“17–23 Aperila. Mataio 18; Luka 10: ‘Se A Se Mea Ou Te Faia Ina Ia Ou Maua ai le Ola e Faavavau?,’” Sau, Mulimuli Mai ia te A‘u—Mo le Peraimeri: Feagaiga Fou 2023 (2022)
“17–23 Aperila. Mataio 18; Luka 10,” Sau, Mulimuli Mai ia te Au—Mo le Peraimeri: 2023
O le Samaria Agalelei, saunia e Dan Burr
17–23 Aperila
Mataio 18; Luka 10
“Se A Se Mea Ou Te Faia Ina Ia Ou Maua ai le Ola e Faavavau?”
O a upumoni i le Mataio 18 ma le Luka 10 e manaomia ona aoao e tamaiti? Faalogologo mo uunaiga mai le Agaga Paia a o e faitauina nei mataupu. Sau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e taialaina au suesuega, ma e mafai ona avatu e lenei otootoga ia te oe ni manatu faafaiaoga.
Valaaulia le Fefaasoaai
Fai i tamaiti e faasoa se mea na latou aoaoina e uiga ia Iesu Keriso i le fale po o le Peraimeri.
Aoao atu le Aoaoga Faavae: Tamaiti Laiti
E tatau ona ou faamagalo atu i isi e le aunoa.
A o e faitauina le Mataio 18:21–35, mafaufau i ou lava aafiaga i le faamagalo atu ma pe o a mea e manaomia ona iloa e tamaiti e uiga i lenei mataupu faavae.
Gaoioiga e Mafai Ona Fai
-
Faamatala le faataoto i le auauna le alofa (tagai Mataio 18:23–35). Faamatala atu a agaleaga pe le sa’o mai se tasi, atonu o le a tatou lagonaina le ita po o le faanoanoa i le taimi muamua. Ae o le faamagalo atu o lona uiga e mafai ona tatou toe lagonaina le filemu. A tatou faamagalo atu i se tasi, ua tatou filifili e aua nei toe ita ia i latou. (Fesoasoani i tamaiti ia malamalama afai e agaleaga pe le sa’o atu se tasi ia i latou, e tatau ona latou fesili atu i o latou matua po o se isi tagata matua faatuatuaina mo se fesoasoani.)
-
Tusi le Ua ou faamagalo ia te oe i le laupapa, ma ta’u atu i tamaiti e mafai ona fesoasoani nei upu e liliu ai taimi faanoanoa i taimi fiafia. Tusi se ata o foliga faanoanoa i le laupapa, ma faasoa ni nai faataitaiga o tamaiti o fefaamagaloa’i. A uma faataitaiga taitasi, valaaulia se tamaitiiti e sui le foliga faanoanoa i se foliga fiafia.
-
Usu se pese e faatatau i le faamagalo atu, e pei o le “Fesoasoani Mai Ia Te A‘u Tama Pele” (Tusipese a Tamaiti, 52). Faasoa atu lau molimau o le a fesoasoani le Tama Faalelagi ia i tatou e faamagalo atu i isi.
Na aoao mai au e Iesu ou te vaai atu i tagata uma o o’u lava tuaoi ma alofa ia i latou.
O le faataoto i le Samaria agalelei e mafai ona faaali atu ai i tamaiti po o ai o tatou tuaoi ma pe faapefea ona tatou taulimaina i latou. Mafaufau i ni auala e mafai ona e musuia ai tamaiti e “alu ia, ma ia e faapea ona fai …“ (Luka 10:37).
Gaoioiga e Mafai Ona Fai
-
Fesili i tamaiti taitoatasi, “O ai lou tuaoi?” Aotele le tala i le Luka 10:25–37, ma faasoa mai pe na faapefea ona tali atu Iesu i lena fesili. O le a le mea na aoao mai e Iesu e uiga i le ala e tatau ona tatou taulimaina ai o tatou tuaoi?
-
Faitau le Luka 10:25–37 a o faatino mai e tamaiti le faataoto i le Samaria agalelei. Fesoasoani ia i latou e mafaufau i auala e mafai ai ona avea i latou e pei o le Samaria agalelei e ala i le faaali atu o le alofa ma le agalelei i isi.
-
Tusi ni nai faataitaiga o tulaga e manaomia ai e se tagata se fesoasoani, ma nana ia pepa faataamilo i le potu. Fai i tamaiti e sue pepa o loo misi. Fai i tamaiti e sue pepa ma faasoa mai pe mafai faapefea ona latou faaalia le agalelei i le tagata o i ai i lena tulaga.
-
Usu faatasi ma tamaiti se pese e faatatau i le agalelei, e pei o le“Fetalai Mai Iesu e Alofa i Tagata Uma” po o le “O Le Agalelei e Amata ia te Au” (Tusipese a Tamaiti, 39, 83). Fesoasoani i tamaiti e mafaufau i ni nai auala latou te faaalia ai le alofa ma le agalelei i isi. E mafai foi ona latou tusi o latou lava ata o faia nei mea.
Aoao atu le Aoaoga Faavae: Tamaiti Matutua
O le a faamagalo a’u e le Tama Faalelagi pe a ou faamagalo atu i isi.
O le faataoto i le auauna le alofa e mafai ona avea o se ala e le galo e aoao ai tamaiti e manao le Tama Faalelagi ia tatou faamagalo atu i tagata uma.
Gaoioiga e Mafai Ona Fai
-
Faitau faatasi ma tamaiti le Mataio 18:23–35 . Faamatala atu o le tupu po o le alii e faatusa i le Tama Faalelagi, o le auauna e faatusa ia i tatou, ma o le uso a auauna e faatusa ia i latou o e agaleaga mai ia i tatou. Fai atu i tamaiti ni fesili e pei “O le a se mea o aoao mai e lenei tala e uiga i le ala e tatau ona tatou taulimaina ai isi? O anafea na faigata ai ia te oe ona faamagalo atu i se tasi? Na faapefea ona e lafoai ese na lagona tiga? O anafea na e manaomia ai le faamagaloina ona o se filifiliga sese?”
-
Faaali le vitio “Forgive Every One Their Trespasses: The Parable of the Unmerciful Servant” (ChurchofJesusChrist.org) e fesoasoani i tamaiti e vaai faalemafaufau i lenei faataoto.
-
Tusi i le laupapa le faatele 70 × 7, ma fesoasoani i tamaiti e tali. Fai i se tasi e faitau le Mataio 18:21–22, ma faamatala atu sa faaaoga e Iesu lenei fuainumera e aoao ai i tatou e tatau lava ona tatou faamagalo atu e le aunoa.
-
Fai i tamaiti e fesoasoani atu ia oe e mafaufau i ni nai tulaga e ono manaomia ai e se tagata ona faamagalo atu i se isi tagata. Valaaulia tamaiti e faatino pe faapefea ona e faaali atu le lotofaamagalo i na tulaga.
-
Usu se pese e faatatau i le faamagaloga, e pei o le “Fesoasoani Mai Ia Te A‘u Tama Pele” (Tusipese a Tamaiti, 52). Fesoasoani i tamaiti ia malamalama i mea o loo aoao mai e le pese ia i tatou e uiga i le faamagalo atu o isi.
E mafai ona ou alofa ma auauna atu i isi, aemaise i latou o e manaomia le fesoasoani.
Manatunatu loloto i taimi i lou lava olaga sa avea ai se tasi ma “Samaria agalelei” ia te oe. E mafai faapefea ona e musuia tamaiti ia avea ma “Samaria agalelei” i isi?
Gaoioiga e Mafai Ona Fai
-
Tofi tamaiti taitoatasi e faitau lemu se vaega o le faataoto i le Samaria agalelei. Valaaulia tamaiti e faamatala mai a latou vaega o le faataoto i le faasologa o mea na tutupu.
-
Faamalamalama i tamaiti o tagata Iutaia e matua le fiafia lava i tagata Samaria ma a oo la ina latou faimalaga mai Ierusalema i Kalilaia, latou te ui mamao ese mai Samaria ina ia le fetaui ai ma ni tagata Samaria. Ina ia faapupula lenei mea, faaali atu le faafanua 1 o le Tusi Paia, “Faafanua Faaletino o le Nuu Paia.” Aisea ua faaaoga ai e Iesu se tagata Samaria o se faataitaiga o le agalelei i lenei faataoto? O le a se mea ua aoao mai e lenei tala e uiga i le fesoasoani atu i isi o loo manaomia le fesoasoani? (Tagai foi i le Mosaea 4:16–22.)
-
Fai i tamaiti e faasoa mai se aafiaga ina ua i ai se tagata na faapei o le Samaria agalelei ia te i latou.
-
Lu’i tamaiti e faatu se sini ia faapei o le Samaria agalelei i lenei vaiaso. Atonu e te fai atu ia i latou pe latou te iloaina se tasi o ma’i pe tuuatoatasi po o se tasi e seāseā sau i le lotu. Fesili i tamaiti pe mafai faapefea ona latou fesoasoani i lena tagata. Fesoasoani i tamaiti ia malamalama pe faapefea e le auauna atu i isi ona fesoasoani ia i latou e tausia folafolaga na latou faia i le papatisoga (tagai Mosaea 18:8–10).
Uunaia le Aoaoina i le Aiga
Valaaulia tamaiti e faasoa atu i o latou aiga mea ua latou fuafua e fai ina ia atili faamagalo atu ai pe sili atu e pei o le Samaria agalelei i lenei vaiaso.
Faaleleia o Lo Tatou Aoao Atu
Aoao atu tamaiti ia tusifaamaumau o latou lagona uunai. Afai e mafai e tamaiti ona aoao le mausa o le tusifaamaumau o lagona uunai, o le a fesoasoani ia i latou e iloa ai ma mulimuli i le Agaga. E mafai ona tusifaamaumau e tamaiti ia lagona uunai e ala i le makaina o mau, tusi ia ata, pe fai ni faamatalaga faigofie i a latou apitalaaga.