“Septyembre 30–Oktubre 13. Mga Taga-Efeso: ‘Alang sa Pagkasangkap sa mga Balaan’” Dali, Sunod Kanako—Alang sa Primary: Bag-ong Tugon 2019 (2019)
“Septyembre 30–Oktubre 13. Mga Taga-Efeso,” Dali, Sunod Kanako—Alang sa Primary: 2019
Septyembre 30–Oktubre 13
Mga Taga-Efeso
“Alang sa Pagkasangkap sa mga Balaan”
Samtang imong tun-an ang Sulat ngadto sa Mga Taga-Efeso, hunahunaa kon unsa nga mga baruganan ang hatagan nimo og gibug-aton aron mapanalanginan ang mga bata nga imong gitudloan. Irekord ang bisan unsang ideya nga mosulod sa hunahuna samtang magbasa ka.
Irekord ang Imong mga Impresyon
Awhaga ang Pagpaambit
Dapita ang mga bata nga mobarug nga maglinya. Hangyoa ang unang bata sa linya sa pagpaambit og usa ka butang nga bag-o lang niyang nakat-unan panahon sa pagtuon sa pamilya sa kasulatan, diha sa Primary, o bisan asa. Hangyoa ang sunod nga bata sa linya nga isulti og balik ang gipaambit sa nasundan nga bata ug dayon modugang og usa ka butang nga iyang nakat-unan. Balika kini hangtud nga ang matag bata aduna nay oportunidad sa pagpaambit.
Itudlo ang Doktrina
Mas Gagmay nga mga Bata
Ang mga miyembro sa Simbahan kinahanglang mahimong mga higala ug “mga katagi-lungsod.”
Ang mga bata ba sa imong klase mas sama sa “mga langyaw” o “mga katagi-lungsod” sa usag usa ug sa ubang mga miyembro sa ward? Tabangi sila nga makasabut nga bisan tuod aduna kitay kalahian, ang Manluluwas nagtabang kanato nga magkahiusa ug mohigugma sa usag usa.
Posible nga mga Kalihokan
-
Pagbutang og hulagway sa Manluluwas diha sa sentro sa kwarto. Dapita ang mga bata nga mobarug sa lain-laing mga parte sa kwarto aron morepresentar sa “mga langyaw” o “mga dumuloong.” Samtang basahon nimo ang Mga Taga-Efeso 2:19, dapita sila nga molakaw padulong sa hulagway ni Kristo hangtud nga nagbarug na sila nga dug-ol sa usag usa. Sultihi sila nga samtang mas mopaduol kita sa Manluluwas, mahimo kitang mahiusa sa uban isip mga higala ug “mga katagi-lungsod.”
-
Pangita og mga hulagway sa mga bata gikan sa lain-laing mga parte sa kalibutan, ug tagu-i kini libut sa kwarto. Pagbutang og hulagway sa Manluluwas diha sa atubangan sa kwarto. Dapita ang imong klase nga magpares sama sa mga misyonaryo ug magpuli-puli sa pagpangita og hulagway sa usa ka “langyaw” aron mabutang duol sa hulagway sa Manluluwas. Tabangi sila nga makasabut nga kon ang mga tawo mabunyagan, mahimo sila nga parte sa atong pamilya sa Simbahan, o sa “panimalay sa Dios.” Unsaon nato sa pagtabang ang usa ka bag-o nga tawo aron mobati nga gihangup?
Gusto sa Langitnong Amahan nga motuman ko sa akong mga ginikanan.
Samtang imong basahon ang Mga Taga-Efeso 6:1–3, paghunahuna og mga paagi nga makatabang ka sa mga bata nga makasabut nganong importante ang pagtuman sa ilang mga ginikanan.
Posible nga mga Kalihokan
-
Basaha ang Mga Taga-Efeso 6:1 ngadto sa klase, o tabangi ang usa sa mga bata sa pagbasa niini. Hangyoa sila sa pag-role play sa mga panahon sa dihang gituman nila ang ilang mga ginikanan. Unsa unta ang mahitabo kon wala pa sila motuman?
-
Kantaha og dungan ang usa ka kanta mahitungod sa pagkamasulundon, sama sa “Dali Ko nga Motuman” (Songbook sa mga Bata, 71). Hunong human sa unang linya, ug hangyoa ang usa ka bata sa paghingalan og usa ka butang nga gihangyo sa usa ka ginikanan nga iyang buhaton; dayon tapusa ang kanta. Balika og pipila ka higayon aron ang ubang mga bata makasulay.
-
Pagpaambit og usa ka kasinatian diin mituman ka sa imong mga ginikanan ug napanalanginan. O ipaambit ang istorya mahitungod ni Chloe gikan sa pakigpulong ni Sister Carole M. Stephens “Kon Nahigugma Kamo Kanako, Inyong Pagatumanon ang Akong mga Sugo” (Liahona,Nob. 2015, 118–20).
Ang hinagiban sa Dios makapanalipod kanako.
Unsaon nimo pagtabang ang mga bata nga makasabut nga ang pagbuhat og matarung nga mga butang susama sa pagsul-ob og hinagiban?
Posible nga mga Kalihokan
-
Pagpakita og hulagway sa usa ka tawo nga nagsul-ob og hinagiban, sama sa usa nga anaa sa pahina sa kalihokan karong semanaha diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Samtang imong i-summarize ang Mga Taga-Efeso 6:10–18, pakit-a ang mga bata kon sa unsang paagi ang managlahi nga mga piraso sa hinagiban mopanalipod sa lain-laing parte sa lawas. (Tan-awa sa “Ang Tibuok Taming sa Dios,” Liahona, Hunyo 2016, 70–71.)
-
Pagdala og pipila ka mga butang ngadto sa klase nga nagrepresentar sa mga piraso sa hinagiban nga gihisgutan diha sa Mga Taga-Efeso 6:14–17 (sama pananglit, kalo o apron), o paghimo og yanong mga piraso sa hinagiban gikan sa papel. Papuli-puliha ang mga bata sa pagsul-ob sa “hinagiban.” Hisguti kon unsa ang gipasabut nga mapanalipdan gikan sa dautan ug sa unsang paagi ang pagsul-ob sa matag piraso sa hinagiban makapanalipod kanila. Unsaon nato sa pagsul-ob sa hinagiban sa Dios? (sama pananglit, pinaagi sa pagtuon sa mga kasulatan, pagserbisyo sa uban, pag-ampo, pagtuman, ug uban pa).
Itudlo ang Doktrina
Mas Dagko nga mga Bata
Mga katagi-lungsod kita diha sa panimalay sa Dios.
Malig-on ang mga bata kon aduna silay maayong mga higala diha sa ebanghelyo. Unsaon nimo sila pagtabang sa pagpalambo og mas maayo nga panaghigalaay sa usag usa?
Mga “katagi-lungsod” kita uban sa mga Santos sa Dios.
Posible nga mga Kalihokan
-
Basaha og dungan ang Mga Taga-Efeso 2:19, ug hisguti kon unsay gipasabut nga mahimong usa ka langyaw o dumuloong. Pagpaambit og kasinatian diin gibati nimo nga sama sa usa ka langyaw o dumuloong ug usa ka tawo ang mitabang nimo nga mobati nga gihangup ug gidawat. Dapita ang mga bata sa pagpaambit og susama nga mga kasinatian. Unsa ang atong mabuhat aron mahimo “mga katagi-lungsod” imbis nga mga langyaw? Aduna bay mga bata sa imong klase kinsa dili kanunay motambong, tingali tungod kay mibati sila nga daw mga langyaw? Tabangi ang mga bata sa paghimo og plano nga matabangan kadto nga mga miyembro nga mobati nga gihangup ug gihigugma.
-
Aron matabangan ang mga bata nga imong gitudloan nga mas magkasuod sa usag usa, pagsulat og pipila ka mga pangutana diha sa pisara nga makaaghat nila sa pagpaambit og kasayuran mahitungod sa ilang mga kaugalingon, sama sa Kanus-a man kamo nakasulay nga natubag ang inyong pag-ampo? o Unsa ang paborito ninyong buhaton uban sa inyong pamilya? Ipares-pares ang mga bata, ug dapita sila sa pagpangutana sa usag usa sa mga pangutana. Unsa man ang ilang nakat-unan mahitungod sa usag usa?
Gusto sa Langitnong Amahan nga motuman ko ug motahud sa akong mga ginikanan.
Paghunahuna og mga paagi nga makatabang ka sa mga bata nga makasabut nganong importante ang pagtuman sa ilang mga ginikanan.
Posible nga mga Kalihokan
-
Dapita ang mga bata sa pagbasa sa Mga Taga-Efeso 6:1–3 sa tagsa-tagsa ug sa pagtino sa mga pulong nga importante kanila. Dapita sila sa pagpaambit niini nga mga pulong ug nganong gibati nila nga importante ang mga pulong.
-
Dapita ang mga bata sa pagpaambit og mga ehemplo sa mga tawo diha sa mga kasulatan kinsa mituman ug mitahud sa ilang mga ginikanan, sama sa Manluluwas (tan-awa sa Lucas 2:42–52), si Ruth (tan-awa sa Ruth 1), o si Nephi (tan-awa sa 1 Nephi 3:1–8). Nganong importante man nga tumanon ug tahuron ang atong mga ginikanan?
-
Hatagi ang matag bata og usa ka piraso sa papel nga adunay pulong nga tahud sa ibabaw. Hisguti kon unsay gipasabut sa pulong. Dapita ang mga bata sa pagsulat o pagdrowing diha sa ilang papel sa usa ka butang nga ilang mahimo aron mapakita nga nagtahud sila sa ilang mga ginikanan.
Ang hinagiban sa Dios makapanalipod kanako gikan sa dautan.
Samtang imong basahon ang Mga Taga-Efeso 6:10–18, paghunahuna og pipila ka espiritwal nga mga peligro nga giatubang sa mga bata ug sa unsang paagi ka makatabang sa paglig-on sa mga bata batok niini.
Posible nga mga Kalihokan
-
Samtang basahon sa usa ka bata ang Mga Taga-Efeso 6:10–18, hangyoa ang laing bata sa paglista o pagdrowing diha sa pisara sa mga piraso sa hinagiban nga gihisgutan. Nganong importante man ang hinagiban diha sa pakig-away? Sa unsang paagi nga makasul-ob kita og espiritwal nga hinagiban kada adlaw?
-
I-assign ang matag bata sa pagdrowing ug paghingalan og usa ka piraso sa hinagiban nga gihulagway diha sa Mga Taga-Efeso 6:14–17. Sa unsang paagi kini nga mga piraso sa hinagiban makapanalipod kanato gikan sa dautan? Unsa ang gisaad sa Ginoo niadtong mosul-ob sa hinagiban sa Dios? (tan-awa sa Mga Taga-Efeso 6:13). Unsay gipasabut sa “makasukol kamo inig-abut sa adlaw sa kalisdanan”?
Awhaga ang Pagkat-on diha sa Panimalay
Dapita ang mga bata nga magbantay karong semanaha alang sa usa ka tawo nga tingali mobati nga daw usa ka langyaw. Hagita sila sa paghimo og bisan unsa nga makatabang nianang tawhana.
Pagpalambo sa Atong Pagtudlo
Tabangi ang gagmay nga mga bata nga magkat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, tutoki ang usa ka bersikulo sa kasulatan o bisan usa lang ka importanting hugpong sa mga pulong. Mahimo nimong dapiton ang mga bata sa pagbarug kon makadungog sila og piho nga pulong o hugpong sa mga pulong. (Tan-awa sa Pagtudlo sumala sa Pamaagi sa Manluluwas, 25–26.)