Si Juan Bautista nga nagbunyag ni Jesus

Kinoloran nga bildo nga bentana [stained-glass window] sa Nauvoo Illinois Temple, ni Tom Holdman

Enero 23–29

Mateo 3; Marcos 1; Lucas 3

“Andama Ninyo ang Dalan alang sa Ginoo”

Samtang mobasa ka mahitungod ni Juan Bautista ug sa bunyag ni Jesukristo, irekord ang bisan unsang espirituwal nga mga impresyon nga imong madawat. Ang Dali, Sunod Kanako—Alang sa mga Indibidwal ug mga Pamilya makatabang kanimo nga makasabot niini nga mga kasulatan ug makatabang kanimo sa pagsuporta sa pagkat-on nga gihimo sa mga bata sa panimalay.

pagpaambit nga icon

Dapita ang Pagpaambit

Aron mahatagan ang mga bata og kahigayonan sa pagpaambit sa unsay ila nang nahibaloan, ipakita ang usa ka hulagway ni Jesus nga gibunyagan. Hangyoa sila sa pagsulti kanimo unsa ang nahitabo dinhi niini nga litrato ug unsay ilang gibati mahitungod sa pagpabunyag.

pagtudlo nga icon

Itudlo ang Doktrina: Mas Gagmay nga mga Bata

Mateo 3:13–17

Mabunyagan ko sama ni Jesus.

Unsaon nimo paggamit ang istorya sa bunyag ni Jesus aron sa pagtabang sa mga bata nga mangandam sa pagpabunyag?

Posible nga mga Kalihokan

• I-summarize ang istorya sa bunyag sa Manluluwas (tan-awa sa Mateo 3:13–17; tan-awa usab sa “Kapitulo 10: Jesus Gibunyagan,” sa Mga Istorya sa Bag-ong Tugon, 26–29). Ipasabot nga si Jesus gibunyagan pinaagi sa pagpaunlod pinaagi sa tawo nga adunay awtoridad sa pagkapari. Balik-balika ang istorya sa pipila ka higayon ug dapita ang mga bata sa pagpaambit sa mga detalye nga ilang mahinumdoman.

• Ipakita ang usa ka hulagway ni Jesus nga gibunyagan ug ang pahina sa kalihokan karong semanaha. Ipatudlo sa mga bata ang mga pagkasusama sa duha ka hulagway. (Adunay hulagway ni Jesukristo nga gibunyagan sa latid niini nga semana sa Dali, Sunod Kanako—Alang sa mga Indibidwal ug mga Pamilya.)

• Rebyoha ang mga saad nga himoon sa mga bata sa dihang mabunyagan sila (tan-awa sa Mosiah 18:8–10; Doktrina ug mga Pakigsaad 20:37). Pangutan-a sila kon hain niini nga mga butang ang ila nang gibuhat.

• Dapita ang usa ka sakop sa bishopric sa pagsulti sa mga bata mahitungod sa ilang interbiyo sa bunyag sa dili pa sila mabunyagan.

• Kantaha og dungan ang usa ka awit mahitungod sa bunyag, sama sa “Bunyag” (Songbook sa mga Bata, 54-55). Ikonsiderar ang paghangyo sa usa ka bata nga mangulo sa ubang mga bata samtang manganta sila.

batang babaye nga gibunyagan

Makasunod kita sa ehemplo ni Jesus pinaagi sa pagpabunyag.

Mateo 3:11, 16

Ang Espiritu Santo motabang kanako.

Agig dugang sa pagpangandam alang sa bunyag, ang mga bata mangandam usab sa pagdawat sa gasa sa Espiritu Santo. Unsaon nimo pagtabang kanila?

Posible nga mga Kalihokan

• Gamita ang Mateo 3:11, 16 aron sa pagtudlo sa mga bata nga ang Espiritu Santo mikunsad ngadto kang Jesus sa dihang Siya gibunyagan (usa ka salampati mipakita isip timailhan aron sa pagpakita nga kini nahitabo). Ipakita ang hulagway nga Ang Gasa sa Espiritu Santo (Libro sa mga Hulagway sa Ebanghelyo, nu. 105), ug ipasabot nga kita makadawat sa gasa sa Espiritu Santo kon kita kompirmahan.

• Pagdala og kahon nga gisudlan og mga butang sama sa usa ka hulagway ni Jesus, usa ka makapahupay nga habol, ug usa ka kompas o mapa. Dapita ang mga bata sa pagpili og usa ka butang, ug tugoti sila nga ipasabot kon sa unsang paagi ang matag butang nagrepresentar og paagi nga ang Espiritu Santo makatabang kanato—Siya magpamatuod bahin ni Jesus, (tan-awa sa Juan 15:26), mohupay kanato (tan-awa sa Juan 14:26), ug mopakita kanato sa husto nga dalan (tan-awa sa 2 Nephi 32:5).

• Ipaambit ang imong kaugalingon nga mga kasinatian bahin sa pagdawat og tabang gikan sa Espiritu Santo.

• Dapita ang mga bata sa pagpaminaw og mga paagi nga ang Espiritu Santo motabang kanato samtang manganta sila og awit mahitungod Kaniya, sama sa “Ang Espiritu Santo” (Songbook sa mga Bata, 56).

pagtudlo nga icon

Itudlo ang Doktrina: Mas Magulang nga mga Bata

Mateo 3

Napanalanginan ako pinaagi sa mga ordinansa sa Aaronic nga Pagkapari.

Si Juan Bautista naghupot sa Aaronic nga Pagkapari, mao nga ang pagbasa mahitungod kaniya diha sa Mateo 3 usa ka maayo nga oportunidad sa pagtudlo sa mga bata mahitungod sa Aaronic nga Pagkapari. Tabangi sila nga makaila sa mga panalangin ug gahom nga moabot kanato pinaagi niini nga pagkapari.

Posible nga mga Kalihokan

• Dapita ang mga bata sa paghimo og lista sa mga katungdanan sa Aaronic nga Pagkapari, gamit ang Doktrina ug mga Pakigsaad 20:46, 58–60; 84:111. Hangyoa ang mga bata nga mangita diha sa Mateo 3 og mga ehemplo ni Juan nga nagtuman sa pipila niini nga mga katungdanan. Sa unsang paagi nga kitang tanan makadapit sa uban sa pagduol kang Kristo, sama sa gibuhat ni Juan?

• Ipakita ang pipila ka litrato sa mga tighupot sa Aaronic nga Pagkapari nga nagpahigayon sa mga ordinansa sa bunyag ug sakramento (tan-awa sa Libro sa mga Hulagway sa Ebanghelyo, mga nu. 103–4, 107–8). Hisgoti kon sa unsang paagi nga kini nga mga ordinansa nag-andam kanato sa pagdawat ni Jesukristo ug sa mga panalangin sa Iyang Pag-ula.

• Basaha og dungan ang Doktrina ug mga Pakigsaad 13:1, ug pagpamatuod nga si Juan Bautista mipahiuli sa Aaronic nga Pagkapari ngadto ni Joseph Smith. Pangutan-a ang mga bata kon sa unsang paagi nga sila napanalanginan tungod kay napahiuli ang Aaronic nga Pagkapari.

Mateo 3:13–17; Marcos1:1–11; Lucas 3:2–18

Makatuman ako sa akong mga pakigsaad sa bunyag.

Ang pagkat-on mahitungod sa istorya sa bunyag ni Jesus usa ka maayo nga oportunidad sa pagtabang sa mga bata sa pagrebyo sa ilang mga pakigsaad sa bunyag ug sa pagpasalig og usab sa pagsunod niini.

Posible nga mga Kalihokan

• Dapita ang mga bata sa pagpuli-puli og basa sa mga bersikulo gikan sa Marcos 1:1–11. Hisgoti kon nganong gusto sa Langitnong Amahan nga mabunyagan kita. Nganong gibunyagan si Jesukristo, bisan og dili siya kinahanglan nga malimpyohan sa sala? Tabangi ang mga bata nga makakaplag og mga tubag niini nga pangutana diha sa Mateo 3:13–15 ug 2 Nephi 31:6–7.

• Rebyoha ang mga pakigsaad nga gihimo sa mga bata panahon sa bunyag, nga makita diha sa Mosiah 18:8–10 ug Doktrina ug mga Pakigsaad 20:37. Dapita ang mga bata sa pagsulat niini nga mga pakisayran diha sa pahina sa kalihokan karong semanaha.

• Pag-andam og pipila ka parisan sa mga kard nga adunay magkapares nga mga pulongan o mga litrato nga nagrepresentar sa atong mga pakigsaad sa bunyag. Ikulob ang mga kard. Dapita ang mga bata nga magpuli-puli sa pag-ukab og duha ka kard matag higayon, nga mangita og magkapares. Human makaukab og magkapares nga mga kard, dapita ang mga bata sa pagpaambit og mga paagi nga ilang gituman kana nga pakigsaad.

• Ipaambit kon sa unsang paagi ang pagtuman sa imong mga pakigsaad sa bunyag nakapanalangin kanimo.

Mateo 3:11, 16

Ang Espiritu Santo makagiya kanako.

Ang mga bata nagkat-on kon unsaon sa pag-ila ug pagsunod sa giya sa Espiritu Santo. Tabangi sila nga makasabot nga ang pagtuman sa ilang mga pakigsaad sa bunyag makatabang kanila nga mahimong takos sa pagdawat sa Iyang giya.

Posible nga mga Kalihokan

• Hangyoa ang matag bata sa pagbasa og usa sa mosunod nga mga kasulatan ug sa pagpasabot kon unsa ang gitudlo niini mahitungod kon sa unsang paagi nga ang Espiritu Santo mamulong kanato: Helaman 5:30; Doktrina ug mga Pakigsaad 6:23; 8:2–3; 11:12–13.

• Hangyoa ang usa ka bata sa pagbasa sa Mateo 3:11. Sa unsang paagi ang Espiritu Santo sama sa kalayo? Sama pananglit, ang kalayo makahupay, ug naghatag kini og kahayag aron sa paggiya kanato (tan-awa sa Juan 15:26; 2 Nephi 32: 5).

• Dapita ang mga bata sa pagpiyong sa ilang mga mata ug sa pagtuyhad sa ilang mga kamot. Dayon pahiri og hinay ang ilang mga palad gamit ang usa ka balahibo o hilo. Dapita sila sa pagsulti kanimo kon mabati nila kini. Unsay gitudlo niini nga kalihokan mahitungod sa pag-ila sa mga impresyon sa Espiritu Santo?

• Dapita ang mga bata sa pagpaambit sa ilang mga kasinatian uban sa Espiritu Santo. Nganong ang pagtuman sa atong mga pakigsaad makatabang kanato nga makabaton sa giya sa Espiritu Santo?

pagkat-on nga icon

Awhaga ang Pagkat-on diha sa Panimalay

Awhaga ang matag bata sa pagpangutana sa ilang mga ginikanan, sa ubang mga sakop sa pamilya, o sa mga higala mahitungod sa ilang mga bunyag.

Pagpalambo sa Atong Pagtudlo

Pagtinguha og imong kaugalingon nga inspirasyon. Ayaw hunahunaa kini nga mga latid isip mga instruksiyon nga kinahanglan gayod nimong sundon samtang magtudlo ka. Hinuon, gamita kini isip mga ideya nga makaawhag og imong kaugalingon nga inspirasyon samtang mamalandong ka sa mga panginahanglan sa mga bata nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)

pahina sa kalihokan: Mahimo ko nga mabunyagan sama ni Jesus