“24–30 Iulai. Galuega 16–21: ‘Ua Valaauina i Matou e Le Alii e Folafola Atu le Talalelei’” Sau, Mulimuli Mai ia te A‘u—Mo Tagata Taitoatasi ma Aiga: Feagaiga Fou 2023 (2022)
“24–30 Iulai. Galuega 16–21,” Sau, Mulimuli Mai ia te A‘u—Mo Tagata Taitoatasi ma Aiga: 2023
24–30 Iulai
Galuega 16–21
“Ua Valaauina i Matou e Le Alii e Folafola Atu le Talalelei”
A o e faitau i taumafaiga a Paulo e talai le talalelei, atonu e uuna‘ia oe e le Agaga i ni manatu po o ni lagona. Tusi i lalo nei uuna‘iga ma fai ni fuafuaga e faatino ai.
Tusifaamaumau Ou Lagona Uuna‘i
O se tasi o fetalaiga mulimuli a le Alii i Ana Aposetolo o le poloa‘iga , “Ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Alo, ma le Agaga Paia: a‘oa‘o atu ia te i latou ia tausi i mea uma ua ou fai atu ai ia te outou” (Mataio 28:19–20). A o le i oo lelei atu Aposetolo i atunuu uma, o le Galuega 16–21 o loo faaalia ai sa tulaga ese le alualu i luma sa faia e Paulo ma ana soa i le faavaeina o le Ekalesia. Sa latou a‘oa‘oina atu, papatisoina, ma tuuina atu le meaalofa o le Agaga Paia. Sa latou faia vavega, e oo lava i le faatuina o se alii mai le oti, ma valo‘ia le Liliu Ese Tele (Galuega 20:7–12, 28–31). Ma o loo faaauau pea le galuega sa latou amataina e Aposetolo soifua i aso nei, faatasi ai ma soo tuuto e pei o oe, o e o loo fesoasoani e faataunuu le poloa‘iga a le Faaola i auala e le i mafai ona mafaufauina e Paulo. Atonu o loo e iloa ni tagata o e e le iloaina lo latou Tama Faalelagi ma Lana talalelei. Atonu na e lagonaina le “tiga tele ifo o [lou] loto” ia faasoa atu ia i latou mea ua e iloa e uiga ia te Ia (Galuega 17:16). Afai e te mulimuli i faataitaiga a Paulo o le lotomaualalo ma le lototoa i le faasoaina atu o le talalelei, atonu e te maua se tagata “ua tatalaina e le Alii lona loto” (Galuega 16:14).
Manatu mo Suesuega Faaletagata Lava Ia o Tusitusiga Paia
O le a taiala a’u e le Agaga i a’u taumafaiga e faasoa atu le talalelei.
Na tautino mai e le Perofeta o Iosefa Samita, “E leai se tasi e mafai ona folafola atu le Talalelei e aunoa ma le Agaga Paia” (Aoaoga a Peresitene o le Ekalesia: Iosefa Samita [2007],335). A o e faitauina le Galuega 16–21, mafaufau oe aisea e sa’o ai le saunoaga a le Perofeta. Ia matau taimi na taiala ai e le Agaga ia Paulo ma ana soa. O a faamanuiaga na oo mai a o latou mulimuli i le Agaga? O le a se taimi sa e lagona ai le uunaiga o oe e le Agaga i au taumafaiga e faasoa atu le talalelei.
E mafai ona ou folafola atu le talalelei i tulaga uma.
O le lafo i le falepuipui mo le talaiina o le talalelei e foliga mai o se mafuaaga malamalama lea e taofi ai le talai atu. Ae ia Paulo ma Sila, sa avea o se avanoa e faaliliu ai se leoleo o le falepuipui (tagai i le Galuega 16:16–34). I le Galuega 16–21, atoa, vaavaai mo isi faataitaiga o le naunau o Paulo e faasoa atu lana molimau i tagata uma. Aisea e te manatu sa matuai lototoa ma le fefe ai o ia? O le a se mea ua e aoao mai i le faataitaiga a Paulo?
E tele lava isi savali e uiga i le faasoa atu o le talalelei i le Galuega 16–21. Ao e suesue i nei mataupu, vaavaai mo ni [savali] e faapitoa ona faatatau ia te oe?
Tagai foi Dieter F. Uchtdorf, “Galuega Faafaifeautalai: Faasoaina atu o Mea o Loo i Totonu o Lou Loto,” Liahona, Me 2019, 15–18.
O i tatou taitoatasi o se atalii po o se afafine o le Atua.
“O le fanau a le Atua i tatou.”
I Atenai, sa tau atu ai Paulo i tagata sa eseese lagona faaalia ma manatu faalelotu. Sa latou saili e le aunoa e “faalogo mai sina tala faatoa iloa,” ma o le mea sa ofo atu e Paulo sa mautinoa lava le fou ia i latou (tagai Galuega 17:19–21). Sa latou tapuai i le tele o atua, e aofia ai se tasi na latou taua “o le Atua e le mailoa” (Galuega 17:23), ae sa latou talitonu o atua o ni paoa po o ni malosiaga, ae e le o ni tagata ola, ma patino, ma e mautinoa lava e le o so tatou Tama. Mafaufau loloto i le mea na fai atu e Paulo e fesoasoani ia latou iloa ai le Atua. O le a le uiga ia te oe o le avea ma “fanau a le Atua”? (Galuega 17:29). I lou manatu, e faapefea ona ese le avea ma se atalii o le Atua mai le nao le avea ma se tasi o Ana foafoaga? E faapefea e le malamalama i lenei upumoni ona faatosina ai le ala e te vaai ai ia te oe lava ma isi?
Afai na e tu i talane o Paulo ao tuuina atu lana molimau, o le a se mea e te ono tau atu i tagata Eleni anamua e uiga i lo tatou Tama Faalelagi? E te iloa se tasi e mafai ona manuia mai le faalogo i lau molimau?
Tagai foi Roma 8:16; 1 Ioane 5:2; “We Are the Offspring of God” (vitio), ChurchofJesusChrist.org.
Manatu mo Suesuega Faaleaiga o Tusitusiga Paia ma Afiafi Faaleaiga
-
Galuega 16–21.Ina ia faaloloto le malamalama o lou aiga i le Galuega 16–21, e mafai ona tou suesue i le faafanua o loo i le faaiuga o le otootoga lenei, vaavaai mo nuu na talai atu i ai e Paulo le talalelei i mataupu nei. O a ni punaoa ua tatou maua i aso nei e fesoasoani e avatu ai le talalelei i atunuu uma?
Ina ia musuia lou aiga e faasoa atu le talalelei, e mafai ona e faaali atu se vitio se tasi pe sili atu o loo i le vaega “Sharing the Gospel” o le Gospel Library.
-
Galuega 17:10–12; 18:24–28.E mafai faapefea ona avea atili i tatou e pei o le Au Paia i nei fuaiupu? Mata o le a le uiga o le “talia le upu ma le fiafia tele”? (Galuega 17:11). O le a se mea e mafai ona tatou faia ina ia “[po]poto [ai] i tusi”? (Galuega 18:24).
-
Galuega 19:1–7.E mafai ona fesoasoani fuaiupu nei e amata ai se talanoaga a lou aiga e uiga i le taua o le papatisoina ma le faamauina. Ina ia malamalama lelei i upumoni o loo i le Galuega 19:1–7, e mafai ona tou talanoaina nisi o mea e leai se aoga pe a leai se isi mea, e pei o se telefoni feaveai pe a leai se maa. Pe e mafai foi ona e faasoa atu le saunoaga lenei mai le Perofeta o Iosefa Samita: “O le papatisoga i le vai o se afa papatisoga, ma e leai se uiga e aunoa ma le isi afa—o lona uiga, o le papatisoga a le Agaga Paia” (Aoaoga: Iosefa Samita,95). Aisea e “leai ai se uiga” o le papatisoga pe a aunoa ma le mauaina o le meaalofa o le Agaga Paia? (tagai 3 Nifae 27:19–20; Mose 6:59–61).
-
Galuega 19:18–20.A o tou faitau i le Galuega 19:18–20, maitau le taua o meatotino na naunau tagata e lafoai ina ia mafai ona talia le talalelei (tagai fuaiupu 19). O i ai ni meatotino po o ni gaoioiga faalelalolagi e manaomia ona tatou lafoaia ina ia maua ai faamanuiaga faalelagi?
-
Galuega 20:32–35.O le a se taimi sa maua ai e le tou aiga se aafiaga o le aoaoga a Keriso o le: “e sili le manuia o le na te foai atu i le manuia o le na te talia mai”? (Galuega 20:35). O i ai se tasi e mafai ona manuia mai le auaunaga, taimi po o meaalofa e mafai ona tuuina atu e lo outou aiga? Ia talanoa o se aiga ni manatu ma fai se fuafuaga e auauna atu ai i se tagata. O a ni o tatou lagona pe a tatou auauna atu i isi? Aisea e sili ai le manuia o le foai atu nai lo le talia mai?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “O Au o se Atalii o le Atua,” Tusipese a Tamaiti, 2–3.
Faaleleia o Suesuega Faaletagata Lava ia
Tusifaamaumau lagona uunaia. “A e tusifaamaumauina ni musumusuga faaleagaga, ua e faaali atu i le Alii e te faatauaina Lana taitaiga, ma o le a Ia faamanuia oe i ni isi faaaliga faifai soo” (Aoao Atu i le Ala a le Faaola,12; tagai foi i le itulau30).
O malaga faafaifeautalai a le Aposetolo o Paulo.