“Septyembre 30–Oktubre 13. Mga Taga-Efeso: ‘Alang sa Pagkasangkap sa mga Balaan’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Septyembre 30–Oktubre 13. Mga Taga-Efeso,” Dali, Sunod Kanako—Alang sa mga Indibidwal ug mga Pamilya: 2019
Septyembre 30–Oktubre 13
Mga Taga-Efeso
“Alang sa Pagkasangkap sa mga Balaan”
Nakita ba nimo ang bisan unsa nga mga koneksyon tali sa mga mensahe sa kinatibuk-ang komperensya ug sa Sulat [Epistola] ni Pablo ngadto sa Mga Taga-Efeso?
Irekord ang Imong mga Impresyon
Sa dihang ang ebanghelyo nagsugod sa pagkatap sa Efeso, nakaingon kini og “dili diyutayng kaguliyang” (Mga Buhat 19:23) sa mga taga-Efeso. Ang lokal nga craftsmen [artesano] nga naghimo og mga building o butang sa usa ka diosa sa pagano nakakita nga ang Kristiyanismo nahimong hulga sa ilang panginabuhi ug sa wala madugay “sila nasilag ug naninggit, … ug ang siyudad napuno sa kagubot” (tan-awa sa Mga Buhat 19:27–29). Hunahunaa nga usa ikaw ka bag-ong kinabig sa maong sitwasyon. Daghang mga taga-Efeso ang midawat ug misunod sa ebanghelyo bisan niining “kagubot” (Mga Buhat 19:40), ug gihatagan sila og kasiguroan ni Pablo nga si “Kristo … mao ang atong kadaitan” (Mga Taga-Efeso 2:13–14). Kini nga mga pulong, uban sa iyang pagdapit sa “isalikway ninyo ang tanang kayugot ug kapungot ug kasuko ug mga singkahay ug pagtampalas” (Mga Taga-Efeso 4:31) ingon og angay ug makahupay sa atong panahon sama kaniadto. Alang sa mga taga-Efeso, ingon alang kanimo, ang kalig-on sa pag-atubang sa kalisdanan nagagikan “sa Ginoo ug sa kusog sa Iyang gahum” (Mga Taga-Efeso 6:10–13).
Mga Ideya alang sa Personal nga Pagtuon sa Kasulatan
Ang Dios ba “nagpili” o “mipili nang daan” sa Iyang pipila ka anak aron luwason?
Si Pablo namulong sa mga Santos nga “gipili nang daan” sa Dios ug “napili … sa wala pa matukod ang kalibutan” nga mahimo Niyang katawhan. Sama sa gisulti ni Presidente Henry B. Eyring, ang kamatuoran nga daghan kaayo nga mga tawo ang nabuhi ug namatay nga walay kahigayunan sa pagdawat sa ebanghelyo nga maoy nakaingon nga uban “tingali moingon nga gitino nang daan sa Dios kinsa sa Iyang mga anak ang Iyang luwason ug ipaabut kanila ang ebanghelyo, samtang kadtong wala makadungog sa ebanghelyo siyempre dili ‘pinili.’ Apan … ang plano sa Dios mas labaw pa kamahigugmaon ug kamakiangayon kay sa niana. Gusto gayud sa atong Langitnong Amahan nga pundukon ug panalanginan ang tanan sa Iyang pamilya” (“Pagpundok sa Pamilya sa Dios,” Liahona, Mayo 2017, 20). Ang tanang mga anak sa Dios makadawat sa ebanghelyo ug sa mga ordinansa niini tungod sa buhat nga gipahigayon alang sa mga patay sa balaang mga templo.
Bisan og walay usa nga gipili nang daan nga maluwas o dili maluwas, ang moderno nga pagpadayag nagtudlo nga ang pipila napili o “gi-orden nang daan sa premortal nga kalibutan sa pagtuman og piho nga mga responsibilidad dinhi sa yuta. Kini naglakip sa responsibilidad nga ang tanang mga Santos sa Ulahing mga Adlaw kinahanglang mopaambit sa ebanghelyo ug pagtabang sa tanang mga anak sa Dios sa duha ka bahin sa tabil nga moduol ngadto ni Kristo.
Ang Dios “mohiusa diha kang Kristo sa tanang mga butang.”
Nakahunahuna ba ikaw unsa “ang pagatumanon sa tukma nga panahon” o unsay gipasabut sa “mohiusa diha kang Kristo sa tanang mga butang”? Samtang ikaw mamalandong niini nga mga pulong, basaha ang mosunod nga mga kasulatan: Mga Taga-Efeso 4:13; 2 Nephi 30:7–8; Doktrina ug mga Pakigsaad 110:11–16; 112:30–32; 128:18–21. Mahimong mobati ka nga nadasig sa pagsulat sa imong kaugalingong mga pagpasabut niini nga hugpong sa mga pulong.
Mga Taga-Efeso 2:19–22; 4:11–16
Ang Simbahan gitukod pinaagi sa mga apostoles ug mga propeta, ug si Jesukristo mao ang bato sa pamag-ang.
Ang pagbasa sa mga pagtulun-an ni Pablo mahitungod sa mga apostoles ug mga propeta makatabang nimo nga makaandam sa pagpaminaw sa mga mensahe sa moderno nga mga apostoles ug mga propeta panahon sa kinatibuk-ang komperensya. Sumala sa Mga Taga-Efeso 2:19–22; 4:11–16, ngano nga kinahanglan kita og mga propeta ug mga apostoles? Sa unsa nga paagi nga ang ilang mga pagtulun-an nakatabang kanimo nga dili “igatuyatuya ug igaliyokliyok sa tanang hangin sa tuloohan”?
Tan-awa usab sa Mga Buhat 4:10–12.
Ang Ginoo motawag sa mga propeta ug mga apostoles sa paggiya sa Iyang Simbahan.
Ako makapalig-on sa relasyon sa akong pamilya.
Samtang magbasa ka sa Mga Taga-Efeso 5:21–6:4, unsa nga mga hunahuna ang moabut nimo mahitungod kon unsaon sa pagpalig-on sa relasyon sa imong pamilya?
Importante nga mahibaloan nga ang mga pulong ni Pablo sa Mga Taga-Efeso 5:22 gisulat sa konteksto sa sosyal nga mga kustombre sa iyang panahon. Ang mga propeta ug mga apostoles karon nagtudlo nga ang mga tawo dili superyor ngadto sa mga babaye ug nga ang mga kapikas kinahanglang “managkauban” (tan-awa sa “Ang Pamilya: Usa ka Pamahayag ngadto sa Kalibutan,” Liahona, Mayo 2017, 145). Bisan pa, makakita gihapon ka og importante nga tambag sa Mga Taga-Efeso 5:23–33, ilabi na kon ikaw minyo o nag-andam alang sa kaminyoon. Sama pananglit, sa unsa nga paagi nga si Kristo mopakita sa Iyang gugma alang sa mga Santos? Unsa ang gipasabut niini mahitungod kon unsaon sa pagtagad sa mga bana ang ilang mga asawa? Unsa nga mga mensahe ang imong nakita alang sa imong kaugalingon niini nga tudling?
Ang pagbutang “sa tibuok hinagiban sa Dios” makatabang sa pagpanalipod kanako gikan sa dautan.
Samtang magbasa ka sa Mga Taga-Efeso 6:10–18, ikonsiderar ngano nga si Pablo mihingalan sa matag piraso sa hinagiban sa paagi nga iyang gibuhat. Gikan sa unsa kita panalipdan sa “tibuok hinagiban sa Dios”? Unsay imong mahimo nga mas mabutang sa hingpit ang matag piraso sa hinagiban matag adlaw?
Tan-awa usab sa 2 Nephi 1:23; Doktrina ug mga Pakigsaad 27:15–18.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Pinaagi sa Pagpahiuli sa ulahing adlaw, ang Dios mihiusa sa tanang mga butang, lakip sa tanang mga baruganan ug mga ordinansa sa ebanghelyo. Sa pagpakita niini nga ideya, mahimo kang motago og mga butang o sinulat nga mga pulong sa palibut sa imong balay nga nagrepresentar sa mga butang nga gipahiuli sa atong panahon (sama sa mga yawe sa priesthood, mga ordinansa sa templo, mga kasulatan ug espirituhanong mga gasa). Ang mga sakop sa pamilya makapangita ug “mopundok” niini. Ngano nga kita mapasalamaton nga nagpuyo sa “dispensasyon sa kahingpitan sa mga panahon”?
Dapita ang mga sakop sa pamilya nga mopaambit og mga kasinatian diin sila mibati sa gugma ug kalooy sa Dios ug ni Jesukristo nga gihulagway niini nga mga bersikulo.
Ang imong pamilya tingali malingaw nga maghimo og mga bongbong gamit ang mga unlan o ubang mga butang nga anaa sa panimalay ug dayon tumbahon kini. Unsa nga mga matang sa bongbong ang nagbulag sa mga tawo karon? Giunsa ni Jesukristo “pagguba ang … nag-ulang nga bongbong tali kanato” ug sa Dios?
Ang imong pamilya mahimong maghimo sa ilang kaugalingong “hinagiban sa Dios” gamit ang mga butang sa balay. Ang video “The Armour of God” (LDS.org) makatabang sa mga sakop sa pamilya nga maghanduraw niini nga hinagiban, ug sila makakita og yanong mga pagpasabut sa “The Whole Armor of God” (Friend, Hunyo 2016, 24–25). Sa unsa nga paagi nga ang matag piraso sa hinagiban espirituhanong makapanalipod kanato? Unsay atong mahimo sa pagtabang sa usag usa sa “pagsul-ob sa tibuok hinagiban sa Dios” (Mga Taga-Efeso 6:11) kada adlaw?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Tuguti ang Espiritu nga mogiya sa imong pagtuon. Pagsensitibo ngadto sa Espiritu samtang Siya mogiya nimo ngadto sa mga butang nga imong kinahanglan nga makat-unan matag adlaw, bisan kon kini mogiya nimo sa pagtuon og hilisgutan nga wala nimo planoha sa una.
Ang pagsul-ob sa hinagiban sa Dios makapanalipod nato sa espirituhanong paagi.