O Le Liuaina o Keriso

O le Liuaina, saunia e Carl Heinrich Bloch

10–16 Aperila

Mataio 15–17; Mareko 7–9

“O Oe o le Keriso”

A o e mafaufau loloto i le Mataio 15–17 ma le Mareko 7–9, ia gauai atu i uunaiga faaleagaga e mafai ona fesoasoani e te iloa ai mea e manaomia e tamaiti o lau vasega.

aikona o le fefaasoaai

Valaaulia le Fefaasoaai

Valaaulia tamaiti e faasoa mai pe aisea latou te faafetai ai mo taitai i le Ekalesia, e aofia ai le perofeta ma aposetolo ma taitai i le lotoifale. O le a se mea na tatou faalogo i ai talu ai nei o latou aoao mai?

aikona o le aoao atu

Aoao atu le Aoaoga Faavae: Tamaiti Laiti

Mataio 16:13–17

E mafai ona maua sa’u molimau o Iesu Keriso o le Alo o le Atua.

Mafaufau pe mafai faapefea ona e faaaogaina le molimau a Peteru ma le tali a Iesu e aoao ai le fanau pe o le a le molimau ma musuia i latou e sailia sa latou lava.

Gaoioiga e Mafai Ona Fai

• Fai i tamaiti e faalogologo po o a tala a Peteru a o e faitauina le Mataio 16:15–17. (Tagai foi “Mataupu 32: Ua Molimau Atu Peteru e uiga i le Keriso,” i le Tala o le Feagaiga Fou, 76–77, po o le vitio talafeagai o loo i luga o le ChurchofJesusChrist.org.) Faamalamalama atu sa tuuina atu e Peteru lana molimau e uiga ia Iesu Keriso. Toe faitau fuaiupu. (Pe toe faaali le vitio.) O le taimi lenei fai i tamaiti e faalogologo pe o ai na ta’u atu ia Peteru o Iesu o le Keriso le Alo o le Atua.

• Tuu atu lau molimau e uiga ia Iesu Keriso, ma faamalamalama pe na faapefea ona e mauaina. Valaaulia tamaiti e sailia a latou lava molimau mai le Tama Faalelagi.

Mataio 16:15–19

Ua tuuina mai e Iesu Keriso i perofeta ma aposetolo ia ki o le perisitua e taitai ai Lana Ekalesia.

Sa faatusaina e le Faaola ia faaaliga i se papa ma ki o le pule o le perisitua. E mafai faapefea ona e faaaogaina nei faatusatusaga e fesoasoani ai i tamaiti ia faatuatua i e o taitaia Lana Ekalesia?

Gaoioiga e Mafai Ona Fai

• Faaali i tamaiti se maa a o outou faitauina faatasi le Mataio 16:18 ma i latou. Toe fai faatasi ma i latou le fasifuaitau “Ou te ati ae foi la’u ekalesia i luga o lenei papa,” faaopoopo i ai ni taga e o faatasi ma upu. Faamalamalama atu o le Ekalesia ua fausia i luga o le “papa” o faaaliga.

• Faaali i tamaiti ni ki ma fesili i ai po o le a le mea e faaaoga i ai ki. Faamatala atu na maua e Peteru ma isi Aposetolo ki o le perisitua mai ia Iesu. O nei ki e “tatala” ai faamanuiaga mo i tatou ma tatala ai foi le ala i le lagi. Mo se faataitaiga, o ki o le peiristua ua mafai ai ona tatou papatiso ma tagofia le faamanatuga. Tuu atu i tamaiti ni ki pepa, ma fai i ai e tusi ai ni faamanuiaga ua “tatala” mai e ki o le perisitua.

• Faaali atu se ata o le Peresitene o le Ekalesia, ma tuu atu lau molimau o loo ia umia ki o le perisitua i aso nei, e pei foi ona sa i ai ia Peteru.

faatagata o Peteru o loo umia ki

O ki o le perisitua o le pule lea e faatonutonu ai le faaaogaina o le perisitua.

Mataio 17:19–20

E mafai e lo’u faatuatua ona faia vavega.

A e faitauina le folafolaga a Iesu e faapea o le faatuatua e faapei o le fatu o le sinapi e mafai ona aveese ai se mauga, o a lagona uunai e te maua e uiga i tamaiti o loo e faiaoga ai?

Gaoioiga e Mafai Ona Fai

• Faitau faatasi ma tamaiti le Mataio 17:19–20 . Valaaulia i latou e feauauai i le tusia o ata o mauga tetele ma fatu laiti i luga o le laupapa. Faamalamalama atu o mauga e pei o mea e faigata ona tatou faia. O a ni mea e mafai ona lagonaina ua pei o ni mauga ia i tatou? Faaaoga le itulau o gaoioiga o lenei vaiaso e fesoasoani ai i tamaiti e mafaufau pe mafai faapefea e le faatuatua ona faia mea e finagalo le Atua latou te faia.

• Tuu se ata o se mauga i se tasi itu o le potu. Fai i tamaiti e ta’u mai ni mea e mafai ona latou fai ia maua atili ai le faatuatua ia Iesu Keriso. Tuu atu i tamaiti taitasi o e fautuaina mai se mea e sii le mauga faalatalata i le isi itu o le potu. Faitau le Mataio 17:19–20, ma molimau atu i le mana o le faatuatua i lou olaga.

• Usu faatasi se pese e faatatau i le faatuatua, e pei o le “Faatuatua” (Tusipese a Tamaiti, 50). Tuu atu ia tofu le tamaitiiti ma se fatu e ave i le fale. Valaaulia i latou e toto le fatu i se mea e mafai ona latou matauina a o ola ae e fesoasoani latou te manatua ai ia faatuatua i le Tama Faalelagi ma Iesu Keriso.

aikona o le aoao atu

Aoao atu le Aoaoga Faavae: Tamaiti Matutua

Mataio 16:13–17

O se molimau ia Iesu Keriso e oo mai e ala i faaaliga.

E mafai faapefea ona fesoasoani le molimau a Peteru o i le Mataio 16:13–17 i tamaiti a o latou fausiaina a latou molimau?

Gaoioiga e Mafai Ona Fai

• Fesili i tamaiti pe o le a sa latou tala pe a fesili atu se tasi, “O ai Iesu?” Valaaulia tamaiti e faitau le Mataio 16:13–17 e iloa ai pe na faapefea ona tali atu Peteru i lena fesili. Na faapefea ona maua lana molimau ia Iesu? O a ni mea e mafai ona tatou faia e faamalosia ai a tatou molimau?

• Fesoasoani i tamaiti e faatusatusa le ala tatou te iloa ai upumoni faaleagaga ma ala tatou te iloa ai isi upumoni. Mo se faataitaiga, e faapefea ona tatou iloa pe o le a le umī o se tagata po o a uiga o le tau? E faapefea ona tatou iloa o Iesu Keriso o le Alo o le Atua? Tau atu i tamaiti pe na faapefea ona molimau atu le Agaga Paia ia te oe e uiga i le Faaola.

• Faasoa atu lau molimau ia Iesu Keriso, ma lu’i tamaiti ia maua pe faamalosia a latou lava molimau ia te Ia.

Mataio 16:15–19

O le Ekalesia a Iesu Keriso o loo taitaia e i latou o e umia ki o le perisitua.

O le suesueina o le Mataio 16:15–19 e mafai ona fausia ai le faatuatua o tamaiti e faapea O Le Ekalesia a Iesu Keriso o le Au Paia o Aso e Gata Ai o se toefuataiga o le Ekalesia lava e tasi na faavaeina e Iesu a o nofo ai o Ia i lenei lalolagi.

Gaoioiga e Mafai Ona Fai

• Tusi le Mataio 16:19 i le laupapa, aveese ni nai upu, e aofia ai ma le upu “ki.” Fai i tamaiti e sue upu o loo misi.

• Faaali le vitio “Where Are the Keys?” (ChurchofJesusChrist.org), pe iloilo “Ki o le Perisitua” i le Taiala i Tusitusiga Paia (scriptures.ChurchofJesusChrist.org). O a ki o le perisitua? E faapefea ona pei ki o le perisitua o ki mao’i?

• Fesoasoani i tamaiti e lisi i le laupapa ia ni nai tagata o i ai ki o le perisitua. “Ki o le Perisitua” i le Taiala i Tusitusiga Paia (scriptures.ChurchofJesusChrist.org) o loo i ai se lisi e mafai ona fesoasoani ia i latou. Valaaulia se tasi i lau uarota o loo umia ki o le perisitua e talanoa i le vasega e uiga i le taua o nei ki.

• Nana ni ki (po o ata o ki) i le potu, ma valaaulia tamaiti e sue mai. A maua ki taitasi, fesoasoani ia i latou e mafaufau i faamanuiaga tatou te olioli ai ona o ki o le perisitua (mo se faataitaiga, aiga e faavavau, papatisoga, ma le faamanatuga).

Mataio 17:1–9

O Iesu Keriso o le Alo o le Atua.

O nei fuaiupu ua faamatala ai se tasi o nai taimi i tusitusiga paia na faalogoina ai le siufofoga o le Atua o molimau mai i Lona Alo Pele. O le suesueina o lenei tala ma tamaiti e mafai ona fausia ai lo latou faatuatua ia Iesu Keriso.

Gaoioiga e Mafai Ona Fai

• Valaaulia tamaiti e tusi ni ata o le mea na tupu i le Mataio 17:1–9. Fai atu ia i latou e faamatala a latou ata i le tasi ma le isi. (Tagai “Mataupu 33: Faaali Mai i le Mamalu: O Le Liua,” i le Tala o le Feagaiga Fou, 78–79, po o le vitio talafeagai i luga o ChurchofJesusChrist.org.)

• Tuu atu i tamaiti se taimi e mafaufau loloto ai po o le a se mea o aoao mai e le tala o i le Mataio 17:1–9 ia i latou e uiga ia Iesu Keriso. Valaaulia i latou e tusi o latou manatu i luga o le laupapa. Valaaulia tamaiti e faasoa mai pe na faapefea ona latou iloa o Iesu Keriso o le Alo o le Atua.

aikona o le aoaoina

Uunaia le Aoaoina i le Aiga

Valaaulia tamaiti e fesili i o latou matua po o isi tagata o le aiga pe na faapefea ona maua a latou molimau ia Iesu Keriso.

Faaleleia o Lo Tatou Aoao Atu

Faaaoga musika. E mafai ona fesoasoani pese a le Peraimeri ma viiga i tamaiti o vaitausaga uma e malamalama ai ma manatua upumoni o le talalelei. E mafai foi e pesepesega ona faagauai atu tamaiti i le aoaoina. (Tagai Aoao Atu i le Ala a le Faaola,22.)

itulau o gaoioiga: e mafai e lo tatou faatuatua ona faia vavega