tulo ka babaye nga nagbarug gawas sa templo

Oktubre 28–Nobyembre 3

1 ug 2 Timoteo; Tito; Filemon

“Alang sa mga Magtutuo, Pagkinabuhi Ingon nga Panig-ingnan”

Tun-i sa mainampoong paagi ang 1 ug 2 Timoteo; Tito; ug Filemon aron makat-on unsaon nimo paggamit niini nga mga sulat aron sa pagtudlo sa mga bata diha sa pagkamatarung (tan-awa sa 2 Timoteo 3:16).

Irekord ang Imong mga Impresyon

pagpaambit nga icon

Awhaga ang Pagpaambit

Hangyoa ang mga bata sa paghisgut og tawo kinsa usa ka maayo nga “[panig-ingnan] alang sa mga magtutuo” ngadto kanila. Unsa ang ilang gibuhat aron mahimo nga maayong ehemplo sa uban?

pagtudlo nga icon

Itudlo ang Doktrina

Mas Gagmay nga mga Bata

1 Timoteo 3:1–2; Tito 1:7–9

Ang mga bishop mangulo sa ward isip mga sulugoon sa Dios.

Mitudlo si Pablo kang Timoteo ug Tito mahitungod sa kaimportante sa mga bishop. Unsaon nimo pagtudlo ang mga bata unsa ang ginabuhat sa bishop? (Ang presidente sa branch susama sa usa ka bishop.)

Posible nga mga Kalihokan

• Pagdrowing og yano nga hulagway sa inyong bishop diha sa pisara. Hangyoa ang mga bata sa pagngalan og pipila ka butang nga ilang nasayran mahitungod sa bishop. Sama sa unsa siya? Unsa ang iyang ginabuhat? Giunsa niya sa pagpanalangin ang ward? (Makakita ka og pipila ka mga kinaiya sa usa ka bishop diha sa 1 Timoteo 3:1–2 ug Tito 1:7–9.) Samtang mopaambit ang mga bata sa ilang mga ideya, isulat kini diha sa ginunting nga mga papel ug ipabutang kini sa mga bata diha sa pisara tupad sa drowing.

  bishop diha sa iyang opisina nga nakig-istorya og batan-ong lalaki

  Ang mga bishop gitawag sa paghatag og espiritwal nga giya sa mga miyembro sa ward.

• Isulat ang mga katungdanan sa usa ka bishop sa mga piraso sa papel—sama sa pagdawat sa ikapulo ug mga halad sa puasa, paghatag og mga calling, pag-interbyu sa mga miyembro, pagtabang sa mga kabus ug timawa, ug pag-ampo alang sa uban. Ibutang kining mga piraso sa papel sulod sa usa ka panaksan, ug dapita ang matag bata sa pagkuha og usa. Dayon tabangi ang mga bata sa pag-aksyon niini nga mga katungdanan uban kanimo. Ipaambit ang imong pagpamatuod nga ang inyong bishop gitawag sa Dios.

• Dapita ang mga bata sa pagdrowing og hulagway sa bishop nga nagserbisyo sa mga miyembro sa ward. Isugyot nga ilang ihatag ang ilang mga drowing ngadto kaniya sa pagpasalamat kaniya. Unsa ang atong mabuhat sa pagtabang kaniya?

1 Timoteo 4:12

Mamahimo akong “[panig-ingnan] alang sa mga magtutuo.”

Unsay imong mabuhat aron sa pagdasig sa mga bata nga magmasaligon sa ilang abilidad nga mahimong “[mga panig-ingnan] alang sa mga magtutuo”?

Posible nga mga Kalihokan

• Kantaha uban sa mga bata ang “Sunda Ko Ninyo,” (Songbook sa mga Bata, 146). Hangyoa ang mga bata sa pagsunod sa imong ehemplo pinaagi sa pagbuhat sa mga aksyon nga imong buhaton. Papuli-puliha ang mga bata sa pagpangulo sa tibuok klase sa pagsunod sa ilang mga aksyon. Basaha ang 1 Timoteo 4:12, ug pangutan-a ang mga bata kon unsay ilang mabuhat aron mahimong maayong mga ehemplo ngadto sa uban.

• Pagpaambit og kasinatian sa dihang naningkamot ka nga mahimong maayo nga ehemplo sa usa ka tawo o sa dihang ang usa ka tawo nahimong maayo nga ehemplo kanimo. Tabangi ang mga bata nga makasabut nga kon sila maayo nga mga ehemplo, makatabang sila sa mga sakop sa ilang pamilya ug mga higala.

2 Timoteo 3:14–17

Ang mga kasulatan motabang nako nga makat-on sa kamatuoran.

Kon makatabang ka sa mga bata nga makakat-on sa paghigugma sa mga kasulatan, makapanalangin ka sa ilang kinabuhi sa umaabut nga katuigan.

Posible nga mga Kalihokan

• I-display ang usa ka hugpong sa mga kasulatan, ug tabangi ang mga bata nga mahimong pamilyar niini pinaagi sa pagpakita kanila sa ulohan nga mga pahina sa Biblia, sa Basahon ni Mormon, sa Doktrina ug mga Pakigsaad, ug sa Perlas nga Labing Bililhon. Pagdapit og usa ka bata sa paggunit niini nga mga basahon samtang imong basahon ang 2 Timoteo 3:15–17. Ipasabut nga ang Langitnong Amahan misugo og mga propeta sa tibuok kasaysayan sa pagsulat sa mga kamatuoran nga Iyang gipadayag kanila. Atong makat-unan kini nga mga kamatuoran samtang atong basahon ang mga kasulatan.

• Hangyoa ang mga bata sa paghisgut kabahin sa ilang labing bililhon nga butang. Unsay ilang gibuhat niini? Papuli-puliha sila sa paghupot sa mga kasulatan ug sa mainampingong pagpakli sa mga pahina. Unsay atong gamit sa mga kasulatan? Nganong kinahanglang ampingan man nato kini? Tabangi ang mga bata sa paghimo og mga aksyon nga mobagay sa mga kanta mahitungod sa mga kasulatan, sama sa “Pagsiksik, Pamalandong, ug Pag-ampo” o “Mga Istorya sa Basahon ni Mormon” (Songbook sa mga Bata, 66, 62–63).

pagtudlo nga icon

Itudlo ang Doktrina

Mas Dagko nga mga Bata

1 Timoteo 4:12

Mamahimo akong “[panig-ingnan] alang sa mga magtutuo.”

Medyo batan-on pa si Timoteo isip lider sa Simbahan, apan gusto ni Pablo nga iyang masayran nga mamahimo gihapon siya nga usa ka ehemplo. Makatabang ka sa mga bata nga imong gitudloan nga mobati nga masaligon sa ilang abilidad sa paghimo og maayo nga ehemplo.

Posible nga mga Kalihokan

• Basaha og dungan ang 1 Timoteo 4:12, ug hangyoa ang mga bata sa pagpangita og unom ka paagi nga miingon si Pablo nga mamahimo kitang “[panig-ingnan] sa mga magtutuo.” Ipares-pares ang mga bata, ug dapita ang matag pares sa paghunahuna og sitwasyon diin mamahimo silang ehemplo sa mga tumutuo. Hangyoa sila sa pagdrama-drama sa ilang sitwasyon alang sa tibuok klase.

• Pangutan-a ang mga bata kon gusto ba nilang mopaambit og bisan unsa nga mga kasinatian sa dihang naningkamot sila nga mahimong maayo nga ehemplo ngadto sa uban. Sultihi sila kon sa unsang paagi sila nahimong mga ehemplo sa mga magtutuo diha kanimo ug sa unsang paagi nga imo silang nabantayan nga nahimong maayong mga ehemplo alang sa uban.

1 Timoteo 6:7–12

Kinahanglang higugmaon nako ang mahangturong mga butang labaw kay sa kwarta.

Sa kalibutan nga misamot ang pagtutok sa materyal nga mga butang, unsaon nimo pagtabang ang mga bata nga padayong nakasentro ang ilang atensyon ug gugma sa Langitnong Amahan ug ni Jesukristo?

Posible nga mga Kalihokan

• Dapita ang mga bata sa paghisgut unsa ang ilang paliton kon aduna sila sa tanang kwarta sa kalibutan. Dapita ang usa ka bata sa pagbasa sa 1 Timoteo 6:7–12, ug hangyoa ang ubang mga bata sa pag-summarize sa gitudlo ni Pablo kang Timoteo mahitungod sa kwarta. Dayon dapita ang mga bata sa pagbasa og usab sa mga bersikulo, nga mangita sa mga butang nga gihisgutan ni Pablo nga mas bililhon kay sa kwarta.

• Pagpakita og mga hulagway sa kalibutanong mga butang (sama sa kwarta, mga dulaan, o kalingawan) ug mahangturon nga mga butang (sama sa mga pamilya o mga templo). Dapita ang mga bata sa paghan-ay sa mga hulagway ngadto sa duha ka tapuk—mga butang nga makapaduol nato kang Kristo ug mga butang nga mahimong makapalinga kanato gikan ni Kristo kon higugmaon nato kini labaw pa kay sa atong paghigugma Kaniya. Nganong “ang pagkamahigugmaon og salapi mao ang gamut sa tanang pagkadautan”?

2 Timoteo 3:14–17

Ang Langitnong Amahan mihatag kanato sa mga kasulatan sa pagtabang kanato nga mahibalo sa kamatuoran gikan sa sayop.

Ang mga bata makasinati sa mga panalangin sa pagbasa sa mga kasulatan. Samtang motudlo ka sa mga bata mahitungod sa mga kasulatan, pangita og mga paagi sa pag-awhag kanila nga makaangkon og ilang kaugalingong gamhanan nga mga kasinatian sa pulong sa Dios.

Posible nga mga Kalihokan

• Dapita ang mga bata sa pagbasa sa 2 Timoteo 3:15–17. Pagdala og hulagway nga nagpakita og istorya gikan sa matag usa sa upat ka sumbanan nga mga kasulatan, ug ibutang ang mga hulagway sa usa ka kahon nga dunay tabon. Dapita ang pipila ka mga bata sa pagkuha og hulagway ug sa pagsaysay sa istorya. Pangutan-a ang mga bata kon duna ba silay mapaambit nga lain mahitungod niana nga basahon sa kasulatan. Sa unsang paagi ang mga kasulatan “makagagahum sa pagtudlo [kanato] ngadto sa kaluwasan”?

• Dapita ang mga bata sa pagpaambit sa ilang paborito nga bersikulo sa kasulatan o usa ka kasinatian sa dihang ang usa ka kamatuoran diha sa mga kasulatan nakatabang kanila. Mahimo ka usab nga mopaambit og imong kaugalingong bersikulo o kasinatian.

• Hangyoa ang usa ka estudyante sa pagbasa sa Moroni 10:4–5. Unsa ang gisaad ni Moroni niini nga mga bersikulo? Pangutan-a ang mga bata unsay ilang nahimo aron makaangkon og pagpamatuod nga ang mga kasulatan tinuod. Dapita sila sa pagbasa o pagpaminaw sa mga kasulatan kanunay.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang mga pamilya kon unsay ilang nakat-unan mahitungod sa mga kasulatan ug sa pagpangita og usa ka bersikulo sa kasulatan nga mahimo nilang mapaambit sa klase sunod semana (uban sa tabang sa ilang mga ginikanan, kon gikinahanglan).

Pagpalambo sa Atong Pagtudlo

Ipahiangay ang mga kalihokan aron matubag ang mga panginahanglan. Imbis nga motan-aw niini nga mga outline isip mga instruksyon nga kinahanglan nimong sundon, gamita kini isip tinubdan sa mga ideya nga makaawhag og imong kaugalingong inspirasyon samtang mamalandong ka sa mga panginahanglan sa mga bata nga imong gitudloan. Mahimo nimong mapahiangay ang mga kalihokan sa pagtudlo og mga bata sa bisan unsang edad.

pahina sa kalihokan: ang mga kasulatan nagtudlo kanato sa kamatuoran