“Oktubre 14–20. Mga Taga-Filipos; Mga Taga-Colosas: ‘Mahimo Ko ang Tanang Butang Pinaagi Kaniya nga Nagapalig-on Kanako’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Oktubre 14–20. Mga Taga-Filipos; Mga Taga-Colosas,” Dali, Sunod Kanako—Alang mga Indibidwal ug sa mga Pamilya: 2019
Oktubre 14–20
Mga Taga-Filipos; Mga Taga-Colosas
“Mahimo Ko ang Tanang Butang Pinaagi Kaniya nga Nagapalig-on Kanako”
Kanus-a ang katapusang higayon nga ikaw nagbasa sa espirituhanong mga impresyon nga imong narekord panahon sa imong pagtuon sa Bag-ong Tugon? Tingali makatabang ang pagribyu sa mga pag-aghat nga imong nadawat.
Irekord ang Imong mga Impresyon
Gisulat ni Pablo ang iyang mga epistola [sulat] ngadto sa Mga Taga-Filipos ug sa Mga Taga-Colosas samtang didto siya sa prisohan. Apan kini nga mga sulat walay tono nga imong gipaabut gikan sa usa ka tawo nga anaa sa prisohan. Naghisgot si Pablo og daghan mahitungod sa kalipay, pagmaya, ug pasalamat kay sa iyang gibuhat mahitungod sa mga pag-antus ug mga pagsulay: “Si Kristo gisangyaw,” miingon siya, “ug tungod niini ako nagakalipay” (Mga Taga-Filipos 1:18). “Kay bisan tuod ako wala diha kaninyo sa lawas, ako anaa uban kaninyo sa espiritu, nga nagakalipay sa pagsaksi … sa pagkamahusay ug sa kalig-on sa inyong pagtuo kang Kristo” (Mga Taga-Colosas 2:5). Sa pagkatinuod, “ang kalinaw sa Dios” nga nasinati ni Pablo sa iyang malisud nga mga sirkumstansya “lapaw sa tanang pagpanabut” (Mga Taga-Filipos 4:7), apan kini tinuod gayud. Sa atong kaugalingong mga pagsulay, mabati nato kining maong kalinaw ug “pagkalipay kamo kanunay diha sa Ginoo” (Mga Taga-Filipos 4:4). Kita, sama sa gihimo ni Pablo, hingpit nga mosalig kang Jesukristo, “kang kinsa kita nakabaton sa pagkatinubos” (Mga Taga-Colosas 1:14). Makasulti kita, sama ni Pablo, “Mahimo ko ang tanang butang pinaagi kaniya nga nagapalig-on kanako” (Mga Taga-Filipos 4:13; tan-awa usab sa Mga Taga-Colosas 1:11).
Mga Ideya alang sa Personal nga Pagtuon sa Kasulatan
Kita ba “nanlimbasug sa [atong] kaugalingong kaluwasan”?
Ang mga pulong “panlimbasugi ninyo ang inyong kaugalingong kaluwasan” gigamit sa pipila ka mga tawo sa pagsuporta sa ideya nga kita maluwas lamang pinaagi sa atong kaugalingong mga paningkamot. Apan kana usa ka limitado nga panglantaw, sama nga limitado ang pagsabut sa pagtulun-an ni Pablo—“tungod sa grasya kamo nangaluwas pinaagi sa pagtuo” (Mga Taga-Efeso 2:8)—nga magpasabut nga walay mga buhat ang gikinahanglan alang sa kaluwasan. Ang mga kasulatan, lakip sa mga sinulat ni Pablo, klarong nagtudlo sa panginahanglan sa grasya ni Jesukristo ug sa personal nga paningkamot aron makadawat og kaluwasan. Sama sa giingon ni Nephi, “Nga pinaagi sa grasya kami maluwas, human sa tanan nga atong mabuhat” (2 Nephi 25:23). Bisan sa atong mga paningkamot sa paglihok sa atong kaugalingong kaluwasan, “ang Dios mao ang nagapalihok sa imong pagtinguha” (Mga Taga-Filipos 2:13; tan-awa usab sa Mga Taga-Filipos 1:6; Giya ngadto sa mga Kasulatan, “Grasya”).
Ang ebanghelyo ni Jesukristo bililhon kaayo sa matag sakripisyo.
Daghan ang gibiyaan ni Pablo sa dihang nakabig siya sa ebanghelyo ni Jesukristo, lakip sa iyang gihuptan nga impluwensyal nga katungdanan sa kapunongan sa Judeo isip usa ka Pariseo. Sa Mga Taga-Filipos 3:5–14, pangitaa unsay naangkon ni Pablo tungod kay siya andam sa paghimo og mga sakripisyo alang sa ebanghelyo. Unsay iyang gibati mahitungod sa iyang mga sakripisyo?
Dayon ikonsiderar ang imong kaugalingong pagkadisipulo. Unsa ang imong gisakripisyo alang sa ebanghelyo ni Jesukristo? Unsay imong nadawat? Aduna bay bisan unsa nga dugang mga sakripisyo nga imong gibati nga kinahanglan nga imong himoon aron mahimong mas mahalaron nga disipulo sa Manluluwas?
Tan-awa usab sa 3 Nephi 9:19–20; Doktrina ug mga Pakigsaad 58:2–5; Robert C. Gay, “Unsa May Ikahatag sa Tawo nga Arang Ikabawi Niya sa Iyang Kinabuhi?” Liahona, Nob. 2012, 34–36.
Makakita ko og kalipay ni Kristo, bisan pa sa akong mga sirkumstansya.
Ang kinabuhi ni Pablo mao ang usa ka gamhanan nga ehemplo sa kamatuoran nga gipadayag ni Presidente Russell M. Nelson: “Kon ang sentro sa atong kinabuhi anaa … ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabut gikan ug tungod Kaniya” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82).
Samtang magbasa ka sa Mga Taga-Filipos—ilabi na sa kapitulo 4—pangitaa ang mga pamahayag nga makatabang nimo nga makakita og kalipay sa bisan unsa nga sirkumstansya sa imong kinabuhi. Kanus-a ka nakasinati “sa kalinaw sa Dios” atol sa mahagiton nga panahon? (bersikulo 7). Kanus-a ka nakakita og kalig-on “diha kang Kristo” sa pagbuhat og lisud nga mga butang? (bersikulo 13). Ngano sa inyong hunahuna nga importante “sa pagpahaigo” sa bisan unsa na kahimtang? (bersikulo 11). Sa unsa nga paagi nga ang paghimo sa mga hiyas sa bersikulo 8 makatabang nimo nga makakita og kalipay sa imong mga kahimtang?
Tan-awa sa Alma 33:23; Dieter F. Uchtdorf, “Mapasalamaton sa Bisan Unsang Kahimtang,” Liahona, Mayo 2014, 70–77.
Ang akong pagtuo gibase diha kang Jesukristo.
Aniay pamaagi sa pagtuon nga imong masulayan uban sa hapit bisan unsa nga kapitulo sa kasulatan, gani kini maayong gamiton sa Mga Taga-Colosas 1:12–23. Siksika kini nga mga bersikulo alang sa bisan unsa nga imong makat-unan mahitungod ni Jesukristo, ug paghimo og lista sa unsay imong makit-an. Ngano nga imong gibati nga importante nga makahibalo niining mga butanga mahitungod sa Manluluwas?
Ang mga disipulo ni Jesukristo mahimong “bag-o” kon magsunod sila sa Iyang ebanghelyo.
Unsaon ninyo pagkahibalo kon ang ebanghelyo ni Jesukristo nagtabang ninyo nga mahimong usa ka “bag-ong lalaki [o babaye]”? Usa ka paagi nga mahibaloan mao ang pagsiksik sa Mga Taga-Colosas 3:1–17 ug maghimo og lista sa mga kinaiya, mga hiyas, ug mga aksyon sa “daan nga kinaiya” ug laing lista sa mga kinaiya, mga hiyas, ug mga aksyon sa “bag-ong tawo.”
Ang imong pagtuon ba niining mga bersikulo makadasig og bisan unsa nga hunahuna mahitungod kon sa unsa nga paagi ang ebanghelyo nakausab kanimo? I-rekord ang imong mga hunahuna aron nga ikaw makaribyu niini sa umaabut ug mamalandong unsaon nimo sa pag-uswag.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Tingali ang imong pamilya makamatikod sa mga pulong hingpit nga kalipay o pagmaya nga gibalik-balik pirme sa Mga Taga-Filipos. Matag higayon nga makasugat ka og usa niini nga mga pulong, hunong ug hisguti unsa ang gitudlo ni Pablo mahitungod unsaon sa pagpangita og hingpit nga kalipay.
Sa unsa nga paagi nga kita “nagasidlak ingon nga mga kahayag dinhi sa kalibutan”?
Tingali ang imong pamilya makaila sa mga butang nga “hunahunaon” nga mohaum sa mga deskripsyon niini nga bersikulo (tan-awa usab sa Mga Artikulo sa Hugot nga Pagtuo 1:13). Sa unsa nga paagi nga ang imong pamilya mapanalanginan pinaagi sa pagsunod sa tambag ni Pablo?
Unsay atong mahimo aron magatubo “diha sa kahibalo sa Dios”? Unsa nga “mga bahandi sa kaalam ug kahibalo” ang atong makita diha sa ebanghelyo?
Tingali ang imong pamilya makabasa niini nga mga bersikulo samtang naglingkod libut sa usa ka punoan sa kahoy o samtang nagtan-aw sa hulagway sa usa ka kahoy (sama sa usa nga anaa niini nga outline). Unsay gipasabut nga mahimong “dili matarug” ug “pinagamut” diha kang Kristo? Sa unsa nga paagi kita makatabang sa usag usa?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Palamboa ang imong pagpamatuod. “Imong gitudlo kon unsa ka,” si Elder Neal A. Maxwell mitudlo. “Ang imong mga kinaiya mas mahinumduman … kay sa usa ka piho nga kamatuoran sa usa ka partikular nga leksyon. ” (sa Pagtudlo sumala sa Pamaagi sa Manluluwas, 13).
Mitudlo si Pablo nga ang atong pagtuo kinahanglang “nakagamut” diha kang Jesukristo (Mga Taga-Colosas 2:7).