pamilya nga nagtan-aw sa album sa mga litrato

Disyembre 26–Enero 1

Kita Ang Responsable sa Atong Kaugalingong Pagkat-on

Samtang imong basahon ang mga kasulatan niini nga latid, irekord ang bisan unsang espirituwal nga mga impresyon nga imong madawat. Imong mamatikdan nga ang matag latid niini nga manwal adunay mga kalihokan alang sa mas gagmayng mga bata ug mas magulang mga bata, apan mahimo nimong ipahiangay ang bisan unsa nga kalihokan alang sa imong klase.

pagpaambit nga icon

Dapita ang Pagpaambit

Sa sinugdanan sa matag klase, hatagi ang mga bata og mga oportunidad sa pagpaambit sa unsay ilang nakat-onan mahitungod sa ebanghelyo. Sama pananglit, karong semanaha mahimo nimo silang dapiton sa pagpaambit sa ilang paborito nga mga istorya mahitungod ni Jesukristo.

pagtudlo nga icon

Itudlo ang Doktrina: Mas Gagmay nga mga Bata

Gusto ni Jesukristo nga mosunod ako Kaniya.

Ikaw ug ang mga bata mobasa og daghang istorya niining tuiga gikan sa kinabuhi ni Jesukristo. Tabangi ang mga bata nga makasabot nga ang rason nga nagkat-on kita niini nga mga istorya mao nga aron mas makasunod kita sa hingpit nga ehemplo ni Jesukristo.

Posible nga mga Kalihokan

• Sultihi ang mga bata mahitungod sa imbitasyon sa Manluluwas, “Sunod kamo kanako,” nga makita sa Mateo 4:18–22. Paghimo og kalihokan diin ang usa ka bata mohimo og usa ka aksiyon ug dayon mosulti sa ubang mga bata, “Sunod kamo kanako.” Dapita ang ubang mga bata sa pagsubli sa aksiyon.

• Pagpakita og mga litrato sa mga tawo nga nagsunod sa Manluluwas sa lainlaing paagi, sa panahon sa Iyang mortal nga pangalagad ug sa atong panahon. Makakita ka og mga hulagway diha sa Libro sa mga Hulagway sa Ebanghelyo o diha sa mga magasin sa Simbahan. Ipasusi sa mga bata kon giunsa pagsunod sa mga tawo ang Manluluwas.

• Tabangi ang mga bata sa paghunahuna og mga butang nga ilang gibuhat sa pagsunod sa Manluluwas. Ang pagkanta sa “Sayo kong Mangita sa Ginoo” (Songbook sa mga Bata, 67) makahatag kanila og pipila ka ideya. Padrowinga sila og mga hulagway sa ilang mga kaugalingon nga nagbuhat niining mga butanga.

batang lalaki nga nagbasa sa mga kasulatan

Ang mga bata makaangkon og ilang kaugalingong mga pagpamatuod sa mga kamatuoran sa kasulatan.

Ang mga kasulatan tinuod.

Ang mga bata makaangkon og pagpamatuod nga ang mga kasulatan tinuod bisan kon dili pa sila makahimo sa pagbasa niini. Samtang magtuon ka sa mga kasulatan uban sa mga bata niining tuiga, imo silang matabangan nga masayod sa ilang kaugalingon nga ang mga kasulatan tinuod.

Posible nga mga Kalihokan

• Dapita ang mga bata sa pagsulti mahitungod sa paborito nga mga regalo nga ilang nadawat alang sa mga birthday o sa ubang mga okasyon. Pagdala og kopya sa mga kasulatan nga giputos isip regalo, paablihi kini sa usa ka bata, ug pagpamatuod nga ang mga kasulatan usa ka gasa alang kanato gikan sa Langitnong Amahan.

• Ipakita sa mga bata ang pipila ka basahon nga naglangkob og dili tinuod [fictional] nga mga istorya, ug pangutan-a sila mahitungod sa ilang paborito nga mga istorya. Ipakita ngadto nila ang mga kasulatan, ug pagpamatuod nga ang mga kasulatan naglangkob sa pulong sa Dios alang kanato. Kini nagsugilon bahin sa tinuod gayod nga mga tawo ug sa mga butang nga nahitabo gayod.

• Ipaambit ang mga mensahe nga anaa sa 2 Timoteo 3:15 ug Moroni 10:3–5, nga tabangan ang mga bata sa pagsulti og balik sa pipila ka pulongan. Tabangi sila nga makasabot nga mahimo silang masayod sa ilang kaugalingon nga ang mga kasulatan tinuod.

• Tagoi ang usa ka hulagway sa Manluluwas, ug hatagi ang mga bata og mga timailhan [clue] aron matabangan sila nga makit-an kini. Tabangi ang mga bata nga makasabot kon sa unsang paagi nga ang pagsiksik sa mga kasulatan makatabang kanato nga makaila ni Jesukristo. Papuli-puliha ang mga bata sa pagtago sa hulagway ug sa paghatag og mga timailhan ngadto sa ubang mga bata.

• Kantaha og dungan ang usa ka awit mahitungod sa pagkat-on sa ebanghelyo, sama sa “Pagsiksik, Pamalandong, ug Pag-ampo” (Songbook sa mga Bata, 66), ug tabangi ang mga bata nga makahimo og mga aksiyon nga motakdo sa mga pulong. Ipaambit sa mga bata ang usa o duha sa imong paborito nga mga kasulatan, ug sultihi sila kon sa unsang paagi nimo nasayran nga ang mga kasulatan tinuod. Kon ang mga bata adunay paborito nga mga kasulatan o mga istorya sa kasulatan, dapita sila sa pagpaambit.

pagtudlo nga icon

Itudlo ang Doktrina: Mas Magulang nga mga Bata

Gusto ni Jesukristo nga magkat-on ako mahitungod Kaniya ug mosunod Kaniya.

Hunahunaa kon sa unsang paagi nga nahibalo ka mahitungod ni Jesukristo. Unsay imong mabuhat aron matabangan ang mga bata nga makakat-on ug mosunod Kaniya?

Posible nga mga Kalihokan

• Dapita ang mga bata sa paghisgot kabahin sa usa ka suod nga higala nga ilang nailhan ug ihulagway kon sa unsang paagi nga kini nga tawo nahimong higala. Basaha ug hisgoti ang Juan 5:39 ug Juan 14:15 aron makakita og mga paagi nga mobati kita nga duol kang Jesus. Hangyoa ang mga bata sa pagpaambit og mga panahon nga mibati sila nga duol Kaniya.

• Dad-a ang imong klase nga maglakaw-lakaw libot sa meetinghouse. Dapita ang mga bata sa pagpataas sa ilang mga kamot kon makakita sila og usa ka butang niana nga paglakaw nga makapahinumdom kanila og usa ka paagi nga makasunod sila sa Manluluwas (sama sa bunyaganan o usa ka litrato).

• Kantaha uban sa mga bata ang usa ka awit mahitungod sa pagsunod ni Jesukristo, sama sa “Dali, Sunod Mo Kanako” (Mga Himno, nu. 64). Dapita ang mga bata sa pagpaambit og mga panahon nga misunod sila sa ehemplo sa Manluluwas.

Makatuon ako sa mga kasulatan sa akong kaugalingon.

Samtang mobasa ka sa mga kasulatan uban sa mga bata ug mangutana kanila, imong mapalig-on ang ilang pagsalig nga makakat-on sila gikan sa mga kasulatan ug makakaplag og bililhon nga mga bahandi sa kahibalo.

Posible nga mga Kalihokan

• Basaha og dungan ang Juan 5:39 ug Mga Buhat 17:10–11, ug pangutan-a ang mga bata kon unsay ilang nakat-onan mahitungod kon unsaon sa pagtuon sa mga kasulatan.

• Pagpili og pipila ka yano, gamhanan nga mga kasulatan gikan sa Bag-ong Tugon, isulat ang matag usa sa usa ka piraso nga papel, ug tagoi ang mga papel. Paghimo og mga timailhan nga mogiya sa mga bata sa usa ka “pagpangita og bahandi [treasure hunt]” sulod sa klasehanan o gambalay sa simbahan aron makit-an kini nga mga kasulatan. Human nila makit-an ang matag kasulatan, hisgoti kon unsa ang kahulogan sa kasulatan ug nganong importante kini nga bahandi.

• Pagpaambit og pipila ka kasulatan nga imong gibahandi ug ipasabot kon nganong makahuloganon kini kanimo. Isip usa ka klase, paghupot og lista sa gibahandi nga mga kasulatan nga nakita sa mga bata diha sa Bag-ong Tugon niining tuiga—sa panimalay o atol sa Primary.

• Hisgoti uban sa mga bata kon nganong usahay lisod ang pagbasa sa mga kasulatan. Hangyoa ang mga bata sa pagpaambit og tambag sa usag usa mahitungod sa pagtuon sa mga kasulatan. Hangyoa usab sila sa pagpaambit og bisan unsang positibo nga mga kasinatian nga ilang nasinati sa mga kasulatan.

• Tabangi ang mga bata sa paghimo og yano nga mga kalendaryo nga ilang magamit aron sa pagtimaan kon kapila sila mobasa sa mga kasulatan. Kini nga mga kalendaryo makapahinumdom nila sa pagbasa sa mga kasulatan kada adlaw.

Nagkinahanglan ko og akong kaugalingong pagpamatuod.

Ang mga bata nga imong gitudloan magkinahanglan og ilang kaugalingong mga pagpamatuod mahitungod sa Langitnong Amahan ug ni Jesukristo. Unsay imong mabuhat aron sa pagdasig kanila nga magkat-on sa kamatuoran sa ilang kaugalingon?

Posible nga mga Kalihokan

• Ipaambit ang istorya sa napulo ka dalagang birhen (tan-awa sa Mateo 25:1–13; tan-awa usab sa “Kapitulo 47: Ang Napulo ka mga Birhen,” diha sa Mga Istorya sa Bag-ong Tugon, 118–20). Pangutan-a ang mga bata og mga sama niini: Sa unsang paagi ang atong mga pagpamatuod susama sa mga lampara? Nganong importante man nga makabaton og atong kaugalingong mga pagpamatuod?

• Hisgoti kon unsay atong mabuhat sa paglig-on sa atong mga pagpamatuod. Alang sa mga ideya, dapita ang mga bata sa pagsiksik sa Juan 7:17 ug Moroni 10:3–5. Dapita sila sa pagpaambit og mga butang nga nahibaloan nila nga tinuod.

• Hangyoa ang mga bata sa pagtabang nimo sa pag-label sa mga building block og mga kamatuoran nga magmugna sa atong mga pagpamatuod. Ipagamit sa mga bata ang mga block sa paghimo og estruktura nga nagrepresentar sa usa ka pagpamatuod.

pagkat-on nga icon

Awhaga ang Pagkat-on diha sa Panimalay

Unsaon nimo sa pag-awhag ang mga bata ug ang ilang mga ginikanan nga magkat-on gikan sa Bag-ong Tugon diha sa panimalay? Sama pananglit, mahimo nimong dapiton ang mga bata sa pagsag-ulo sa usa sa mga kasulatan nga imong gihisgotan sa klase (makatabang tingali nga bahinon ang kasulatan ngadto sa mugbo nga mga pulongan) ug sa pagpaambit sa bersikulo ngadto sa ilang mga pamilya.

Pagpalambo sa Atong Pagtudlo

Ipahaom ang mga kalihokan sa edad ug sa mga abilidad sa mga bata nga imong gitudloan. Ang mas gagmayng mga bata nagkinahanglan og detalyado nga mga pagpasabot ug makakat-on gikan sa nagkalainlaing pamaagi sa pagtudlo. Samtang magkahingkod ang mga bata, mas daghan na sila og matampo ug mahimong mas maayo sa pagpaambit sa ilang mga hunahuna. Hatagi sila og mga oportunidad sa pagpaambit, pagpamatuod, ug pagsalmot. Hatag og tabang kon gikinahanglan. (Tan-awa sa Pagtudlo sumala sa Pamaagi sa Manluluwas, 25–26.)

pahina sa kalihokan: Maninguha Kong Mahimong Mahisama Kang Jesus