“Enero 23–29. Mateo 3; Marcos 1; Lucas 3: ‘Andama Ninyo ang Dalan alang sa Ginoo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)

“Enero 23–29. Mateo 3; Marcos 1; Lucas 3,” Dali, Sunod Kanako—Alang sa mga Indibidwal ug mga Pamilya: 2023

Imahe

Juan nga Bautista nagbunyag ni Jesus

Gikolorang bildo nga bintana sa Nauvoo Illinois Temple, ni Tom Holdman

Enero 23–29

Mateo 3; Marcos 1; Lucas 3

“Andama ninyo ang Dalan alang sa Ginoo”

Sugdi pinaagi sa pagbasa sa Mateo 3; Marcos 1; ug Lucas 3. Samtang mag-ampo ka alang sa Espiritu Santo sa pagtabang kanimo nga makasabot niini nga mga kapitulo, Siya mohatag kanimo og mga panabot nga alang lamang kanimo. I-rekord kini nga mga panghunahuna, ug paghimo og mga plano sa pagbuhat niini.

I-rekord ang Imong mga Panghunahuna

Si Jesukristo ug ang Iyang ebanghelyo makapausab kanimo. Mikutlo si Lucas og karaan nga panagna ni Isaias nga naghulagway sa epekto sa pag-anhi sa Manluluwas: “Ang tanang walog pagatabonan, ug ang tanang bukid ug bungtod pagapatagon, ug ang mga hiwi pagatul-iron, ug ang mga dalan nga sagalsalon pagahinloon” (Lucas 3:5; tan-awa usab sa Isaias 40:4). Kini usa ka mensahe alang kanatong tanan, lakip niadtong naghunahuna nga dili sila makausab. Kon ang usa ka butang nga permanente sama sa usa ka bukid mahimong mapatag, nan sa pagkatinuod ang Ginoo makatabang kanato sa pagtul-id sa atong kaugalingong hiwi nga mga dalan (tan-awa sa Lucas 3:4–5). Sa atong pagdawat sa pagdapit ni Juan nga Bautista sa paghinulsol ug sa pag-usab, giandam nato ang atong mga hunahuna ug mga kasingkasing sa pagdawat ni Jesukristo aron nga kita usab “makakita sa kaluwasan gikan sa Dios” (Lucas 3:6).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Kinsa si Marcos?

Sa mga tagsulat sa mga Ebanghelyo, labing gamay ang atong nahibaloan mahitungod ni Marcos. Nasayod kita nga siya usa ka misyonaryo nga kompanyon nila ni Pablo, Pedro, ug pipila sa ubang mga misyonaryo. Daghang mga eskolar sa biblia nagtuo nga si Pedro misugo ni Marcos sa pagrekord sa mga panghitabo sa kinabuhi sa Manluluwas. Ang Ebanghelyo ni Marcos may kalagmitan nga gisulat sa wala pa ang laing tulo ka ebanghelyo.

Tan-awa usab Ang Giya ngadto sa mga Kasulatan, “Marcos.”

Mateo 3:1–12; Marcos 1:1–8; Lucas 3:2–18

Ang paghinulsol mao ang dakong kausaban sa hunahuna ug sa kasingkasing.

Ang misyon ni Juan nga Bautista mao ang pag-andam sa mga kasingkasing sa mga tawo sa pagdawat sa Manluluwas ug mahimong mas sama Kaniya. Giunsa niya sa paghimo niini? Mipahayag siya, “Paghinulsol kamo” (Mateo 3:2). Ug migamit siya og mga imahe sama sa prutas ug trigo sa pagtudlo mahitungod sa paghinulsol (tan-awa sa Lucas 3:9, 17).

Unsa ang ubang mga imahe ang imong makita diha sa mga asoy sa pagpangalagad ni Juan nga Bautista? (tan-awa sa Mateo 3:1–12; Marcos 1:1–8; Lucas 3:2–18). Hunahunaa ang pagmarka niini diha sa imong mga kasulatan o pagdrowing og mga hulagway niini. Unsa ang gitudlo niini nga mga imahe mahitungod sa doktrina ug ang panginahanglan sa paghinulsol?

Ang tinuod nga paghinulsol mao ang “usa ka kausaban sa hunahuna, bag-ong panglantaw mahitungod sa Dios, mahitungod sa kaugalingon, ug mahitungod sa kalibotan. … [Nagpasabot kini] og usa ka pag-usab sa kasingkasing ug kabubut-on ngadto sa Dios” (Giya ngadto sa mga Kasulatan, “Paghinulsol”). Sa Lucas 3:7–14, unsa nga mga kausaban ang gidapit ni Juan nga himoon sa mga tawo sa pagpangandam sa pagdawat ni Kristo? Sa unsang paagi kini nga tambag magamit nganha kanimo? Unsaon nimo sa pagpakita nga ikaw tinud-anay nga naghinulsol? (tan-awa sa Lucas 3:8).

Tan-awa usab sa Russell M. Nelson, “Kita Makabuhat og Mas Maayo Pa ug Mahimong mas Maayo,” Liahona, Mayo 2019, 69–72; Dallin H. Oaks, “Nalimpyo pinaagi sa Paghinulsol,” Liahona, Mayo 2019, 91–94.

Mateo 3:7; Lucas 3:7

Kinsa ang mga Pariseo ug ang mga Saducio?

Ang mga Pariseo mao ang mga sakop sa relihiyosong grupo sa Judeo kinsa mapagarbuhon sa ilang mga kaugalingon diha sa istrikto nga pagsunod sa balaod ni Moises ug sa mga ritwal niini. Ang mga Saducio mga adunahang klase sa mga Judeo nga adunay dakong relihiyoso ug politikanhong impluwensya; wala sila magtuo sa doktrina sa pagkabanhaw. Ang duha ka grupo nahisalaag gikan sa orihinal nga katuyoan sa mga balaod sa Dios.

Tan-awa usab sa Mateo 23:23–28; Giya ngadto sa mga Kasulatan, “Pariseo, Mga,” “Saducio, Mga.”

Mateo 3:13–17; Marcos1:9–11; Lucas 3:15–16, 21–22

Si Jesukristo, gibunyagan aron sa “pagtuman sa tanang pagkamatarong.”

Sa dihang ikaw gibunyagan, gisunod nimo ang ehemplo sa Manluluwas. Itandi ang unsay imong nakat-onan gikan sa mga asoy sa bunyag sa Manluluwas ngadto sa unsay nahitabo sa panahon sa imong bunyag.

Ang Bunyag sa Manluluwas	Akong Bunyag
Ang Bunyag sa Manluluwas Kinsa ang mibunyag ni Jesus, ug unsa nga awtoridad ang iyang gihuptan?	Akong Bunyag Kinsa ang mibunyag kanimo, ug unsa nga awtoridad ang iyang gihuptan?
Ang Bunyag sa Manluluwas Diin bunyagi si Jesus?	Akong Bunyag Diin ka bunyagi?
Ang Bunyag sa Manluluwas Sa unsa nga paagi gibunyagan si Jesus?	Akong Bunyag Sa unsa nga paagi ikaw gibunyagan?
Ang Bunyag sa Manluluwas Nganong si Jesus gibunyagan?	Akong Bunyag Nganong ikaw gibunyagan?
Ang Bunyag sa Manluluwas Sa unsa nga paagi ang Langitnong Amahan nagpakita nga Siya nahimuot ni Jesus?	Akong Bunyag Giunsa pagpakita sa Langitnong Amahan nga Siya nahimuot sa dihang ikaw gibunyagan? Giunsa Niya pagpakita ang iyang pagtugot sukad niana?

Tan-awa usab sa 2 Nephi 31; Mosiah 18:8–11; Doktrina ug mga Pakigsaad 20:37, 68–74; .

Mateo 3:16–17; Marcos 1:9–11; Lucas 3:21–22

Ang mga sakop sa Dios nga Kapangulohan tulo ka managlahi nga mga personahe.

Ang Biblia naglangkob og daghang mga ebidensya nga ang mga sakop sa Dios nga Kapangulohan tulo ka managlahi nga mga binuhat. Ang asoy sa bunyag sa Manluluwas usa ka ehemplo. Samtang ikaw nagbasa niini nga mga asoy, pamalandonga ang unsay imong nakat-onan mahitungod sa dios nga kapangulohan. Nganong bilihon kini nga mga doktrina nganha kanimo?

Tan-awa usab sa Genesis 1:26; Mateo 17:1–5; Juan 17:1–3; Mga Buhat 7:55–56; Doktrina ug mga Pakigsaad 130:22.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 3.Si Juan nga Bautista naghupot sa Aaronic nga Pagkapari. Unsa ang atong makat-onan gikan sa ehemplo sa Manluluwas mahitungod sa mga katuyoan sa Aaronic nga Pagkapari? Unsa nga mga panalangin ang atong madawat tungod sa Aaronic nga Pagkapari? Kon ikaw adunay batan-ong lalaki sa inyong pamilya, tingali mogahin ka og panahon sa pagtabang kaniya sa pagsabot kon unsaon niya sa paggamit ang Aaronic nga Pagkapari sa pagpanalangin sa uban. (Tan-awa usab sa Doktrina ug mga Pakigsaad 13:1; 20:46–60.)

Kon kita bunyagan, ang atong mga sala mahugasan.

Mateo 3:11–17; Marcos 1:9–11; Lucas 3:21–22.Nakakita na ba ang mga sakop sa imong pamilya og usa ka tawo nga nabunyagan o nakumpirmahan nga usa ka miyembro sa Simbahan? Unsa ang gibati sa mga sakop sa pamilya? Tingali mahimo kang makatudlo kanila mahitungod sa simbolismo sa bunyag ug pagkumpirma. Sa unsang paagi ang pagpabunyag ug pagpakumpirma sama sa bag-ong pagpakatawo? Nganong kita hingpit nga iunlod diha sa tubig kon kita bunyagan? Nganong magsul-ob kita og puti kon kita bunyagan? Ngano nga ang gasa sa Espiritu Santo gihulagway nga usa ka “bunyag sa kalayo”? (Doktrina ug mga Pakigsaad 20:41; tan-awa usab ang Giya ngadto sa mga kasulatan, “Bunyag,” “Espiritu Santo”).

Mateo 3:17; Marcos 1:11; Lucas 3:22.Kanus-nato gibati nga ang Dios nahimuot kanato? Unsay atong mahimo isip usa ka pamilya sa pagpahimuot sa Dios?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Bunyag,” Songbook sa mga Bata, 38.

Pagpalambo sa Personal nga Pagtuon

Pangayo og tabang sa Ginoo. Ang mga kasulatan gihatag pinaagi sa pagpadayag, ug aron gayod kini masabtan nagkinahanglan kita og personal nga pagpadayag. Ang Ginoo misaad, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7).