“Oktubre 21–27. 1 ug 2 Mga Taga-Tesalonica: ‘Dili Unta Kamo Makuyawan Pagdali, ni Makulbaan’” Dali, Sunod Kanako—Alang sa Primary: Bag-ong Tugon 2019 (2019)
“Oktubre 21–27. 1 ug 2 Mga Taga-Tesalonica,” Dali, Sunod Kanako—Alang sa Primary: 2019
Oktubre 21–27
1 ug 2 Mga Taga-Tesalonica
“Dili Unta Kamo Makuyawan Pagdali, ni Makulbaan”
Samtang mainampuon ka nga mobasa sa 1 ug 2 Mga Taga-Tesalonica nga maghunahuna sa mga bata, makakita ka og mga baruganan nga kinahanglan nilang masabtan.
Irekord ang Imong mga Impresyon
Awhaga ang Pagpaambit
Sa leksyon sa miaging semana, gidapit ba nimo ang mga bata sa paggamit sa unsay ilang nakat-unan sa bisan unsang paagi? Ipagamit sa mga bata ang unang pipila ka minuto sa klase karong semanaha sa pagpaambit sa ilang mga kasinatian.
Itudlo ang Doktrina
Mas Gagmay nga mga Bata
Samtang mosunod ko sa mga sugo sa Dios, mahimo akong andam alang sa Ikaduhang Pag-anhi ni Jesukristo.
Ang tambag ni Pablo makatabang kanato nga mahimong andam ug magbantay alang nianang mahinungdanon nga adlaw sa dihang ang Manluluwas moanhi sa yuta pag-usab.
Posible nga mga Kalihokan
-
Pagdapit og usa ka inahan nga mamulong kon sama sa unsa ang maghulat sa pagkatawo sa iyang anak nga wala masayud sa tukma kon kanus-a mahitabo ang pagpanganak. Basaha ang 1 Mga Taga-Tesalonica 5:2–3, ug sultihi ang mga bata nga si Jesukristo moanhi pag-usab sa yuta, apan walay usa nga nasayud kon kanus-a gayud—sama sa usa ka inahan nga wala masayud kon kanus-a gayud ipakatawo ang iyang anak.
-
Hangyoa ang mga bata sa paghisgut og higayon nga nangandam sila alang sa usa ka biyahe o kalihokan. Unsa ang ilang gibuhat sa pagpangandam? Pagdala og maleta o bag ug sugoa ang mga bata nga magpakaaron-ingnon nga nag-impaki niini agig pagpangandam sa usa ka biyahe o kalihokan. Ipasabut nga mangandam kita sa pag-anhi pag-usab ni Jesukristo pinaagi sa pag-ampo, pagbasa sa mga kasulatan, pagsunod sa propeta, ug pagpuyo nga matarung matag adlaw. Hangyoa ang mga bata sa pagdrowing og mga hulagway kon unsaon nila kini sa pagbuhat ug isulod kini sa maleta.
-
Basaha ang 1 Mga Taga-Tesalonica 5:6 ngadto sa mga bata ug ipasabut nga kon wala kita mangandam sa pag-anhi pag-usab ni Jesus, susama ra kini nga nakatulog kita ug dili kita mahimong andam alang Kaniya. Dapita ang mga bata nga magpakaaron-ingnon nga natulog. Ipasabut nga kon mangandam kita, susama kini nga nagmata kita ug naghulat Kaniya. Dapita sila sa pagmata. Kantaha og dungan ang “Kon Siya Moanhi Pag-usab” (Songbook sa mga Bata, 46–47).
Mitudlo si Pablo nga mahitabo ang apostasiya sa dili pa si Jesukristo moanhi pag-usab.
Ang Simbahan nga giestablisar ni Jesukristo sa katapusan nahiagum sa apostasiya, nagpasabut nga ang awtoridad sa priesthood ug ang mga kamatuoran sa ebanghelyo gikuha gikan sa yuta. Nanagna si Pablo nga kini nga apostasiya, o “pagsupil,” mahitabo sa wala pa ang Ikaduhang Pag-anhi sa Manluluwas.
Posible nga mga Kalihokan
-
Human mabasa ang 2 Mga Taga-Tesalonica 2:3 ngadto sa mga bata, pagtukod og tore gamit ang plastik nga mga baso o bloke. Sultihi ang mga bata nga ang mga baso o mga bloke nagrepresentar sa importante nga mga parte sa tinuod nga Simbahan, sama sa mga kamatuoran sa ebanghelyo, sa priesthood, mga sealing sa templo, ug mga propeta. Human mamatay si Pablo ug ang ubang mga Apostoles, kini nga mga butang nawala, ug ang tinuod nga Simbahan wala na dinhi sa yuta sulod sa daghang katuigan. Dapita ang usa ka bata sa paglumpag sa tore, ug ipasabut nga kini mao ang gitawag nga Apostasiya o “pagsupil.” Sa dihang gibalik ni Jesukristo ang Iyang Simbahan, gitawag kini nga ang Pagpahiuli. (Tan-awa ang “Apostasiya,” Matinud-anon sa Tinuhoan, 9–10.)
-
Pag-display og Basahon ni Mormon ug mga hulagway sa propeta ug sa usa ka templo. Dapita ang mga bata sa pagsulti og “Apostasiya” kon imong itago ang mga butang diha sa bag ug “Pagpahiuli” kon imong ipagawas og balik ang mga butang.
-
Pagkanta og mga awit nga nagtudlo og mga kamatuoran nga gikuha panahon sa Apostasiya ug gipahiuli sa atong panahon, sama sa “Ako Anak sa Dios,” “Ang Simbahan ni Jesukristo,” ug “Gusto Ko nga Makita ang Templo” (Songbook sa mga Bata, 2–3, 48, 99).
Itudlo ang Doktrina
Mas Dagko nga mga Bata
Samtang mosunod ko sa mga sugo sa Dios, mahimo akong andam alang sa Ikaduhang Pag-anhi ni Jesukristo.
Ang tambag ni Pablo makatabang kanato nga mahimong andam ug magbantay alang nianang mahinungdanon nga adlaw sa dihang ang Manluluwas moanhi sa yuta pag-usab.
Posible nga mga Kalihokan
-
Pagdapit og bata nga mobasa sa 1 Mga Taga-Tesalonica 5:1–6 samtang magsunod ang ubang mga bata. Human sa matag bersikulo, hangyoa ang usa ka bata sa pag-summarize kon unsa kaha ang gipasabut sa bersikulo. Mahimo nimong ipasabut nga “ang adlaw sa Ginoo” nagpasabut sa Ikaduhang Pag-anhi ni Jesukristo. Nganong naghunahuna man ang mga bata nga ang Ikaduhang Pag-anhi matandi ngadto sa usa ka kawatan sa kagabhion o usa ka babaye nga hapit na manganak?
-
Sultihi ang mga bata sa paghunahuna nga ang Manluluwas mobisita sa inyong klase bisan unsang orasa karong adlawa. Unsaon nato sa pag-andam ang atong klasehanan alang sa Iyang pagbisita? Tabangi ang mga bata sa paghunahuna sa mga butang nga mahimo natong buhaton aron maandam ang atong kaugalingon alang sa adlaw nga mobalik na si Jesukristo. Sama pananglit, mahimo kitang maghinulsol, mopasaylo, mopalambo sa atong relasyon uban sa atong pamilya, mosunod sa propeta, ug motuman sa atong mga pakigsaad. Awhaga ang mga bata sa pagpili og usa ka butang nga ilang buhaton aron maandam ang ilang kaugalingon sa pagdawat sa Manluluwas sa Iyang Pag-anhi.
Mitudlo si Pablo nga mahitabo ang apostasiya sa dili pa si Jesukristo moanhi pag-usab.
Kon makasabut ang mga bata nga ang Simbahan ni Jesukristo ug ang Iyang ebanghelyo gikuha gikan sa yuta panahon sa Dakong Apostasiya, ang kakinahanglanon sa Pagpahiuli mahimong mas klaro kanila.
Posible nga mga Kalihokan
-
Dapita ang usa sa mga bata sa pagbasa sa 2 Mga Taga-Tesalonica 3:1–3. Sumala niini nga mga bersikulo, unsay kinahanglan nga mahitabo sa dili pa “ang adlaw ni Kristo,” nga nagpasabut sa Ikaduhang Pag-anhi? Aduna bay nahibalo sa mga bata kon unsay gipasabut sa “pagsupil”? Siguroa nga ang mga bata nakasabut nga nangahulugan kini sa Dakong Apostasiya, nga nahitabo human sa kamatayon sa mga Apostoles sa Manluluwas. Mahimo nimong ipaambit ang impormasyon gikan sa “Apostasiya” Matinud-anon sa Tinuhoan, 9–10.
-
Tabangi ang mga bata sa paglista diha sa pisara sa pipila ka mga kamatuoran ug mga panalangin nga atong natagamtam tungod sa ebanghelyo. (Pipila ka mga ehemplo mahimong maglakip sa mga templo, mga propeta, sa priesthood, ug ang gasa sa Espiritu Santo.) Papasa sa tagsa-tagsa kining mga butanga, ug pangutan-a ang mga bata kon sa unsang paagi nga lahi ang ilang kinabuhi kon wala kining mga butanga. Ipasabut nga kini nga mga kamatuoran nawagtang panahon sa Dakong Apostasiya. Nganong importante man nga ang Simbahan ni Jesukristo ipahiuli sa yuta sa ulahing mga adlaw? Dapita ang mga bata nga “ipahiuli” o isulat og balik ang mga kamatuoran ug mga panalangin diha sa pisara.
Gusto sa Langitnong Amahan nga motrabaho ko.
Unsaon nimo sa pagtabang ang mga bata nga motan-aw sa trabaho isip usa ka panalangin, dili usa ka butang nga angayng likayan?
Posible nga mga Kalihokan
-
Dapita ang mga bata nga magpuli-puli sa pagbasa sa mga bersikulo gikan sa 2 Mga Taga-Tesalonica 3:7–13 ug sa pagpangita sa problema nga giatubang sa mga Santos. Nganong gusto man sa Langitnong Amahan nga motrabaho kita? Unsa ang mahitabo kon wala gayud kita makat-on sa pagtrabaho og maayo? Papulipuliha ang mga bata sa pag-aksyon og yano nga mga buluhaton samtang tag-anon sa ubang mga bata kon unsay ilang gibuhat.
-
Dapita ang mga bata sa paghisgut sa usa ka higayon dihang mitrabaho sila og maayo sa usa ka buluhaton, proyekto, o tumong. Unsa ang ilang gibati sa ilang kaugalingon sa dihang nahuman na sila? Unsay ipasabut sa “ayaw kamo pagkataka [pagkaluya] sa pagbuhat ug maayo”? (2 Mga Taga-Tesalonica 3:13).
Awhaga ang Pagkat-on diha sa Panimalay
Dapita ang mga bata nga sultihan ang usa ka sakop sa pamilya o higala sa usa ka rason nganong mapasalamaton sila nga anaa kanato sa kalibutan karon ang ebanghelyo (ang pahina sa kalihokan karong semanaha makatabang kanila sa paghinumdom).
Pagpalambo sa Atong Pagtudlo
Suportahi ang mga ginikanan sa mga bata. “Ang mga ginikanan maoy labing importanting mga magtutudlo sa ebanghelyo alang sa ilang mga anak—anaa kanila ang labing dako nga responsibilidad ug ang labing dako nga gahum sa pag-impluwensya sa ilang mga anak (tan-awa sa Deuteronomio 6:6–7). Samtang magtudlo ka sa mga bata sa simbahan, pagmainampuon nga motinguha og mga paagi sa pagsuporta sa ilang mga ginikanan sa ilang mahinungdanong tahas” (Pagtudlo sumala sa Pamaagi sa Manluluwas, 25).