Na pau Paulo i luga o le eleele

Liua i le Ala i Tamaseko, saunia e Michelangelo Merisi da Caravaggio

10–16 Iulai

Galuega 6–9

“Se A Le Mea E Te Finagalo I Ai Ou Te Faia?”

Amata i le faitauina o le Galuega 6–9. O leotootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga e mafai ona fesoasoani e te suesue ai i nei mataupu. O gaoioiga mo tamaiti laiti i lenei aotelega e mafai ona fetuunai mo tamaiti matutua, ma faapena ai lava.

aikona o le fefaasoaai

Valaaulia le Fefaasoaai

Tusi i luga o le laupapa igoa o nisi o tagata mai le Galuega 6–9, e pei o Saulo, Setefano, ma Tapita. Valaaulia tamaiti e faasoa mai soo se mea ua latou iloa e uiga i nei tagata.

aikona o le aoao atu

Aoao atu le Aoaoga Faavae: Tamaiti Laiti

Galuega 6–7

E mafai ona ou mulimuli ia Iesu Keriso e ala i le tu atu mo le mea tonu.

O a ni mea e mafai e tamaiti ona aoao mai ia Setefano e uiga i le avea ai ma se e mulimuli ia Iesu Keriso?

Gaoioiga e Mafai Ona Fai

• Fesoasoani i tamaiti e fatuai ni taga e o faatasi ma se pese e uiga i le filifili o le mea tonu, e pei o le “Tu mo le Mea Tonu” (Tusipese a Tamaiti, 81). Faaaoga le Galuega 7:51–60 e aoao atu ai i tamaiti e faapea, na aoao atu Setefano e uiga ia Iesu Keriso, e ui ina na matua feitai ai taitai Iutaia (tagai foi “Mataupu 57: Ua Fasioti e Tagata Leaga ia Setefano,” i le Tala o le Feagaiga Fou, 150–51, po o le vitio talafeagai o loo i luga o le ChurchofJesusChrist.org). Na faapefea ona tu atu Setefano mo le mea tonu?

• Tuu atu i tamaiti ni tulaga o ni tamaiti na tatau ona faia se filifiliga i le va o le sao ma le sese. Fesili i tamaiti pe o le a se mea latou te faia e tutu atu ai mo le mea tonu.

Galuega 8:26–39

Ua musuia au e le Agaga Paia e faasoa atu le talalelei i isi.

Na mulimuli Filipo i uunaiga a le Agaga ma sa fesoasoani i se alii Aitiope lea sa tauivi ia malamalama i tusitusiga paia. O a lesona o i ai i lenei tala mo tamaiti o loo e aoaoina?

O Filipo o loo aoao atu i le tagata Aitiope

Filipo o loo Aoao atu i le tagata Aitiope, saunia e Robert T. Barrett

Gaoioiga e Mafai Ona Fai

• Toso faatasi ni nofoa se lua e fai ai se kariota. Valaaulia ni tamaiti se toalua e nonofo i totonu o le kariota, o le tasi e fai ma sui o Filipo ma le isi o le alii Aitiope. Ona faamatala lea o le tala i le ala na aoao atu ai e Filipo le talalelei i le alii mai Aitiope.

• Faasoa atu se aafiaga na e lagonaina ai le Agaga Paia o tau atu ia te oe e faasoa atu le talalelei i se tasi. Molimau atu e mafai e le Agaga Paia ona fesoasoani ia i tatou e tau atu i isi e uiga ia Iesu.

Galuega 9:1–20

Ua valaaulia a‘u e le Tama Faalelagi ia salamo ma suia.

Ina ua ta’u atu e Iesu ia Saulo e tuu le sauaina o le Ekalesia a le Alii, sa salamo loa lava ia Saulo ma sa suia. E mafai faapefea ona fesoasoani lenei tala i tamaiti o loo e aoaoina ia mananao ia vave ona sui pe a latou faia se mea sese?

Gaoioiga e Mafai Ona Fai

• Aotele le tala i le liua o Saulo, o loo maua i le Galuega 9:1–20 (tagai foi “Mataupu 59: Ua Aoao Saulo e uiga ia Iesu,” i le Tala o le Feagaiga Fou, 154–55, po o le vitio talafeagai o loo i luga o le ChurchofJesusChrist.org).

• Talanoa ma tamaiti e uiga i mea e suia, e pei o se tamai lane, lea e suia i se lane, po o se ketapila, lea e suia i se lelefua. Faaali atu ata, pe a mafai. Na faapefea ona liua Saulo ina ua asiasi atu Iesu Keriso ia te ia?

• Tusi se auala magalua i le laupapa. Valaaulia tamaiti e faaigoa mai ni nofoaga latou te fia asiasi i ai, ma tusi i le pito i luga o se tasi o auala. O le a se mea e tupu pe a tatou liliu i le auala sese? Faatusatusa le salamo i le toe foi i le auala sao.

• Fai i tamaiti e toe fai mai le mea na fai atu ai Saulo i le Alii: “Se a le mea e te finagalo i ai ou te faia?” (Galuega 9:6). O le a se mea e finagalo le Alii tatou te faia?

aikona o le aoao atu

Aoao atu le Aoaoga Faavae: Tamaiti Matutua

Galuega 6–7

O le a avea au o se molimau o Iesu Keriso.

E mafai faapefea ona e fesoasoani i tamaiti o loo e aoaoina ia aoao mai le faataitaiga a Setefano e tu atu o se molimau a Iesu Keriso?

Gaoioiga e Mafai Ona Fai

• Faitau faatasi le Galuega 6:5--15 ma le 7:51--60 ma tamaiti. O le a se mea na avea ai Setefano ma se molimau mamana ia Iesu Keriso? Valaaulia se toatasi pe sili atu foi o ni tamaiti e faafoliga ia Setefano ma faasoa mai pe aisea latou te talitonu ai ia Iesu Keriso.

• Valaaulia tamaiti e faitau le Galuega 6:3–10, ma saili mo uiga auaumama o Setefano na fesoasoani ia te ia e tuputupu ae.

• Fai i tamaiti e fesoasoani atu e te mafaufau i tulaga e mafai ona latou tutu atu ai o ni molimau a Iesu Keriso ma Lana talalelei. Fesoasoani ia i latou e faatino i taga nisi o nei tulaga. Fai i tamaiti e faitau le Mosaea 18:9. Ta’u i ai o le avea ai o se molimau o Iesu Keriso o loo aofia i folafolaga tatou te faia i le papatisoga.

Galuega 8:9–24

O le perisitua o se meaalofa e le mafaatauina mai le Atua.

E faalauiloa e Satani le savali faapea o mea o le lalolagi e aumaia ai ia i tatou le fiafia. E mafai faapefea ona e faaaogaina le tala ia Simona e fesoasoani ai i tamaiti e faataua mea faaleagaga e pei o le perisitua ma ona faamanuiaga?

Gaoioiga e Mafai Ona Fai

• Aotele le tala ia Simona, o loo maua i le Galuega 8:9–24 (tagai foi “Mataupu 58: O Simona ma le Perisitua,” i le Tala o le Feagaiga Fou, 152–53, po o le vitio talafeagai o loo i luga o le ChurchofJesusChrist.org). Aisea e le mafai ai ona tatou maua le perisitua e ala i le faatauina mai? E faapefea ona maua moni e se tasi le pule o le perisitua? (tagai Mataupu Faavae o le Faatuatua 1:5).

• Faaali atu ata o le faamanatuga, o se malumalu (e faatusa i faamanuiaga o le malumalu), o se papatisoga, ma isi faamanuiaga tatou te maua e ala mai i le perisitua. Faamalamalama atu o nei meaalofa mai le Atua e le mafai ona faatauina i tupe. Aisea e sili atu ai lo latou taua nai lo se isi lava mea e mafai ona tatou faatauina? E faapefea ona tatou mauaina nei faamanuiaga?

Galuega 9:1–20

Ua valaaulia a‘u e le Tama Faalelagi ia salamo ma suia.

Ina ua ta’u atu e Iesu ia Saulo e tuu le sauaina o le Ekalesia a le Alii, sa salamo loa lava ia Saulo ma sui. E mafai faapefea ona fesoasoani lenei tala i tamaiti o loo e aoaoina ia mananao ia vave ona sui pe a latou faia se mea sese?

Gaoioiga e Mafai Ona Fai

• Valaaulia tamaiti e gaulua se fasipepa. Fai i ai e tusi le Muamua i le tasi afa ma le Mulimuli Ane i le isi afa. Faitau faatasi ma tamaiti le Galuega 8:1--3; 9:1--2; ma le 9:17--22, ma faiatu ia i latou e tusi i lalo upu po o fasifuaitau o loo faamatala mai ai Saulo i le taimi muamua ma le taimi ua uma ona ia vaai ai i le Alii.

• Valaaulia se tagata o le uarota e faasoa atu lana tala o lona liua ma pe na faapefea e le avea ai o se tagata o le Ekalesia ona suia lona olaga, e pei ona suia le olaga o Saulo.

• Tusi se “ala i Tamaseko” i le laupapa. Valaaulia tamaiti e faitau le Galuega 9:6, 11, 18, 20–22, e saili ai mo mea na faia e Saulo ia salamo ai ma liliu atu ia Keriso, ma tusi taga nei i luga o le ala. O a mea ua tatou aoao mai ia Saulo e uiga i le ala e mafai ai ona tatou avea atili e faapei o Keriso?

• Valaaulia tamaiti e tusi ata o a latou vaega e sili ona fiafia i ai i le tala o le liua o Saulo ma faasoa mai a latou atatusi i le vasega.

aikona o le aoaoina

Uunaia le Aoaoina i le Aiga

Fautuaina tamaiti e faamatala i o latou aiga la latou gaoioiga e sili ona fiafia i ai mai le vasega i le aso ma mea sa latou aoao mai ai.

Faaleleia o Lo Tatou Aoao Atu

Fesoasoani i tamaiti e aoao mai tusitusiga paia. Atonu e le mafai e tamaiti laiti ona faitau lelei, ae e mafai lava ona e faaaofia i latou i le aoao mai tusitusiga paia. Mo se faataitaiga, e mafai ona e faitauina se fuaitau ma valaaulia i latou e tu i luga pe sisii i luga o latou lima pe a latou faalogo i se fasifuaitau patino e te manao e taulai i ai.

itulau o gaoioiga: pe a ou faia se mea sese, e valaaulia au e le Tama Faalelagi e sui