu’am laj Abraham kiwan sa’ xiwxiw, kixb’oq li Dios ut kixoke’. Eb’ li kok’al maare wan k’a’ru xe’xk’ul rik’in li tijok li naru neke’xwotz.

Kok’ k’anjel naru chi b’aanumank

• K’ut li jalam-uuch Un ángel salva a Abraham (ChurchofJesusChrist.org), ut patz’ reheb’ li kok’al naq te’xwotz k’a’ru neke’xnaw chirix li seraq’ wan sa’ Abraham 1:12, 15–17. Patz’ reheb’ li kok’al naq te’ril li raqal ut te’xwotz k’a’ru neke’xtzol chirix li tijok.

• Patz’ reheb’ li kok’al naq te’xwotz xnumsihomeb’ b’ar wi’ li qaChoxahil Yuwa’ kixsume lix tijeb’ ut wotz junaq aanumsihom laa’at.

Genesis 13:5–12

Naru tink’ojob’ li tuqtuukilal.

Chiqajunil naqanumsi hoonal li narisi xsahil qach’ool ut naxch’a’ajko’b’resi li qawanjik. K’oxla chan ru naq li seraq’ chirix laj Abraham ut laj Lot tixtenq’aheb’ li kok’al chixk’ojob’ankil li tuqtuukilal sa’eb’ li hoonal a’an.

Kok’ k’anjel naru chi b’aanumank

• Tz’iib’a Eb’ li kristiaan, Li nak’ulman, Ch’a’ajkilal, ut Xtuqub’ankil ru chiru li pizarron. Patz’ reheb’ li kok’al naq te’ril Genesis 13:5–12 re naq te’xk’e reetal li seraq’ jo’ li tz’iib’anb’il chiru li pizarron. Tenq’aheb’ li kok’al chixk’oxlankil junaq hoonal b’ar wi’ naru neke’xk’ojob’ li tuqtuukilal, maare naq ani nawech’in malaj naxyal pleetik. Chirix a’an, patz’ reheb’ naq te’xk’ut chan raj ru te’xk’ojob’ li tuqtuukilal sa’eb’ li hoonal a’an.

• Tenq’aheb’ li kok’al chixtawb’aleb’ li na’leb’ “Tuqtuukilal” ut “Aj k’ojob’ahom re li tuqtuukilal” sa’ li K’utul Raqal reheb’ li Loq’laj Hu. Patz’ reheb’ chixjunileb’ li kok’al naq te’xsik’ ru jun raqal sa’eb’ li loq’laj hu na’aatinak chirix li tuqtuukilal, ut naq te’xwotz k’a’ru neke’xtzol. Tenq’aheb’ chixk’oxlankil junjunq hoonal b’ar wi’ li Kolonel kixk’ojob’ li tuqtuukilal, maare li wan sa’ Lukas 22:50–51. Chan ru naru taqab’aanu li kixb’aanu a’an?

  laj Lot ut laj Abraham rik’ineb’ li ketomq

  Li kixsik’ ru laj Lot, © Providence Collection/licensed from goodsalt.com

Genesis 17:1–8; Abraham 2:8–11

Naru ninpaab’eb’ li sumwank ninb’aanu rik’in li qaChoxahil Yuwa’.

Raatinankileb’ li kok’al chirix li sumwank kixb’aanu li Dios rik’in laj Abraham ut xSara naru naxtenq’aheb’ chixk’oxlankil li sumwank te’xb’aanu a’an.

Kok’ k’anjel naru chi b’aanumank

• Patz’ reheb’ li kok’al naq te’ril Genesis 17:1–8 ut Abraham 2:8–11 ut tz’iib’a k’a’ru kipatz’e’ re laj Abraham naq tixb’aanu ut k’a’ru kixyeechi’I li Qaawa’ re. K’a’ru naqatzol chirix li Qaawa’ sa’eb’ li raqal a’in?

• K’ut xjalam-uuch junaq kristiaan yoo chi kub’eek xha’ (chi’ilmanq Hu reheb’ li Jalam-uuch re li Evangelio, 103, 104). Patz’ reheb’ li kok’al naq te’xtz’iib’a k’a’ru naxyeechi’i li kristiaan nakub’e xha’ ut k’a’ru naxyeechi’i li Dios. Ye reheb’ li kok’al naq naru te’ril Mosiah 18:10; Tzol’leb’ ut Sumwank 20:37, 77, 79 re xsik’b’al xtenq’ankil. K’a’ru taqab’aanu re xpaab’ankileb’ li sumwank xe’qab’aanu sa’ li kub’iha’?

reetalil li tzolok

Xb’oqb’aleb’ chi tzolok sa’ kab’l

Taqla jun ch’ina hu rik’ineb’ li kok’al re xpatz’b’al reheb’ li komon sa’ lix junkab’aleb’ naq te’xk’e reetal naq eb’ li kok’al yookeb’ chixk’ojob’ankil li tuqtuukilal, chixb’aanunkil li neke’xyeechi’i, malaj chixb’aanunkil junaq chik na’leb’ xe’xtzol.

Xkawresinkil qib’ jo’ aj k’utunel

Eb’ li kok’al aj ajeb’ ru. Maare chanchan naq eb’ li kok’al ink’a’ jwal neke’ab’in, a’b’an naru nakawoksi lix ajikeb’ ru sa’ li tzolok. Patz’ reheb’ naq te’xk’utb’esi junaq seraq’ malaj te’reek’asi rib’ jo’ chanru xyaab’ junaq li b’ich malaj jo’ naxye junaq raqal sa’ li loq’laj hu. (Chi’ilmanq Li k’utuk jo’ li Kolonel, 25–26.)

perel re kok’ k’anjel: aajel ru naq tinb’aanu li k’a’ru ninye