Paulo i le falepuipui

31 Iulai–6 Aokuso

Galuega 22–28

“O Se Auauna ma se Molimau”

O lagona mai le Agaga Paia e masani ona filemu ma o nisi o taimi e pu‘upu‘u lava. O le tusifaamaumauina o ou lagona e mafai ai ona e manatunatu loloto atili i ai. A o e faitauina le Galuega 22–28, tusi i lalo manatu ma lagona e oo atu ia te oe ma faaalu se taimi e mafaufau loloto i ai.

Tusi Faamaumau Ou Lagona Uuna‘ia

“Pe a tatou i ai i le feau a le Alii,” na folafola mai e Peresitene Thomas S. Monson, “ua tatou agava‘a i le fesoasoani a le Alii” (“Ia A‘oa‘o, Ia Faia, Ia Avea Ai,” Liahona, Nov. 2008, 62). Ae ui i lea, tatou te le agavaa, i se auala laulelei ma se auvai o faamanuiaga e le gata. Mo se faamaoniga o lenei mea, tatou te tau vaai mamao atu nai lo le Aposetolo o Paulo. O lana feau mai le Faaola o le “momoli [o] lo’u igoa i luma o Nuuese, ma tupu, ma le fanauga a Isaraelu” (Galuega 9:15). I le mataupu 22–28 o le Galuega, ua tatou vaai ai i le faataunuuga e Paulo o lenei feau ma le feagai ma le tele o le tetee—saisai, faafalepuipui, sauaga faaletino, matagitogaina i folauga, ma faapea foi ona osofaia e se gata. Ae ua tatou vaaia ai foi “sa tu [Iesu] ia te ia, ua faapea mai, Paulo e, ina faalototele ia oe” (Galuega 23:11). O aafiaga o Paulo o se faamanatu musuia o le valaau a le Alii e “alaga atu [Lana] talalelei ma le leo o le olioliga” e sau faatasi ma le folafolaga lenei: “Ia sii i luga o outou loto ma fiafia, ona ua Ou i ai i lo outou lotolotoi” (Mataupu Faavae ma Feagaiga 29:4–5; tagai foi Mataio 28:19–20).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Galuega 22:1–21; 26:1–29

Ua faasoa atu ma le lototoa e soo o Iesu Keriso a latou molimau.

Ina ua momoli atu e Paulo molimau mamana ua tusifaamaumauina i le Galuega 22 ma le26, sa faapea ona taofia faapagotaina o ia e fitafita Roma. Sa i ai i tagata sa ia tautala atu i ai le mana e faasala ai o ia i le oti. Ae sa filifili o ia e tuu atu ma le lototoa le molimau ia Iesu Keriso ma “le faaaliga mai le lagi” (Galuega 26:19) sa ia mauaina. O le a se mea e musuia ai oe e uiga i ana upu? Mafaufau i avanoa e te maua e faasoa atu ai lau molimau. Mo se fataitaiga, o iloa e au uo ou lagona e uiga ia Iesu Keriso? Po o le a le taimi mulimuli na e tauina atu ai i lou aiga le auala na e maua ai lau molimau o le talalelei?

Ina ua tauemuina Iosefa Samita ao talavou mo le ta’uina atu o lana Uluai Faaaliga, sa musuia o ia i le ala na molimau atu ai Paulo e uiga i lana faaaliga vaaia (tagai Talafaasolopito—Iosefa Samita 1:24–25). O le a faapefea ona e aoteleina mea na aoao mai e Iosefa Samita ia Paulo? O le a se mea ua e aoao mai i nei molimau e toalua e uiga ia Iesu Keriso?

Tagai Neil L. Andersen, “Matou te Tautalatala e uiga ia Keriso,” Liahona, Nov. 2020, 88–91.

Galuega 23:10–11; 27:13–25, 40–44

E tu le Alii ia i latou o e taumafai e auauna atu ia te Ia.

E pei ona faaalia manino mai i le auaunaga a Paulo, o faafitauli i o tatou olaga e le o se faailoga lea o le le fiafia o le Atua ia i tatou po o le galuega o tatou faia. O le mea moni, o nisi taimi, o taimi o faafitauli tatou te lagona ai Lana lagolagosua aupito sili ona malosi. Atonu e manaia le toe faamanatu o mea na e faitauina talu ai nei e uiga i le auaunaga a Paulo ma lisi nisi o mea sa ia onosaia (tagai, mo se faataitaiga, Galuega 14:19–20; 16:19–27; 21:31–34; 23:10–11; 27:13–25, 40–44). Na faapefea ona tu le Alii ia te ia? O faapefea ona tu o Ia ia te oe?

Galuega 24:24–27; 26:1–3, 24–29; 27

E i ai le saogalemu ma le filemu i le faalogo ma usitai i upu a auauna a le Atua.

I lana auaunaga atoa, sa tuuina atu ai e Paulo se molimau mamana ia Iesu Keriso ma Lana talalelei. E toatele tagata sa taliaina lana molimau, ae sa lei talia e tagata uma. A o e faitauina le Galuega 24:24–27 ma le Galuega 26:1–3, 24–29, vaavaai mo upu ma fasifuaitau o loo faaalia ai le ala na tali atu ai taitai Roma i Iutaia i aoaoga a Paulo:

• Filiki

• Feso

• Tupu o Akeripa

A o folau atu i Roma ina ia faamasinoina e Kaisara, sa vavalo ai Paulo e faapea, o le a oo mai i le vaa ma lana pasese le “tele o le leaga ma le maumau” (Galuega 27:10). Faitau le mataupu 27 e iloa ai pe na faapefea ona tali atu uo malaga a Paulo i ana lapataiga. Pe ua e maua ni lesona mo oe lava i lenei aafiaga?

Pe na i ai se taimi na e tali atu ai e pei o se tasi o nei tagata ina ua e faalogo i aoaoga a taitai o le Ekalesia? O a ni taunuuga e ono tulai mai o le tali atu i nei auala? O le a se mea ua e aoao mai nei tala e uiga i le faalogo ma usitai i fautuaga a le Alii e ala mai i Ana auauna?

Tagai foi i le 2 Nifae 33:1–2; D. Todd Christofferson, “O Le Leo o le Lapataiga,” Liahona, Me 2017, 108–11; “Mulimuli i le Perofeta Soifua,” Aoaoga a Peresitene o le Ekalesia: Ezra Taft Benson (2014), 147–55.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Galuega 24:16.A o lei liua o ia, sa i ai se talaaga umi o solitulafono a Paulo e faasaga i le Atua. Ae ona sa naunau o ia e salamo, sa mafai ai ona ia faapea atu, “Ua ia te aʼu se mafaufaufuatiaifo ua aunoa ma se faatausuai e faasaga i le Atua, ma faasaga i tagata uma” (tagai foi Mataupu Faavae ma Feagaiga 135:4–5). E mafai faapefea ona tatou aveese o tatou mafaufau mai faatausuai e faasaga i le Atua ma isi?

Galuega 26:16–18.I nei fuaiupu, o le a le mea na valaau le Alii ia Paulo e fai? O a ni avanoa ua tatou maua e fai ai mea faapenei?

Galuega 28:1–9.E i ai se tagata o lou aiga e fiafia i gata? Atonu e te manao e fai atu i le tagata lena po o se isi tagata o le aiga e faamatala atu tala o loo i le Galuega 28:1–9. Atonu o le a fiafia lau fanau e tusi se ata o nei tala pe faatino foi. O le a ni lesona e mafai ona tatou aoao mai i nei tala? O le tasi atonu o le, e faataunuu e le Alii Ana folafolaga i Ana auauna. Mo se faataitaiga, e mafai ona e faatusatusaina folafolaga o loo faia i le Mareko 16:18 ma o latou faataunuuga i aafiaga a Paulo. E mafai foi ona e sailia se lauga o le konafesi aupito lata mai, sa faia ai se folafolaga e se tasi o auauna a le Alii—atonu o se folafolaga e anoa i le tou aiga—ma faapipii i totonu o le tou fale. E mafai faapefea ona tatou faaalia lo tatou faatuatua o le a faataunuuina lenei folafolaga?

o se gata uogo

Sa puipuia e le Alii ia Paulo ina ua u o ia e se gata uogo.

Galuega 28:22–24.E pei o le Ekalesia i aso o Paulo (na taua o se “lotu” i le fuaiupu 22), e masani foi ona “talaeseina” le Ekalesia i aso nei. Ina ua talaeseina e tagata le Faaola ma Lana Ekalesia, sa faapefea ona tali atu i ai Paulo? O le a se mea e mafai ona tatou aoao mai le aafiaga a Paulo?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Lo’o Soifua Lo’u Faaola,” Viiga, nu. 72.

Faaleleia o Lo Tatou Aoao Atu

Taulai i mataupu faavae o le a manuia ai lou aiga. Ao e suesue i tusitusiga paia, ia fesili ifo ia te oe lava, “O le a se mea ou te mauaina ii o le a aoga tele i lou aiga?” (Tagai Aoao Atu i le Ala a le Faaola,17.)

Paulo i luma o le Tupu o Akeripa

Paulo i luma o le Tupu o Akeripa Lototoa i le Molimau ia Iesu Keriso, saunia e Daniel A. Lewis