“Enero 2–8. Mateo 1; Lucas 1: ‘Mahitabo Unta Kanako ang Imong Gisulti’” Dali, Sunod Kanako—Alang sa Primary: Bag-ong Tugon 2023 (2022)
“Enero 2–8. Mateo 1; Lucas 1,” Dali, Sunod Kanako—Alang sa Primary: 2023
Enero 2–8
Mateo 1; Lucas 1
“Mahitabo Unta Kanako ang Imong Gisulti”
Pagsugod pinaagi sa pagbasa sa Mateo 1 ug Lucas 1. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabot niini nga mga kapitulo, ug kini nga latid makahatag kanimo og mga ideya sa pagtudlo. Kon nagkinahanglan ka og dugang nga tabang sa pagtudlo sa mas gagmay nga mga bata, tan-awa ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan.
Dapita ang Pagpaambit
Hangyoa ang mga bata sa paglingkod nga mag-alirong, ug dayon hangyoa ang usa ka bata sa pagpaambit og butang nga bag-ohay niyang nakat-onan gikan sa mga kasulatan. Kana nga bata mahimong mopaligid og bola padulong sa usa ka bata o motudlo og laing bata diha sa mga nag-alirong, kinsa turno na pod niya nga mopaambit.
Itudlo ang Doktrina: Mas Gagmay nga mga Bata
Ang mga anghel mipahibalo sa pagkatawo ni Jesus.
Si Maria ug Jose tagsa-tagsa nga gibisitahan sa usa ka anghel kinsa mipahibalo sa pagkatawo ni Jesukristo. Kini nga mga kasinatian makatabang sa mga bata nga makakita kon unsa ka importante ang pagkatawo ni Kristo.
Posible nga mga Kalihokan
-
Pagdapit og mga ginikanan sa usa ka bata nga motambong sa klase nga magsinina nga sama kang Maria ug Jose. Hangyoa sila sa pagpaambit sa mga kasinatian nga narekord diha sa Mateo 1:18–25 ug Lucas 1:26–38.
-
Isaysay ang mga istorya sa mga anghel nga nagpakita kang Maria ug Jose, sumala sa narekord dinhi nga mga bersikulo. (Tan-awa usab sa “Kapitulo 2: Maria ug ang Anghel” ug “Kapitulo 4: Jose ug ang Anghel,” sa Mga Istorya sa Bag-ong Tugon, 8–9, 12.) Mahimo nimong ipakita ang hulagway sa latid niini nga semana sa Dali, Sunod Kanako—Alang sa mga Indibidwal ug mga Pamilya. Dapita ang mga bata nga isaysay og balik ang istoryadiha nimo.
-
Dapita ang mga bata sa pagdrowing og mga hulagway sa mga istorya nga makita diha sa Mateo 1:18–25 ug Lucas 1:26–38.
The Annunciation [Ang Pagpahibalo], ni John Scott
Ang Langitnong Amahan motubag sa akong mga pag-ampo.
Si Zacarias ug Elisabet tingali nag-ampo sulod sa daghang katuigan nga makabaton og anak. Sa kataposan ang Langitnong Amahan mitubag sa ilang mga pag-ampo pinaagi sa paghatag kanila og usa ka anak nga lalaki, si Juan Bautista. Unsaon nimo paggamit niini nga istorya sa pagtudlo sa mga bata nga ang Langitnong Amahan motubag sa mga pag-ampo?
Posible nga mga Kalihokan
-
Sa imong kaugalingong mga pulong, ipaambit ang istorya gikan sa Lucas 1:5–25, 57–63. Mahimo nimong balikon ang istorya sa pipila ka higayon. Pag-assign og mga bata nga modala sa mga papel ni Zacarias, ni Elisabet, ug sa anghel ug idrama-drama ang istorya. Hatagi og gibug-aton ang mga pulong sa anghel ngadto ni Zacarias nga: “Gidungog sa Dios ang imong pag-ampo” (Lucas 1:13). Pagpaambit og kasinatian diin ang Langitnong Amahan mitubag sa imong pag-ampo.
-
Gamita ang “Iduko ang Atong Ulo” (Songbook sa mga Bata, 18b) o laing kanta aron sa pagtudlo sa mga bata unsaon sa pag-ampo. Sa matag higayon nga ang mga bata mokanta sa mga pulong nga “ampo” o “mag-ampo”, dapita sila sa pagduko ug pagpanguyugpos.
-
Hangyoa ang matag bata sa paghimo og mga aksiyon nga nagrepresentar og usa ka butang nga mahimo niyang iampo. Tugoti ang ubang bata sa pagtagna kon unsa ang girepresentar sa mga aksiyon. Makakita sila og mga ideya diha sa pahina sa kalihokan karong semanaha.
Si Jesukristo mao ang Anak sa Dios.
Si Jesukristo mao ang Anak sa Langitnong Amahan ug ni Maria. Unsay imong mabuhat aron matabangan ang mga bata nga mas makakat-on pa mahitungod Kaniya?
Posible nga mga Kalihokan
-
Sultihi ang mga bata nga ang anghel miingon kang Maria nga ang iyang anak pagatawgon nga Anak sa Dios (tan-awa sa Lucas 1:35). Tabangi ang mga bata nga balikon og sulti ang pulongan nga “Si Jesukristo mao ang Anak sa Dios.” Tabangi ang mga bata nga makasabot kon kinsa ang mga ginikanan ni Jesus pinaagi sa pagdapit kanila sa pagdrowing og mga hulagway sa ilang kaugalingong mga ginikanan. Samtang nagbuhat sila niini, sultihi sila nga si Jesus adunay mga ginikanan usab—si Maria ug ang Langitnong Amahan. Dugang pa, si Jose gihangyo sa pagpanalipod ug pag-amuma kang Jesus samtang nagpuyo Siya sa yuta.
-
Ipaambit ang imong pagpamatuod nga tungod kay si Jesus mao ang Anak sa Dios, mahimo Siyang mamatay alang sa atong mga sala ug mabuhi pag-usab. Pagpakita og mga hulagway sa Paglansang sa Krus ug Pagkabanhaw ni Jesus (tan-awa sa Libro sa mga Hulagway sa Ebanghelyo, nu. 57, 59).
Itudlo ang Doktrina: Mas Magulang nga mga Bata
Walay imposible sa Dios.
Ang pagkahimugso ni Jesus ug ni Juan Bautista nahimong posible lamang pinaagi sa gahom sa Dios. Ang pagkat-on mahitungod niini nga mga milagro makalig-on sa hugot nga pagtuo sa mga bata nga ang Dios adunay gahom sa pagbuhat og mga milagro diha sa ilang kinabuhi.
Posible nga mga Kalihokan
-
Samtang ikaw ug ang mga bata morebyo sa Mateo 1:18–25 ug Lucas 1:5–37, pangutan-a ang mga bata og sama sa “Unsa kaha ang inyong isulti kon kamo pa si Maria?” o “Unsa kaha ang inyong bation kon kamo pa si Zacarias?”
-
Gamit ang yano nga mga pulong, isaysay ang mga istorya nga gihulagway sa Mateo 1:18–25 ug Lucas 1:5–37. Hangyoa ang mga bata sa pag-isa sa ilang mga kamot kon makadungog sila og butang nga daw imposible kon wala ang gahom sa Dios. Unsa ang ubang mga istorya nga mapaambit sa mga bata diin ang Dios mibuhat og butang nga daw imposible?
-
Tabangi ang mga bata sa pagsag-ulo sa Lucas 1:37. Aron sa pagbuhat niini, mahimo nimong isulat ang bersikulo diha sa pisara ug dapita ang mga bata sa pagsulti niini sa pipila ka higayon. Human sa matag higayon, pagpapas og usa ka pulong.
Mateo 1:21–25; Lucas 1:30–35, 46–47
Si Jesukristo mao ang Anak sa Dios.
Si Jesukristo mao ang Anak sa Langitnong Amahan ug ni Maria. Unsaon nimo sa pagtabang ang mga bata nga makakat-on niini nga kamatuoran?
Posible nga mga Kalihokan
-
Hangyoa ang mga bata sa pagbasa sa Lucas 1:30–35, nga mangita sa mga tubag niini nga mga pangutana: “Kinsa ang inahan ni Jesus?” ug “Kinsa ang Amahan ni Jesus?” Tabangi sila nga makasabot nga si Jesukristo mao lamang ang bugtong tawo nga adunay usa ka mortal nga inahan, si Maria, ug usa ka imortal nga Amahan, ang Langitnong Amahan (tan-awa usab sa 1 Nephi 11:18–21).
-
Samtang basahon nimo kini nga mga bersikulo, dapita ang mga bata sa pagpangita sa mga ngalan o mga titulo ni Jesukristo. Unsay gipasabot niini nga mga ngalan, ug unsay gitudlo niini kanato mahitungod ni Jesus?
-
Ipaambit ang imong pagpamatuod ni Jesukristo, ug dapita ang mga bata sa pagpaambit usab sa ilang mga pagpamatuod.
Ang Langitnong Amahan maminaw ug motubag sa akong mga pag-ampo.
Ang Dios motubag sa mga pag-ampo apan dili kanunay sa mga paagi nga atong gipaabot. Unsaon nimo paggamit ang istorya ni Zacarias ug Elisabet sa pagtudlo sa mga bata niini nga kamatuoran?
Posible nga mga Kalihokan
-
Pangutan-a ang mga bata kon unsay ilang isulti ngadto sa usa ka tawo nga nag-ampo alang sa usa ka panalangin apan wala pa makadawat niini. Dapita sila sa paghunahuna niini nga pangutana samtang dungan sila nga magbasa sa Lucas 1:5–25, 57–66. (Tan-awa usab sa “Kapitulo 1: Elisabet ug Zacarias” ug “Kapitulo 3: Juan Bautista Natawo,” diha sa Mga Istorya sa Bag-ong Tugon, 6–7, 10–11.) Unsa kaha ang isulti ni Zacarias ug Elisabet sa tawo nga mibati nga wala gitubag ang iyang pag-ampo?
-
Pagdapit daan og pipila ka bata sa pagpaambit og mga kasinatian sa dihang ang Langitnong Amahan mitubag sa ilang mga pag-ampo. Pagpaambit og higayon diin imong gibati nga ang imong mga pag-ampo gitubag sa wala damha nga paagi.
-
Dapita ang mga bata sa pagdrowing og hulagway sa usa ka higayon sa dihang ang Langitnong Amahan mitubag og pag-ampo—ilabi na sa ilang kaugalingon nga pag-ampo. Tugoti sila sa pagpaambit sa ilang mga drowing diha sa klase.
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya sa bisan unsang hulagway nga ilang gidrowing atol sa klase. Awhaga sila sa pagpangutana sa mga sakop sa ilang pamilya mahitungod sa mga higayon sa dihang ang Dios mitubag sa ilang mga pag-ampo.
Pagpalambo sa Atong Pagtudlo
Tabangi ang gagmay nga mga bata nga makakat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, tutoki ang usa ka bersikulo sa kasulatan o bisan ang usa lang ka importanting pulongan. Mahimo nimong dapiton ang mga bata sa pagbarog o sa pag-isa sa ilang mga kamot kon madungog nila kana nga pulong o pulongan. (Tan-awa sa Pagtudlo sumala sa Pamaagi sa Manluluwas, 21.)