“27 Mati–2 Aperila. Mataio 14; Mareko 6; Ioane 5–6: ‘Aua Tou Te Matata’u,’” Sau, Mulimuli Mai ia te Au—Mo le Peraimeri: Feagaiga Fou 2023 (2022)
“27 Mati–2 Aperila. Mataio 14; Mareko 6; Ioane 5–6,” Sau, Mulimuli Mai ia te Au—Mo le Peraimeri: 2023
27 Mati–2 Aperila
Mataio 14; Mareko 6; Ioane 5–6
“Aua Tou Te Matata’u”
A o e tapenapena e aoao atu mai le Mataio 14; Mareko 6; ma le Ioane 5–6, vaavaai mo savali talafeagai ma olaga o tamaiti o loo e aoaoina. O le a sou manatu o le a se mea o le a fesoasoani ia i latou ia malamalama ai i nei savali? E mafai ona avatu e lenei otootoga ia te oe ni manatu.
Valaaulia le Fefaasoaai
Faaali se ata o Iesu o loo savali i luga o le vai (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga po o le Tusi Ata o le Talalelei, nu. 43), ma fai i tamaiti e faasoa mai mea ua latou iloa e uiga i le tala.
Aoao atu le Aoaoga Faavae: Tamaiti Laiti
E silafia e Iesu Keriso mea ou te manaomia ma e mafai ona fesoasoani mai ia te au.
Mafaufau loloto i le tala ia Iesu o loo faamaloloina le tagata i le taelega i Petesa. E mafai faapefea ona e fesoasoani i tamaiti ia iloa mea o loo aoao mai e le tala e uiga i le agalelei, alofa, ma isi uiga auaumama o Iesu?
Gaoioiga e Mafai Ona Fai
-
Faaaoga le ata O Keriso o loo Faamaloloina le Ma’i i Petesa (Tusi Ata o le Talalelei, nu. 42) e faamatala atu ai i tamaiti le tala o i le Ioane 5:1–9. Pe faaali foi le vitio “Jesus Heals a Man on the Sabbath” (ChurchofJesusChrist.org). Fai i tamaiti e mafaufau faapea o i latou o le tagata lea na faamalolo e Iesu. Mata o a ni o latou lagona ina ua faamalolo i latou e Iesu?
-
Fai i tamaiti e ta’u mai ni mea e faigata mo i latou pe latou te faanoanoa ai foi. Faamatala i ai se taimi i lou olaga na e maua ai se fesoasoani mai le Faaola i se taimi o se tofotofoga faigata. Molimau atu e silafia e Iesu o tatou faafitauli uma ma e manao e fesoasoani mai ia i tatou.
Ou te mulimuli i faataitaiga a Iesu pe a ou agalelei atu i isi.
O se tasi o auala sa faaalia ai e Iesu le alofa o le fafaga lea o tagata sa mulimuli atu ia te Ia ina ua latou fia aai. E mafai faapefea ona e fesoasoani i tamaiti e aoao ia auauna atu i isi e faapei ona sa faia e Iesu?
Gaoioiga e Mafai ona Fai
-
Faaali atu i tamaiti se ato ma ni nai falaoa a o e faamatalaina le tala i le Mataio 14:13–21. Faamalamalama atu e ui ina sa taumafai Iesu e saili se nofoaga ina ia tau ai lava na o ia, ae sa mananao lava tagata ina ia latalata atu ia te Ia. Faasoa atu le toega o le tala i tamaiti, ma fai i ai e faalogologo pe o a mea na faia e Iesu e faaalia ai le agalelei ma le alofa mo tagata.
-
Fai i tamaiti e faasoa mai ni ala sa agalelei atu ai se tasi ia i latou. Ona fesoasoani lea ia i latou e mafaufau i mea e mafai ona latou faia i lenei vaiaso ina ia agalelei atu ai i isi. Mo tali uma latou te aumai, tusi se papa falaoa po o se i’a i luga o le laupapa. Ta’u i tamaiti a latou faia nei mea, o loo latou mulimuli i le faataitaiga na faatuina e Iesu ina ua Ia fafagaina tagata e lima afe o e sa fia aai.
O le faatuatua ia Iesu Keriso e mafai ona fesoasoani ia te au ia ou le fefe ai.
Sa faaalia e Peteru le faatuatua tele ina ua savali o ia i luga o le vai agai atu ia Iesu. O a lesona o i ai i lenei tala mo tamaiti?
Gaoioiga e Mafai ona Fai
-
Faaali atu le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga (tagai foi Tusi Ata o le Talalelei, nu. 43) a o e faamatalaina le tala mai le Mataio 14:22–33 i au lava upu. Mafaufau e faaaoga le itulau o gaoioiga o lenei vaiaso e fesoasoani ai i tamaiti e toe faamatala atu le tala ia te oe. E mafai foi ona e aumaia se tama’i pesini vai ma valaaulia tamaiti e faafoliga faapea o loo “savavali” o latou tamatamailima i luga o le vai.
-
Faaali le vitio “Wherefore Didst Thou Doubt?” (ChurchofJesusChrist.org), ma fesili atu i tamaiti pe aisea na fefe ai Peteru. Ona fai lea i ai e faamatala atu ni taimi na latou lagona ai le fefe ma faasoa mai po o le a le mea na fesoasoani ia i latou. Fesoasoani ia latou iloa o le faatuatua ia Iesu Keriso e fesoasoani ia i tatou e faatoilalo ai le fefe.
Aoao atu le Aoaoga Faavae: Tamaiti Matutua
Ua aoao mai au e Iesu Keriso e uiga i le Tama Faalelagi.
E mafai faapefea e aoaoga a Iesu Keriso e uiga i Lona Tama ona fesoasoani e aoao ai tamaiti e uiga i le Tama Faalelagi?
Gaoioiga e Mafai ona Fai
-
Fai ni seti se lua o kata faafetaui e tusi ai upu sa faaaoga e Iesu e aoao mai ai e uiga i le Tama Faalelagi i le Ioane 5, e pei o le alofa, ola, ma le galuega (tagai Ioane 5:20, 26, 36). Faafāō kata, ona fai lea i tamaiti e vaavaai mo kata e fetaui e ala i le faau i luga o kata e lua i le taimi e tasi. A o maua kata e lua e fetaui, faitau le fuaiupu o loo i ai le upu, ona fesili lea i tamaiti po o le a le mea o aoao mai e le upu e uiga i le Tama Faalelagi.
-
Fai i tamaiti e faitau le Ioane 5:30 ona faauma lea o le fuaiupu lenei: “Ou te le usiusita’i i lo’u lava loto, a o …” Na faapefea ona faia e Iesu Keriso le finagalo o Lona Tama Faalelagi? E mafai faapefea ona tatou faia le finagalo o le Tama Faalelagi?
Na fafagaina faavavega e Iesu le lima afe o tagata i falaoa e lima ma i’a e lua.
O nai mea iti tatou te ofoina atu e mafai ona faia ai se eseesega.
O se tamaitiiti talavou sa tuuina atu falaoa ma i’a ia na faaaoga e Iesu e fafaga ai le lima afe. E mafai faapefea ona e fesoasoani i tamaiti o loo e faiaoga ai ia iloa pe mafai faapefea ona latou saofaga atu i le galuega a le Alii?
Gaoioiga e Mafai ona Fai
-
Fesoasoani ia latou manatunatu i le toatele naua o se aofaiga e lima afe tagata. Mata o le a se tulaga e i ai pe a fafagaina lena anoanoai o tagata i le na o le lima ni papa falaoa ma ni i’a se lua?
-
Valaaulia se tamaitiiti e faamatala mai le tala i le fafagaina o le lima afe i ana lava upu. Faamamafa atu o se taulealea talavou na saunia falaoa ma i‘a ia na faaaoga e le Alii e faatino ai lenei vavega. E mafai faapefea ona tatou pei o le tamaitiiti i le Ioane 6:9? Valaaulia tamaiti e tusi ni ata o ni falaoa ma i’a i luga o se pepa ma tusi ai ni mea e mafai ona latou faia e foai atu i le Alii e fesoasoani ai i Lana galuega.
-
Avatu i tamaiti se tama’i paso e faamaea. O le a se mea e tupu pe afai e misi se fasi paso se tasi? Faamalamalama atu o i tatou taitoatasi e pei o se fasi paso—e taua uma i tatou, ma e tatou te manaomia uma lava le tasi ma le isi. Fesoasoani i tamaiti e ta‘u mai ni mafuaaga e taua ai i latou i o latou aiga, i la latou vasega Peraimeri, aiga o le Atua, ma isi vaega.
O le faatuatua ia Iesu Keriso e mafai ona fesoasoani ia te au ia ou le fefe ai.
O le faatuatua ma le fefe e i ai matafaioi iloga i le tala ia Iesu ma Peteru sa savavali i luga o le sami. O a lesona e mafai ona aoao e tamaiti mai lenei tala?
Gaoioiga e Mafai ona Fai
-
Faaali atu le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga (tagai foi Tusi Ata o le Talalelei, nu. 43). Fai i tamaiti e sue fuaiupu i le Mataio 14:22–33 o loo faamatala ai le ata.
-
Fai i tamaiti e vaavaai mo faailoga o le faatuatua ma faailoga o le fefe a o latou faitauina le Mataio 14:22–33. E mafai foi ona e faaali le vitio “Wherefore Didst Thou Doubt?” (ChurchofJesusChrist.org). O le a le uiga o le faatuatua ia Iesu Keriso? Fesoasoani i tamaiti e mafaufau i taimi na fesoasoani ai lo latou faatuatua ia i latou e faatoilalo le fefe.
-
Fai i tamaiti e manatu faapea, sa latou i ai ma sa i ai se mea pueata i le taimi na savavali ai Iesu ma Peteru i luga o le sami. O le fea taimi o le a latou filifili ai e pu’e le ata ma pe aisea foi? Fautua atu e saili le Mataio 14:22–23 mo ni manatu. Valaaulia i latou e tusi se ata o le taimi lea na latou filifilia, faasoa mai a latou ata, ma faamalamalama pe aisea na latou filifilia ai lena taimi.
Uunaia le Aoaoina i le Aiga
A maea le itulau o gaoioiga o lenei vaiaso a tamaiti, valaaulia i latou e faaaoga e aoao atu ai o latou aiga i mea sa latou aoaoina i le vasega. Pe tuu atu ia i latou se kopi o le itulau e faamaea ai ma o latou aiga i le fale.
Faaleleia o Lo Tatou Aoao Atu
Valaaulia le fefaasoaai. Fesili i tamaiti e uiga i o latou mafaufauga, lagona, ma aafiaga. O le a e iloaina e tele lava ina faigofie ae maoae o latou malamalamaaga.