“Nobyembre 18–24. Santiago: ‘Tumana Ninyo ang Pulong, ug Dili kay Magpaminaw Ra Kamo Niini’” Dali, Sunod Kanako—Alang sa Primary: Bag-ong Tugon 2019 (2019)
“Nobyembre 18–24. Santiago,” Dali, Sunod Kanako—Alang sa Primary: 2019
Si Abraham sa Kapatagan sa Mamre, ni Grant Romney Clawson
Nobyembre 18–24
Santiago
“Tumana Ninyo ang Pulong, ug Dili kay Magpaminaw Ra Kamo Niini”
Ang Sulat ni Santiago naglangkob og daghang kamatuoran nga makapanalangin sa mga bata nga imong gitudloan. Sunda ang Espiritu aron sa pagtino kon unsa nga mga kamatuoran ang imong ipaambit kanila. Ang mga ideya niini nga outline makatabang usab.
Irekord ang Imong mga Impresyon
Awhaga ang Pagpaambit
Dapita ang mga bata sa pagpaambit og usa ka baruganan sa ebanghelyo nga mahinumduman nila nga nakat-unan uban sa ilang pamilya sa miaging semana o gikan sa ilang klase sa Primary sa miaging Dominggo. Human makapaambit ang matag bata, pagdapit og laing bata sa klase sa pag-summarize kon unsay napaambit.
Itudlo ang Doktrina
Mas Gagmay nga mga Bata
Makahangyo ko sa Langitnong Amahan sa pagtabang kanako nga makat-on unsay tinuod.
Tabangi ang mga bata nga imong gitudloan nga makasabut nga mahimo silang modangup sa Langitnong Amahan alang sa kaalam. Ang pagbuhat sa ingon makapanalangin kanila pag-ayo kon mag-atubang sila og lisud nga mga pangutana.
Posible nga mga Kalihokan
-
Tabangi ang mga bata nga makat-on sa mga pulong “Kon aduna man kaninyoy nakulangan og kaalam, papangayoa siya sa Dios” (Santiago 1:5). Unsaon nato sa pagpangutana sa Dios? Unsaon kita Niya sa pagtubag?
-
Pagpakita og hulagway sa Unang Panan-awon (Libro sa mga Hulagway sa Ebanghelyo, nu. 90), ug pagpaambit kon sa unsang paagi ang pagbasa sa Santiago 1:5 miaghat ni Joseph Smith sa paghangyo sa Langitnong Amahan sa pagtabang kaniya kabahin sa usa ka pangutana (tan-awa sa Joseph Smith—Kasaysayan 1:1–15). Ipaambit ang imong pagpamatuod nga ang Dios motubag sa mga pag-ampo, ug pagpamatuod nga ang mga bata mahimong moampo Kaniya kon duna silay mga pangutana. Padrowinga ang mga bata og kaugalingon nilang mga hulagway ni Joseph Smith nga nagbasa sa Santiago 1:5 ug nag-ampo sa Langitnong Amahan.
Makasulti ko og maayo nga mga butang.
Sama sa gipamatuod ni Santiago, ang pagkat-on sa pagsulti lamang og mabination nga mga butang ngadto sa uban makatabang kanato nga mahimong sama ni Jesukristo (tan-awa sa Santiago 3:2).
Posible nga mga Kalihokan
-
Pagdala og butang nga tam-is ug butang nga aslom aron tilawan sa mga bata. Tabangi sila nga makasabut nga kinahanglang gamiton nato ang atong mga dila sa pagsulti og tam-is (o mabination) nga mga butang ug dili mosulti og aslom (o ngil-ad) nga mga butang (tan-awa sa Santiago 3:10). Tabangi sila sa paghunahuna og mga ehemplo sa maayo nga mga butang nga mahimo natong isulti sa uban.
-
Hatagi ang matag bata og yano nga drowing sa usa ka tawo nga namulong. Dapita ang mga bata sa pag-isa niini kon mosulti ka og maayong butang nga atong mabuhat sa atong mga dila (sama sa pagsulti sa kamatuoran, pagdayeg og tawo, ug pagtanyag og tabang sa usa ka tawo) ug sa pagpaubos niini kon mosulti ka og butang nga dili nato angayng buhaton sa atong mga dila (sama sa pagsulti og mga bakak, pagtawag sa ubang mga tawo gamit ang ngil-ad nga mga ngalan, ug pagdumili sa pagsunod sa mga ginikanan).
-
Ipasabut og maayo ang mensahe sa Santiago 3:1–13 pinaagi sa pagkanta og dungan sa usa ka kanta mahitungod sa pagkamabination, sama sa “Pagkamabination Magagikan Kanako” (Songbook sa mga Bata, 83). Isugyot nga ang mga bata mohimo og “garapon sa kamabination” nga mahimo nilang sudlan og gagmayng mga bato o ubang gagmay nga mga butang kon mosulti sila og maayo ngadto sa usa ka tawo.
Ang pipila sa mga panalangin sa Dios magkinahanglan og pailub.
Ang pailub dili kanunay moabut sa natural nga paagi, ilabi na sa mga bata. Ikonsiderar kon unsaon nimo sa paggamit ang tambag ni Santiago aron sa pagtabang sa mga bata nga imong gitudloan nga makakat-on og pailub.
Posible nga mga Kalihokan
-
Tabangi ang mga bata sa paghunahuna sa mga panahon sa dihang kinahanglan nilang maghulat alang sa usa ka butang nga gusto kaayo nila. Ipasabut nga ang paghulat alang sa usa ka butang nga gusto nato nga dili magbagulbol mao ang gitawag nga pagpailub.
-
I-summarize ang Santiago 5:7 sa kaugalingon nimong mga pulong, ug pagpakita og hulagway sa usa ka liso o binhi. Nganong gikinahanglan man nato ang pailub kon magpadako kita og mga tanom? Unsa ang mahitabo kon atong sulayan sa pagbira ang binhi aron mapadali ang pagtubo niini? Pagpamatuod nga ang Dios adunay daghang mga panalangin alang kanato, apan ang uban niini nagkinahanglan og pailub.
-
Ipaambit ang istorya ni Job, kinsa gihisgutan diha sa Santiago 5:11 isip ehemplo sa pailub (tan-awa sa “Kapitulo 46: Job,” Mga Istorya sa Daang Tugon,165–69). Sa unsang paagi napanalanginan si Job tungod sa pagkamapailubon?
Itudlo ang Doktrina
Mas Dagko nga mga Bata
Ang Langitnong Amahan motabang kanako nga makakat-on sa kamatuoran kon magtinguha ako sa Iyang tabang.
Bisan og ang mga bata nga imong gitudloan daw gagmay pa, mas bata lang sila og pipila ka tuig kay ni Joseph Smith sa dihang mibasa siya sa Santiago 1:5 ug nadasig nga moduol sa Langitnong Amahan pinaagi sa pag-ampo. Ikonsiderar kon sa unsang paagi nimo matabangan ang mga bata nga imong gitudloan sa pagtukod sa ilang pagtuo nga ang Dios motabang kanila kon nagkulang sila sa kaalam.
Posible nga mga Kalihokan
-
Hangyoa ang mga bata sa pagsulti kanimo sa istorya sa Unang Panan-awon ni Joseph Smith gamit ang kaugalingon nilang mga pulong (tan-awa sa Joseph Smith—Kasaysayan 1:5–19). Sa unsang paagi ang Santiago 1:5 nakatabang ni Joseph? Tabangi ang mga bata sa paghunahuna og mga ehemplo sa ubang mga tawo diha sa mga kasulatan kinsa nakadawat og tubag sa ilang mga pag-ampo (sama ni Nephi [1 Nephi 11:1–6] ug ang igsoon nga lalaki ni Jared [Ether 2:18–3:9]). Unsa ang pipila ka mga butang nga mahimo natong pangayoon sa Langitnong Amahan diha sa pag-ampo?
-
Basaha uban sa mga bata ang Joseph Smith—Kasaysayan 1:10–14. Dapita ang mga bata sa pagpangita sa mga butang nga gibuhat ni Joseph aron makadawat og mga tubag sa iyang mga pangutana. Unsaon nato pagsunod ang ehemplo ni Joseph Smith kon duna kitay mga pangutana?
“Walay kapuslanan ang pagtuo nga bulag sa binuhatan.”
Unsaon nimo pagtabang ang mga bata nga makakita sa koneksyon tali sa unsay ilang gituohan ug unsa ang ilang buhaton?
Posible nga mga Kalihokan
-
Pakit-a ang mga bata og flashlight nga walay bateriya, lapis nga walay tahal, o lain pang butang nga walay pulos o “patay.” Hangyoa ang mga bata sa pagbasa sa Santiago 2:14–17. Sa unsang paagi gipakita niini nga mga butang ang kamatuoran niini nga mga bersikulo?
-
Dapita ang mga bata nga hilum nga mobasa sa Santiago 1:22–27; 2:14–26. Dayon dapita sila sa pagpaambit sa unsay ilang mabuhat aron mapakita nga sila mga tigtuman sa pulong. Pananglitan, duna ba silay nailhan nga tawo nga nasakit o nag-inusara nga mahimo nilang bisitahan, o makahimo ba sila nga maningkamot nga mas moserbisyo pa sa ilang mga pamilya? Mahimo usab nimo silang pahinumduman sa mga pulong nga tingali ilang nadunggan sa miting sa sakrament karong adlawa. Unsaon nato nga mahimong mga tigtuman niini nga mga pulong?
Makakontrol ko sa mga butang nga akong isulti.
Ang mga pulong nga atong isulti sa usag usa morag dili importante, apan sama sa gipamatuod ni Santiago, mahimong kini adunay gamhanan nga impluwensya, alang sa maayo o dautan.
Posible nga mga Kalihokan
-
Aduna bay tawo sa ward, tingali usa sa mga bata nga imong gitudloan, nga nakatrabaho sa mga kabayo o dunay nahibaloan mahitungod sa mga sakayan? Mahimo nimo siyang dapiton sa paghatag og panabut mahitungod sa mga pagtulun-an ni Santiago diha sa Santiago 3:3–4 mahitungod sa paggamit og mabinationg mga pulong, o paghatag og pipila sa imong kaugalingong mga panabut. Unsa ang atong makat-unan mahitungod sa pagkontrolar sa atong mga dila gikan niini nga mga ehemplo?
-
Dapita ang mga bata sa pagbasa sa Santiago 3:1–13 ug sa pagdrowing og hulagway sa usa ka butang nga ilang nakit-an nga nagtudlo mahitungod sa pagkontrolar sa atong mga dila. Hatagi sila og panahon sa pagpaambit sa ilang hulagway ug sa unsay ilang nakat-unan.
-
Human maribyu og dungan ang Santiago 3:1–13, ribyuha ang mga sumbanan alang sa pinulongan diha sa Alang sa Kalig-on sa mga Kabatan-onan (20–21). Tabangi ang mga bata sa paghunahuna og usa ka butang nga mahimo nilang buhaton aron mapalambo ang paagi sa ilang pagpakigsulti sa uban, ug awhaga sila sa paghimo og personal nga mga tumong.
Awhaga ang Pagkat-on diha sa Panimalay
Dapita ang mga bata sa pag-ampo ngadto sa Langitnong Amahan nga adunay ipangutana o maningkamot nga mahimong mas mapailubon sa umaabut nga semana. Hangyoa sila sa pagpaambit sa ilang mga kasinatian sa sunod nga klase.
Pagpalambo sa Atong Pagtudlo
Tabangi ang mga bata nga mahimong aktibo. “Samtang ikaw nagtudlo sa mga bata, tugoti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).