“10–16 Iulai. Galuega 6-9: ‘Se A Le Mea E Te Finagalo I Ai Ou Te Faia’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023 (2022)
“10–16 Iulai. Galuega 6–9,” Sau, Mulimuli Mai ia te A’u—Mo Tagata Taitoatasi ma Aiga: 2023
Liua i le Ala i Tamaseko, saunia e Michelangelo Merisi da Caravaggio
10–16 Iulai
Galuega 6–9
“Se A Le Mea E Te Finagalo I Ai Ou Te Faia?”
Amata i le faitauina o le Galuega 6–9. E mafai ona fesoasoani ia te oe fautuaga o i lenei otootoga e te iloa ai nisi o mataupu faavae taua i nei mataupu, e ui e te ono maua isi mataupu faavae i au lava suesuega.
Tusifaamaumau Ou Lagona Uunai
Afai e i ai se tagata e foliga mai e le ono avea ma se tagata mo le liua, atonu o Saulo lea—o se Faresaio o le sa lauiloa o ia i le sauaina o tagata Kerisiano. O lea la, ina ua ta‘u atu e le Alii i se soo e igoa ia Anania e su‘e ia Saulo ma tuu atu ia te ia se faamanuiaga, sa malamalama lelei lava le musua o Anania. “Le Alii e,” sa ia fai atu ai, “Ua ou faalogo i tagata e toatele i lena tagata, i mea leaga e tele ua na faia i ou tagata paia” (Galuega 9:13). Ae sa silafia e le Alii le loto o Saulo ma ona gafatia, ma sa i ai i Lona finagalo se misiona mo Saulo: “O le ipu lava o ia ua filifilia ma’u e momoli lo’u igoa i luma o nuu ese, ma tupu, ma le fanauga a Isaraelu” (Galuega 9:15). O lea sa usitai ai Anania, ma ina ua maua le sa avea muamua ma faaoosala, sa ia tauina o ia o “Lo’u uso e, Saulo” (Galuega 9:17). Afai ua mafai ona suia atoa Saulo ma mafai e Anania ona taliaina ma le saoloto o ia, pe tatau ea la ona tatou mafaufau i soo se tasi o se tagata e le ono avea ma se tagata e mafai ona suia—e aofia ai i tatou lava ia?
Manatu mo Suesuega Faaletagata Lava Ia o Tusitusiga Paia
E manaomia e lo’u loto le “tonu i le silafaga a le Atua”
O le faatoateleina o le ekalesia, o lona uiga o se manaoga faateleina lea mo soo e auauna atu i le malo. E tusa ai ma le Galuega 6:1–5, o a ni uiga sa sailia e Aposetolo e Toasefululua mo i latou o le a latou auauna faatasi? A o e faitau i le Galuega 6–8, ia matau auala na faaalia ai nei uiga, faapea ma isi, i tagata e pei o Setefano ma Filipo. O le a le mea sa le’i i ai ia Simona, ma o le a se mea e mafai ona tatou aoao mai ia te ia e uiga i le naunau ia suia?
E i ai se mea ua e lagona le musuia o oe e sui ia mautinoa ai o lou loto ua “tonu i le silafaga a le Atua”? (Galuega 8:21–22). E ono mafai faapefea e le faia o lenei suiga ona e manuia ai ao e auauna atu i le Atua?
O le teenaina o le Agaga Paia e mafai ona tau atu i le teenaina o le Faaola ma Ana auauna.
O taitai Iutaia sa nafa mo le saunia o tagata mo le afio mai o le Mesia. Peitai, sa latou le iloa le Mesia ma teena o Ia. Na faapefea ona tupu lenei mea? E mafai ona maua se vaega o le tali i upu a Setefano: “Ua outou tetee atu pea lava i le Agaga Paia” (Galuega 7:51). O le a sou manatu i le uiga o le tetee atu i le Agaga Paia? Aisea e oo atu ai le tetee i le Agaga Paia i le teenaina o le Faaola ma Ana auauna?
A o e faitau i le Galuega 6–7, vaavaai mo isi savali sa aoao atu e Setefano i tagata Iutaia. O a uiga sa ia lapataia ai i latou? Pe o e maitauina ni uiga faapena ia te oe lava? O le a se mea o aoao mai e upu a Setefano ia te oe e uiga i taunuuga o le teenaina o le Agaga Paia? E mafai faapefea ona e nofouta atili ma tali atu i uunaiga a le Agaga Paia i lou olaga?
Tagai foi “The Martyrdom of Stephen” (vitio), ChurchofJesusChrist.org.
O le a fesoasoani le Agaga Paia i lo’u taitaiina atu o isi ia Iesu Keriso.
O le a se mea ua e aoaoina e uiga i le faasoa atu o le talalelei mai le tala i le Galuega 8:26–39? Na faapefea ona fesoasoani le Agaga Paia ia Filipo? E faapefea ona pei le faasoa atu o le talalelei i isi o le avea ma se taiala? (see Galuega 8:31).
Na saunoa Elder Ulisses Soares, o lenei tala “o se faamanatu o le tiute paia ua ia i tatou uma ia saili le aoaoina ma ia aoao atu e le tasi le isi i le talalelei a Iesu Keriso. … O nisi taimi e pei ai i tatou o le tagata Aitiope—tatou te manaomia le fesoasoani a se faiaoga faamaoni ma musuia; ma o nisi taimi e pei ai i tatou o Filipo—e manaomia ona tatou aoao atu ma faamalosia isi i lo latou liuaina” (“E Mafai Faapefea Ona Ou Malamalama?,” Liahona, Me 2019, 6). Mafaufau e faitau le vaega o totoe o le savali a Elder Soares ma mafaufau loloto i auala e mafai e le Agaga Paia ona fesoasoani ia oe ia avea o se tagata aoao ma se faiaoga lelei atu o le talalelei.
A ou usitai atu i le finagalo o le Alii, e mafai ona avea a’u ma Ona tufugaaao.
Sa pei na faafuasei le vave o le liua o Saulo; sa vave alu atu o ia mai le faafalepuipuiina o tagata Kerisiano i le talai atu e uiga ia Keriso i totonu o sunako. A o e faitauina lana tala, mafaufau loloto pe aisea na naunau ai lava o ia e sui. (Ina ia faitau le faamatalaga a Saulo lava ia e uiga i lona liua, tagai i le Galuega 22:1–16 ma le 26:9–18. Ia manatua i nei tala, ua alu Saulo i le igoa o Paulo [tagai Galuega 13:9].)
E ui e moni o le aafiaga o Saulo o se mea e ese lava—mo le toatele o tagata, o le liuaina o se faagasologa e sili atu le umi—e i ai ea se mea e mafai ona e aoao mai ia Saulo e uiga i le liuaina? O le a se mea ua e aoao mai i le auala na tali atu ai Anania ma isi o le au soo i le liua o Saulo? O le a se mea o le a e faia e faaaoga ai nei lesona i lou olaga? Atonu e te amata i le ole atu i le tatalo, e pei ona sa faia e Saulo, “Se a le mea e te finagalo i ai ou te faia?”
A o e faitau i le Galuega 9:36–42, mafaufau pe na faapefea ona avea Tapita ma se meafaigaluega i aao o le Atua. O le a se mea ua musuia ai oe e uiga i lana tala?
Tagai foi i le Dieter F. Uchtdorf, “Faatalitali i le Auala i Tamaseko,” Liahona, Me 2011, 70–77; “The Road to Damascus” (vitio, ChurchofJesusChrist.org.
Manatu mo Suesuega Faaleaiga o Tusitusiga Paia ma Afiafi Faaleaiga
-
Galuega 6:8; 7:51–60.Faatusatusa tala ia Setefano i le Galuega 6:8 ma le Galuega 7:51–60 i tala o le Faaola i le Luka 23:1–46. Na faapefea ona mulimuli Setefano i le faataitaiga a le Faaola?
-
Galuega 7:51–60.Na faapefea ona faamanuia e le Agaga Paia ia Setefano i le taimi na sauaina ai o ia? O le a se taimi na tatou maua ai le malosi mai le Agaga Paia i ni taimi faigata?
-
Galuega 9:5.O se tui o se tao maai na faaaoga e tulituli ai meaola. E masani lava ona toe kiki mai ia meaola pe a tatui, lea e mafua ai ona goto atili i totonu le tao i le aano o le tino o le meaola. E ono faapefea ona aoga lenei tala faatusa ia i tatou i ni isi taimi? O a ni mea e mafai ona tatou faia ia talia lelei ai faasa’oga mai le Faaola?
Ua Tu i Luga Tapita, saunia e Sandy Freckleton Gagon
-
Galuega 9:32–43.Mafaufau e valaaulia tagata o lou aiga e tusi ni ata o tala o loo i le Galuega 9:32–43. O le a se mea ua tatou iloa e uiga i le avea ma soo moni mai i nei tala? E mafai faapefea e se tagata ua “tumu i galuega lelei,” e pei ona sa i ai Tapita, ona fesoasoani i isi ia talitonu i le Alii? (tagai Galuega 9:36; “Mataupu 60: Ua Toe Faaola Mai Tapita e Peteru” (i le Tala o le Feagaiga Fou, 156–57, po o le vitio e faatatau i ai o loo i le ChurchofJesusChrist.org).
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese Fautuaina: “Ou te Alu i Mea e te Tofia,” Viiga, nu. 169.
Faaleleia o Suesuega Faaletagata Lava ia
Ia faatatau tusitusiga paia i lou olaga. A o e faitau, mafaufau pe faapefea ona faaaoga tala ma aoaoga o loo i tusitusiga paia i lou olaga. Mo se faataitaiga, o a ni avanoa ua e maua e auauna atu ai i isi, e pei ona sa faia e Tapita i le Galuega 9:36–39?
“Ua fetogi foi i latou ia Setefano, ua valau o ia, ua faapea atu i le Aua, Le Alii e Iesu, ia e talia ma lo’u nei agaga” (Faaliliuga a Iosefa Samita, Galuega 7:59 [i le Galuega 7:59, vaefaamatalaga i]).