“23–29 Tīsema. Fakahā 12–22: ‘Ko Ia ia ʻe Ikuná, ʻe Maʻu ʻe Ia ʻa e Ngaahi Meʻa Kotoa Pē’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“23–29 Tīsema. Fakahā 12–22,” Haʻu, ʻo Muimui ʻIate Au—Maʻá e Palaimelí: 2019
The City Eternal, tā ʻe Keith Larson
23–29 Tīsema
Fakahā 12–22
“Ko Ia ia ʻe Ikuná, ʻe Maʻu ʻe Ia ʻa e Ngaahi Meʻa Kotoa Pē”
ʻI hoʻo teuteu ke akoʻí, fakaʻaongaʻi hoʻo aʻusia ʻi hono ako e fakataautaha pe fakafāmili ʻa eFakahā 12–22. Ko e hā ne mahino kia koé? Ko e hā ha ngaahi ongo naʻá ke maʻu? Fakamanatu atu ʻe lava ke liliu e ngaahi ʻekitivitī naʻe fokotuʻu atu hení, maʻá e fānau ʻo ha faʻahinga taʻu motuʻa pē.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi e fānaú ke nau vahevahe e ʻuhinga ʻoku nau toe fie nofo ai mo e Tamai Hēvaní. Tokoniʻi kinautolu ʻi he toenga ʻo e lēsoní ke nau fekumi ki he ngaahi meʻa te nau lava ʻo fai ke nau teuteu ai ke foki kiate Ia.
Akoʻi e Tokāteliné
Fānau Iiki Angé
Naʻá ku fakahaaʻi ʻeku tui kia Sīsū Kalaisí ʻi he maama fakalaumālié.
ʻI he Tau ʻi Hēvaní, naʻe ikunaʻi ʻe he fānau angatonu ʻa e ʻOtuá ʻa Sētane ʻaki e “lea ʻo ʻenau fakamoʻoní” mo ʻenau tui kia Sīsū Kalaisí (Fakahā 12:11).
Ngaahi ʻEkitivitī ʻe Ala Fakahokó
-
Ke tokoniʻi e ke mahino ki he fānaú e ʻuhinga ke muimui ʻi ha faʻifaʻitakiʻanga ʻo ha taha, fili ha taha ʻi he fānaú ke hoko ko ha “taki,” pea kole ki he niʻihi kehé ke muimui ʻiate ia ʻaki ʻenau fai e meʻa ʻokú ne faí. Pea tuku leva ki he fānau kehé ke hoko ko ha taki. Lau e Fakahā 12:7–11 ki he fānaú pea fakamatalaʻi ange, kimuʻa pea fanauʻi kitautolú, ne tau fili ke tau muimui kia Sīsū kae ʻikai ko Sētane.
-
Hivaʻi fakataha ha foʻi hiva kau ki he maama fakalaumālié, hangē ko e “Te u Muimui he Palani ʻa e ʻOtuá” (Tohi Hiva ʻa e Fānaú, 86–87). Fai ha ngaahi fehuʻi hangē ko e, Ko e hā e meʻa ne hoko ʻi hēvani kimuʻa hono fanauʻi kitautolú? Ko e hā naʻa tau fili ke faí? (Vakai foki “Talateú: Ko e Palani ʻa ʻEtau Tamai Hēvaní,” Ngaahi Talanoa ʻo e Fuakava Foʻoú, 1–5, pe vitiō fakafekauʻakí ʻi he LDS.org.)
Te u lava ʻo mateuteu ki he Hāʻele ʻAngaua mai ʻa Sīsū Kalaisí, ʻi heʻeku fili ki he totonú.
Te ke tokoniʻi fēfē ʻa e fānaú ke mahino kiate kinautolu, ʻe fakafiefia maʻatautolu ʻa e Hāʻele ʻAngauá kapau ʻoku tau muimui ki he ngaahi fekau ʻa Sīsuú?
Ngaahi ʻEkitivitī ʻe Ala Fakahokó
-
Fakaʻaliʻali e fakatātā mei he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, mo lau e Fakahā 19:7. Fakamatalaʻi ange ʻoku fakafofongaʻi ʻe he “taʻane ʻo e Lamí” ki he Hāʻele ʻAngaua Mai ʻa Sīsū Kalaisí. Ko e hā e ʻuhinga naʻe “fiefia” ai e kakaí? Fehuʻi ki he fānaú pea kuo nau ʻalu ki ha mali. Ko e hā ʻenau ongoʻi ki aí? Ko e hā e ʻuhinga naʻe fiefia ai e kakaí?
-
Vahevahe ki he fānaú e ʻuhinga ʻokú ke fakatuʻamelia ai ki he Hāʻele ʻAngaua Mai ʻa Sīsuú? Te mou lava foki ʻo hivaʻi fakataha ha foʻi hiva kau ki he Hāʻele ʻAngauá, hangē ko e “ʻO Ka Ne Ka Toe Haʻú” (Tohi Hiva ʻa e Fānaú, 46–47).
-
Fakaafeʻi e fānaú ke vahevahe e meʻa ʻoku nau fai ke nau mateuteu ai ki he lotú he Sāpaté. Ko e hā e ʻuhinga ʻoku tau fai ai e ngaahi meʻá ni kimuʻa pea tau haʻu ki he lotú? Ko e hā ʻoku totonu ai ke tau mateuteu ki he Hāʻele ʻAngaua Mai ʻa Kalaisí? ʻI he peesi ʻekitivitī ki he uike ní, tuku ki he fānaú ke nau tā e meʻa te nau lava fai ke nau teuteu ai ki he Hāʻele ʻAngauá.
Fakahā 21:1, 3–4, 22–27; 22:1–2
Te u lava ʻo nofo mo e Tamai Hēvaní pea mo kinautolu ʻoku ou ʻofa aí, ʻi he puleʻanga fakasilesitialé.
ʻI he ongo vahe fakaʻosi ʻe ua ʻo Fakahaá, naʻe fakaʻaongaʻi ʻe Paula ha lea fakaʻofoʻofa ke fakamatalaʻi ʻaki ʻa e nāunau fakasilesitiale ʻe fiefia ai e kau angatonú.
Ngaahi ʻEkitivitī ʻe Ala Fakahokó
-
Tuku ki he fānaú ke nau tā ʻi he palakipoé ʻa e fuʻu ʻakau naʻe fakamatalaʻi ʻi he Fakahā 22:2. Fakamatalaʻi ange ko e fuʻu ʻakau ko ʻení, ko e ʻakau ia ʻo e moʻuí, pea ʻoku fakafofongaʻi ʻe hono fuá ʻa e ʻofa ʻa e ʻOtuá (vakai 1 Nīfai 11:21–22). ʻOange ki he fānaú ha ngaahi laʻi pepa kuo kosi hangē ha fuaʻiʻakaú, pea fakaafeʻi kinautolu ke nau tā ʻi he laʻi pepá ha meʻa ʻokú ne tokoniʻi kinautolu ke nau ongoʻi e ʻofa ʻa e Tamai Hēvaní. Fakamatalaʻi ange ʻe nofo ʻa kinautolu ʻoku angatonú pea mo e Tamai Hēvaní ʻi he puleʻanga fakasilesitialé.
-
Vahevahe mo e fānaú ha ngaahi ʻīmisi ʻe niʻihi pe ngaahi fakaikiiki naʻe fakaʻaongaʻi ʻe Sione ke fakamatalaʻi ʻaki ʻa e nāunau fakasilesitialé (vakai Fakahā 21:1, 3–4, 22–27; 22:1–2), pea fakaafeʻi e fānaú ke nau tā ha ngaahi fakatātā ʻo e ngaahi meʻá ni.
-
Hivaʻi fakataha ha hiva kau ki he palani ʻa e ʻOtuá, hangē ko e “Te u Muimui he Palani ʻa e ʻOtuá” (Tohi Hiva ʻa e Fānaú, 86–87). Fakaafeʻi e fānaú ke nau feinga ke ʻiloʻi e meʻa te nau lava ʻo fai ke nau toe nofo ai mo e Tamai Hēvaní.
Akoʻi e Tokāteliné
Fānau Lalahi Angé
Naʻá ku fakahaaʻi ʻeku tui kia Sīsū Kalaisí ʻi he maama fakalaumālié.
Ko e fānau ʻokú ke akoʻí, ʻoku nau ʻi māmani koeʻuhi ne nau maʻu ha tui kia Sīsū Kalaisi ʻi he maama fakalaumālié pea nau fili ke muimui kiate Ia.
Ngaahi ʻEkitivitī ʻe Ala Fakahokó
-
Lau fakataha e Fakahā 12:7–11, pea tohiʻi ʻi he palakipoé ʻa e ngaahi foʻi lea fuʻu ngata, Tau ʻi he Langí, lī ki tuʻa, fakamoʻoni, mo e Lami. Kole ki he fānaú ke nau fakamatala fakanounouʻi e ngaahi veesi ko ʻení ʻo fakaʻaongaʻi e ngaahi lea ʻi he palakipoé. Ko e hā ʻoku tau ako kau kia Sīsū Kalaisi (Lamí) mei he ngaahi veesi ko ʻení? Ko e hā ʻoku tau ako kau ki he ngaahi fili ne tau fai ʻi he maama fakalaumālié?
-
Faʻu ha ngaahi kōlomu ʻe tolu ʻi he palakipoé pea fakahingoa kinautolu ko e Kimuʻa ʻi he moʻuí ni, Lolotonga e moʻuí ni, mo e Fakatoloua. Teuteuʻi ha ngaahi laʻipepa ʻoku nau fakahaaʻi e ngaahi moʻoni kau ki he maama fakalaumālié mo e moʻui fakamatelié, hangē ko e ʻOku ʻi ai hotau sino, ʻOku ʻikai hatau sino, ʻOku tau nofo ʻi he ʻao ʻo e ʻOtuá, ʻOku tau tauʻi ʻa Sētane, ʻOku tau fakahaaʻi ʻetau tui kia Sīsū Kalaisí, pea mo e ʻOku tau muimui ki he palani ʻa e ʻOtuá. Tuku ki he fānaú ke nau taufetongi ʻi hono fili ha laʻi pepa mo fili e kōlomu ʻoku kau ki aí. Vahevahe ange hoʻo loto falala ʻe lava ke hokohoko atu hono fakahaaʻi ʻe he fānaú ʻa e tui kia Kalaisi.
Te u lava ʻo mateuteu ki he Hāʻele ʻAngaua mai ʻa Sīsū Kalaisí, ʻi heʻeku fili ki he totonú.
Te ke tokoniʻi fēfē e fānau ʻokú ke akoʻí ke mahino kiate kinautolu ko e Hāʻele ʻAngaua mai ʻa Sīsū Kalaisí ko ha meʻa fakafiefia ia maʻá e kakai māʻoniʻoní?
Ngaahi ʻEkitivitī ʻe Ala Fakahokó
-
Lau fakataha e Fakahā 19:7–8, pea tokoniʻi e fānaú ke mahino kiate kinautolu e fakataipe ʻi he ngaahi veesi ko ʻení—ko e taʻané ko e Hāʻele ʻAngaua mai ia ʻa e Fakamoʻuí, ko e Lamí ʻa e Fakamoʻuí, pea ko Hono ʻunohó ʻa e Siasí (pe ko kitautolu kotoa). ʻOku teuteu fēfē nai ʻa e kakaí ki ha mali? Ko e hā ha ngaahi meʻa te tau ala fai ke tau teuteu ai ki he toe hāʻele mai ʻa e Fakamoʻuí?
-
Toe vakaiʻi mo ako maʻuloto mo e fānaú ʻa e Tefito ʻo e Tui 1:10. Fakamatalaʻi ange ʻoku fakamatalaʻi ʻe he tefito ʻo e tui ko ʻení ha meʻa fakafiefia lahi ʻe hoko ʻi he taimi ʻe toe hāʻele mai ai ʻa Sīsuú. Fakaʻaliʻali ʻa e fakatātā ʻo e Hāʻele ʻAngaua maí ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau tā e meʻa ʻoku nau fakakaukau atu ʻe hoko ʻi he Hāʻele ʻAngaua mai ʻa Sīsuú.
Fakahā 21:1, 3–4, 22–27; 22:1–2, 17
Te u lava ʻo nofo mo e Tamai Hēvaní pea mo kinautolu ʻoku ou ʻofa aí, ʻi he puleʻanga fakasilesitialé.
ʻI hoʻo teuteu ke akoʻi kau ki he puleʻanga fakasilesitialé, fakakaukau ki he ʻuhinga ʻo e puleʻanga fakasilesitialé kiate koé. Te ke lava fēfē ʻo vahevahe hoʻo fakamoʻoní mo e fānau ʻokú ke akoʻí?
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau fekumi ʻi he ngaahi veesi ko ʻení, ki ha ngaahi fakatātā pe fakaikiiki naʻe fakaʻaongaʻi ʻe Sione ke fakamatalaʻi ʻaki ʻa e nāunau fakasilesitialé: Fakahā 21:1, 3–4, 22–27; 22:1–2. Tuku ke nau fili ha ʻīmisi pe fakaikiiki te nau fie tā. Te nau lava leva ke talanoa ki he kalasí ʻo kau ki heʻenau ngaahi fakatātaá. Poupouʻi kinautolu ke fakaʻaliʻali ʻenau ngaahi fakatātaá ki honau ngaahi fāmilí ʻi ʻapi.
-
Lau fakataha e Fakahā 22:17, pea fakamatalaʻi ange ko e taʻahine ʻoku lea “Haʻú” ko e Siasí ia. Ko e hā ʻoku tau fie maʻu ke fakaafeʻi e niʻihi kehé ke nau “haʻu” ki aí? Ko e hā ha ngaahi founga lelei ke tau fakaafeʻi ʻaki e kakaí ke nau “haʻú”?
Poupouʻi e Ako ʻi ʻApí
Tokoniʻi e fānaú ke nau teuteu ke lau ʻa e Tohi ʻa Molomoná he taʻu foʻou, ʻaki hono fakaafeʻi kinautolu ke nau kole ki ha mēmipa ʻo e fāmilí pe kaungāmeʻa ke vahevahe ha veesi ʻoku nau manako ai pe talanoa mei he Tohi ʻa Molomoná.
Fakatupulaki ʻEtau Akoʻí
Akoʻi e fānaú ke hiki e ngaahi ongó. Kapau ʻe lava ʻe he fānaú ʻo ako e ʻulungaanga ʻo hono hiki e ngaahi ongó, ʻe tokoniʻi ai kinautolu ke nau ʻiloʻi mo muimui ʻi he Laumālié. ʻE lava ke hiki ʻe he fānaú e ngaahi ongó ʻaki hono fakaʻilongaʻi e folofolá, tā e ngaahi fakatātā, pe hiki ha ngaahi fakamatala tohinoa faingofua. (Vakai Ko e Faiako ʻi he Founga ʻa e Fakamoʻuí, 30.)