“26 Iuni–2 Iulai. Mataio 28; Mareko 16; Luka 24; Ioane 20–21: ‘Ua Toetu o Ia,’” Sau, Mulimuli Mai ia te Au—Mo le Peraimeri: Feagaiga Fou 2023 (2022)
“26 Iuni–2 Iulai. Mataio 28; Mareko 16; Luka 24; Ioane 20–21,” Sau, Mulimuli Mai ia te Au—Mo le Peraimeri: 2023
Fafaga Au Mamoe, saunia e Kamille Corry
26 Iuni–2 Iulai
Mataio 28; Mareko 16; Luka 24; Ioane 20–21
“Ua Toetu o Ia”
O tamaiti o i ai se molimau i le moni o i nei mataupu ua i ai se faavae mautu e fausia ai o latou faatuatua. O le a faapefea ona e valaaulia le Agaga e molimau atu e uiga i nei upumoni?
Valaaulia le Fefaasoaai
O le vaai i se ata e mafai ona fesoaosani i tamaiti e manatua ai mea sa latou aoaoina i le fale po o isi nofoaga. Atonu e mafai ona e faaalia se ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma fai i tamaiti e faasoa mai mea ua latou iloa e uiga i le tala o loo faaalia i le ata.
Aoao atu le Aoaoga Faavae: Tamaiti Laiti
Mataio 28; Mareko 16; Luka 24; Ioane 20:1–23
O le a ou toe ola pe a ou oti, e faapei foi o Iesu.
O le Togiola a Iesu Keriso, e aofia ai Lona Toetu, o le mea aupito taua lea na tupu i le talafaasolopito, ma o le faavae lea o le faatuatuaga o le au Kerisiano. A o e faitau i le Toetu, manatunatu pe o le a faapefea ona e fesoasoani i tamaiti e fausia lo latou faatuatua ia Iesu Keriso.
Gaoioiga e Mafai Ona Fai
-
Faamatala i au lava upu le tala i le Toetu o Iesu. (Afai e manaomia, faaaoga le “Mataupu 54: Ua Toetu Iesu,” i Tala o le Feagaiga Fou, 139–44, po o le vitio talafeagai i luga o ChurchofJesusChrist.org.) Faamalamalama atu ina ua maliu Iesu, na tuua e Lona agaga Lona tino. Ina ua toetu o Ia, sa toe faatasia Lona agaga ma Lona tino. Fai i tamaiti e feauaua’i e toe faamatala atu le tala ia te oe. Fesili i tamaiti pe mata o a ni o latou lagona pe ana latou toe vaai ia Iesu o soifua.
-
Faaali le vitio “What Happens after We Die?” (ChurchofJesusChrist.org), ma faamatala e uiga i se tasi e te iloa ua maliu. Faasoa atu lau molimau o le a toetutu tagata uma i se aso. Valaaulia tamaiti e faasoa mai a latou molimau.
-
Usu se pese e faatatau i le Toetu o le Faaola, e pei o le “Pe Na Toe Soifua Moni Mai ea Iesu?” (Tusipese a Tamaiti, 45). Fai i tamaiti e manatunatu pe o a ni lagona pe a vaai ia Iesu. Tuu atu ia i latou e faasoa mai o latou manatu i le vasega.
E mafai ona ou faatuatua ia Iesu Keriso tusa lava pe le mafai ona ou vaai ia te Ia.
Mafaufau pe mafai faapefea ona malamalama tamaiti i le faatuatua ma pe mafai faapefea ona latou faaali le faatuatua i le Faaola.
Gaoioiga e Mafai Ona Fai
-
Faaali le ata Ua Faaali Atu Keriso ia Toma (ChurchofJesusChrist.org) a o e faamatalaina le aafiaga o Toma i le Ioane 20:24–29. Toe faamatala le tala, ae o le taimi lenei fai i tamaiti e faasoa mai ni nai faamatalaga.
-
Faaali atu se pusa o i ai se mea i totonu e le o mafai ona vaai atu i ai tamaiti, ma faamatala le mea o i totonu i tamaiti. Fesili i ai pe ua latou talitonu o i ai moni se meafaitino i totonu o le pusa ma pe aisea foi. Ona faaali lea i ai o le meafaitino, ma faamalamalama i ai o le faatuatua o le talitonu lea i mea e le o mafai ona tatou vaai i ai. O le faatuatua aupito sili ona taua e mafai ona tatou maua o le faatuatua lea ia Iesu Keriso.
Faauta i O’u Lima, saunia e Jeff Ward
E mafai ona ou faaali atu lo’u alofa mo Iesu i le auauna atu i isi.
E mafai faapefea ona e musuia tamaiti ia alolofa ma fesoasoani ia i latou o siomia i latou?
Gaoioiga e Mafai Ona Fai
-
Faitau le Ioane 21:15–17, pe faaali le vitio “Feed My Sheep” (ChurchofJesusChrist.org). Fesoasoani i tamaiti ia malamalama i le mea na finagalo Iesu e fai e Peteru: faasoa atu le talalelei ma valaaulia tagata uma ia talitonu ia Iesu. Avatu i tamaiti taitasi se mamoe pepa, ma fai i ai e tusi ai i luga se mea e mafai ona latou faia e fesoasoani ai i se tasi e faalatalata atili ia Iesu.
-
Fesoasoani i tamaiti e mafaufau i mea o latou faia e alofa atu ai ma auauna atu i isi. O le a se isi mea e mafai ona tatou faia e faaali atu ai lo tatou alofa?
-
Tusi le igoa o tamaiti taitasi o lau vasega i ni fasi pepa ua otioti i foliga o se mamoe ma faasalalau solo na mamoe i le potuaoga. (Ia aofia ai igoa o tamaiti e le toaaga mai.) Valaaulia tamaiti e faapotopoto mai mamoe i le sueina o le mea o loo i ai lona igoa. Fesoasoani i tamaiti e mafaufau i ni auala e mafai ona latou aapa atu ai i se uo e le sau i le lotu.
Aoao atu le Aoaoga Faavae: Tamaiti Matutua
Mataio 28; Mareko 16; Luka 24; Ioane 20:1–23
Ona ua toetu Iesu, o le a toetutu ai foi tagata uma.
O se mea e masani ai le taumanatunatu o tamaiti pe o le a le mea e tupu pe a tatou oti. Mafaufau pe mafai faapefea ona e aoao atu le Toetu i se ala o le a fausia ai lo latou faatuatua.
Gaoioiga e Mafai Ona Fai
-
Valaaulia tamaiti e moeiini ma mafaufau faapea o la e nofonofo i tala ane o le tuugamau o Iesu a o e faitauina le Ioane 20:1–17 pe aotele foi le tala o Lona Toetu (tagai foi “Mataupu 54: Ua Toetu Iesu,” i le Tala o le Feagaiga Fou, 139–44, po o le vitio talafeagai o loo i luga o le ChurchofJesusChrist.org). O le a le uiga o le toetu? Mata e faapeī le vaavaai atu i le Faaola toetu?
-
Fai i tamaiti taitasi e suesue le aafiaga o se tasi na vaai i le Faaola toetu ma faasoa mai i le isi vaega o le vasega mea sa latou aoaoina.
-
Matamata se tasi pe sili atu o nei vitio ma tamaiti: “Jesus Is Laid in a Tomb,” “Jesus Is Resurrected,” “Christ Appears on the Road to Emmaus,” and “The Risen Lord Appears to the Apostles” (ChurchofJesusChrist.org). Valaaulia tamaiti e faasoa mai pe aisea e taua ai le Toetu o le Faaola ia i latou.
E mafai ona ou faatuatua ia Iesu Keriso tusa lava pe le mafai ona ou vaai ia te Ia.
E faapefea ona e fesoasoani i tamaiti e faamalosia lo latou faatuatua ia Iesu Keriso?
Gaoioiga e Mafai Ona Fai
-
Valaaulia tamaiti e faitau le Ioane 20:24–29. (Tagai foi i le vitio “Blessed Are They That Have Not Seen, and Yet Have Believed” i luga o le ChurchofJesusChrist.org.) E mafai faapefea ona tatou iloa o loo soifua Iesu Keriso, e tusa lava pe le mafai ona tatou vaai ia te Ia?
-
Tusi upu taitasi o i le fasifuaitau “Amuia o e le vaai mai, ae talitonu mai pea” i ni fasi pepa eseese. Valaaulia tamaiti e faatulaga sao ia upu. Valaaulia i latou e faamatala ni aafiaga na latou lagonaina ai le alofa o le Faaola tusa lava pe latou te lei vaai ia te Ia.
-
Valaaulia tamaiti e tusi ni ata o mea e mafai ona latou fai e faamalosia ai lo latou faatuatua i lenei vaiaso. Fai atu ia i latou e faasoa mai mea na latou tusia, ma faasoa mai mea na e faia e faamalosia ai lou faatuatua ia Iesu Keriso.
E mafai ona ou faaali atu lo’u alofa ia Iesu i le fafagaina o Ana mamoe.
E mafai ona matuai faatosinaina e tamaiti i latou o loo siomia ai i latou. E mafai faapefea ona e uunaia i latou e faamalosiau atu i isi i le talalelei?
Gaoioiga e Mafai Ona Fai
-
Faitau faatasi le Ioane 21:1–17 . A e faitauina fuaiupu 9–13, fai i tamaiti e mafaufau i se taimi na faia ai e se tasi se meaai faapitoa mo i latou, ma valaaulia i latou e mafaufau i ni auala e fafagaina ai i tatou faaleagaga e Iesu. A e faitau i fuaiupu 15–17, sui le igoa o Simona i igoa o tamaiti. O ai mamoe a Iesu? E mafai faapefea ona tatou fesoasoani ia te Ia e fafaga i latou?
-
Tufatufa atu sina meaai faigofie i tamaiti. A o latou aai, fesili i ai pe faapefea e le faasoa atu o le talalelei i se tasi ona pei o le fafagaina o i latou.
Uunaia le Aoaoina i le Aiga
Valaaulia tamaiti e faaaoga le itulau o gaoioiga o le vaiaso lenei e aoao atu ai o latou aiga e uiga i le Toetu o le Faaola.
Faaleleia o Lo Tatou Aoao Atu
Tulitatao ia valaaulia e faatino. A e valaaulia tamaiti e faatino se mea ua latou aoaoina, ia tulitatao lau valaaulia i le taimi o le isi vasega e sosoo ai. O lena mea e faaali atu ai i tamaiti e te manatu atu ia i latou i le faamanuiaina o o latou olaga i le talalelei. A o latou faasoa mai o latou aafiaga, o le a faamalosia i latou ma o le a fesoasoani ai le tasi i le isi e ola i le talalelei.