“Nobyembre 4–10. Mga Hebreohanon 1–6: ‘Si Jesukristo, ‘[ang] Tuburan sa Dayong Kaluwasan’’” Dali, Sunod Kanako—Alang sa Primary: Bag-ong Tugon 2019 (2019)
“Nobyembre 4–10. Mga Hebreohanon 1–6,” Dali, Sunod Kanako—Alang sa Primary: 2019
Balsamo sa Galaad, ni Annie Henrie
Nobyembre 4–10
Mga Hebreohanon 1–6
Si Jesukristo, “[ang] Tuburan sa Dayong Kaluwasan”
Unsa nga mga kamatuoran ang imong nakita sa Mga Hebreohanon 1–6 nga nadasig ka nga itudlo sa mga bata? Pagmatngon sa mga pag-aghat sa Espiritu nga moabut samtang mangandam ka, ug siguroa nga marekord kini.
Irekord ang Imong mga Impresyon
Awhaga ang Pagpaambit
Gidawat ba sa mga bata ang imbitasyon sa katapusan sa leksyon sa miaging semana nga mangita og usa ka bersikulo sa kasulatan nga mahimo nilang mapaambit? Kon mao, hatagi sila og panahon sa pagpaambit niini. Kon wala, tabangi sila sa paghunahuna og usa nga bag-o lang nilang nakat-unan gikan sa mga kasulatan nga mahimo nilang mapaambit.
Itudlo ang Doktrina
Mas Gagmay nga mga Bata
Mga Hebreohanon 1:2–10; 2:8–10, 17–18
Nagtuo ako ni Jesukristo.
Kini nga mga bersikulo makatabang sa mga bata nga makakat-on pa og dugang mahitungod ni Jesukristo ug mapalig-on ang ilang relasyon uban Kaniya.
Posible nga mga Kalihokan
-
Gamit ang imong kaugalingong mga pulong, pagsulat diha sa ginunting nga mga papel og mga kamatuoran mahitungod ni Jesukristo nga imong nakit-an sa Mga Hebreohanon 1:2–10; 2:8–10, 17–18, ug tagoi kini libut sa kwarto. Dapita ang mga bata sa pagpangita sa ginunting nga mga papel. Tabangi sila sa pagbasa sa mga kamatuoran nga nasulat diha sa papel, ug hisguti kon unsa ang gipasabut niini nga mga kamatuoran. Kon gikinahanglan, ipasabut nga si Jesus gitawag nga Anak sa Dios tungod kay ang Langitnong Amahan mao ang amahan sa Iyang espiritu ug sa Iyang lawas.
-
Ipasa ang usa ka hulagway sa Manluluwas libut sa kwarto, ug pasultiha ang matag bata nganong mapasalamaton siya kang Jesukristo samtang naggunit sa hulagway.
Gusto sa Langitnong Amahan nga kita “[dili mopagahi sa atong] mga kasingkasing.”
Ang Mga Hebreohanon 3 naghatag sa ehemplo sa mga Israelite nga mipagahi sa ilang mga kasingkasing ug misalikway sa mga panalangin sa Ginoo. Usa usab kini ka pasidaan kanatong tanan nga dili magpagahi sa atong mga kasingkasing.
Posible nga mga Kalihokan
-
Pagdala og usa ka espongha (o labakara) ug usa ka bato ngadto sa klase. Dapita ang mga bata sa paghikap sa mga butang ug sa paghulagway kon sama sa unsa kini hikapon. Butangi og pipila ka tulo sa tubig ang matag butang, ug ipasabut nga mas daghang tubig ang motuhop sa espongha kay sa bato. Ipasabut nga ang atong kasingkasing kinahanglan humok ug dili gahi aron atong madawat ang mga kamatuoran sa Langitnong Amahan diha sa atong kasingkasing.
-
Paggunting og porma og kasingkasing gikan sa humok nga materyal, sama sa panapton, ug sa mas gahi nga materyal, sama sa karton. Sultihi ang mga bata nga kon maminaw ug mosunod kita aduna kitay humok nga kasingkasing ug kon kita dili maminaw ug dili mosunod aduna kitay gahi nga kasingkasing. Sa imong kaugalingong mga pulong, pagpaambit og pipila ka ehemplo gikan sa mga kasulatan sa mga tawo nga adunay malumo nga kasingkasing o gahi nga mga kasingkasing (sama ni Nephi, Laman ug Lemuel [1 Nephi 2:16–19], ni Pablo [Mga Buhat 9:1–22], o ni Joseph Smith [Joseph Smith—Kasaysayan 1:11–20]). Samtang imong ipaambit ang matag ehemplo, dapita ang mga bata sa pagtudlo ngadto sa humok nga kasingkasing o sa gahi nga kasingkasing.
Gitawag ni Moises si Aaron sa Pagpangalagad, ni Harry Anderson
Ang mga naghupot sa priesthood gitawag sa Dios.
Ang Mga Hebreohanon 5:4 usa ka importante nga bersikulo tungod kay nagklaro kini nga ang mga naghupot sa priesthood—ug ang uban nga nagserbisyo sa Simbahan—kinahanglang pagatawgon sa Dios.
Posible nga mga Kalihokan
-
Basaha ang Mga Hebreohanon 5:4 ngadto sa mga bata. Hangyoa ang usa ka naghupot sa priesthood sa pagpasabut kon unsa ang priesthood ug sa pagpaambit sa iyang kasinatian sa pagdawat sa priesthood.
-
Tabangi ang mga bata sa pagsag-ulo sa mga pulong gikan sa ikalima nga artikulo sa hugot nga pagtuo. Ihatag ang imong pagpamatuod nga ang mga tawo kinsa gitawag sa pagbuhat sa buhat sa Dios gitawag sa Dios pinaagi sa pagpadayag.
Itudlo ang Doktrina
Mas Dagko nga mga Bata
Mga Hebreohanon 1:2–10; 2:8–10, 17–18
Nagtuo ako ni Jesukristo.
Ang Sulat ngadto sa mga Hebreohanon gisulat aron sa paglig-on sa pagtuo sa mga Santos nga Hebreohanon diha ni Jesukristo. Makahimo usab kini niini diha sa mga bata nga imong gitudloan.
Posible nga mga Kalihokan
-
I-assign ang matag bata og pipila ka mga bersikulo diha sa Mga Hebreohanon 1:2–10; 2:8–10, 17–18, ug dapita ang mga bata sa pagpangita og mga kamatuoran mahitungod ni Jesukristo diha niana nga mga bersikulo. Ipaambit o ipasulat kanila diha sa pisara ang unsay ilang makit-an. Unsa pa ang atong nahibaloan mahitungod ni Jesukristo? Ang mga bata mahimong makakita og pipila ka mga ideya diha sa mga kanta sama sa “Ako Nasayud Nga Akong Manunubos Buhi” (Mga Himno ug mga Awit sa mga Bata, nu. 38) o “Mipadala sa Bugtong Anak” (Songbook sa mga Bata, 20–21).
-
Dapita ang mga bata sa pagdrowing og mga hulagway sa ilang kaugalingon uban sa ilang mga ginikanan. Hangyoa sila sa pagpaambit kon unsa ang anaa nila nga anaa usab sa ilang mga ginikanan. Ipasabut nga sa dihang ang Mga Hebreohanon 1:3 nag-ingon nga si Jesukristo mao “ang tukma nga hulad sa … kinaiya [sa Dios]”, nagpasabut kini nga si Jesus ug ang Langitnong Amahan adunay sama nga mga kalidad ug mga hiyas. Pagpamatuod nga makakat-on kita sa Langitnong Amahan pinaagi sa pagkat-on ug pagsunod ni Jesukristo.
-
Tabangi ang mga bata sa paghunahuna og mga tawo nga mahimo nilang mapaambitan sa ilang pagpamatuod kabahin ni Jesukristo. Ikonsiderar ang pagdapit kanila sa pagpraktis sa pagpaambit sa unsay ilang isulti niadto nga mga tawo mahitungod ni Jesus.
Aron makadawat sa giya ug mga panalangin sa Langitnong Amahan, kita kinahanglang “[dili mopagahi sa atong] mga kasingkasing.”
Sa Mga Hebreohanon 3, ang istorya sa mga Israelite sa kamingawan gigamit sa pagtudlo sa kaimportante nga dili magpagahi sa atong mga kasingkasing. Unsaon nimo paggamit niini nga istorya aron matudloan ang mga bata sa imong klase niini nga baruganan?
Posible nga mga Kalihokan
-
Hangyoa ang mga bata sa paghunahuna og mga butang nga gahi ug humok. (Mahimong magdala ka og pipila ka mga ehemplo nga mapakita nila.) Basaha og dungan ang Mga Hebreohanon 3:8. Unsay buot ipasabut nga magbaton og gahi nga kasingkasing? Nganong gusto man sa Dios nga humok ang atong kasingkasing?
-
Sa imong kaugalingong mga pulong, ipaambit ang istorya sa mga Israelite nga mipagahi sa ilang kasingkasing batok sa Ginoo diha sa kamingawan (tan-awa sa Numeros 14:1–12; Mga Hebreohanon 3:7–19). Ipadrama sa mga bata ang istorya. Unsa ang mahitabo kon magpagahi kita sa atong kasingkasing batok sa Ginoo ug sa Iyang ebanghelyo?
-
Dapita ang mga bata sa pagbasa sa Mateo 13:15; Mga Hebreohanon 3:15; Mosiah 11:29; ug Moises 6:27. Hangyoa sila sa pagdrowing sa pisara sa mga parte sa lawas nga gihisgutan niini nga mga bersikulo. Unsay buot ipasabut nga adunay bungol nga mga dalunggan, buta nga mga mata, ug gahi nga mga kasingkasing sa espiritwal nga paagi? Sa unsang paagi kita makasiguro nga ang atong mga dalunggan, mga mata, ug mga kasingkasing andam sa pagdawat sa mga panalangin sa Dios?
Ang mga naghupot sa priesthood gitawag sa Dios.
Ang Mga Hebreohanon 5 naghatag og oportunidad sa paghisgut kon unsa ang priesthood—ang gahum ug awtoridad sa paglihok diha sa ngalan sa Dios—ug sa unsang paagi kini madawat. Labi kining makatabang sa mga batan-ong lalaki kinsa nangandam nga ma-orden sa priesthood.
Posible nga mga Kalihokan
-
Ipakita ang litrato nga Si Moises Mihatag ni Aaron sa Priesthood (Libro sa mga Hulagway sa Ebanghelyo, nu. 15) samtang ang usa ka bata mobasa sa Mga Hebreohanon 5:4. Mahimong makatabang ang pagpasabut nga tungod kay si Aaron mao ang unang tawo nga naghupot sa Aaronic Priesthood, gipangalan kini kaniya. Tabangi ang mga bata sa paghunahuna sa mga katungdanan nga ipahigayon sa mga naghupot sa Aaronic Priesthood (sama sa pagbunyag, pagpanalangin ug pagpasa sa sakrament, ug pagdapit sa uban nga moduol kang Kristo).
-
Tabangi ang mga bata sa paghunahuna og lain-laing mga paagi diin ang mga tawo modawat og awtoridad. Sama pananglit, sa unsang paagi modawat og awtoridad ang usa ka magtutudlo, doktor, o politikal nga lider? Sa unsang paagi mohatag ang Dios sa Iyang awtoridad? Dapita ang mga bata sa paghunahuna mahitungod niini nga pangutana samtang mobasa sila sa Mga Hebreohanon 5:4 ug sa ikalima nga artikulo sa hugot nga pagtuo.
Awhaga ang Pagkat-on diha sa Panimalay
Dapita ang mga bata sa pagpaambit og kasulatan, kanta, o kalihokan nga ilang nakat-unan sa klase karon ngadto sa ilang mga pamilya alang sa family home evening.
Pagpalambo sa Atong Pagtudlo
Ang mga bata makaila sa impluwensya sa Espiritu. Tudloi sila nga ang mga pagbati sa kalinaw, gugma, ug kainit nga anaa kanila kon maghisgot o mokanta sila mahitungod ni Jesukristo ug sa Iyang ebanghelyo nagagikan sa Espiritu Santo. Kini nga mga pagbati makalig-on sa ilang mga pagpamatuod.