O Peteru o loo talanoa ma Konelio

17–23 Iulai

Galuega 10–15

“Ua Tupu le Afioga a le Atua ma ua Faateleina”

Suesue ma le agaga tatalo le Galuega 10–15 ma mafaufau e uiga i tamaiti o lau vasega. O a mea ua e maua i nei mataupu ua musuia oe e aoao atu i tamaiti?

aikona o le fefaasoaai

Valaaulia le Fefaasoaai

Ina ia fesoasoani i tamaiti e faasoa mai mea latou te aoaoina ma oo i ai, e mafai ona e fai i ai e faasoa mai mea o loo latou faia e faaalia ai latou te talitonu ia Iesu Keriso.

aikona o le aoao atu

Aoao atu le Aoaoga Faavae: Tamaiti Laiti

Galuega 10:34–35

E alofa le Tama Faalelagi i Ana fanau uma.

O se aoaoga faavae taua e oo lava i tamaiti laiti e mafai ona malamalama ai, o tagata uma o se atalii/afafine o le Atua ma e alofa o Ia i Ana fanau uma lava.

Gaoioiga e Mafai Ona Fai

• Faaali le ata O Keriso ma Tamaiti mai le salafa o le Lalolagi (Tusi Ata o le Talalelei, nu.116) a o e faitauina le Galuega 10:34–35. Faamatala atu i ona po o Peteru sa talitonu ai nisi tagata o faamanuiaga o le talalelei e le mo tagata uma. Ae na aoaoina e Peteru e alofa le Atua i Ana fanau uma ma e finagalo o Ia ia latou aoao uma i le talalelei.

• Valaaulia tamaiti e tusi se ata o i latou lava. A o latou faasoa mai a latou ata, talanoa e uiga i se mea e te fiafia i ai e uiga i tamaiti taitasi. Faasoa atu lau molimau faapea e alofa le Tama Faalelagi ia i latou taitoatasi ma Ana fanau uma lava, tusa lava pe o a o latou foliga pe o fea foi latou te o mai ai.

• Usu faatasi ma tamaiti se pese e faatatau i le alofa i isi—mo se faataitaiga, “Ou te Savali ma Oe” (Tusipese a Tamaiti, 78--79). Valaaulia tamaiti e faasoa mai ni auala e mafai ona latou faaalia ai le alofa i tagata uma, e pei lava ona sa faia e Iesu.

• Tusi lou lima i tamaiti taitasi ma fai atu, “E alofa le Tama Faalelagi ia [igoa].” Tuu i tamaiti e feauauai ona tusi atu le tasi i le isi ma fai le fasifuaitau lea.

Galuega 11:26

O au o se Kerisiano aua ou te talitonu ma mulimuli ia Iesu Keriso.

E mafai faapefea ona e fesoasoani i tamaiti ia malamalama i le uiga o le avea ai ma se tagata Kerisiano?

Gaoioiga e Mafai Ona Fai

• Faitau le Galuega 11:26 i tamaiti, ma valaaulia i latou e tutu i luga pe a latou faalogo ua e fai atu le upu Kerisiano. Fesili atu ia i latou po o le a so latou manatu i le uiga o le avea ma se tagata Kerisiano. Faamalamalama atu faapea o se tagata e talitonu ma mulimuli ia Iesu Keriso ua ta’ua o se Kerisiano, o le mea lea o i tatou o Kerisiano.

• Usu faatasi ma tamaiti se pese e faatatau i le mulimuli ia Iesu Keriso, e pei o le “O Le Ekalesia a Iesu Keriso” (Tusipese a Tamaiti, 40). E mafai faapefea ona tatou faaali atu o i tatou o soo o Iesu Keriso ma e auai i Lana Ekalesia? Fesoasoani i tamaiti e mafaufau i mea e mafai ona latou faia e mulimuli ai ia Iesu i le fale, i le aoga, ma isi nofoaga.

fafine ma se teineitiiti o loo tatalo

E alofa le Tama Faalelagi ia i tatou ma o le a tali mai ia tatou tatalo.

Galuega 12:1–17

E faafofoga ma tali mai le Tama Faalelagi i tatalo.

O le tala i le agelu na faasaolotoina Peteru mai le falepuipui o loo aoao malosi mai ai faapea e tali mai le Tama Faalelagi i tatalo.

Gaoioiga e Mafai Ona Fai

• Valaaulia tamaiti e faatino mai taga o le tala ia Peteru na faasaolotoina mai le falepuipui i le Galuega 12:1–17 a o e aoteleina le tala. Na faapefea ona tali e le Tama Faalelagi ia tatalo a i latou o e sa tatalo mo Peteru?

• Usu se pese e uiga i le tatalo—mo se faataitaiga, “Matou Te Ifo Atu” (Tusipese a Tamaiti, 18)—ma fatuai ni taga e fesoasoani ai i tamaiti e aoao pe faapefea ona tatalo. Valaaulia tamaiti e faasoa mai ni faataitaiga o mea e mafai ona latou faafetai ai i le Tama Faalelagi ma ole atu ai ia te Ia i le tatalo.

• Faaali atu ata o tagata o loo tatalo (tagai, mo se faataitaiga, Tusi Ata o le Talalelei, nu. 111–12) a o e faasoa atu se aafiaga ina ua tali au tatalo e le Tama Faalelagi.

aikona o le aoao atu

Aoao atu le Aoaoga Faavae: Tamaiti Matutua

Galuega 10:34–35; 15:6–11

“E le faailoga tagata le Atua.”

E manaomia ona malamalama ia tamaiti o loo e aoaoina e alofa le Tama Faalelagi i Ana fanau uma lava, tusa lava pe o a o latou foliga, pe o fea e o mai ai, pe o a foi filifiliga latou te faia.

Gaoioiga e Mafai Ona Fai

• Fesili i tamaiti pe mafai ona latou iloa le ituaiga o tagata i le na o le vaai atu ia i latou pe taumate foi pe o fea latou te o mai ai. E tusa ai ma le Galuega 10:35, e faapefea ona fuafua e le Atua “ua talia e ia” se tagata?

• Faitau faatasi le Galuega 10:34–35; 15:6–11 ma tamaiti. Faamalamalama atu o ona po o Peteru, sa talitonu tagata Iutaia faapea sa lei taliaina e le Atua ia tagata e le o ni Iutaia (sa faaigoa nei tagata o Nuuese). Ae na aoao atu e le Atua ia Peteru e faapea e alofa le Atua i Ana fanau uma lava, o Iutaia ma Nuuese. Usu faatasi le “O Au o se Atalii o le Atua” (Tusipese a Tamaiti, 2–3). Valaaulia tamaiti e sui igoa o le tasi ma le isi i upu e pei o le Ou po o a’u.

• Valaaulia tamaiti e faasoa mai se mea e tulagaese e uiga i se isi tagata o i le vasega. Faamatala atu o le faaupuga “E le faailoga tagata le Atua” o lona uiga e alofa le Tama Faalelagi i Ana fanau uma lava, ma ona e alofa o Ia ia i latou, ua finagalo ai o Ia ia faalogo Ana fanau uma i le talalelei.

Galuega 11:26

O se Kerisiano o se tagata ua talitonu ma mulimuli ia Iesu Keriso.

E mafai faapefea ona e fesoasoani i tamaiti ia malamalama o a latou upu ma taga e fai e faaalia ai o i latou o ni Kerisiano?

Gaoioiga e Mafai Ona Fai

• Valaaulia tamaiti e faitau le Galuega 11:26; 3 Nifae 27:3–8; ma le Mataupu Faavae ma Feagaiga 115:4. Tusi Kerisiano i le laupapa ma vase le vaega o loo fai mai “Keriso.” Fai i tamaiti e faasoa mai po o le a le uiga o le avea ma se Kerisiano ia i latou.

• Fai atu i tamaiti e faasoa mai igoa o vaega eseese latou te auai, e pei o o latou aiga po o atunuu. Valaaulia i latou e faasoa mai ni mafuaaga latou te faafetai ai i le avea ai o se Kerisiano ma lo latou auai i Le Ekalesia a Iesu Keriso o le Au Paia o Aso e Gata Ai. E mafai faapefea ona tatou faaali atu i isi o i tatou o Kerisiano?

• Faaali atu ni mea faitino po o ni ata e faatusa i upumoni e tulaga ese i le Ekalesia a Iesu Keriso, e pei o se ata o le toefuataiga o le perisitua (tagai Tusi Ata o le Talalelei, nu. 93–94). Fai i se tamaitiiti e piki se meafaitino se tasi po o ata ma faamatala mai pe o faapefea ona avea lena mea o se faamanuiaga i la tatou Ekalesia. Faamalamalama atu e ui ina auai ia Kerisiano i le lalolagi atoa i le tele o lotu eseese, ae ua tatou auai i le Ekalesia lava e tasi lea na faatuina e Iesu Keriso i le lalolagi.

• Faaali le vitio “True Christianity” (ChurchofJesusChrist.org). Valaaulia tamaiti e tusi ni mea po o ni ata o mea e mafai ona latou faia e avea ai o ni tagata Kerisiano moni.

Galuega 12:1–17

Pe a ou tatalo i le faatuatua, o le a tali mai le Tama Faalelagi.

Mafaufau i ni taimi na tali mai ai e le Tama Faalelagi au tatalo. E mafai faapefea ona e faaaogaina nei aafiaga e aoao atu ai tamaiti faapea o le a faafofoga ma tali mai le Tama Faalelagi i a latou tatalo i Lana lava ala ma le taimi?

Gaoioiga e Mafai Ona Fai

• Valaaulia tamaiti e faatino le tala i le agelu na faasaolotoina Peteru mai le falepuipui a o faitau e se isi tamaitiiti le tala i le Galuega 12:1–17.

• Fesili i tamaiti pe o le a so latou manatu i le uiga o le “faia le tatalo faatauanau” (Galuega 12:5). Na faapefea ona taliina tatalo a tagata? Valaaulia tamaiti e faasoa mai ni aafiaga na tali atu ai e le Tama Faalelagi se tatalo a le tagata lava ia po o le tatalo faaleaiga. E mafai foi ona e faasoa atu se aafiaga na Ia taliina ai lau tatalo. Atonu e te faaaofia ai ni aafiaga na oo mai ai le tali i se auala e lei faamoemoeina. Molimau atu e alofa le Atua ia i tatou, ma o le a Ia tali mai ia tatou tatalo i le ala ma le taimi e silisili mo i tatou.

aikona o le aoaoina

Uunaia le Aoaoina i le Aiga

Valaaulia tamaiti e fai se mea e faamanatu ai ia i latou mea sa latou aoaoina i le aso, e pei o se faamanatu e tatalo.

Faaleleia o Lo Tatou Aoao Atu

Molimau atu i faamanuiaga ua folafola mai. Pe a e valaaulia tamaiti o le Peraimeri e ola i se mataupu faavae patino, faasoa atu ia folafolaga ua faia e le Atua ia i latou o e ola ai i lena mataupu faavae. Mo se faataitaiga, e mafai ona tuu atu lau molimau e uiga i faamanuiaga ua e mauaina a o e tatalo ai ma le faatuatua.

itulau o gaoioiga: O a’u o se tagata Kerisiano aua ou te talitonu ma mulimuli ia Iesu Keriso